វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2621 នាក់
ម្សិលមិញ 3717 នាក់
សរុប 14150954 នាក់
អ៊ុយក្រែន៖សង្គ្រាមអ៊ុយក្រែនបានឈានចូល៧៦៨ថ្ងៃហើយ គិតត្រឹមថ្ងៃអង្គារ៍ទី២មេសាឆ្នាំ២០២៤។ សេចក្តីរាយការណ៍បាន បង្ហាញថា រុស្ស៊ីបានធ្វើការវាយប្រហារតាមផ្លូវអាកាសយ៉ាងខ្លាំងក្លា, បង្កការខូចខាតដល់ស្ថា នីយ៍ឋាមពលអគ្គីសនីរបស់អ៊ុយក្រែន ដោយបានធ្វើឱ្យពលរដ្ឋច្រើនម៉ឺននាក់រងនឹង ការដាច់ ចរន្តអគ្គីសនីក្នុងរដូវត្រជាក់មិនទាន់ ឆ្លងផុតនៅឡើយ។ រុស្ស៊ី បានបាញ់មីស៊ីលនិងដ្រូនប្រ មាណជាង១០០គ្រាប់ដាក់លើហេដ្ឋារចនាសម្ព័ន្ធថាមពលអគ្គីសនីរបស់អ៊ុយក្រែន ក្នុងនោះ ក្រុមហ៊ុនថាមពលដ៏ធំជាងគេបង្អស់មួយឈ្មោះ DTEK បានរងការខូចខាតយ៉ាងដំណំក្រោយ រងការវាយប្រហារជាច្រើនដង។
ស្ថានីយ៍៥ក្នុងចំណោមស្ថានីយ៍៦ដែលផលិតអគ្គីសនី បានរង ការខូចខាតធ្ងន់ធ្ងរដែលធ្វើឱ្យបរិមាណភ្លើងទំហំ ជាង៨០ភាគរយមិនអាចដំណើរការបានឡើយ។ មន្ត្រីអ៊ុយក្រែនបានវាយតម្លៃថាដើម្បីការជួសជុលស្ថានីយ៍នេះ ឱ្យដំណើរការវិញបាន គេត្រូវ ការរយៈពេលដល់១៨ខែឯនោះទើបអាចស្តារថាមពលនេះវិញបាន។ប្រធានាធិបតីអ៊ុយក្រែនជាមួយការចោទថា មេដឹកនាំរុស្ស៊ីលោកវ្លាឌីមៀរពូទីន បានប្រើនូវវិធីខ្មៅ កខ្វក់ដើម្បីធ្វើឱ្យពលរដ្ឋអ៊ុយក្រែនស្លាប់ បានអំពាវនាវដល់ប្រទេសសម្ព័ន្ធ មិត្ត លោកខាងលិចសូមប្រញាប់ជម្រុញការផ្តល់ជំនួយ នៃប្រព័ន្ធការពារអាកាសមកឱ្យអ៊ុយ ក្រែន។កាលពីថ្មីៗនេះលោកប្រធានាធិបតីអ៊ុយក្រែនបានប្រកាសទុកជាមុនថាអ៊ុយក្រែននឹងថកថយប្រសិនបើគ្មានជំនួយពីសហរដ្ឋអាមេរិក។
លោកវ៉ូឡូឌីមៀរហ្សេឡិនស្គីថ្លែងថា «ក្រុមភេរវកររុស្ស៊ីពេលនេះកំពុងវាយប្រហារដាក់លើ ថាមពលអគ្គីសនីដើម្បីបង្កឱ្យ ពលរដ្ឋអ៊ុយក្រែនស្លាប់។ យើងបានផ្តល់នូវសញ្ញាចាំបាច់ទាំង អស់ចំពោះដៃគូជំនួយរបស់យើងនិងផ្តល់សំណើសំខាន់ចាំបាច់ ទៅប្រទេសនីមួយៗដែលមាន ប្រព័ន្ធការពារដែនអាកាសនិងមីស៊ីល