នគរបាលរាជធានីភ្នំពេញ ចុះចែកម៉ាស់ជូនប្រជាពលរដ្ឋ ដើម្បីបង្ការទប់ស្កាត់ជំងឺឆ្លងកូវីដ១៩
21-September-2026 / សុខភាពនិងកីឡា
ភ្នំពេញ ៖ ម៉ាស់ចំនួន៥ម៉ឺនម៉ាស់ដែលជាការឧបត្ថម្ភ របស់រដ្ឋបាលរាជធានីភ្នំពេញ ត្រូវបានកម្លាំងនគរបាលរាជធានីភ្នំពេញ ចែកជូនប្រជាពលរដ្ឋដើម្បីពាក់ប្រើប្រាស់បង្ការទប់ស្កាត់ជំងឺឆ្លងកូវីដ១៩ ខណៈដែលការរីករាលដាលជំងឺឆ្លងកូវីដ១៩ បានឆ្លងចូលសហគមន៍ រាធានីភ្នំពេញ ក្នុងព្រឹត្តិការណ៍២០ កុម្ភៈ ។
លោក ឧត្តមសេនីយ៍ឯក ស ថេត អគ្គស្នងការរងនគរបាលជាតិនិងជាស្នងការនគរបាលរាចធានីភ្នំពេញ និងលោក លោកស្រីស្នងការរងបានដឹកនាំការចែកម៉ាសរយៈពេល០១ថ្ងៃពេញនៅថ្ងៃទី២៣ ខែកុម្ភៈ ឆ្នាំ២០២១ នៅតាមគោលដៅជាច្រើនបណ្តាខណ្ឌទាំង១៤។ លោកលោកស្រីស្នងការរង និងលោកអធិការនគរបាលខណ្ឌទាំង១៤ ក៏បានណែនាំប្រជាពលរដ្ឋត្រូវពាក់ម៉ាស់ឱ្យបានគ្រប់គ្នា និងសំណូមពរឱ្យបងប្អូនប្រជាពលរដ្ឋត្រូវប្រុងប្រយ័ត្នជានិច្ចពីជំងឺឆ្លងកូវីដ១៩ ។ជាពិសេសត្រូវអនុវត្តវិធានការណ៍របស់ក្រសួងសុខាភិបាលឱ្យបានខ្ជាប់ខ្ជួន ដូចជានៅឃ្លាតឆ្ងាយពីគម្លាតសុវត្ថិភាព, ត្រូវពាក់ម៉ាស់ជាប់ជាប្រចាំ កុំចេញក្រៅផ្ទះបើគ្មានការចាំបាច់, លាងដៃនឹងសាប៊ូ អាល់កុលឱ្យបានញឹកញាប់។
សូមបញ្ជាក់ថា៖ ម៉ាសរបស់សម្ដេចអគ្គមហាសេនាបតីជោហ៊ុន សែន ដែល លោកឃួង ស្រេងប្រគល់ជូនជាលើកទី២ក្នុងព្រឹត្តិ ការណ៍សហគមន៍២០ កុម្ភៈនេះ រួមមាន៖ ប្រគល់ជូន១៤ខណ្ឌ ក្នុង១ខណ្ឌទទួលបានម៉ាស១៤០០០ម៉ាស សង្កាត់ទាំង១០៥ ក្នុង១ សង្កាត់ទទួលបានម៉ាស២០០០ម៉ាស សហគមន៍ក្រីក្រនៅទូទាំងរាជធានីភ្នំពេញចំនួន១២៤០០០ម៉ាសប្រគល់ជូននគរបាលរាជធានីភ្នំពេញចំនួន៥ម៉ឺនម៉ាស កងរាជអាវុធ ហត្ថ៣ ម៉ឺនម៉ាសនិងនៅតាមផ្សារនានាទាំង ២៥ផ្សារ ក្នុងមួយផ្សារទទួលបាន៤៥០០ម៉ាស។
លោកឃួង ស្រេង ក៏បានសូមឱ្យអាជ្ញាធរខណ្ឌ សង្កាត់ កម្លាំងមានសមត្ថកិច្ចត្រូវចែកម៉ាសទាំងនេះឱ្យដល់ដៃប្រជាពលរដ្ឋក្រីក្រ ដើម្បីរួមគ្នាទប់ស្កាត់នូវការរីករាលដាលជំងឺកូវីដ-១៩ ក្នុងព្រឹត្តិការណ៍សហគមន៍២០ កុម្ភៈនេះ អោយទទួលបានជោគជ័យ។គិតត្រឹមរសៀលថ្ងៃទី២៣ ខែកុម្ភៈ ឆ្នាំ២០២១នេះ ទីតាំងដែលមានការពាក់ព័ន្ធនឹងព្រឹត្តិការណ៍ «សហគមន៍២០កុម្ភៈ» រហូតដល់៤៧ទីតាំងហើយ ក្នុងនោះទីតាំងមួយចំនួនត្រូវបានបិទជាបណ្ដោះអាសន្ន ហើយបញ្ជូនមនុស្សទាំងអស់នោះ ទៅពិនិត្យសំណាក និងធ្វើចត្តាឡីស័ករយៈពេល១៤ថ្ងៃ តាមការកំណត់របស់ក្រសួងសុខាភិបាល។
