កម្ពុជា ជំរុញឱ្យសមាជិកអាស៊ាន ត្រូវបន្តរួមគ្នាដើម្បីប្រឆាំងអំពើពុករលួយ
សៀមរាប៖ លោក កិត្តិនីតិ កោសលបណ្ឌិត ទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ និងជាប្រធានស្ថាប័នប្រឆាំងអំពើពុករលួយអាស៊ាន (អាស៊ាន-ផេក) បានជំរុញឱ្យសមាជិកនៃកិច្ចប្រជុំអាស៊ាន-ផេក បន្តធ្វើការរួមគ្នា ដើម្បីប្រឆាំងអំពើពុករលួយនៅតាមបណ្ដាប្រទេសរបស់ខ្លួន។
ក្នុងពិធីបើកនៃកិច្ចប្រជុំលេខាធិការដ្ឋានអាស៊ាន-ផេក (ASEAN-PAC) នាព្រឹកថ្ងៃទី១៦ ខែសីហា ឆ្នាំ២០២៣ នៅសណ្ឋាគារសូភីតែលអង្គរភូគីត្រា ខេត្តសៀមរាប លោក កិត្តិនីតិ កោសលបណ្ឌិត ទេសរដ្ឋមន្ត្រី ឱម យ៉ិនទៀង បញ្ជាក់ថា កម្ពុជាតែម្នាក់ឯងមិន អាចដោះស្រាយបញ្ហានេះបាននោះទេ គឺតម្រូវឱ្យមានកិច្ចសហការ និងការជួយគ្នាទៅវិញទៅមកពីបណ្តាប្រទេសជាមិត្តនិងជាបងប្អូន។ អនុលោម តាម ASEAN-PAC MoU និងផ្អែកលើស្មារតីចែករំលែកក្នុងនាមជាបងប្អូនក្នុងគោលដៅរួមគ្នាប្រឆាំងអំពើ ពុករលួយនៅក្នុងប្រទេសនីមួយៗរបស់ខ្លួន និងលទ្ធភាពឈានទៅជួយ និងគាំទ្រគ្នាទៅវិញទៅមក ផ្អែកទៅតាមបរិបទ និងលទ្ធភាពនៃកិច្ចសហប្រតិបត្តិការដូចមានចែងនៅក្នុង ASEAN-PAC MoU។
សម្រាប់ការរៀបចំលោក កិត្តិនីតិ កោសលបណ្ឌិត ទេសរដ្ឋមន្ត្រី វាយតម្លៃថា «ពេលនេះជាថ្មីម្តងទៀតគឺជាកិត្តិយសដ៏ធំធេង សម្រាប់អង្គភាពប្រឆាំងអំពើពុករលួយ នៃព្រះរាជាណាចក្រកម្ពុជា ដែលបានទទួលធ្វើជាម្ចាស់ផ្ទះរៀបចំកិច្ចប្រជុំលេខាធិការដ្ឋាន នៃស្ថាប័នប្រឆាំងអំពើពុករលួយអាស៊ាន (អាស៊ាន-ផេក) លើកទី១៩ បន្ទាប់ពីកិច្ចប្រជុំថ្នាក់ដឹកនាំអាស៊ាន-ផេកលើកទី១៨ ដែលបានប្រព្រឹត្តទៅនៅរាជធានីភ្នំពេញកាលពីថ្ងៃទី២២-២៣ ខែវិច្ឆិកា ឆ្នាំ២០២២កន្លងទៅ។
លោកទេសរដ្ឋមន្ត្រី ឱម យ៉ិនទៀង ឲ្យដឹងថាកិច្ចប្រជុំលេខាធិការដ្ឋានអាស៊ាន-ផេក លើកទី១៩ នៅពេលនេះ និងពិនិត្យ ពិភាក្សា និងធ្វើការរៀប ចំកិច្ចការនៅសេសសល់ពីកិច្ចប្រជុំថ្នាក់ដឹកនាំអាស៊ាន-ផេកលើកទី១៨ កាលពីថ្ងៃទី២២-២៣ ខែវិច្ឆិកា ឆ្នាំ ២០២២ និងដើម្បីត្រៀមរៀបចំនូវរបៀបវារៈ ក៏ដូចជាការអនុវត្តការងាររបស់អាស៊ាន-ផេក សម្រាប់កិច្ចប្រជុំថ្នាក់ដឹកនាំអាស៊ាន-ផេក បន្ទាប់ទៀត។ កិច្ចប្រជុំលេខាធិកាដ្ឋានអាស៊ាន-ផេក គឺគាំទ្រដល់សកម្មភាព និងជួយជំរុញឱ្យសម្រេចបាននូវពហុគោលបំណងរបស់អាស៊ាន-ផេក ស្របតាមឯកសារគោលដែលបានកំណត់អំពី បែបបទនៃដំណើរការការងាររបស់អាស៊ាន-ផេក។
លោក កិត្តិនីតិ កោសលបណ្ឌិត ទេសរដ្ឋមន្ត្រី ឱម យ៉ិនទៀង បានបន្តទៀតថា អាស៊ាន-ផេក ក៏ត្រូវបន្តអភិវឌ្ឍខ្លួនទៅមុខទៀត តាមរយៈការរៀបចំតាក់តែងឯកសារសំខាន់ៗ ទាក់ទងនឹងដំណើរការវិវត្តនិងការប្រព្រឹត្តទៅរបស់អាស៊ាន-ផេក ដែលឆ្លុះបញ្ចាំង តាមរយៈការពិភាក្សាទៅ លើសកម្មភាពមួយរបស់អាស៊ាន-ផេក គឺការតាក់តែងជាសេចក្ដីព្រាងកូនសៀវភៅអេឡិចត្រូនិករបស់អាស៊ាន-ផេក (ASEAN-PAC E-Booklet) ដែលកិច្ចប្រជុំថ្នាក់ដឹកនាំអាស៊ាន-ផេក បានប្រគល់ជូនទៅកិច្ចប្រជុំលេខាធិការដ្ឋាននាពេលនេះដើម្បីបន្តពិនិត្យ និងពិភាក្សារៀបចំ។លោកទេសរដ្ឋមន្ត្រីយល់ថា ការចែករំលែកបទពិសោធន៍ និងកិច្ចសហប្រតិបត្តិការរវាងភាគីអាស៊ាន-ផេកទាំងអស់ ការបន្តចូលរួមយ៉ាងសកម្មជាមួយនឹងកម្មវិធីឬព្រឹត្តិការណ៍ របស់អាស៊ាន និងការចូលរួមក្នុងព្រឹត្តិការណ៍ពាក់ព័ន្ធដទៃទៀត ព្រមទាំងកិច្ចសហការលើការងារបណ្តុះប ណ្តាលសមត្ថភាពជាមួយភាគីជាដៃគូទៅតាមការឯកភាពរបស់អាស៊ាន-ផេក នៅតែជាការងារដ៏មានសារសំខាន់។
