វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4822 នាក់
ម្សិលមិញ 5304 នាក់
សរុប 14144348 នាក់
ភ្នំពេញ៖ លោកកឹមស៊ីថនរដ្ឋមន្ត្រីស្តីទីនៃក្រសួងពាណិជ្ជកម្ម បានស្វាគមន៍ និងលើកទឹកចិត្តដល់វិនិយោគិនកូរ៉េ ឱ្យបន្តស្វែងរកឱកាសវិនិយោគនិងអាជីវកម្មបន្ថែមទៀត ជាពិសេស វិស័យផ្តល់តម្លៃបន្ថែមខ្ពស់ ដូចជា៖ វិស័យបច្ចេកវិទ្យាឌីជីថល គ្រឿងអេឡិចត្រូនិក និងគ្រឿងបង្គុំយានយន្ត និងវិស័យកសិកម្ម និងកែច្នៃម្ហូបអាហារ នៅកម្ពុជា។
ការលើកឡើងរបស់លោក កឹម ស៊ីថន តំណាងរបស់ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្មធ្វើឡើង នៅក្នុងពិធីអបអរសាទរសម្រាប់ «វេទិកាម៉េឃ្យុង (MAEKYUNG) កម្ពុជា» នៅថ្ងៃទី ២៧ខែមីនា ឆ្នាំ ២០២៤ ដោយមានការអញ្ជើញចូលរួមពី លោក In-Kyo Cheong រដ្ឋមន្ត្រីក្រសួងពាណិជ្ជកម្មនៃសាធារណរដ្ឋកូរ៉េ, លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា, លោក Jung-Wook Park ឯកអគ្គរដ្ឋទូត នៃសាធារណរដ្ឋកូរ៉េ ប្រចាំព្រះរាជាណាចក្រកម្ពុជា និងឧកញ៉ា ងួន ម៉េងតិច អគ្គនាយកសភាពាណិជ្ជកម្ពុជា តំណាងរបស់ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ព្រមទាំងមានការចូលរួមពីថ្នាក់ដឹកនាំក្រុមហ៊ុនកម្ពុជា និងកូរ៉េ ជាច្រើនរូបផងដែរ។
វេទិកានេះ រៀបចំឡើងក្នុងគោលបំណងក្នុងការស្វែងរកកាលានុវត្តភាព សម្រាប់ជំរុញភាពរីកចម្រើន និងវិបុលភាពរួមគ្នានាពេលអនាគតរវាងកម្ពុជា និងសាធារណរដ្ឋកូរ៉េ។ វេទិកានេះ គឺមានការចូលរួមពីក្រុមហ៊ុនធំៗរបស់កូរ៉េ ដូចជា៖ ក្រុមហ៊ុន ម៉េឃ្យុង មេឌា គ្រុប (Maekyung Media Group), ក្រុមហ៊ុន Samsung Electronics, ក្រុមហ៊ុន Booyoung, ក្រុមហ៊ុន LS Group និងក្រុមហ៊ុន LX International ជាដើម។
លោករដ្ឋមន្ត្រីស្តីទី បានថ្លែងអំណរគុណ ចំពោះក្រុមប្រឹក្សាអភិវឌ្ឍន៍កម្ពុជា ទីភ្នាក់ងារជំរុញពាណិជ្ជកម្ម វិនិយោគកូរ៉េ (KOTRA) និងក្រុមហ៊ុន ម៉េឃ្យុង មេឌា គ្រុប (Maekyung Media Group) សម្រាប់ការរៀបចំ និងស្វាគមន៍ វិនិយោគិនកូរ៉េដែលបានចូលរួមវេទិកាដ៏សំខាន់នេះ។ក្នុងឱកាសនេះ លោករដ្ឋមន្ត្រីស្តីទី បានលើកឡើងអំពីភាពរីកចម្រើន និងទំនាក់ទំនងពាណិជ្ជកម្មទ្វេភាគីកម្ពុជា-សាធារណរដ្ឋកូរ៉េ ជាពិសេសបន្ទាប់ពីការចូលជាធរមាននៃកិច្ចព្រមព្រៀងពាណិជ្ជកម្មសេរីកម្ពុជា-សាធារណរដ្ឋកូរ៉េ (CKFTA) នៅខែធ្នូ ឆ្នាំ២០២២។
លោករដ្ឋមន្ត្រីស្តីទី បានបង្ហាញការប្តេជ្ញាចិត្តក្នុងការធ្វើឱ្យប្រសើរឡើងនូវបរិយាកាសធុរកិច្ច និងកិច្ចសហប្រតិបត្តិការយ៉ាងជិតស្និទ្ធជាមួយភាគីពាក់ព័ន្ធ រួមមាន៖ វិស័យឯកជន និង KOTRA ក្នុងការសម្រួលដល់សកម្មភាពពាណិជ្ជកម្ម ដើម្បីសម្រួល និងជំរុញសកម្មភាពពាណិជ្ជកម្មដល់វិនិយោគិនកូរ៉េ។កូរ៉េត្រូវបានចាត់ទុកថាជាទីផ្សារធំមួយរបស់ព្រះរាជាណាចក្រកម្ពុជាផងដែរ ដោយក្នុងឆ្នាំ ២០២៣ កម្ពុជា បាននាំចេញផលិតផលទៅកាន់ទីផ្សារកូរ៉េ ក្រោមកិច្ចព្រមព្រៀង CKFTA ក្នុងទំហំ ២៦,២១ លានដុល្លារអាមេរិក ដែលមានកំណើនរហូត ២០៤៨% បើធៀបទៅនឹងឆ្នាំ២០២២ ដែលមានទំហំត្រឹម ១,២២លានដុល្លារអាមេរិក។ រីឯរយៈពេល ២ខែ (មករា-កុម្ភៈ) នៃឆ្នាំ ២០២៤នេះ ការនាំចេញរបស់កម្ពុជាទៅកាន់ទីផ្សារកូរ៉េ ក្រោមកិច្ចព្រមព្រៀង CKFTA មានទំហំ ៨,៥៣លានដុល្លារអាមេរិក ដែលមានកំណើនរហូតដល់ ២៨៦,៩% បើធៀបទៅនឹងរយៈពេល ២ខែ (មករា-កុម្ភៈ) នៃឆ្នាំ ២០២៣ ដែលមានទំហំ ២,២១លានដុល្លារអាមេរិក៕