ក្រសួងសុខាភិបាល បានអំពាវនាវ និងក្រើនរំលឹកសាជាថ្មីម្ដងទៀត សូមបងប្អូនប្រជាពលរដ្ឋទាំង អស់នៅទូទាំងប្រទេស និងជាពិសេសអ្នករស់នៅក្នុងរាជធានីភ្នំពេញ និងខេត្តកណ្ដាល ត្រូវប្រកាន់យកនូវការប្រុង ប្រយ័ត្នខ្លួនជាប់ជានិច្ច គ្រប់គ្រងក្រុមគ្រួសារឲ្យបានល្អ និងចូលរួមអនុវត្តវិធានការការពារខ្លួនឲ្យបានខ្ជាប់ខ្លួនគ្រប់ៗគ្នា។
ក្រសួងសុខាភិបាលបន្តថា តាមការរុករកស្រាវជ្រាវ បានបង្ហាញថា ស្ថានភាពនៃការចម្លងក្នុងសហគមន៍នាពេលនេះ មានលក្ខណៈធំជាង និងសាំញ៉ាំជាងព្រឹត្តិការណ៍សហគមន៍ ២៨វិច្ឆិកា២០២០ ហើយវិធានការ និងអន្តរាគមន៍នានា បានដាក់ចេញជាបណ្ដើរ រៗ គឺអាស្រ័យទៅតាមស្ថានភាពនៃការរកឃើញវត្តមានវីរុសកូវីដ-១៩ នៅតាមទីតាំងនីមួយៗ (Localized interventions) ដើម្បីទប់ស្កាត់ការចម្លងបន្តនូវវីរុសកូវីដ-១៩ នៅក្នុងសហគមន៍ទ្រង់ទ្រាយធំធេង។ ក្រសួងសុខាភិបាល សូមធ្វើការអំពាវនាវដល់បងប្អូនប្រជា ពលរដ្ឋទាំងអស់ សហការសាមគ្គីភាពគ្នា ជួយគ្នាទៅវិញទៅមក ចូលរួមអនុវត្តន៍ដោយម៉ឺងម៉ាត់នូវការដាក់ ចេញនូវវិធានការសុខាភិបាល។
គួរជម្រាបថា គិតត្រឹមម៉ោង៧៖០០នាទីព្រឹកថ្ងៃទី២៣ ខែកុម្ភៈ ឆ្នាំ២០២១នេះ កម្ពុជារកឃើញអ្នកឆ្លងកូវីដ១៩ ថ្មីចំនួន៥៩៣នាក់ ក្នុងនោះអ្នកជាសះស្បើយចំនួន ៤៧៥នាក់ និងអ្នកជំងឺចំនួន ១១៦នាក់កំពុងសម្រាកនៅមន្ទីរពេទ្យ ក្នុងនោះឆ្លងក្នុងសហគមន៍២០កុម្ភៈ កើនឡើង៩៩ករណី។ ដោយឡែក នៅព្រឹកថ្ងៃទី២៣ ខែកុម្ភៈឆ្នាំ២០២១ ក្រសួងសុខាភិបាលបានប្រកាសរកឃើញអ្នកមានវិជ្ជមានកូវីដ-១៩ ថ្មីចំនួន ២៥នាក់ និងគ្មានអ្នកជាសះឡើយ។ដោសាការឆ្លងជាសហគមន៍ កើតមានជាលក្ខណៈទ្រង់ទ្រាយធំនៅរាជធានីភ្នំពេញ និងខេត្តកណ្ដាល រដ្ឋាភិបាលបាន បិទសាលាចំនួនពីរសប្តាហ៍ នៅរាជធានីភ្នំពេញនិងខេត្តកណ្ដាល។ ក្រៅពីនោះ រោងភាពយន្ត សារមន្ទីរ វគ្គបណ្ដុះបណ្ដាលផ្សេងៗ ក៏ត្រូវបានផ្អាកជាបណ្ដោះអាសន្នផងដែរ៕
