សង្គ្រោះបានហើយក្មេងស្រីបាត់ខ្លួនពីត្បូងឃ្មុំរកឃើញនៅស្រុកចិន
03-July-2026 / សន្តិសុខសង្គម
ភ្នំពេញ៖ក្រសួងមហាផ្ទៃនិងការបរទេសបានឲ្យដឹងថាក្មេងស្រីនៅស្រុកចិនដែលអំពាវនាវសុំជួយពីការបង្ខាំងខ្លួននៅស្រុកចិនត្រូវាបានជួយសង្គ្រោះហើយ។ឯកឧត្តម ជុំ សុន្ទរី អ្នកនាំពាក្យក្រសួងការបរទេសកម្ពុជាបានឲ្យដឹងថា ស្ត្រីរងគ្រោះត្រូវបានស្ថានអគ្គកុងស៊ុល កម្ពុជានៅសៀងហៃទាក់ទងជាមួយអាជ្ញាធរនគរបាលចិនជួយសង្គ្រោះរួចហើយ នៅថ្ងៃទី១០ មីនា ២០២៤ ហើយកំពុងបំពេញបែបបទនៅការិយាល័យនគរបាលចិន នៅខេត្តជឺជាំង។ដូចគ្នាដែរលោក ទូច សុខៈ អ្នកនាំពាក្យរងក្រសួងមហាផ្ទៃបានបញ្ជាក់ថា ក្មេងស្រីរងគ្រោះត្រូវបានជួយសង្គ្រោះកាលពីយប់ថ្ងៃទី១០មីនា និងត្រៀមបញ្ចូនរូបគេមកកម្ពុជាវិញ។
ប្រភពពីរដ្ឋបាលខេត្តត្បូងឃ្មុំ បានឲ្យដឹងថា កាលពីថ្ងៃសៅរ៍ ទី៩ ខែមីនា ឆ្នាំ២០២៤ថ្មីៗនេះ មានគេហទំព័រគណនីអាខោនហ្វេសប៊ុកឈ្មោះ នាង ធីដា បានបង្ហោះ វីដេអូឃ្លីប ភ្ជាប់ជាមួយគេហទំព័រគណនីអាខោនហ្វេសប៊ុក លី ណា ដែលមានខ្លឹមសារថា “ជំរាបសួរពុកម៉ែបងប្អូនទាំងអស់គ្នា ខ្ញុំ មានឈ្មោះថា ភិជា មានអាយុ ១៦ឆ្នាំ ហើយអ្នកខេត្តត្បូងឃ្មុំ អ្នកស្រុក ក្រូចឆ្មារ អ្នកភូមិខ្សាច់ប្រឆេះក្រោម ឥឡូវហ្នឹងខ្ញុំ បានចាញ់បោកគេ ហើយមេខ្យល់យកខ្ញុំមកលក់នៅឯ ប្រទេសចិន គេថាយកខ្ញុំមកធ្វើការ ប៉ុន្តែគេយក ខ្ញុំមកលក់ ហើយគេយកខ្ញុំមកយកប្តីចិន គេចាប់ខ្ញុំឃុំ ៦ខែ ហើយ គេចាក់សោរពីក្រៅទៀត អញ្ចឹងខ្ញុំមានតែម្រាមដៃ ១០ សំពះសុំជំនួយ៍សម្តេចយាយ សម្ដេចត់ សម្ដេច ហ៊ុន សែន ជួយកូនចៅទៅវិញផង។
រដ្ឋបាលខេត្តត្បូងឃ្មុំ មិនបង្អង់ និងបានចាត់ស្នងការនគរបាលខេត្ត សហការជាមួយនឹងអាជ្ញាធរពាក់ព័ន្ធ ដើម្បីចុះពិនិត្យ ស្រាវជ្រាវជាបន្ទាន់ភ្លាមៗ និងជួបឈ្មោះ រ៉ុម គន្ធា ភេទ ស្រី អាយុ ៣១ឆ្នាំ ដែលត្រូវជាបងស្រីបង្កើតរបស់ជនរងគ្រោះ (រុំ ភិជា) បានរៀបរាប់បញ្ជាក់ប្រាប់កម្លាំង នគរបាលជំនាញ នៃស្នងការនគរបាលខេត្តត្បូងឃ្មុំ ថាកាលពីកំឡុងដើមឆ្នាំ២០២៣ ប្អូនស្រីរបស់គាត់ ដែល មានឈ្មោះ រុំ ភិផា ភេទស្រី កើតនៅថ្ងៃទី២២ ខែវិច្ឆិកា ឆ្នាំ២០០៥ មានទីលំនៅបច្ចុប្បន្នភូមិខ្សាច់ប្រឆេះក្រោម ឃុំក្រូចឆ្មារ ស្រុកក្រូចឆ្មារ ខេត្តត្បូងឃ្មុំ ពិតប្រាកដមែន គឺបានចេញពីផ្ទះទៅរាជធានីភ្នំពេញ ដើម្បីធ្វើការ រោងចក្រកាត់ដេរ នឹងតែងតែផ្ញើប្រាក់ខែមកឧបត្ថម្ភគ្រួសារជាប្រចាំរាល់ខែ លុះ ៥-៦ខែក្រោយមកស្រាប់តែ បាត់មិនឃើញ និងទាក់ទងលែងបានតែម្តង។
