បីក្រសួងរួមគ្នា ចេញប្រកាស ស្តីពីការពង្រីកវិសាលភាព មូលនិធិសមធម៌សុខាភិបាល ដល់គ្រួសារងាយរងហានិភ័យ បន្ទាប់ពីសម្តេចធិបតីប្រកាសផែនការពង្រឹងប្រពន្ធសុខាភិបាល
03-April-2024 / សុខភាពនិងកីឡា
ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ, ក្រសួងសុខាភិបាល និងក្រសួងផែនការ បានចេញប្រកាសអន្តរក្រសួងមួយចុះថ្ងៃទី១៩កញ្ញាឆ្នាំ២០២៣ ស្តីពីការពង្រីកវិសាលភាពមូលនិធិសមធម៌សុខាភិបាល ដល់គ្រួសារងាយរងហានិភ័យ។ ប្រកាសអន្ដរក្រសួងបានឲ្យដឹងថា ប្រកាសនេះ មានគោលបំណងកំណត់ អំពីការពង្រីកវិសាលភាពមូលនិធិសមធម៌សុខាភិបាល ដល់គ្រួសារងាយរងហានិភ័យ ដើម្បីផ្ដល់ការថែទាំសុខភាព។
នៅព្រឹកថ្ងៃអង្គារ ទី២៤ ខែតុលា ឆ្នាំ២០២៣ក្នុងឱកាសអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការ «មន្ទីរពេទ្យជាតិ តេជោសន្តិភាព» និងប្រកាសដាក់ឱ្យអនុវត្តជាផ្លូវការនូវកម្មវិធីទី១ នៃគោលនយោបាយជាអាទិភាពទាំង៦ គឺ «ការពង្រីកវិសាលភាពមូលនិធិសមធម៌ ដល់គ្រួសារងាយរងហានិភ័យ»សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានស្នើឲ្យប្រធានមន្ទីរពេទ្យ វេជ្ជបណ្ឌិត គ្រូពេទ្យ និងបុគ្គលិកសុខាភិបាលទាំងអស់ យកចិត្តទុកដាក់ឱ្យបានខ្ពស់ចំពោះការព្យាបាលអ្នកជំងឺ នៅគ្រប់កន្លែងទាំងអស់ មិនថាអ្នកជំងឺស្ថិតនៅកម្រិតណា ឬមកពីមជ្ឈដ្ឋានណានោះទេ។
សម្ដេចធិបតី ហ៊ុន ម៉ាណែត បានថ្លែងបន្ដថា «ចំពោះការយកចិត្ដទុក្ខដាក់ខ្ពស់បំផុត ដល់ការព្យាបាលអ្នកជំងឺនេះ មិនមែនសម្រាប់តែមន្ទីរពេទ្យជាតិ តេជោសន្ដិភាពនោះទេ គឺសម្រាប់ក្រសួងសុខាភិបាល និងគ្រប់បណ្ដាមន្ទីរពេទ្យ មណ្ឌលសុខភាព និងប៉ុស្ដិ៍សុខភាពគ្រប់កម្រិតទាំងអស់ សូមបង្កើនការយកចិត្ដទុកដាក់បំផុត ដល់ការពង្រឹងគុណភាពនៃការផ្ដល់សេវាសុខាភិបាលរបស់ខ្លួន ទៅដល់ប្រជាជនគ្រប់ៗរូបទាំងអស់។ ជាពិសេសយើងត្រូវធានាថា មន្ទីរពេទ្យរដ្ឋ គឺជាកន្លែងដែលសង្គ្រោះអាយុជីវិតរបស់ប្រជាពលរដ្ឋ ប្រកបដោយគុណធម៌ មេត្ដាធម៌ និងជាទីពឹង ដ៏គួរជាទីទុក្ខចិត្ដរបស់ប្រជាពលរដ្ឋកម្ពុជានៅទូទាំងប្រទេស»។
សម្ដេចធិបតី ហ៊ុន ម៉ាណែត បានបន្ដថា កិច្ចការទាំងអស់នេះត្រូវមានការងារចំនួន៣ គឺទី១៖ ត្រូវមានផែនការគ្រប់ជ្រុងជ្រោយ, ទី២៖ ត្រូវមានវិធានការអនុវត្ដឱ្យបានច្បាស់លាស់ និងទី៣៖ គឺយន្ដការសម្រាប់ការអនុវត្ដប្រកបដោយសមត្ថភាព និងប្រសិទ្ធភាព។
