ចំខួប១០០ថ្ងៃនៃការចូលកាន់តំណែងនាយករដ្ឋមន្ដ្រីសម្ដេចធិបតី ហ៊ុន ម៉ាណែត ទស្សនកិច្ចផ្លូវការនៅវៀតណាម
ភ្នំពេញ៖លោក ផាម មិញជិញ (PHAM Minh Chinh) នាយករដ្ឋមន្ត្រីវៀតណាម បានសម្តែងនូវការអបអរសាទរចំពោះសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលត្រូវបានអង្គសន្និបាតគណៈកម្មាធិការកណ្តាល គណបក្សប្រជាជនកម្ពុជា លើកទី៤៤ អាណត្តិទី៥ បោះឆ្នោតជ្រើសតាំង ជាអនុប្រធានគណបក្សប្រជាជនកម្ពុជា។ការអបអរសាទររបស់លោកនាយករដ្ឋមន្ត្រីវៀតណាម បានធ្វើឡើងនាព្រឹកថ្ងៃទី១១ ខែធ្នូ ឆ្នាំ២០២៣ អំឡុងជួបពិភាក្សាទ្វេភាគីជាមួយ សម្តេចធិបតី ហ៊ុន ម៉ាណែត ក្នុងឱកាសនៃដំណើរបំពេញទស្សនកិច្ចផ្លូវការរយៈពេល០២ថ្ងៃ ចាប់ពី១១ ដល់ថ្ងៃទី១២ ខែធ្នូ ឆ្នាំ២០២៣ នៅសាធារណរដ្ឋសង្គមនិយមវៀតណាម។សម្ដេចធិបតី ហ៊ុន ម៉ាណែត បានទទួលតំណែងនាយករដ្ឋមន្ដ្រីកម្ពុជា នៅថ្ងៃទី២២ ខែសីហា ឆ្នាំ២០២៣ ដូច្នេះដំណើរទស្សនកិច្ចនេះចំខួប១០០ថ្ងៃនៃការកាន់តំណែង។
ក្នុងការបំពេញទស្សនកិច្ចនេះមានឯកសារចំនួន៣ ដែលជាអនុស្សារណៈនៃការយោគយល់គ្នា (MOU) រវាងកម្ពុជា និងវៀតណាម ត្រូវបានចុះហត្ថលេខា នៅថ្ងៃទី១១ ខែធ្នូ ឆ្នាំ២០២៣នេះ ក្រោមអធិបតីភាព សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និង លោក ផាម មិញជិញ (Pham Minh Chinh) នាយករដ្ឋមន្ត្រី នៃសាធារណរដ្ឋសង្គមនិយមវៀតណាម។ឯកសារទាំង៣នោះ រួមមាន៖
១៖ អនុស្សរណៈនៃការ យោគយល់គ្នាស្តីពីកិច្ចសហប្រតិបត្តិការ លើវិស័យវិទ្យាសាស្ត្របច្ចេកវិទ្យា និងនវានុវត្តន៍ រវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រសួងវិទ្យាសាស្ត្រ និងបច្ចេកវិទ្យាវៀតណាម២៖ អនុស្សរណៈនៃការ យោគយល់គ្នាស្តីពីកិច្ចសហប្រតិបត្តិការ រវាងវិទ្យាស្ថានជាតិការទូត និងទំនាក់ទំនង អន្តរជាតិ និងបណ្ឌិត្យសភាការទូតវៀតណាម៣៖ អនុស្សរណៈនៃការយោគយល់គ្នារវាងសភាពាណិជ្ជកម្មកម្ពុជា និងសភាពាណិជ្ជកម្មវៀតណាម។
សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បាននិងកំពុងដឹកនាំគណៈប្រតិភូរាជរដ្ឋាភិបាលកម្ពុជាទស្សនកិច្ចផ្លូវការនៅរដ្ឋធានីហាណូយ សាធារណរដ្ឋសង្គមនិយមវៀតណាម រយៈពេលពីរថ្ងៃចាប់ពីថ្ងៃទី១១ ដល់ ១២ ខែធ្នូ ឆ្នាំ២០២៣ តបតាមការអញ្ជើញរបស់លោក ផាម មិញជិញ នាយករដ្ឋមន្ដ្រីវៀតណាម។សូមបញ្ជាក់ថាក្នុងកម្មវិធីសម្តេចធិបតី ហ៊ុន ម៉ាណែត និង ឯកឧត្តមនាយករដ្ឋមន្ត្រី ផាម មិញ ជិញ នឹងជួបប្រជុំទ្វេភាគី ក្នុងគោលបំណងបន្តពង្រឹង និងពង្រីកបន្ថែមទៀត នូវកិច្ចសហប្រតិបត្តិការលើវិស័យជាច្រើនរួមមានអប់រំ ពាណិជ្ជ កម្ម វិនិយោគ ការតភ្ជាប់ ទេសចរណ៍ វប្ប ធម៌ សន្តិសុខ ការពារជាតិ និងកិច្ច ការព្រំដែន ជាដើម។ បញ្ហាអនុតំបន់ តំបន់ និងអន្តរជាតិដែលជាចំណាប់អារម្មណ៍ និងក្តីបារម្ភរួមក៏នឹងត្រូវលើកយកមកពិភាក្សាផងដែរ។
នាយករដ្ឋមន្ត្រីទាំងពីរ នឹងធ្វើជាសាក្សីក្នុងពិធីចុះហត្ថលេខា លើឯកសារកិច្ចព្រមព្រៀងមួយចំនួន និងធ្វើជាសហអធិបតីក្នុងវេទិកាកម្ពុជា-វៀតណាមស្តីពី ការ ជំរុញពាណិជ្ជកម្ម និងវិនិយោគ។ សម្តេចធិបតី នឹងអញ្ជើញចូលជួបសម្តែងការគួរសមដាច់ដោយឡែកជាមួយ ឯកឧត្តម ង្វៀន ហ្គីចុង (NGUYEN Phu Trong) អគ្គលេខាធិការនៃគណៈកម្មាធិ ការមជ្ឈិមបក្សកុម្មុយនីស្តវៀតណាម ឯកឧត្តម វ៉ វ៉ាន់ធឿង (VO Van Thuong) ប្រធានរដ្ឋវៀតណាម និងឯកឧត្តម រឿង ទិញហ្វេ (VUONG Dinh Hue) ប្រធានរដ្ឋសភាវៀតណាម។ សម្តេចធិបតីក៏នឹងអនុញ្ញាតជូនលោក ជំទាវ ង្វៀន ធីថាញ់ (NGUYEN Thi Thanh) ប្រធានសមាគមមិត្តភាពកម្ពុជា- វៀតណាម ព្រមទាំងថ្នាក់ដឹកនាំសម្ព័ន្ធយុវជនកុម្មុយនីស្តហូជីមិញចូលជួបសម្តែងការគួរសម និងពិភាក្សាការងារផងដែរ។ សម្តេចធិបតីនឹងថ្លែងសុន្ទរកថាគន្លឹះស្តីពីគោលនយោបាយអភិវឌ្ឍន៍សេដ្ឋកិច្ចរបស់រាជរដ្ឋាភិបាលកម្ពុជា និងទំនាក់ទំនងសេដ្ឋកិច្ចរវាងកម្ពុជា និងវៀតណាម នៅសាកលវិទ្យាល័យពាណិជ្ជកម្មអន្តរជាតិ នៅទីក្រុងហាណូយ។