ពេលនោះគាត់(បងស្រីបង្កើត) និងក្រុមគ្រួសារពុំបានរាយការណ៍ មកសមត្ថកិច្ចនោះទេ ដោយគិតថាគាត់(ជនរងគ្រោះ) ខឹងនរណាម្នាក់ក្នុងគ្រួសារ ឬមានសង្សា មិនឱ្យគ្រួសារ ដឹងជាដើម ទើបនៅល្ងាចថ្ងៃទី០៩ ខែមីនា ឆ្នាំ២០២៤ថ្មីៗនេះ ក៏បានឃើញមានការផុសវីដេអូឃ្លីបរបស់គាត់ (ជនរងគ្រោះនៅខេត្តលីសូយជីញបាន ប្រទេសចិន) និងបានប្ដឹងរាយការណ៍មកសមត្ថកិច្ចតែម្ដង។ ដូចនេះ រដ្ឋបាលខេត្តត្បូងឃ្មុំ បាននឹងកំពុងទំនាក់ទំនងជាមួយអាជ្ញាធរមានសមត្ថកិច្ចគ្រប់លំដាប់ថ្នាក់ សហការជាមួយនឹងនាយកដ្ឋានប្រឆាំងការជួញដូរមនុស្ស និងការពារអនីតិជន នៃក្រសួងមហាផ្ទៃ និង ក្រសួងការបរទេស និងសហប្រតិបត្តិការអន្តរជាតិ ដើម្បីផ្តល់ព័ត៌មានដល់ស្ថានទូតសាធារណរដ្ឋប្រជា មានិតចិន ប្រចាំប្រទេសកម្ពុជា ធ្វើការស្រាវជ្រាវ និងជួយសង្គ្រោះក្មេងស្រីរងគ្រោះ ឱ្យបានត្រឡប់មក ប្រទេសកំណើតវិញ ព្រមទាំងស្វែងរកមេខ្យល់ មកផ្ដន្ទាទោសតាមច្បាប់ជាធរមាន៕ គួរជម្រាបថា ជនរងគ្រោះជាអនិតិជនអាយុ១៦ឆ្នាំដែលមានស្រុកកំណើតនៅស្រុកក្រូចឆ្មារ ខេត្តត្បូងឃ្មុំបានចាកចេញពីស្រុកកំណើតមកធ្វើការងាររោងចក្រនៅភ្នំពេញនាដើមឆ្នាំ២០២៣។ តែក្នុងរយៈពេល ៥-៦ខែចុងក្រោយនេះក៏ស្រាប់បាត់ដំណឹងលែងទាក់ទងមកគ្រួសារតែម្តង។ នេះបើតាមការបញ្ជាក់របស់បងស្រីជនរងគ្រោះទៅកាន់រដ្ឋបាលខេត្តត្បូងឃ្មុំ។
អាជ្ញាធរកម្ពុជាក៏បានអះអាងពីការតាមរកចាប់មេខ្យល់ដើម្បីផ្តន្ទាទោសតាមច្បាប់ជាធរមាន។ គួរបញ្ជាក់ថា នេះមិនមែនជាលើកទី១ទេដែលមានក្មេងស្រី ឬ ស្ត្រីខ្មែរបានរងគ្រោះចាញ់បោកមេខ្យល់យកទៅលក់នៅក្រៅប្រទេសក្រោមរូបភាពទៅបម្រើការងារបានចំណូលខ្ពស់ ឬទៅរៀបការប្តីបរទេស។ រូបភាពបោកប្រាស់ទាំងនេះមានទម្រង់នៃការជួញដូរមនុស្ស ដូចជាការជួញដូរកម្លាំងពលកម្ម ឬជួញដូរមនុស្ស និងអាពាហ៍ពិពាហ៍ផ្ទុយពីឆន្ទៈ។ របាយការណ៍របស់នាយកដ្ឋានប្រឆាំងអំពើជួញដូរមនុស្ស និងការពារអនីតិជនបង្ហាញថា ការបង្ក្រាបអំពើជួញដូរមនុស្ស និងអាជីវកម្មផ្លូវភេទមានជាង ១៣០ករណី ក្នុងរយៈពេល១០ខែនៃឆ្នាំ២០២៣៕
