ប្រធានប្រតិកម្មរហស័៖ ព័ត៌មានក្លែងក្លាយវាជាសង្គ្រាមចិត្តសាស្ត្រដ៏គ្រោះថ្នាក់
ភ្នំពេញ៖ លោក ស្វាយ ស៊ីថា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពព័ត៌មាន និងប្រតិកម្មរហ័ស បានថ្លែងថា ព័ត៌មានក្លែងក្លាយ មិនត្រឹមតែពាក់ព័ន្ធនឹងសន្តិសុខនយោបាយប៉ុណ្ណោះទេ តែវាជាសង្គ្រាមចិត្តសាស្ត្រដ៏គ្រោះថ្នាក់ ដែលគេបាន និងកំពុងបង្កើតឡើង ដើម្បីទាក់ទាញប្រជាប្រិយភាពតាមរយៈការបំភ័ន្តមតិប្រជាពលរដ្ឋ ។
នៅទីស្តីការគណៈរដ្ឋមន្ត្រីក្រោយពីទទួលការបណ្តុះបណ្តាលរយៈពេល៥ថ្ងៃ នៅរសៀលថ្ងៃទី២៩ ខែមីនា ឆ្នាំ២០១៩ក្នុងឱកាសបិទវគ្គបណ្តុះបណ្តាលវិជ្ជាជីវៈស្តីពី ព័ត៌មានក្លែងក្លាយ ដែលមានសិក្ខាកាមប្រមាណ១០០នាក់ ជាតំណាងមកពីក្រសួង ស្ថាប័ន រាជធានីខេត្តលោក ស្វាយ ស៊ីថា បានមានប្រសាសន៍ថា៖ វគ្គបណ្តុះបណ្តាលវិជ្ជាជីវៈ ស្តីពីព័ត៌មានក្លែងក្លាយ ដែលបានបង្រៀនដោយគ្រូជនជាតិបរទេស បានផ្តល់នូវបទពិសោធន៍ជាច្រើនដល់មន្ត្រីស្ថាប័នរដ្ឋ ដែលទទួលបន្ទុកការងារព័ត៌មាន និងសាធារណមតិ ឱ្យបានយល់ដឹងអំពីគ្រោះថ្នាក់ នៃព័ត៌មានក្លែងក្លាយ និងពង្រឹងនូវយុទ្ធសាស្ត្រ យុទ្ធវិធីក្នុងការទប់ស្កាត់ និងបន្សាបព័ត៌មានក្លែងក្លាយដែលបង្កឡើងដោយក្រុមជនមួយចំនួន ក្នុងចេតនាទុច្ចរិត តាមរយៈសកម្មភាពខុសច្បាប់នានាសំដៅបំផុសបំផុល បង្កើតនូវអំពើអាណាធិបតេយ្យ ចលាចលសង្គម ឬប៉ុនប៉ងបំផ្លាញនូវស្ថេរភាពនយោបាយ ជាពិសេសសុខសន្តិភាពដែលខិតខំរកបានដោយលំបាកបំផុត។
លោក ស្វាយ ស៊ីថា បានថ្លែងថា តាមរយៈវគ្គបណ្តុះបណ្តាលដ៏មានសារៈសំខាន់នេះ សិក្ខាកាមដែលជាមន្ត្រីព័ត៌មានបានយល់ដឹងនូវយុទ្ធសាស្ត្រ យុទ្ធវិធី និងបទពិសោធន៍ជាក់ស្តែងជាច្រើនសម្រាប់យកទៅអនុវត្តដើម្បីទប់ស្កាត់ និងបន្សាបព័ត៌មានក្លែងក្លាយសំដៅរក្សាប្រៀប ក្នុងការគ្រប់គ្រងសាធារណមតិ។ លោក ស្វាយ ស៊ីថា ក៏បានធ្វើការកត់សម្គាល់ផងដែរថា បច្ចុប្បន្នព័ត៌មានក្លែងក្លាយមួយចំនួនបាន និងកំពុងបំពុលសង្គម និងនាំឱ្យប្រជាពលរដ្ឋខាតបង់ពេលវេលា ថវិកា ចាញ់បោក ឬក៏បានធ្វើការសំរេចចិត្តខុស ដោយសារព័ត៌មានក្លែងក្លាយ ដែលក្រុមជនមួយចំនួនបានបង្កឡើង។ ហេតុនេះ សិក្ខាកាមទាំងអស់ត្រូវតាមដាន ត្រួតពិនិត្យ ផ្ទៀងផ្ទាត់ព័ត៌មានដែលបានកើតឡើងក្នុងបណ្តាញផ្សព្វផ្សាយសង្គម និងត្រូវខិតខំចូលរួមគ្នាទប់ស្កាត់ និងបន្សាបព័ត៌មានក្លែងក្លាយឱ្យបានទាន់ពេលវេលា។
លោក ស្វាយ ស៊ីថា បាន គូសបញ្ជាក់ថា ដើម្បីចូលរួមចំណែកក្នុងការបញ្ឈប់នូវការផ្សព្វផ្សាយព័ត៌មានក្លែងក្លាយ បណ្តាញផ្សព្វផ្សាយព័ត៌មាន មន្ត្រីសាធារណៈ និងអ្នកប្រើប្រាស់ហ្វេសប៊ុក ត្រូវរួមគ្នាប្រយុទ្ធប្រឆាំងទៅនឹងព័ត៌មានក្លែងក្លាយ តាមរយៈការមិនផ្សព្វផ្សាយបន្ត ឬចែករំលែកនូវព័ត៌មានក្លែងក្លាយ និងចូលរួមបន្សាបនូវព័ត៌មានក្លែងក្លាយនៅពេលដែលវាត្រូវបានបង្កើតឡើង ឱ្យបានទាន់ពេលវេលា។