ទាំងសហរដ្ឋអាមេរិកនិងអឺរ៉ុប និងគ្រប់ដៃគូទាំងអស់ ដែលគេទាំងអស់បានដឹងហើយនូវអ្វីដែលយើងត្រូវការ…និងប្រទេសទាំងឡាយដឹងហើយនូវ សេចក្តីត្រូវការរបស់យើង នូវអាវុធដ៏សំខាន់នេះដើម្បីជួយការពារអ៊ុយក្រែន»។នាពេលនេះដើម្បីស្វែងរកជំនួយពីការផ្តល់ថាមពល អគ្គីសនី អ៊ុយក្រែនបានងាកការស្វែងរកការជួយពីប្រទេសប៉ូឡូញសិន ដោយសារតែការជួស ជុលប្រព័ន្ធថាមពលអគ្គីសនីអ៊ុយក្រែននោះ នឹងត្រូវការពេលវេលាជាច្រើនខែទៀត ដើម្បីការស្តារភ្លើងវិលត្រឡប់មកវិញនោះ។ សេចក្តីរាយការណ៍បង្ហាញថាក្រៅពីខេត្តទាំងបីដែលរងការ វាយប្រហារនោះ, រដ្ឋធានីគៀវក៏រងនឹងការវាយប្រហារតាមផ្លូវអាកាសពីរុស្ស៊ីផងដែរ។ លោក ហ្សេឡិនស្គី បានថ្លែងថាលោកនឹងធ្វើការសងសឹកតបទៅវិញ។
លោកហ្សេឡិនស្គីបានថ្លែងថា «នេះគឺជាសង្គ្រាមដែលគ្មានអ្នកណាខ្លាចថា នឹងក្លាយជាសត្វ សាហាវខាំអ្នកណាដទៃឡើយ»។ លោកហ្សេឡិនស្គី បានអំពាវនាវ«សូមឱ្យពិភពលោកកុំភ្លេច នូវតម្លៃសមរភូមិនេះនិងកុំភ្លេចនូវអំពើអាក្រក់ទាំងឡាយ ដែលយើងបានបញ្ឈប់វានាពេលនេះ នៅលើទឹកដីអ៊ុយក្រែន ក្នុងពេលដែលអ៊ុយក្រែនបានរារាំង និងបណ្តេញកងកម្លាំងកាន់កាប់ របស់រុស្ស៊ី»។សង្គ្រាមអ៊ុយក្រែនបានឈានចូលដល់ឆ្នាំទី៣ហើយ គ្រាដែលចំណុចទីបញ្ចប់របស់វានៅមិន ទាន់រកឃើញនៅឡើយ។ ក្នុងឆ្នាំ២០២៤នេះ ខណៈដែលអ៊ុយក្រែនកំពុងប្រឈម ភាពរអាក់រអួលនៃជំនួយយោធា, មេ ដឹកនាំរុស្ស៊ីលោកវ្លាឌីមៀរពូទីនដែលឈរឈ្មោះម្នាក់ឯកគ្មានកម្លាំងប្រជែង ត្រូវបានជាប់ឆ្នោតបន្តការដឹកនាំអាណ្ណត្តិថ្មីក្នុងរុស្ស៊ីជាបន្ថែម ទៀតដែលមានន័យថាពលរដ្ឋរុស្ស៊ី បានបន្តគាំទ្រឱ្យលោកពូទីនបន្តធ្វើសង្គ្រាមដាក់ទៅលើអ៊ុយ ក្រែនជាបន្ថែមទៀតរហូតដល់រុស្ស៊ីទទួលបានជ័យជម្នះ?!។
