សាច់បង្កក ដឹកតាមរថយន្តក្លាស់សេទាំងតោនៗ ចូលតាម ច្រកអូរស្មាច់ផ្អើល អ្នកនាំពាក្យអគ្គ នាយកដ្ឋានគយ និងរដ្ឋាករ កម្ពុជា
03-April-2024 / ព័ត៌មានជាតិ
ខេត្តឧត្តរមានជ័យ : បន្ទាប់ ពីបែកធ្លាយព័ត៌មាន ដ៏ក្តៅគគុកអំពី ករណីឈ្មួញ រកស៊ីដឹក ជញ្ជូន សាច់ ឬគ្រឿងក្នុងសត្វបង្កកទាំងតោនៗ ក្នុង១ថ្ងៃៗ ៤-១០ឡានធំៗ ប្រភេទឡាន ទូកុងតឺន័រ បំពាក់ម៉ាស៊ីនត្រជាក់សំរាប់ ក្លាស្សេសាច់បង្កក ដឹកចេញពីដីថៃតាមច្រក ឆងចម នៃស្រុកកាប់ឆើង ខេត្តសូរិន្ទ ចូលមកក្នុងទឹកដីខ្មែរ តាមច្រកអូរស្មាច់ ស្ថិតក្នុងក្រុងសំរោង ខេត្តឧត្តរមានជ័យ ដោយពុំមាន អាជ្ញាធរ ឬសមត្ថកិច្ចជំនាញណាមួយ ហាមឃាត់ ឬត្រួត ពិនិត្យសោះឡើយ? ។
អ្នកកាសែតបានចុះទៅថត ផ្តិតយករូបភាព និងសកម្មភាពរបស់ក្រុមរថយន្តទូរក្លាស់សេ ទាំងនោះដល់មាត់ច្រកទ្វារអន្តរ ជាតិអូរស្មាច់ កាលពីពេលថ្មីៗនេះ ធ្វើការផ្សព្វផ្សាយ តាមប្រព័ន្ធ TV និងគេហទំព័រ សារព័ត៌មានក្នុង ស្រុកព្រោងព្រាត បង្កភ្ញាក់ផ្អើល កក្រើកដល់ អគ្គនាយកដ្ឋានគយ និង រដ្ឋាករកម្ពុជា ។ ឯកឧត្តម គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុក ជាអគ្គនាយក នៃអគ្គនាយកដ្ឋានគយ និង រដ្ឋាករកម្ពុជាបាន ស្ទុះស្ទារ ចាត់វិធានការស្រាវជ្រាវ ស៊ើបអង្កេតលើករណីនេះជាបន្ទាន់ រួចអ្នកនាំពាក្យ អគ្គនាយកដ្ឋានគយ និង រដ្ឋាករកម្ពុជា ក៏ចេញមុខ បំភ្លឺព័ត៌មាន ជូនសាធារជនភ្លាមៗដែរ ដើម្បីកុំអោយមានការយល់ច្រឡំ ។
ប្រភពព័ត៌មាន ពីសមត្ថកិច្ចដែលឈរជើង ប្រចាំការនៅច្រក អូរស្មាច់ បានបញ្ជាក់ប្រាប់ភ្នាក់ងារយើងថា : ករណីឡានទូបង្កកនេះ ពិតជាកើតមានសឹងរាល់ថ្ងៃ ប៉ុន្តែក្រៅពីមន្ត្រីជំនាញ គ្មានសមត្ថកិច្ចណាហ៊ាន សួរនាំក្រុមឈ្មួញ ដឹក ជញ្ជូនទំនិញក្លាស់សេទាំនោះទេ បានត្រឹមឈរមើលតែប៉ុណ្ណោះ ។ ប្រភពបន្តថា : សាច់ជ្រូក សាច់មាន់ សាច់ទា ឬគ្រឿងក្នុងសត្វ ដែលត្រួវបានគេបង្កក ក្លាស់សេក្នុងទូរកំណក របស់រថយន្តធំៗដឹកពីថៃ ចូលមកក្នុងដីខ្មែរតាមច្រកអូរស្មាច់នេះ គឺគេដឹកយកមកស្តុកទុកក្នុងផែស្ងួត ១កន្លែង មានចម្ងាយប្រហែល ៦ គី.