កងកម្លាំងស្វ័យការពារជើងទឹកជប៉ុន ធ្វើទស្សនកិច្ច នៅមូលដ្ឋានកងទ័ពជើងទឹករាមកន្លែងដែលមេឌៀអាមេរិកថាមានចិន
21-September-2026 / ផ្សេងៗ
ព្រះសីហនុ៖ឯកអគ្គរដ្ឋទូតជប៉ុន លោក មិកាមិ ម៉ាសាហ៉ីរ៉ុ ឯកអគ្គរដ្ឋទូតជប៉ុនប្រចាំនៅកម្ពុជា និងលោក ណូហ្គោឈិ យ៉ាស៊ូស៊ិ មេបញ្ជាការកងពលធំបោសសំអាតមីនទី១ នៃកងទ័ពស្វ័យការពារជើងទឹកជប៉ុន នៅព្រឹកថ្ងៃទី១៦ ខែមីនា ឆ្នាំ២០២២នេះបានទៅបំពេញទស្សនកិច្ចនៅមូលដ្ឋានទ័ពសមុទ្ររាម និងជួបសំណេះសំណាលជាមួយមេបញ្ជាការលំហសមុទ្រកម្ពុជា លោកឧត្តមនាវីឯក អ៊ុក សីហា។
លោកឧត្តមនាវីឯក អ៊ុក សីហា បានឱ្យយកនាវាទៅដឹកឯកអគ្គរដ្ឋទូតជប៉ុន និងមេបញ្ជាការស្វ័យការពារជើងទឹកជប៉ុន ពីកំពង់ផែស្វយ័តក្រុងព្រះសីហនុ មកកាន់សមុទ្ររាមដោយផ្ទាល់។ មូលហេតូគឺឲ្យឯកអគ្គរដ្ឋទូតជប៉ុន និងមេបញ្ជាការស្វ័យការពារជើងទឹកជប៉ុន មកកាន់មូលដ្ឋានសមុទ្ររាមតាមផ្លូវ ជំនួសការធ្វើដំណើរតាមផ្លូវគោកនេះ គឺជាការអនុញ្ញាតឱ្យឯកអគ្គរដ្ឋទូតជប៉ុន និងលោកមេបញ្ជាការអាចសង្កេតដោយផ្ទាល់ពីសកម្មភាពនៃការអភិវឌ្ឍនៅមូលដ្ឋានទ័ពសមុទ្ររាម។
នៅពេលនាវាបើកជិតដល់ផែសមុទ្ររាមទាំងលោកឯកអគ្គរដ្ឋទូតជប៉ុន និងមេបញ្ជាការស្វ័យការពារជើងទឹកជប៉ុន បានសង្កេតដោយយកចិត្តទុកដាក់បំផុត ចំពោះសកម្មភាពអភិវឌ្ឍមូលដ្ឋានសមុទ្ររាម ដែលមានសាឡង់ប្រមាណជា៣គ្រឿង បំពាក់ដោយគ្រឿងចាក់ផងកំពុងធ្វើសកម្មភាពនៅលើសមុទ្រចម្ងាយប្រមាណជា ៣០០ម៉ែត្រពីឆ្នេរក្នុងមូលដ្ឋានសមុទ្ររាមនេះ។
លោកឧត្តមនាវីឯក អ៊ុក សីហា ក៏បាននាំលោកឯកអគ្គរដ្ឋទូត និងមេបញ្ជាការស្វ័យការពារជើងទឹកជប៉ុន ទៅត្រួតពិនិត្យរោងជាង ដែលកងទ័ពជើងទឹកកំពុងធ្វើសកម្មភាពជួសជុលនាវា។ក្នុងជំនួបពិភាក្សាវិញ លោកឧត្តមនាវីឯក អ៊ុក សីហា បានផ្តល់នូវព័ត៌មានដោយត្រង់ៗពាក់ព័ន្ធការអភិវឌ្ឍមូលដ្ឋានសមុទ្ររាម ដូចជាការលើកម្ពស់សមត្ថភាពរោងជាងសម្រាប់ជួសជុលនាវា និងការសាងសង់កំពង់ផែ ដែលមានជម្រៅទឹកកាន់តែជ្រៅសម្រាប់នាវាធំៗអាចចូលចតបានជាដើម។
លោកឧត្តមនាវីឯក អ៊ុក សីហាពន្យល់ថា «ដូចសម្តេចតេជោ ហ៊ុន សែន និងសម្តេចពិជ័យសេនា ទៀ បាញ់ បានបានបញ្ជាក់ជារឿយៗមកហើយថា ការអភិវឌ្ឍនៅមូលដ្ឋានទ័ពសមុទ្ររាម គឺជាការពង្រឹងខឿនការពារជាតិរបស់កម្ពុជា មិនមែនជាការគំរាមកំហែងប្រទេសណាមួយនោះឡើយ។ ទាំងប្រទេសនៅក្នុងតំបន់ និងក្រៅតំបន់ គឺសុទ្ធតែជាមិត្តរបស់កម្ពុជា។ កម្ពុជាមិនត្រូវការធ្វើជាសត្រូវជាមួយប្រទេសណាមួយនោះឡើយ នេះគឺជាគោលនយោបាយការទេសរបស់កម្ពុជា»។
