វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1997 នាក់
ម្សិលមិញ 3717 នាក់
សរុប 14150330 នាក់
ភ្នំពេញ៖ សម្ដេចធិបតី នាយឧត្តមសេនីយ៍ ហ៊ុន ម៉ាណែត បានបញ្ជាក់សាជាថ្មីនៅព្រឹកថ្ងៃទី២៣មករាថា រឿងសមុទ្ររាម កម្ពុជាមិនអនុញ្ញាតឲ្យមានមូលដ្ឋាន កងទ័ពបរទេសនៅលើឡើយ ហើយកងទ័ពកម្ពុជា ក៏គ្មានមូលដ្ឋាននៅលើដែនដីប្រទេសណាមួយដែរ លើកលែងតែកងកម្លាំងចូលរួមរក្សាសន្ដិភាពក្រោមឆត្រ នៃអង្គការសហប្រជាជាតិ (អ.ស.ប.) តែប៉ុណ្ណោះ។«ខ្ញុំ សូមបញ្ជាក់ម្ដងទៀត ការលើកឡើងក្នុងកាសែត រឿងសមុទ្រកម្ពុជា រដ្ឋធម្មនុញ្ញរបស់យើងមាត្រា ៥៣ បានបញ្ជាក់ច្បាស់ណាស់ កម្ពុជាមិនមានអនុញ្ញាតឲ្យមូលដ្ឋាន កងទ័ពបរទេស នៅលើទឹកដីរបស់ខ្លួន ហើយក៏មិនមានមូលដ្ឋានកងទ័ពរបស់ខ្លួន ទៅលើទឹកដីផ្សេងទៀត លើកលែងតែក្រោមឆត្រអង្គការសហប្រជាជាតិ។ ខ្ញុំបានបញ្ជាក់ករណីនេះ នៅអង្គការសហប្រជាជាតិរួចទៅហើយ ។ សម្ដេចតេជោ សម្ដេចពិជ័យសេនា ថ្នាក់ដឹកនាំជាតិរបស់យើង ក៏បានបញ្ជាក់ជាប្រចាំហើយ»។
នាឱកាសអញ្ជើញជាអធិបតីពិធីអបអរសាទរ «ខួបអនុស្សាវរីយ៍លើកទី២៥ ថ្ងៃបង្កើតបញ្ជាការដ្ឋានកងទ័ពជើងគោក នៃកងយោធពលខេមរភូមិន្ទ នាថ្ងៃទី២៤ ខែមករា ឆ្នាំ២០២៤សម្ដេចធិបតី គូសបញ្ជាក់ថា ការកសាងសមត្ថភាព របស់កងទ័ពជើងទឹក ជើងគោក និងជើងអាកាសរបស់កម្ពុជា ដើម្បីការពារជាតិកម្ពុជាប៉ុណ្ណោះ មិនមែនទៅបង្កើតសង្គ្រាម ជាមួយអ្នកណានោះទេ។«ខ្ញុំសូមបញ្ជាក់សាជាថ្មី ការកសាងសមត្ថភាពរបស់កងទ័ពជើងទឹក ជើងគោក ជើងអាកាសរបស់កម្ពុជា គឺដើម្បីការពារជាតិកម្ពុជា តែប៉ុណ្ណោះ មិនមែនសម្រាប់ទៅដើម្បីបង្កើតសង្គ្រាមជាមួយអ្នកណានោះទេ»។ នេះជាប្រសាសន៍របស់សម្ដេចនាយករដ្ឋមន្ដ្រី ហ៊ុន ម៉ាណែត។
សម្តេចធិបតី នាយឧត្តមសេនីយ៍ ហ៊ុន ម៉ាណែត បានលើកឡើងថា រយៈពេល២០ឆ្នាំខាងមុខនេះ កម្ពុជានឹងមិនមានកងទ័ពមានបទពិសោធប្រយុទ្ធ ហេតុដូច្នេះអ្វីដែលជាកត្តាសំខាន់ គឺបច្ចុប្បន្នត្រូវធ្វើឲ្យមាននិរន្តរភាព និងចីរភាព នៃសមត្ថភាព និងការបង្កើនជាប្រចាំនូវសមត្ថភាពការពារជាតិរបស់កងទ័ព។សម្ដេចធិបតី នាយឧត្តមសេនីយ៍ មានប្រសាសន៍ថា ការកសាងសមត្ថភាពកងទ័ព គឺជាកិច្ចការសំខាន់ ប៉ុន្តែការធានានិរន្តរភាព នៃសមត្ថិភាពកងទ័ព កាន់តែសំខាន់។ យោធិនបច្ចុប្បន្ន គឺមានលាយគ្នារវាងនាយទាហានដែលមានបទពិសោធប្រយុទ្ធយូរឆ្នាំជាមួយ នាយទាហាន នាយទាហានរង និង ពលទាហានថ្មី។
