វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 2285 នាក់
ម្សិលមិញ 6359 នាក់
សរុប 14088918 នាក់
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានសម្រេចលើសំណើររបស់លោកស្រី ឱ វណ្ណឌីន ប្រធានគណៈកម្មការចំពោះកិច្ច សម្រាប់ការចាក់វ៉ាក់សាំង នៅទូទាំងប្រទេស គឺដូសជំរុញទី៥ នឹងត្រូវចាប់ផ្តើមចាក់ ចាប់ពីថ្ងៃទី៩ ខែមិថុនា ឆ្នាំ២០២២តទៅ សម្រាប់អ្នកដែលបានចាក់ដូសទី៤រួចរាល់ ដែលមានគម្លាតពីដូសទី៤ ទៅដូសទី៥ យ៉ាងតិច៣ខែ។
សារសម្លេងរបស់សម្តេចតេជោ ហ៊ុន សែន ផ្ញើជូនជនរួមជាតិ នៅល្ងាចថ្ងៃទី២០ ខែឧសភា ឆ្នាំ២០២២ មុននឹងសម្តេចអញ្ជើញចាកចេញពីកម្ពុជា ឆ្ពោះទៅកាន់ប្រទេសស្វីស បានឱ្យដឹងថា គណៈកម្មការចំពោះកិច្ចចាក់វ៉ាក់សាំង បានលើកជាផែនការចំពោះអ្នកដែលបានចាក់ដូសទី៤រួចហើយ ក្នុងនោះមានមន្ត្រី អ្នកការទូត អ្នកសារព័ត៌មាន សិល្បៈករ សិល្បៈការិនី និងពិធីករ ពិធិការិនី។ ការនេះ គណៈកម្មការចំពោះកិច្ច សម្រាប់ការចាក់សាំង នឹងផ្តល់ព័ត៌មានលម្អិត ទាក់ទងនឹងទីកន្លែងសម្រាប់ការចាក់ សម្រាប់មន្ត្រីរាជការ កម្លាំងប្រដាប់អាវុធ ជាពិសេសមន្ត្រីអង្គការសហប្រជាជាតិ និងស្ថានទូតនានា បុគ្គលិកអង្គការជាតិ និងអន្តរជាតិ ហើយក៏ផ្តល់ព័ត៌មានផងដែរ ដល់អ្នកសារព័ត៌មាន សមាគមសិល្បៈករកម្ពុជា ក្នុងរាជធានីភ្នំពេញ។
សម្តេចតេជោ ក៏បានអំពាវនាវដល់ប្រជាពលរដ្ឋ បន្តរក្សានូវស្ថានភាពដ៏ល្អប្រសើរនេះ តាមរយៈការការពារខ្លួន ចំពោះមុខការរាតត្បាត នៃជំងឺដែលមិនទាន់បានបញ្ចប់ ជាមួយនឹងការទទួលយកវ៉ាក់សាំង។ ចំពោះប្រជាពលរដ្ឋដែលទទួលបានដូសទី២រួចហើយ ត្រូវទៅទទួលយកដូសទី៣ ហើយដូសទី៤នឹងបន្ត។ អ្នកដែលនឹងត្រូវចាក់ដូសទី៥ មិនមានចំនួនដល់៥០ម៉ឺននាក់នោះទេ។សម្តេចតេជោ ក៏មានប្រសាសន៍ដែរថា នៅថ្ងៃទី២០ ខែឧសភាជាថ្ងៃទី១៤ជាប់ៗគ្នាហើយ ដែលកម្ពុជាមិនមានករណីវិជ្ជមានជំងឺកូវីដ-១៩។ ក្នុងពេលជាមួយគ្នានោះ អ្នកជំងឺកូវីដ-១៩ នៅតាមមន្ទីរពេទ្យនានា មានត្រឹមតែ៨នាក់ប៉ុណ្ណោះ ក្នុងនោះនៅរាជធានីភ្នំពេញ៤នាក់ និងនៅខេត្តបាត់ដំបងចំនួន ៤នាក់។
អ្នកជំងឺទាំង៨នាក់នេះ មានជំងឺផ្សេងៗ តម្រូវឲ្យទទួលការព្យាបាលបន្ត នៅក្នុងមន្ទីរពេទ្យ មិនមែនជាមូលហេតុតែមួយគត់ ទាក់ទងនឹងការឆ្លងជំងឺកូវីដ-១៩ នោះទេ។ នេះជាព័ត៌មានដ៏ល្អ ខណៈកាលពីពេលមុននោះ កម្ពុជាមានអ្នកជំងឺកូវីដ-១៩ ជាង២ម៉ឺននាក់ ដែលអាចចាត់ទុកថា ជាលទ្ធផលនៃការខិតខំរបស់កម្ពុជា ជាពិសេសប្រជាពលរដ្ឋ ចេះការពារខ្លួនតាមរយៈវិធានសុខាភិបាល និងតាមរយៈការទទួលយកវ៉ាក់សាំង។
សម្តេចតេជោ បានសង្កេតឃើញដូចទៅនឹងថ្នាក់ដឹកនាំក្រសួងសុខាភិបាលដែរថា ក្រោយពីប្រជាពលរដ្ឋទទួលបានវ៉ាក់សាំងបង្ការជំងឺកូវីដ-១៩ មិនគ្រាន់តែជំងឺកូវីដ មានការថយចុះប៉ុណ្ណោះទេ ជំងឺផ្សេងៗដែលធ្លាប់បានកើតឡើងកាលពីពេលមុន មុនពេលទទួលបានវ៉ាក់សាំង ដូចជាជំងឺផ្តាសាយធំជាដើម ក៏មានការថយចុះផងដែរ។ នេះជាឥទ្ធិពលនៃវ៉ាក់សាំង ដែលប្រជាពលរដ្ឋទទួលបានកន្លងទៅ តាមរយៈយុទ្ធនាការចាក់វ៉ាក់សាំង ដែលគិតមកដល់ពេលនេះ កម្ពុជាបានចាក់ជាង១៥លាននាក់ ក្នុងចំណោម១៦លាននាក់។សម្តេច បញ្ជាក់ថា វ៉ាក់សាំងមិនត្រឹមតែទប់ស្កាត់មិនឲ្យឆ្លងកូវីដនោះទេ ក៏ប៉ុន្តែក៏បានជួយមិនឲ្យមានជំងឺរាតត្បាតផ្សេងៗទៀត។