ទាំងលោកឯកអគ្គរដ្ឋទូត មិកាមិ ម៉ាសាហ៉ីរ៉ុ និងលោកមេបញ្ជាការកងកម្លាំងស្វ័យការពារជើងទឹកជប៉ុន បានសម្តែងនូវក្តីសោមនស្សរីករាយ ចំពោះការបើកចិត្តយ៉ាងទូលាយរបស់ឧត្តមនាវីឯក អ៊ុក សីហា ដោយផ្តល់ព័ត៌មានដោយត្រង់ៗពាក់ព័ន្ធការអភិវឌ្ឍហេដ្ឋារចនាសម្ព័ន្ធនានានៅមូលដ្ឋានសមុទ្ររាមនេះ។
លោកមេបញ្ជាការកម្លាំងស្វ័យការពារជើងទឹកជប៉ុន បានបង្ហាញក្តីរំពឹងដែរថា កងទ័ពជើងទឹកកម្ពុជា ជាពិសេសលោកមេបញ្ជាការលំហសមុទ្ររាម នឹងផ្តល់ឱកាសឱ្យលោកបានទស្សនកិច្ចនៅមូលដ្ឋានសមុទ្រនាពេលក្រោយៗទៀត ពេលនាវាស្វ័យការពារជើងទឹកជប៉ុនចូលមកកម្ពុជា។ លោកមេបញ្ជការ ក៏សង្ឃឹមថា កងទ័ពលំហសមុទ្រកម្ពុជា និងមានកិច្ចសហប្រតិបត្តិការកាន់តែប្រសើរជាមួយកងកម្លាំងស្វ័យការពារជើងទឹកជប៉ុន ដើម្បីជាប្រយោជន៍សម្រាប់ប្រទេសទាំងពីរ។
មូលដ្ឋានសមុទ្ររាមកាលពីឆ្នាំ២០១៩ ត្រូវបានកាសែតអាមេរិក The Wall Street Journal បានផ្សាយបំភ្លៃថា ស្ថិតក្រោមការគ្រប់គ្រងរបស់កងទ័ពចិន និងប្រគល់ឱ្យចិនអភិវឌ្ឍបម្រើដល់ប្រតិបត្តិការរបស់យោធាចិនជាដើម បានធ្វើឱ្យកម្ពុជាប្រតិកម្ម ហើយចេញបកស្រាយជាបន្តបន្ទាប់។ បើទោះបីកម្ពុជា បានបំភ្លឺជាច្រើនលើកយ៉ាងណាក្តី ក៏រដ្ឋាភិបាលអាមេរិក បន្តចោទប្រកាន់មកលើកម្ពុជារហូតដល់បច្ចុប្បន្ន។
កន្លងមកមានសេនានុពន្ធ័យោធាប្រចាំស្ថានទូតនិងមន្ត្រីយោធាអាមេរិកត្រូវបានបើកឲ្យចូលទៅមើលដែរតែមិនត្រូវបានអនុញ្ញាតិឲ្យមើលគ្រប់កន្លែងតាមការសុំទេទេដោយសំអាងថាការសម្ងាត់កងទ័ព?ដែលធ្វើឲ្យមានការអាក់អន់ចិត្តជាមួយគ្នាម៉ាសាទៅ។
សូមបញ្ជាក់ថា ប្រតិភូនាវាស្វ័យការពារជើងទឹកជប៉ុនចំនួនពីរគ្រឿង និងនាវិកប្រមាណ ២០០នាក់ បានចូលចតនៅកម្ពុជានាព្រឹកថ្ងៃអង្គារ ទី១៥ ខែមីនា ឆ្នាំ២០២២ ដើម្បីអបអរសាទរខួប៣០ឆ្នាំនៃការបំពេញ បេសកកម្មរក្សាសន្តិភាពរបស់ជប៉ុននៅកម្ពុជា។ នាវាស្វ័យការពារជើងទឹកជប៉ុន ដែលចូលមកសំចតនៅកម្ពុជានេះរួមមាន៖ នាវាដែលមានឈ្មោះថា JS URAGA និង JS HIRADO។ នាវា JS URAGA លេខ៤៦៣ ជាប្រភេទនាវាប្រឆាំងមីនមានបណ្ដោយ ១៤១ម៉ែត្រ ទទឹង ២២ម៉ែត្រ ជម្រៅទឹក ៥.៤ម៉ែត្រ មានទម្ងន់ផ្ទុកជិត ៦ពាន់តោន និងមាននាវិកចំនួន ១២៦នាក់៕