សម្រាប់វិធានខាងលើនេះ សម្តេចធិបតីបានដាក់ចេញអនុសាសន៍សម្រាប់ក្រសួងសុខាភិបាល និងក្រសួងស្ថាប័នពាក់ព័ន្ធ ដែលក្នុងនោះ មានទាំងថ្នាក់ក្រោមជាតិផងនោះ រួមមានដូចតទៅ៖
១៖ ក្រសួងសុខាភិបាល ត្រូវគិតគូរនិងយកចិត្តទុកដាក់ក្នុងការលើកកម្ពស់ គុណភាពសេវាសុខាភិបាល នៅថ្នាក់ក្រោមជាតិ ជាពិសេសពង្រឹងមណ្ឌលសុខភាព និងពេទ្យបង្អែក ផ្តល់សេវាមូលដ្ឋានជូនពលរដ្ឋ ក៏ដូចជាពង្រឹងមន្ទីរពេទ្យខេត្ត ឱ្យក្លាយទៅជាមន្ទីរពេទ្យឈានមុខ ដែលមានសមត្ថភាពខ្ពស់ សមមូលនឹងមន្ទីរពេទ្យនៅរាជធានីភ្នំពេញ នៅក្នុងការពិនិត្យ និងព្យាបាលជំងឺ និងផ្តល់សេវាសុខាភិបាលនានា សំដៅបង្កើនប្រសិទ្ធភាព នៃការផ្តល់សេវាសុខាភិបាលផង និងកាត់បន្ថយ ចំណាយក្នុងការមកទទួលសេវាសុខាភិបាល របស់ប្រជាជនផង។
២៖ សម្តេចលើកទឹកចិត្តឱ្យបន្តកិច្ចសហប្រតិបត្តិការ រវាងបណ្តាក្រសួងស្ថាប័ន ដើម្បីធានាប្រសិទ្ធភាព នៃការអនុវត្តមូលនិធិសមធម៌ សម្រាប់គ្រួសារក្រីក្រ និងគម្រោងបេឡាសន្តិសុខសង្គម ផ្នែកថែទាំសុខភាព ជាពិសេសត្រូវធានាថា គ្មានពលរដ្ឋខ្មែរណាម្នាក់ ត្រូវបានបដិសេធក្នុងការធានាថែទាំសុខភាព ដោយសារតែគ្មានលទ្ធភាពបង់ថ្លៃសេវានោះឡើយ៣៖ ក្រសួងសុខាភិបាល ត្រូវពង្រឹងឱ្យបានជាអតិបរមា នូវយន្តការផ្តល់សេវាសុខាភិបាលទាំងរដ្ឋ និងឯកជន ក៏ដូចជាពង្រឹងការបណ្តុះបណ្តាលជំនាញទាំងផ្នែកសុខាភិបាល និងជំនាញទន់។ សម្តេចសូមលើកទឹកចិត្ត ដល់មន្ត្រីសុខាភិបាល គ្រូពេទ្យ និងបុគ្គលថែទាំវេជ្ជសាស្ត្រទាំងអស់ សូមបង្កើនការយកចិត្តទុកដាក់ខ្ពស់ ជាពិសេស ការធ្វើអទិភាវូបនីយកម្មលើការសង្គ្រោះជីវិតមនុស្សលើពីអ្វីៗទាំងអស់ ហើយប្រកាន់ខ្ជាប់ នូវក្រមសីលធម៌អាជីព ព្រោះថាអាជីពជាចម្បងរបស់អ្នកទាំងអស់ គឺការសង្គ្រោះជីវិតប្រជាពលរដ្ឋទូទៅ ដែលតម្រូវឱ្យមានការព្យាបាលប្រកបដោយទឹកចិត្តបរិសុទ្ធ គោរពស្រលាញ់អ្នកជំងឺ និងអ្នកជំងឺសុខាភិបាល ដូចជាសមាជិកក្រុមគ្រួសាររបស់ខ្លួន។
