ចិនប្រកាសពីការធ្វើសមយុទ្ធរួមគ្នាជាមួយកងទ័ពជើងទឹករុស្ស៊ី

ប្រទេសចិន៖ចិននិងរុស្ស៊ីនឹងធ្វើសមយុទ្ធកងទ័ពជើងទឹកប្រចាំឆ្នាំរួមគ្នារបស់ពួកគេ នៅក្នុងខែកក្កដានេះនិងអនុវត្តការល្បាតនៅក្នុងតំបន់ដែលមិនបានបញ្ជាក់ នៃមហាសមុទ្រប៉ាស៊ីហ្វិកផងដែរ។ 

សេចក្តីថ្លែងការណ៍របស់ក្រសួងការពារជាតិចិននៅថ្ងៃអាទិត្យទី០៥ខែកក្កដាឆ្នាំ២០២៦បាននិយាយថា កងកម្លាំងជើងទឹកនៃប្រទេសទាំងពីរនឹងចូលរួមក្នុងសមយុទ្ធ«Joint Sea-2026» នៅក្នុងដែនទឹកនិងដែនអាកាសនៅQingdao ដែលជាកំពង់ផែយោធាដ៏សំខាន់ និងជារមណីយដ្ឋានមាត់សមុទ្រនៅភាគខាងកើតប្រទេសចិន។ សេចក្តីថ្លែងការណ៍បានបន្តថា បន្ទាប់ពីសមយុទ្ធនេះ កងកម្លាំងមួយចំនួនមកពីភាគីទាំងពីរនឹងចូលរួមនៅក្នុងការល្បាតដែនសមុទ្ររួមគ្នា នៅក្នុងតំបន់ពាក់ព័ន្ធនៃមហាសមុទ្រប៉ាស៊ីហ្វិក។ ការរៀបចំនេះ មានគោលបំណងឆ្លើយតបរួមគ្នា ចំពោះបញ្ហាប្រឈមសន្តិសុខ និងការពារសន្តិភាព និងស្ថិរភាពក្នុងតំបន់។

ទោះជាយ៉ាងណា សេចក្តីថ្លែងការណ៍នេះ គ្រាន់តែប្រកាសពីដំណឹងនៃការធ្វើសមយុទ្ធ ដោយមិនបានផ្តល់ព័ត៌មានលម្អិតអំពីទំហំនៃការចល័តទ័ពនោះទេ។ ចិននិងរុស្ស៊ីបានធ្វើសមយុទ្ធ«Joint Sea»រួមគ្នារបស់ពួកគេ តាំងពីឆ្នាំ២០១២មក ដោយសមយុទ្ធកាលពីឆ្នាំមុន បានរៀបចំធ្វើនៅក្បែរកំពង់ផែ Vladivostok ភាគខាងកើតនៃប្រទេសរុស្ស៊ី ហើយក៏បានបន្តដោយការល្បាតរួមគ្នានៅមហាសមុទ្រប៉ាស៊ីហ្វិកដែរ។

យោធាចិននិងរុស្ស៊ីបានធ្វើសមយុទ្ធរួមគ្នាជាប្រចាំ នៅក្នុងរយៈពេលប៉ុន្មានឆ្នាំចុងក្រោយនេះ ដែលភាពជាដៃគូដ៏ស្អិតល្មួតរវាងប្រទេសទាំងពីរ បានស្ថិតក្រោមការសង្ស័យពីលោកខាងលិច ខណៈសង្គ្រាមរបស់រុស្ស៊ីប្រឆាំងនឹងអ៊ុយក្រែន នៅតែបន្តចូលដល់ឆ្នាំទីប្រាំ។ សម្ព័ន្ធមិត្តលោកខាងលិចជាច្រើនរបស់អ៊ុយក្រែន រួមទាំងសហរដ្ឋអាមេរិកផងដែរ ជឿថាទីក្រុងប៉េកាំងបានផ្តល់ការគាំទ្រដល់កិច្ចខិតខំប្រឹងប្រែងធ្វើសង្គ្រាមរបស់ទីក្រុងមូស្គូ។