ដំណើរទស្សនកិច្ចផ្លូវការរបស់សម្តេចធិបតីទៅកាន់ប្រទេសវៀតណាមបង្ហាញពីការធ្វើឱ្យកាន់តែស៊ីជម្រៅនូវទំនាក់ទំនងដ៏យូរអង្វែង ឈរលើស្មារតី «ភាពជាអ្នកជិត ខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង» រវាងកម្ពុជា និងវៀតណាមដើម្បីផលប្រយោជន៍ ទៅវិញទៅមកសម្រាប់ប្រជាជននៃប្រជាជាតិទាំងពីរ។ដោយឡែកក្នុងឱកាសជួបសម្តែងការគួរសមជាមួយ ឯកឧត្តម ង្វៀន ហ្វ៊ូចុង (Nguyen Phu Trong) អគ្គលេខាធិការ នៃបក្សកុម្មុយនីស្តវៀតណាម នារសៀលថ្ងៃទី១១ ខែធ្នូ ឆ្នាំ២០២៣សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាត្រូវបាន ឯកឧត្តម ង្វៀន ហ្វ៊ូចុង បាន សម្តែង នូវការអបអរសាទរចំពោះ សម្តេចធិបតី ដែលត្រូវបានអង្គសន្និបាតគណៈកម្មាធិការកណ្តាល គណបក្សប្រជាជនកម្ពុជា លើកទី៤៤ អាណត្តិទី៥ បោះឆ្នោតជ្រើសតាំង ជាអនុប្រធានគណបក្សប្រជាជនកម្ពុជា ។
អគ្គលេខាធិការបក្សកុំមុយនិស្សតវៀតណាមដ៏មានឥទ្ធីពល ក៏បានសម្តែង នូវការកោតសរសើរដល់រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា ក្នុងការសម្រេចបាននូវសមិទ្ធផលជាច្រើន រហូតនាំឱ្យប្រទេសកម្ពុជាមានការអភិវឌ្ឍរីកចម្រើនឥតឈប់ឈរលើគ្រប់វិស័យ ។ ឯកឧត្តមអគ្គលេខាធិការ បានគូសបញ្ជាក់បន្ថែមទៀតថា តាមរយៈដំណើរទស្សនកិច្ចរបស់ សម្តេចធិបតី នាឱកាសនេះ ទំនាក់ទំនងទ្វេភាគីកម្ពុជា-វៀតណាម នឹងមានវឌ្ឍនភាពរីកចម្រើនរឹងមាំបន្ថែមទៀត ។ ឯកឧត្តម ង្វៀន ហ្វ៊ូចុង ក៏បានបង្ហាញនូវ សុទិដ្ឋិនិយមថា ក្រោមការដឹកនាំប្រកបដោយភាពឈ្លាសវៃរបស់ សម្តេចធិបតី គឺកម្ពុជានឹងបន្តការអភិវឌ្ឍកាន់តែខ្លាំងក្លាទៅមុខ ហើយជីវភាពរស់នៅរបស់ប្រជាជនកម្ពុជា ក៏នឹងត្រូវបាន លើកកម្ពស់ឱ្យកាន់តែប្រសើរធូរធារចម្រុងចម្រើន ។
សម្រាប់ប្រទេសកម្ពុជានិងវៀតណាមមាន ទំហំពាណិជ្ជកម្មទេ្វភាគីរវាងកម្ពុជា និងវៀតណាម ក្នុងរយៈពេល ១១ខែដំបូង ឆ្នាំនេះ សម្រេចបានទំហំទឹកប្រាក់ ៥.៨៧៧លានដុល្លារ កើនឡើង ៦,៦% បើធៀបនឹងរយៈពេលដូចគ្នាកាលពីឆ្នាំ ២០២២។ អគ្គនាយដ្ឋានគយ និងរដ្ឋាករកម្ពុជាបានឲ្យដឹងថាតួលេខដដែលនេះ បានបង្ហាញទៀតថា ក្នុងរយៈពេល ១១ខែនេះ ប្រទេសកម្ពុជា បាននាំចេញមុខទំនិញនានា ទៅកាន់ប្រទេសវៀតណាម មានតម្លៃទឹកប្រាក់ប្រមាណ ២.៦១១លានដុល្លារ កើនឡើង ៣៧,៨%។ ចំណែកឯ ការនាំចូលរបស់ប្រទេសកម្ពុជា ត្រឡប់មកពីប្រទេសវៀតណាមវិញ មានតម្លៃទឹកប្រាក់ ៣.២៦៦លានដុល្លារ ថយចុះ ៩,៦% បើធៀបនឹងរយៈពេលដូចគ្នាកាលពីឆ្នាំមុន។