៤៖ ក្រសួងសុខាភិបាល ត្រូវសហការជាមួយក្រសួងស្ថាប័នពាក់ព័ន្ធ ជាពិសេសក្រសួងពាណិជ្ជកម្ម ក្រសួងមហាផ្ទៃ ក្រសួងអប់រំយុវជន និងកីឡា អគ្គនាយកដ្ឋានគយ និងរដ្ឋាករកម្ពុជា ក៏ដូចជា ក្រសួងស្ថាប័នពាក់ព័ន្ធដទៃទៀត រួមគ្នាកំណត់សកម្មភាពជាក់លាក់ដើម្បីទប់ស្កាត់ និងពង្រឹងការគ្រប់គ្រង ការផលិត ការកែច្នៃ ការនាំចូលម្ហូបអាហារ និងថ្នាំសង្កូវ ដែលមានផលប៉ះពាល់អវិជ្ជមានដល់ប្រជាជនយើង។ យន្តការអន្តរក្រសួងនេះ ក៏ត្រូវជំរុញការផ្សព្វផ្សាយ និងការអប់រំលើម្ហូបអាហារ គ្រឿងបរិភោគ ដែលប៉ះពាល់ ជាអវិជ្ជមានទាំងនោះ ព្រោះយើងមិនចង់សុខភាពប្រជាពលរដ្ឋរបស់យើង រងផលប៉ះពាល់ ដោយសារម្ហូបអាហារ និងថ្នាំសង្កូវនោះទេ។
៥៖ ក្រសួងសុខាភិបាល ត្រូវសហការជាមួយក្រសួងប្រៃសណីយ៍ និងទូរគមនាគមន៍ ក្នុងក្របខណ្ឌ នៃគណៈកម្មការរដ្ឋាភិបាលឌីជីថល ពន្លឿនការប្រើប្រាស់ប្រព័ន្ធឌីជីថល នៅក្នុងវិស័យសុខាភិបាលទាំងមូល ជាពិសេសនៅគ្រប់មន្ទីរពេទ្យទាំងថ្នាក់ជាតិ និងក្រោមជាតិ ព្រមទាំងជំរុញការបណ្តុះបណ្តាល ឱ្យវេជ្ជបណ្ឌិតគ្រូពេទ្យ និងមន្ត្រីសុខាភិបាល ឱ្យចេះប្រើប្រាស់បច្ចេកវិទ្យាផ្នែកសុខាភិបាលឱ្យបានទូលំទូលាយ។
៦៖ សម្តេចស្នើដល់ក្រសួងសុខាភិបាល សហការជាមួយក្រសួងស្ថាប័នពាក់ព័ន្ធដទៃទៀត តាមរយៈ ក្រុមប្រឹក្សាជាតិគាំពារសង្គម ដើម្បីពន្លឿនការដាក់ចេញនូវផែនទីបង្ហាញផ្លូវឆ្ពោះ ទៅការគ្របដណ្តប់សុខភាព ជាសកលនៅកម្ពុជា។ ផែនទីបង្ហាញផ្លូវនេះចាំបាច់ត្រូវមានសុគតភាព ជាមួយ ក្របខណ្ឌគោលនយោបាយ និងយុទ្ធសាស្ត្រដទៃទៀត ជាពិសេស យុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ដែលទើបបាន ដាក់ចេញ ហើយអាទិភាពចម្បងបំផុតត្រូវផ្តល់ទៅលើការសម្របសម្រួលការលំបាករបស់ប្រជាជន ខណៈដែលពួកគាត់ទទួលបានសេវាសុខាភិបាលមួយប្រកបដោយគុណភាព។
សូមជម្រាបថា មន្ទីរពេទ្យជាតិ «តេជោសន្តិភាព» គឺជាមន្ទីពេទ្យដ៏ធំជាងគេបំផុតនៅក្នុងប្រទេសកម្ពុជា ដែលបានចាប់ផ្តើមសាងសង់ កាលពីថ្ងៃទី២៨ ខែមីនា ឆ្នាំ២០២២ ដោយក្រុមហ៊ុន ស៊ីជេអ៉ីស៊ី CJEC co,Ltd សហការជាមួយសាលារាជធានី ភ្នំពេញ នៅលើផ្ទៃដីប្រមាណ ៧.៥៨ហិកតា ជាប់វិថីឈ្នះឈ្នះ ស្ថិតក្នុងសង្កាត់គោករកា ខណ្ឌ ព្រែកព្នៅ រាជធានីភ្នំពេញ។ មន្ទីរពេទ្យជាតិនេះ មានគ្រែសរុបទាំងអស់ចំនួន ៩,៤៩៦គ្រែ ក្នុងនោះគ្រែសម្រាកព្យាបាលសម្រាប់អ្នកជំងឺមានចំនួនសរុប ៩,២៤៤គ្រែ គ្រែសម្រាប់គ្រូពេទ្យប្រចាំការចំនួន ៤៦គ្រែ និងគ្រែសម្រាប់បុគ្គលិកស្នាក់នៅចំនួន២០៦គ្រែ៕