ម ពីមាត់ច្រកអូរស្មាច់មក គឺមានទី តាំងស្ថិតនៅក្នុងភូមិអូរពក ឃុំកូនគ្រៀល ស្រុកសំរោង ខេត្តឧត្តរ មានជ័យ ។
ឯ លោក វ៉ាន់ ក្តេរ ប្រធានទីស្នាក់ការគយប្រចាំច្រកទ្វារ អូស្មាច់ធ្លាប់បានឆ្លើយប្រាប់ អ្នកកាសែតម្តងជាពីរដង រួចមក ហើយថា រឿងឡានដឹកសាច់បង្កកនេះ គឺមានតែអគ្គនាយក ដ្ឋានគយ និង រដ្ឋាករកម្ពុជា ទេ ទើបអាចបំភ្លឺព័ត៌មានជូនអ្នក កាសែតបាន ។ ការពិតជាក់ ស្តែងដូចលោក វ៉ាន់ ក្តេរ បាន ប្រាប់មែន គឺនៅថ្ងៃទី០២ខែមីនាឆ្នាំ២០២៤នេះ ខាងអគ្គនាយកដ្ឋានគយ និងរដ្ឋាករកម្ពុជា បាន ចេញសេចក្តីបំភ្លឺព័ត៌មានជូនដល់ សារធារណជន មេត្តាជ្រាប ពាក់ ព័ន្ធនឹងការផ្សាយព័ត៌មាន របស់ទូរទស្សន៍បាយ័ន កាលពីថ្ងៃ ទី១ ខែមីនា ឆ្នាំ២០២៤ លើករណីនាំចូលសាច់បង្កក តាមមាត់ច្រកអូរស្មាច់ ខេត្តឧត្តមានជ័យ ដូចខាងក្រោម :
- ផលិតផលត្រជាក់ ( chilled ) ដែលនាំចូលតាមច្រកអូរស្មាច់ គឺបានបំពេញកាតព្វកិច្ចបង់ពន្ធ និង អាកររត្រឹមត្រូវតាមច្បាប់ និង បទបញ្ញត្តិជាធរមាន ។
- ផលិតផលទាំងនេះ រួមមាន :( ១ ) ផលិតផលសាច់មាន់បង្កក និង ( ២ ) ប្រហិត ។
- ការនាំចូលដោយដឹកតាមរថយន្តថៃចូលមកផែស្ងួត ហើយបំពេញបែបបទ និងនីតិវិធីគយនៅទីនោះ ។ បន្ទាប់មកទើបលើកដាក់ទំនិញរថយន្តដឹក ជញ្ជូនរបស់កម្ពុជា ដើម្បីបន្តដឹក ជញ្ជូនទៅដាក់តាមគោលដៅ ។ អគ្គនាយកដ្ឋានគយ និង រដ្ឋាករ កម្ពុជា សូមអំពាវនាវដល់អង្គភាព សារព័ត៌មានមួយចំនួនតូច សូមផ្សព្វផ្សាយព័ត៌មានអោយបានត្រឹមត្រូវ និងចៀស វាងការផ្សព្វផ្សាយព័ត៌មានមិនពិតនាំអោយមានភាពច្របូក ច្របល់ក្នុងសង្គម ។ អាស្រ័យ ហេតុនេះសូមសាធារណជនមេត្តាជ្រាប ។អ្នកនាំពាក្យ អគ្គនាយកដ្ឋានគយ និងរដ្ឋាករកម្ពុជា ៕ ដោយ: សុផល Tel: 012 953 824 / 016 953 222