លោកស្វាយ ស៊ីថា បានឱ្យដឹងថា បណ្តាប្រទេសជាច្រើនបានបង្កើតនូវច្បាប់ដើម្បីប្រយុទ្ធប្រឆាំងទៅនឹងព័ត៌មានក្លែងក្លាយ ដែលក្នុងនោះមានដូចជាប្រទេសបារាំង រុស្ស៉ី ម៉ាឡេស៊ី កាតា និងអេស្ស៊ីបជាដើម។ ប្រទេសជាច្រើនដទៃទៀត ក៏បានចាប់ផ្តើមដាក់ចេញនូវវិធានការណ៍ដើម្បីដោះស្រាយបញ្ហានៃការកើនឡើងនូវព័ត៌មានក្លែងក្លាយ ដូចជាប្រទេសអូស្ត្រាលី ប៊ែលហ្សិក កាណាដា ចិន បង់ក្លាដេស ឥណ្ឌា ស៉ិងហ្គាពួរ និងប្រទេសហ្វីលីពីនជាដើម។
លោកស្វាយ ស៊ីថា ក៏បានសង្កត់ធ្ងន់ថា ការប្រយុទ្ធប្រឆាំងទៅនឹងព័ត៌មានក្លែងក្លាយ គឺជារបៀបវារៈថ្នាក់ជាតិជាអាទិភាព ដែលទាមទារឱ្យមានការចូលរួមពីគ្រប់ភាគី បូករួមទាំងវិស័យសាធារណៈ និងវិស័យឯកជន ជាពិសេសមន្ត្រីសាធារណៈ និងបណ្តាអ្នកនយោបាយ។ ប៉ុន្តែ បុគ្គលគ្រប់រូប ឬគ្រប់ស្ថាប័ន មិនគួរធ្វើការឆ្លើយតបទៅរាល់គ្រប់ព័ត៌មានក្លែងក្លាយដែលបានកើតឡើងនោះទេ ដោយយើងត្រូវចេះធ្វើការបែងចែកនូវប្រធានបទណា តម្រូវឱ្យស្ថាប័នណា ឬបុគ្គលណាមួយធ្វើការឆ្លើយតប ឬបន្សាប។
អ្វីដែលសំខាន់ និងទាមទារការចូលរួមពីពួកយើងទាំងអស់គ្នា គឺការចូលរួមជួយផ្សព្វផ្សាយ ចែករំលែកឱ្យបានទូលំទូលាយនូវព័ត៌មានដែលពិត ពីព្រោះការប្រយុទ្ធប្រឆាំងទៅនឹងព័ត៌មានក្លែងក្លាយ គឺជារបៀបវារៈថ្នាក់ជាតិ និងជាអាទិភាព ដែលមិនអាចធ្វើឡើងដោយបុគ្គលតែម្នាក់នោះទេ ដោយសារវាទាមទារឱ្យមានការត្រួតពិនិត្យព័ត៌មានដែលបានផ្សព្វផ្សាយ ជាប្រចាំ ដើម្បីធ្វើការបន្សាប ឱ្យបានទាន់ពេលវេលា។
លោកស្វាយ ស៊ីថា បានលើកទឹកចិត្តដល់សិក្ខាកាមទាំងអស់ ឱ្យបង្កើន និងរឹតចំណងមិត្តភាព និងទំនាក់ទំនង ជាមួយនឹងអ្នកគាំទ្រ និងបណ្តាញប្រព័ន្ធផ្សព្វផ្សាយ ក៏ដូចជាអ្នករាយការណ៍ព័ត៌មាន។ លោកស្វាយ ស៊ីថា ក៏បានសំណូមពរដល់សិក្ខាកាមគ្រប់រូប សូមឱ្យធ្វើការងារប្រកបដោយការទទួលខុសត្រូវខ្ពស់ និងប្រកបដោយវិជ្ជាជីវៈ ក្នុងការប្រយុទ្ធប្រឆាំងទៅនឹងព័ត៌មានក្លែងក្លាយនេះ។
លោកស្វាយ ស៊ីថា បានសំណូមពរដល់សិក្ខាកាមទាំងអស់ ឱ្យចូលរួមផ្សព្វផ្សាយ និងចែករំលែក នូវអ្វីដែលបានសិក្សាស្វែងយល់នៅក្នុងវគ្គបណ្តុះបណ្តាលនេះ បូករួមទាំងមេរៀន និងបទពិសោធន៍ ទៅដល់បណ្តាមន្ត្រី ឬនាយកដ្ឋានដែលពាក់ព័ន្ធ ឬក្រុមការងារប្រព័ន្ធផ្សព្វផ្សាយសង្គមនៅតាមអង្គភាពរបស់ខ្លួនរៀងៗខ្លួន ដើម្បីឱ្យពួកគេអាចស្វែងយល់ដឹងអំពីវិធីសាស្ត្រ នៅក្នុងការប្រយុទ្ធប្រឆាំងទៅនឹងព័ត៌មានក្លែងក្លាយ ដើម្បីធានារក្សានូវសន្តិសុខ ស្ថេរភាព អធិបតេយ្យភាព ឯករាជ្យជាតិ និងការបង្រួបបង្រួមជាតិ ក៏ដូចជាការការពារនូវលទ្ធិប្រជាធិបតេយ្យ និងសិទ្ធិមនុស្ស៕