«២០ឆ្នាំទៀត គឺប្រាកដនៅសល់តែ នាយទាហាន នាយទាហានរង និង ពលទាហាន ដែលពុំមានបទពិសោធនោះទេ។ យើងត្រូវធ្វើឲ្យបទពិសោធប្រយុទ្ធបានផ្ទេរពីនាយទាហាន យោធិនពីមួយជំនាន់ ទៅមួយជំនាន់ទៀត ត្រូវធានាឲ្យបានម្ចាស់ការ។ ហើយនៅកងទ័ពជើងគោកយើងបានធ្វើកិច្ចការនេះច្រើន អគ្គបញ្ជាការ ក្រសួងការពារជាតិ ក៏បានយកចិត្តទុកដាក់ទៅលើការងារនេះ»។សម្ដេចធិបតី ហ៊ុន ម៉ាណែត ក៏បានបញ្ជាក់ថា ការធានានូវសមត្ថភាពបច្ចុប្បន្ន ជាកត្តាសំខាន់ ប៉ុន្តែអ្វីដែលជាកត្តាសំខាន់ គឺការធ្វើឲ្យមាននិរន្តរភាព និងចីរភាព នៃសមត្ថភាព និងការបង្កើនជាប្រចាំនូវសមត្ថភាពការពារជាតិរបស់កងទ័ពទៅថ្ងៃអនាគត រាប់រយឆ្នាំតទៅទៀត នេះគឺជាកិច្ចការចាំបាច់ដែលត្រូវធានា។ បើសិនយើងអាចធានាតែឥឡូវមានមេទាហានមានបទពិសោធប្រយុទ្ធ ហើយមិនបានផ្ទេរនូវជំនាញនេះទេ យើងចប់ហើយ។
សម្តេចធិបតី ហ៊ុន ម៉ាណែតក៏ បានណែនាំបញ្ជាការដ្ឋានកងទ័ពជើងគោកបន្តធ្វើកំណែទម្រង់ពង្រឹងរចនាសម្ព័ន្ធ ពង្រឹងសមត្ថភាពកម្លាំង និងបំពាក់ផ្សេងៗ ដែលការធ្វើកំណែទម្រង់នេះ មិនត្រូវបាត់បង់ស្មារតីលើកតម្កើងកិត្យានុភាពជាតិ។។ ទន្ទឹមនឹងនេះ កងទ័ពជើងគោក ត្រូវបន្តស្រាវជ្រាវហ្វឹកហាត់ ដើម្បីឆ្លើយតបការអភិវឌ្ឍផ្នែកបច្ចេកវិទ្យា និងស្ថានភាពរបស់ពិភពលោក។ទន្ទឹមគ្នានិងការដាក់ចេញកម្មវិធីគំណែទម្រង់ក្នុងស្ថាបន័នានារបស់រាជរដ្ឋាភិបាលតែសម្រាប់កងទព័សម្ដេចធិបតីនាយករដ្ឋមន្ត្រីសង្កត់ធ្ងន់ថា «កំណែទម្រង់កងទ័ព ត្រូវផ្អែកលើមូលដ្ឋាន នៃស្មារតីជាតិនិយម ។ នេះជាកិច្ចការដែលយើងត្រូវធ្វើ កែយ៉ាងម៉េចក៏ដោយ កុំឲ្យបាត់អត្តសញ្ញាណ និងស្មារតីក្នុងការការពារជាតិ ការស្មោះត្រង់ដាច់ខាតចំពោះជាតិ និងប្រជាជន នេះហើយជាមូលដ្ឋាន និងស្មារតីនៃការធ្វើកំណែទម្រង់កងទ័ពរបស់យើង នេះគឺត្រូវធ្វើឲ្យបានការពារជាតិ សាសនា និងព្រះមហាក្សត្រ និងថែរក្សាសុខសន្តិភាព ឲ្យបានជាដាច់ខាត ។
ចឹងកែទម្រង់ទំនើបកម្មយ៉ាងណា ក៏ដោយត្រូវផ្អែកលើមូលដ្ឋាននេះឯង ពង្រឹងកម្លាំងជាតិ ដើម្បីបម្រើប្រទេសជាតិ និងប្រជាជន ការពារឲ្យបានជាដាច់ខាត នូវសុខសន្តិភាព ស្ថេរភាព ជូនប្រទេសជាតិ និងប្រជាជនរបស់យើង» ។សម្ដេចលើកឡើងថា សុខសន្តិភាព ត្រូវថែរក្សាឲ្យបានទោះក្នុងតម្លៃណាក៏ដោយ ហើយស្ថេរភាពសង្គម សន្តិសុខសម្រាប់ពលរដ្ឋ ក៏ជារឿងចាំបាច់ដែលត្រូវតែធ្វើ ដើម្បីធានាបរិស្ថាន ក្នុងការអភិវឌ្ឍជាតិ ប្រកបដោយចីរភាព និងបរិយាប័ន្ន ធ្វើឲ្យពលរដ្ឋមានភាពកក់ក្ដៅ មានលទ្ធភាព ប្រកបរបរចិញ្ចឹមជីវិត និងចូលរួមជាកម្លាំងពលកម្ម របស់ជាតិ ។