សម្តេចធិបតី ហ៊ុន ម៉ាណែត ឡើងជាអនុប្រធានគណបក្សប្រជាជនកម្ពុជា
ភ្នំពេញ៖សម្តេចធិបតីនាយករដ្ឋមន្ត្រី ហ៊ុន ម៉ាណែត ត្រូវសមាជិកគណបក្សប្រជាជនកម្ពុជាបោះឆ្នោតឲ្យឡើងជាអនុប្រធានគណបក្សប្រជាជនដែលមាន សម្តេចតេជោ ហ៊ុន សែន ជាប្រធានគណបក្សនៅព្រឹកថ្ងៃទី១០ ខែធ្នូ ឆ្នាំ២០២៣ ។គណបក្សប្រជាជនកម្ពុជាដែលមានប្រតិភូតំណាងជាង ៣២០០នាក់ បានចូលរួមក្នុងមហាសន្និបាតគណៈកម្មាធិការកណ្តាលលើកទី៤៤ អាណត្តិទី៥ដែលចាប់ផ្តើមពីថ្ងៃទី៩ធ្នូ។ បន្ថែមសម្តេចធិបតីហ៊ុនម៉ាណែតមួយទៀតធ្វើឲ្យអនុប្រធានគណបក្សប្រជាជនកម្ពុជា បានកើនដល់ចំនួន៥រូប រួមមានសម្តេច ស ខេង ។សម្តេច សាយ ឈុំ សម្តេច ទៀ បាញ់ សម្តេច ម៉ែន សំអន និងសម្តេច ហ៊ុន ម៉ាណែត។
មហាសន្និបាតវិសាមញ្ញ័តំណាងគណបក្ស ក៏មានការបោះឆ្នោតជ្រើសតាំងបំពេញបន្ថែមសមាជិកគណៈអចិន្ត្រៃយ៍របស់គណបក្សប្រជាជនកម្ពុជាចំនួន២៣រូបថែមទៀត និងសមាជិកគណកម្មាធិការកណ្តា ថ្មីចំនួន ៤៩៦ នាក់ថែមទៀតធ្វើឲ្យ សមាជិកគណៈកម្មាធិការកណ្តាលគណបក្សប្រជាជនកម្ពុជា បានកើនដល់ ១.៣១២រូប ។សមាជិកគណៈអចិន្ត្រៃយ៍នៃគណបក្សកាន់ប្រជាជនកម្ពុជា ពីមុនមានសរុប៣៦រូប តែស្លាប់ម្នាក់ និងព្យូរតួនាទីម្នាក់ នៅសល់៣៤រូប។ ក្រោយពីបោះឆ្នោតជ្រើសតាំងបំពេញបន្ថែមចំនួន២៣រូប បានធ្វើឲ្យសមាសភាពដឹកនាំក្បាលម៉ាស៊ីនគណបក្សនេះកើនដល់៥៧រូបក្នុងពេលដែលសមាជិកគណបក្សកើនដល់៧លាននាក់។ដោយឡែកសម្រាប់ការងារដឹកនាំមហាសន្និបាតគណៈកម្មាធិការកណ្តាលលើកទី៤៤ អាណត្តិទី៥ (CPP) បានដាក់ទិសដៅបន្តជំរុញដំណើរការកែទម្រង់ស៊ីជម្រៅ ក្នុងវិស័យនានាប្រកបដោយឆន្ទៈមុតស្រួច និងសង្គតិភាព តាមអភិក្រម “ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់”។
សេចក្ដីសម្រេចមហាសន្និបាតវិសាមញ្ញគណកម្មាធិកាកណ្តាល របស់គណបក្សប្រជាជនកម្ពុជា បានឲ្យដឹងថា មហា សន្និបាត បានពិនិត្យពិភាក្សាយ៉ាងល្អិតល្អន់អំពីបញ្ហាប្រឈមនានា នៅក្នុងដំណើរការអភិវឌ្ឍន៍ប្រទេសជាតិ ទាំងកត្តាខាងក្នុង ទាំងកត្តាខាងក្រៅ ហើយបានធ្វើស្វ័យត្រួតពិនិត្យចំពោះចំណុចខ្វះខាតផ្សេងៗ ក្នុងការអនុវត្តគោលនយោបាយ ក៏ដូចក្នុងការកសាងពង្រឹងគណបក្ស។សន្និបាតគណបក្សប្រជាជនកម្ពុជា ក៏បានបេជ្ញារក្សាស្ថិរភាពម៉ាក្រូសេដ្ឋកិច្ច និងហិរញ្ញវត្ថុសាធារណៈ ខិតខំជំរុញកំណើនសេដ្ឋកិច្ចឆ្នាំ ២០២៤ ឲ្យបានសម្រេចតាមការគ្រោងទុក លើមូលដ្ឋានប្រើប្រាស់ដោយឈ្លាសវៃ នូវភាពអំណោយផលនានារបស់កម្ពុជា និងការជំរុញអនុវត្តនូវយុទ្ធសាស្ត្រ និងក្របខណ្ឌគោលនយោបាយនានា របស់រាជរដ្ឋាភិបាល នៅក្នុងវិស័យសេដ្ឋកិច្ចប្រកបដោយប្រសិទ្ធភាព។
លើសពីនេះទៀត មហាសន្និបាតវិសាមញ្ញាគណបក្សប្រជាជនកម្ពុជា ក៏នឹងបន្តជំរុញការអភិវឌ្ឍប្រព័ន្ធជំនួយសង្គម និងប្រព័ន្ធសន្តិសុខសង្គមប្រកបដោយប្រសិទ្ធភាព បរិយាបន្ន និងចីរភាពហិរញ្ញវត្ថុ តាមស្មារតី “មិនបោះបង់ចោលប្រជាពលរដ្ឋណាម្នាក់” និងស្មារតីបុរេសកម្ម សំដៅធានាសន្តិសុខ ប្រាក់ចំណូល និងកាត់បន្ថយភាពងាយរងគ្រោះផ្នែកសេដ្ឋកិច្ច និងហិរញ្ញវត្ថុរបស់ប្រជាជន ជាពិសេសប្រជាជនក្រីក្រ និងងាយរងគ្រោះទាំងនៅទីជនបទ និងទីប្រជុំជន។ ព្រមជាមួយនោះ ជំរុញការអនុវត្តប្រកបដោយប្រសិទ្ធភាព និងប្រសិទ្ធផលនូវកម្មវិធីគោលនយោបាយអាទិភាពទាំង ៦ចំណុច និងកម្មវិធីជំនួយសង្គមផ្សេងៗទៀត ដើម្បីធានាស្ថិរភាព និងលើកកម្ពស់ជីវភាពរបស់ប្រជាជន។
ក្នុងនោះដែរ ក៏នឹងបន្តអភិវឌ្ឍប្រព័ន្ធសុខាភិបាល លើកកម្ពស់សុខុមាលភាពសង្គម និងជំរុញការអភិវឌ្ឍធនធានមនុស្ស បន្តលើកកម្ពស់ជីវភាពរបស់មន្ត្រីរាជការ កងកម្លាំងប្រដាប់អាវុធ និវត្តជន និងអតីតយុទ្ធជន លើកកម្ពស់ការការពារសិទ្ធិ សេចក្តីថ្លៃថ្នូរ និងផលប្រយោជន៍របស់កម្មករ-និយោជិត និងយកចិត្តទុកដាក់ដោះស្រាយបញ្ហានានារបស់អាជីវករ អ្នកលក់ដូរ និងអ្នកប្រកបរបររកស៊ីផ្សេងៗទៀតក្នងសេដ្ឋកិច្ចក្រៅប្រព័ន្ធ៕
