វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1669 នាក់
ម្សិលមិញ 6677 នាក់
សរុប 14149245 នាក់
ភ្នំពេញ៖ទណ្ឌិតសរុបចំនួន ២៤៥នាក់ ស្រី ២៨នាក់ ត្រូវបានព្រះមហាក្សត្រកម្ពុជា ប្រោសព្រះរាជទានការបន្ធូរបន្ថយទោសដល់ទណ្ឌិតសម្រាប់ទិវាជ័យជម្នះ ៧មករា។ លោក គឹម សន្តិភាព រដ្ឋលេខាធិការក្រសួងយុត្តិធម៌ បានសរសេរនៅក្នុងទំព័រហ្វេសប៊ុកផ្លូវការកាលពីថ្ងៃទី០៧ ខែមករា ឆ្នាំ២០២៤ឲ្យដឹងថា៖៖ «ក្នុងឱកាសទិវាជ័យជម្នះលើរបបប្រល័យពូជសាសន៍ ឆ្នាំ២០២៤ នេះ យោងតាមសេចក្តីក្រាបបង្គំទូលថ្វាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ព្រះករុណាព្រះមហាក្សត្រនៃព្រះរាជាណាចក្រកម្ពុជា ទ្រង់សព្វព្រះរាជហឫទ័យប្រោសប្រទានការបន្ធូរបន្ថយទោសដល់ទណ្ឌិតសម្រាប់ទិវាបុណ្យនេះ សរុបចំនួន ២៤៥នាក់ (ស្រី ២៨នាក់)»។
ទណ្ឌិតដែលបន្ថយទោសរយៈពេល ៣ខែ មានចំនួន ១៧៨នាក់ រយៈពេល ៦ខែ ចំនួន ៥៧នាក់ រយៈពេល ៩ខែ ចំនួន ៨នាក់ រយៈពេល ១២ខែ ចំនួន ១នាក់ និងបន្ថយទោសមួយជីវិតមកនៅត្រឹម ៣០ឆ្នាំ ចំនួន១នាក់។ចំពោះទណ្ឌិតដែលប្រព្រឹត្តិបទល្មើសទូទៅ ដូចជា ឧក្រិដ្ឋជនគ្រឿងញៀន អំពើសាហាវយង់ឃ្នង ករណីមិនរាងចាល ប្រព្រឹត្តលើជនរងគ្រោះដែលជាសាច់ញាតិ ឬសហព័ទ្ធ ប្រព្រឹត្តលើជនរងគ្រោះជាមន្ត្រីរាជការ ឬមន្ត្រីសាធារណៈ និងទណ្ឌិតធ្លាប់ទទួលបានការបន្ធូរបន្ថយទោសម្តងរួចមកហើយ គឺមិនទទួលបានការបន្ធូរបន្ថយទោសនោះទេ។
ទណ្ឌិតដែលប្រព្រឹត្តិបទល្មើសរំលោភផ្លូវភេទលើអនីតិជនអាយុក្រោម ១៤ឆ្នាំ លើជនមានវិបល្លាសសា្មរតី ពិការ ជាសាច់សាលោហិត ករណីរំលោភបូក និងករណីប៉ុនប៉ង ឬបៀតបៀនកេរ្តិ៍ខ្មាសលើជនរងគ្រោះជាសាច់សាលោហិត ក៏មិនត្រូវបានទទួលការបន្ធូរបន្ថយទោសផងដែរ។គូសបញ្ជាក់ថា នៅកម្ពុជាមានអ្នកទោសជាប់ពន្ធនាគារទូទាំងប្រទេសសរុបជាង ៤ម៉ឺននាក់ ក្នុងនោះស្រីជាង ២ពាន់នាក់ ភាគច្រើនជាអ្នកទោសបទល្មើសគ្រឿងញៀនមាន ៥១ភាគរយ៕