វៀតណាម គឺជាដៃគូពាណិជ្ជកម្មដ៏សំខាន់មួយរបស់ប្រទេសកម្ពុជា ដែលភាគច្រើនមុខទំនិញរបស់កម្ពុជា នាំចេញទៅកាន់ប្រទេសក្បែរខាងមួយនេះជាផលិតផលកសិកម្ម រួមមាន គ្រាប់ស្វាយចន្ទី ដំឡូងមី ស្រូវ ពោត និងជ័រកៅស៊ូ ជាដើម។ ដោយឡែកមុខទំនិញសំខាន់ៗ ដែលកម្ពុជា នាំចូលពីប្រទេសវៀតណាម រួមមាន ប្រេងឥន្ធនៈ គ្រឿងឧបភោគបរិភោគ សម្ភារៈប្រើប្រាស់ប្រចាំថ្ងៃ គ្រឿងសំណង់ ជីកសិកម្ម និងបន្លែផ្លែឈើ ជាដើម។
លោក សុខ ចិន្ដាសោភា រដ្ឋមន្ដ្រីក្រសួងការបរទេស និងកិច្ចសហប្រតិបត្តិការអន្តរជាតិ ដែលកំពុងអមដំណើរសម្ដេចធិបតី នៅរដ្ឋធានីហាណូយនោះ បានថ្លែងកត់សម្គាល់ពីប្រវត្តិទំនាក់ទំនងប្រពៃណីដ៏ពិសេសនៃប្រទេសទាំងពីរកម្ពុជា-វៀតណាម ប្រាប់ប្រព័ន្ធផ្សព្វផ្សាយវៀតណាមនៅរាជធានីភ្នំពេញថា ប្រទេសយើងទាំងពីរកម្ពុជា-វៀតណាម មានទំនាក់ទំនងរវាងគ្នានិងគ្នាដ៏ស្អិតរមួតទាំងពីដើមទសវត្សរ៍ឆ្នាំ១៩៥០មកម្ល៉េះ ពោលគឺនាសម័យអាណានិគមនិយមបារាំងដែលគ្រានោះទាំងកម្ពុជានិងវៀតណាមបានគិតគូរប្រតិបត្តិការធ្វើសកម្មភាពដើម្បីទាមទារឯករាជ្យជូនប្រទេសជាតិរៀងៗខ្លួន។
ដំណើរទស្សនកិច្ចផ្លូវការជាលើកដំបូងរបស់សម្ដេចនាយករដ្ឋមន្ដ្រី ហ៊ុន ម៉ាណែត នៅប្រទេសវៀតណាមដែលជាប្រទេសសមាជិកអាស៊ានមួយ។ ក្រុមអ្នកវិភាគនយោបាយក្នុងប្រទេសកម្ពុជានិងវៀតណាម ហើយនិងតំបន់បានកត់សម្គាល់ពីដំណើរទស្សនកិច្ចផ្លូវការនេះថាជាដំណើរទស្សនកិច្ចបន្តពូនជ្រំទំនាក់ទំនងប្រពៃណីដ៏ពិសេសរវាងកម្ពុជា-វៀតណាម។ ហើយម្យ៉ាងវិញទៀតក៏អាចនឹងបន្ធូរបន្ថយបាននូវភាពតានតឹងនយោបាយនៅតំបន់អាស៊ីអាគ្នេយ៍ និងវិវាទនៅសមុទ្រចិនខាងត្បូងផង ដោយហេតុថាប្រធានាធិបតីចិន ស៊ី ជិនពីង នឹងក្លាយជាភ្ញៀវផ្លូវបក្ស/ផ្លូវរដ្ឋ តាមការអញ្ជើញរបស់លោក ង្វៀន ហ្វ៊ូចុក អគ្គលេខាបក្សកុម្មុយនីស្ដវៀតណាម និងលោក វ៉ វាន់ធឿង ប្រមុខរដ្ឋវៀតណាម។សម្ដេចធិបតី ហ៊ុន ម៉ាណែត ចាកចេញពីរដ្ឋធានីហាណូយ និវត្តន៍មកកាន់មាតុភូមិវិញនាព្រលប់ថ្ងៃទី១២ ខែធ្នូ ឆ្នាំ២០២៣ ក្រោយបញ្ចប់ទស្សនកិច្ចផ្លូវការគ្រាដំបូងនេះ៕
