អង្គុយផឹកស៊ីជុំគ្នាសុខៗបុរសម្នាក់រត់ទៅលោតសម្លាប់ខ្លួនពីជាន់ទី៥បាក់ជើងម្ខាង

ភ្នំពេញ៖ អង្គុយផឹកស៊ីជុំគ្នាជាមួយមិត្តភក្តិសុខៗបុរសម្នាក់ ស្ទុះរត់ឡើងទៅលើផ្ទះជាន់ទី៥ រួចលោតសម្លាប់ខ្លួន តែសំណាងមិនស្លាប់នៅម៉ោង​៩យប់ ថ្ងៃទី៣០ ខែកញ្ញា​ ឆ្នាំ២០១៨ នៅចំណុចជិត​សណ្ឋាគារ​ស ស្ថិតតាមបណ្ដោយផ្លូវព្រះមុនីវង្ស ​ក្នុងសង្កាត់មនោរម្យ ខណ្ឌ៧មករា រាជធានីភ្នំពេញ​។ទោះជាយ៉ាងណាបុរសនោះបានរងរបួសបាក់ជើងខាងឆ្វេងធ្ងន់ធ្ងរ ត្រូវក្រុមគ្រួសាររាយការណ៍ប្រាប់សមត្ថកិច្ច​ ហៅរថយន្តសាមុយ ដឹកយកទៅ​សង្គ្រោះ​​នៅមន្ទីរពេទ្យកាល់ម៉ែតភ្លាមៗដែរ ​។

សមត្តកិច្ចបានឲ្យដឹងថាជនខ្ពើមរស់លោតពីលើផ្ទះជាន់ទី៥បាក់ជើងមានឈ្មោះ ឡុង ម៉ៃ អាយុ១៨ឆ្នាំ ស្នាក់នៅកន្លែងកើតហេតុ មានស្រុកកំណើតតាកែវ។មូលហេតុមានពីទំនាស់ពាក្យសម្តីជាមួយសង្សារ។ បុរសម្នាក់ដែលផឹកស៊ីជាមួយ បានប្រាប់ឲ្យដឹងថា​ រូបគេនិងជនរងគ្រោះបានអង្គុយផឹកស៊ីជុំគ្នាជាមួយមិត្តភក្តិដ៏ទៃទៀត ខណ:ដែលជនរងគ្រោះផឹកបណ្ដើរ ចុចទូរសព្ទបណ្ដើរ ស្រាប់តែជនរងគ្រោះរត់ឡើងទៅលើដំបូលផ្ទះ(មិនដឹងថាមានបញ្ហាអ្វីនោះទេ) ។

ពួកគេនឹកស្មានមិនដល់ដែរ ថាជនរងគ្រោះបែរជាធ្វើអត្តឃាតខ្លួនដូច្នេះសោះ។ លុះពេលជនរងគ្រោះលោតពីលើផ្ទះ​ ដែលខាងក្រោមមានដើមឈើមួយដើម ពេលធ្លាក់មកទាក់​មែកឈើហើយទើបធ្លាក់ដល់ក្រោម បណ្តាលឲ្យរបួសបាក់ជើងខាងឆ្វេង បង្កការភ្ញាក់ផ្អើលដល់​ប្រជាពលរដ្ឋ​ចោមរោម​ និងរាយការណ៍ប្រាប់សមត្ថកិច្ច​ចុះមកកន្លែងកើតហេតុ​ផងដែរ។

គេឃើញមានសាច់ញាតិក្រុមគ្រួសារ​របស់ជនរងគ្រោះ មកដល់ចំណុចកើតហេតុ​ ស្រែកយំទ្រហោ​យ៉ាងខ្លាំង ហើយមាននារី២នាក់ ក្នុងនោះម្នាក់ជាគូដណ្តឹងរបស់ជនរងគ្រោះ មកអង្គុយយំឱបគ្នា ក្រោយមករថយន្តសាមុយមន្ទីរពេទ្យកាល់ម៉ែតបានមកដល់ រួចពិនិត្យស្ថានភាពរបួស និងបំពាក់ឧបករណ៍សង្គ្រោះបឋមសិន រួចដឹកយកទៅមន្ទីរពេទ្យកាល់ម៉ែតភ្លាមៗតែម្ដង។ សមត្ថកិច្ចបាននាំបុរសម្នាក់ ដែលផឹកស៊ីជាមួយជនរងគ្រោះ​ និងនារីទាំង២នាក់​នោះ មកប៉ុស្តិ៍នគរបាលមនោរម្យ ដើម្បីសួរនាំផងដែរ៕