នៅក្នុងក្របខ័ណ្ឌផ្តល់ជំនួយយោធាដើម្បីជួយឲ្យអ៊ុយក្រែនប្រឈមតទល់នឹងសង្គ្រាមឈ្លានពានរបស់រុស្ស៊ី រដ្ឋាភិបាលបារាំងប្រកាសបញ្ជូនរថពាសដែករាប់រយគ្រឿងទៅឲ្យអ៊ុយក្រែន។ បើតាមការអះអាងរបស់រដ្ឋមន្ត្រីការពារជាតិបារាំង លោកSébatien Lecornu នៅចុងឆ្នាំនេះ និងដើមឆ្នាំ ២០២៥ បារាំងនឹងបញ្ជូនរថពាសដែកចាស់ៗ ប្រភេទ VAB ទៅឲ្យអ៊ុយក្រែន។ កងទ័ពបារាំងលែងប្រើរថពាសដែកប្រភេទVABទៀតហើយ ដោយជំនួសមកវិញនូវរថពាសដែក Griffon ដែលបារាំងទើបផលិតថ្មី។សម្រាប់ប្រមុខការពារជាតិបារាំង រថពាសដែកបារាំងចាស់មែន (ព្រោះវាមានអាយុជាង៤០ឆ្នាំ) ប៉ុន្តែវានៅតែដំណើរការល្អ។ ដើម្បីតទល់នឹងកងទ័ពរុស្ស៊ី នៅក្នុងសមរភូមិដ៏ធំធេង បរិមាណរថពាសដែកបារាំងជាច្រើនរយគ្រឿងនឹងផ្តល់ប្រយោជន៍ ជួយដឹកកងទ័ពអ៊ុយក្រែននៅក្នុងផ្លាស់ទីក្នុងសមរភូមិ។
ក្រៅពីសន្យាផ្តល់រថពាសដែក រដ្ឋមន្ត្រីការពារជាតិបារាំងបន្ថែមថា បារាំងនឹងផ្តល់ប្រព័ន្ធខែមីស៊ីលបន្ថែមទៀត ដើម្បីជួយអ៊ុយក្រែនឲ្យការពារខ្លួនពីការវាយប្រហារមីស៊ីលរបស់រុស្ស៊ី។ ប្រព័ន្ធខែលមីស៊ីលបារាំងAster30 មានសមត្ថភាពដូចខែលមីស៊ីលអាមេរិក ឈ្មោះPatriot។ដោយប្រកាសផ្តល់មីស៊ីលទៅឲ្យអ៊ុយក្រែនទុកការពារដែនអាកាស រដ្ឋមន្ត្រីការពារជាតិបារាំងបញ្ជាក់ផងដែរថា លោកបានបញ្ជាឲ្យអគ្គនាយកដ្ឋានសព្វាវុធបារាំងធ្វើសំណើដើម្បីបង្កើនការផលិតមីស៊ីល Aster បន្ថែមទៀត។ នៅចំពោះមុខសង្គ្រាមរុស្ស៊ីឈ្លានពានអ៊ុយក្រែន បារាំងក៏ដូចជាប្រទេសអឺរ៉ុបធំៗមួយចំនួន ដូចជាអាល្លឺម៉ង់ អ៊ីតាលីជាដើមបានប្រកាសអនុវត្តសេដ្ឋកិច្ចសង្គ្រាម ដូចរុស្ស៊ី ដោយបែរងាកទៅជំរុញឧស្សាហកម្មយោធា។
បើតាមការអះអាងរបស់រដ្ឋមន្ត្រីការពារជាតិបារាំង រដ្ឋាភិបាលបានចេញក្រឹត្យមួយកាលពីថ្ងៃសុក្រ ដើម្បីផ្តល់សិទ្ធិអំណាចដល់ប៉ូលិសរបស់ក្រសួងការពារជាតិ នៅក្នុងការចាប់តម្រូវឲ្យក្រុមហ៊ុនបារាំងផ្តោតអាទិភាពលើកិច្ចសន្យា និងការស្តុកទាំងឡាយណាដែលទាក់ទងនឹងយោធា។ រដ្ឋមន្ត្រីបារាំងនៅបាននិយាយពីលទ្ធភាពចាប់រឹបអូសយករោងចក្រឧស្សាហកម្មមួយចំនួនសម្រាប់ដំណើការផលិតសព្វាវុធ។ ការជំរុញការផលិតសព្វាវុធ មិនត្រឹមជួយឲ្យបារាំងអាចជួយអ៊ុយក្រែនធ្វើសង្គ្រាមតទល់នឹងរុស្ស៊ី ប៉ុន្តែ នឹងទៅបង្កើនស្តុកអាវុធរបស់បារាំង សម្រាប់ការពារខ្លួនផង និងសម្រាប់នាំចេញទៅលក់នៅបរទេសផង។ នៅត្រង់ចំណុចនេះ រដ្ឋមន្ត្រីការពារជាតិកត់សំគាល់ឃើញការធ្លាក់ថយចុះនៃកិច្ចសន្យាទិញអាវុធបារាំង នៅក្នុងចំណោមប្រទេសអឺរ៉ុបខាងកើត។
សម្រាប់លោក ដើម្បីលក់នាំចេញអាវុធ គេមិនត្រឹមពូកែខាងបច្ចេកវិទ្យា បញ្ចុះតម្លៃថោក និងភាពប៉ិនប្រសប់ផ្នែកការទូតតែប៉ុណ្ណោះទេ ប៉ុន្តែ គេត្រូវពូកែផលិតឲ្យបានលឿន ដើម្បីបញ្ជូនទៅដល់ដៃអតិថិជនឲ្យឆាប់បំផុត។ក្រៅពីបារាំងក្រសួងការពារជាតិអាល្លឺម៉ង់ បានប្រកាសឱ្យដឹងថា ប្រទេសអាល្លឺម៉ង់នឹងគាំទ្រអ៊ុយក្រែន តាមរយៈការផ្តល់គ្រាប់កាំភ្លើងធំចំនួន ១៨០,០០០គ្រាប់ ដើម្បីចូលរួមចំណែក ក្នុងផែនការមួយដែលដឹកនាំដោយសាធារណរដ្ឋឆែក ស្តីពីការទិញគ្រាប់រំសេវសម្រាប់ជួយអ៊ុយក្រែន ជាមួយតម្លៃ៥៧៦លានអឺរ៉ូ ឬស្មើនឹង៦១៨លានដុល្លារ។ នេះបើតាមការចេញផ្សាយដោយ ទីភ្នាក់ងារព័ត៌មាន Reutes នាថ្ងៃអង្គារ ទី២ ខែមេសា ឆ្នាំ២០២៤។
តម្រូវការបន្ទាន់បំផុតសម្រាប់អ៊ុយក្រែន នៅក្នុងសង្គ្រាមរយៈពេលជាង២ឆ្នាំមកនេះជាមួយរុស្ស៉ី គឺគ្រាប់កាំភ្លើងធំនិងគ្រាប់ផ្លោង ដែលកំពុងតែមានចំនួនកាន់តែតិចទៅៗ ស្របពេលដែលភាគីទាំងសងខាង ប្រើប្រាស់សព្វាវុធប្រភេទនេះ ដើម្បីការពារទីតាំងឈរជើងរៀងៗខ្លួន ដែលភាគច្រើនគឺសូវមានការប្រែប្រួលខ្លាំងប៉ុន្មានឡើយ នៅតាមបណ្តោយសមរភូមិមុខ ដែលមានប្រវែងប្រមាណ១,០០០គីឡូម៉ែត្រ។
គួរបញ្ជាក់ថា ប្រទេសកាន់តែច្រើនឡើង បាននិងកំពុងនាំគ្នាចុះឈ្មោះចូលរួមក្នុង កិច្ចផ្តួចផ្តើមរបស់សាធារណរដ្ឋឆែក ដែលមានគោលដៅទិញគ្រាប់រំសេវរាប់សែនគ្រាប់ មកពីខាងក្រៅតំបន់អឺរ៉ុប សម្រាប់យកទៅជួយអ៊ុយក្រែន។ បើតាមក្រសួងការពារជាតិអាល្លឺម៉ង់ ចំណែកចូលរួមរបស់ទីក្រុងបែរឡាំង នឹងទទួលបន្ទុកប្រហែល៤០ភាគរយ នៃផែនការទាំងមូលរបស់ឆែក៕