អភិបាលខេត្តកំពង់ឆ្នាំង និងក្រុមការងារថ្នាក់ជាតិចុះចែកប្លង់ដីនៅមូលដ្ឋានស្រុកកំពង់លែង ជូនប្រជាពលរដ្ឋ
03-April-2024 / សេដ្ឋកិច្ច
ខេត្តកំពង់ឆ្នាំង ៖ ប្លង់ដីលំនៅឋានចំនួន ៤៥៣ប័ណ្ណ របស់ពលរដ្ឋនៅ ស្រុកកំពង់លែង ខេត្តកំពង់ ឆ្នាំង ត្រូវបានលោក សឹង សំ ណាង ប្រធានក្រុមការងារជាតិថ្នាក់កណ្ដាលចុះមូលដ្ឋានស្រុកកំពង់លែង និងអភិបាលខេត្តកំពង់ឆ្នាំង លោក ស៊ុន សុវណ្ណារិទ្ធិ ចុះចែកជូនពលរដ្ឋដោយផ្ទាល់នៅថ្ងៃទី១៨ ខែកក្កដា ឆ្នាំ២០២៣ ។ ពលរដ្ឋដេលទទួលបានប័ណ្ឌលំនៅឋាន នៅថ្ងៃនេះ មានចំនួន ៤៣០គ្រួសារ នៅក្នុងភូមិប៉ប្រក និងភូមិសំរោងសែន ឃុំសំរោងសែន ស្រុកកំពង់លែង។
លោកសឹងសំណាងបានលើកឡើងថា កន្លងមកដីលំនៅឋានជាង ១៨ហិចតា នៅក្នុងឃុំសំរោងសែននេះ គឺស្ថិតនៅក្នុងដីតំបន់ ៣ របស់រដ្ឋដែលពុំអាចឲ្យជំនាញ និងអាជ្ញាធរចេញប្លង់រឹងបានឡើយ ។ ប៉ុន្តែក្រោយពីអន្តរក្រសួងនិងអាជ្ញាធរដែនដីចុះពិនិត្យជាក់ស្ដែងកន្លងមក ប្រមុខរាជរដ្ឋាភិបាលបានសម្រេចកាត់ឆ្វៀលដីលំ នៅឋានជាង ១៨ហិចតានេះពីតំបន់ ៣ មកជាតំបន់១វិញ ទើបអាជ្ញាធរស្រុកខេត្ត និងជំនាញចុះវាស់វែងតាមនីតិវិធី និងបានចេញប័ណ្ណរឹងប្រគល់ជូនប្រជាពលរដ្ឋធ្វើជាកម្មសិទ្ធិស្របច្បាប់ ។ លោកបានថ្លែងទៀតថា ក្រោយពីពលរដ្ឋបានទទួលប័ណ្ឌនេះហើយ ប្រជាពលរដ្ឋអាចចែកកូនចែកចៅធ្វើជាមរតក និងក៏អាចលក់ដូរស្របច្បាប់ផងដែរ ។ ហើយនៅក្រោយពេលបោះឆ្នោតរួច ក្រុមការងារនឹងធ្វើការកាត់ឆ្វៀលដីកសិកម្មពីតំបន់៣ ជូនប្រជាពលរដ្ឋបន្តទៀត។
លោក ស៊ុន សុវណ្ណារិទ្ធិ បាន ឲ្យដឹងដែរថា សម្រាប់ខេត្តកំពង់ឆ្នាំង ប្រមុខរាជរដ្ឋាភិបាលបានអនុញ្ញាតឲ្យកាត់ឆ្វៀលដីតំបន់៣ និងតំ បន់២ ជាង ៦ម៉ឺនហិចតា ចេញប័ណ្ណកម្មសិទ្ធិជូនប្រជាពលរដ្ឋជាង ៦ម៉ឺនគ្រួសារ ដែលមន្ត្រីជំនាញកំពុងតែចុះពិនិត្យវាស់វែងជាលក្ខណៈប្រព័ន្ធសព្វថ្ងៃនេះ ដើម្បីធ្វើប័ណ្ណរឹងត្រៀមចែកជូនប្រជាពលរដ្ឋ ។ ជាក់ស្ដែងថ្ងៃនេះ ប្រជាពលរដ្ឋចំនួន ៤៣០គ្រួសារ នៅក្នុងឃុំសំរោងសែន និងទទួលបានប្លង់រឹង លើដីលំនៅដ្ឋានរបស់ខ្លួនចំនួន ៤៥៣ប័ណ្ណ។ នេះគឺជាការយកចិត្តទុកដាក់របស់សម្ដេចតេជោ ហ៊ុន សែន ប្រមុខរាជរដ្ឋាភិបាល ចំពោះប្រជាពលរដ្ឋទូទៅ ដោយមិនប្រកាន់និន្នាការនយោបាយអ្វីនោះឡើយ ។ ដូចនេះ ដើម្បីឆ្លើយតបចំពោះរាជរដ្ឋាភិបាល ប្រជាពលរដ្ឋទាំងអស់គ្នាត្រូវនាំគ្នាទៅបោះឆ្នោតឲ្យបានគ្រប់គ្នា នៅថ្ងៃទី២៣ ខែកក្កដាខាងមុខនេះ ដើម្បីជ្រើសរើសតំណាងរាស្ត្រ អាណត្តិទី៧ និងដើម្បីបង្កើតរាជមរដ្ឋាភិបាលដឹកនាំប្រទេសជាតិឲ្យទទួលបានសុខសន្តិភាព និងមានការអភិវឌ្ឍលើគ្រប់វិស័យជាបន្តទៀត។
ប្រធានមន្ទីរដែនដីនគររូបបនីយកម្មសំណង់ និងសុរិយោដី លោក លី សុភា ដែលបានចូលរួមក្នុង ឱកាសនោះដែរ បានឲ្យដឹងថា ការងារវាស់វែងដីធ្លីគិតមកដល់ពេលនេះ មន្ទីរបានចុះវាស់វែងដីជូនប្រជាពលរដ្ឋចំនួន៣២ម៉ឺន ១៦១ក្បាលដី ស្មើនិង ៤៦% នៃចំនួនប៉ាន់ស្មានក្បាលដីសរុប នៅក្នុងខេត្តកំពង់ឆ្នាំង មានចំនួនប្រមាណ ៧០ម៉ឺនក្បាលដី។ដោយឡែកតាមការសម្រេចដ៏ខ្ពង់ខ្ពស់របស់ប្រមុខរាជរដ្ឋាភិបាលខេត្តកំពង់ឆ្នាំង ត្រូវធ្វើការកាត់ឆ្វៀលដីតំបន់៣ មកតំបន់១ មានចំនួន ៩៩៤ហិចតា និងកាត់ឆ្វៀលលពីដីតំបន់២ មកតំបន់១ មាន ចំនួន ៤ម៉ឺន ៦ពាន់ ៧០៤ហិចតា ដើម្បីចេញប័ណ្ណជូនប្រជាពលរដ្ឋកាន់កាប់ជាកម្មសិទ្ធិស្របច្បាប់ ។ចំពោះឃុំសំរោងសែន ស្រុកកំពង់លែងមកដល់ពេលនេះមន្ទីរបានចេញប័ណ្ណរឹងលើដីលំនៅឋានជូនប្រជាពលរដ្ឋបានចំមនួន ៤៥៣ប័ណ្ណ គឺនៅក្នុងភូមិសំរោងសែន ចំនួន ២០៩ប័ណ្ណ និងភូមិប៉ប្រក ចំនួន២១៩ប័ណ្ណ ។
