សម្តេចតេជោអះអាងថា៖កម្ពុជាមិនធ្លាក់ចូលក្នុងអន្ទាក់បំណុលរបស់ចិនឡើយ
18-April-2024 / សេដ្ឋកិច្ច
ភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា បានប្រកាសថា កម្ពុជាមិនអាចធ្លាក់ ក្នុងអន្ទាក់បំណុល របស់ចិនឡើយ ខណៈប្រទេសមួយចំនួនជំពាក់បំណុល បរទេសរហូតទៅដល់ ២០០% ៣០០% ៥០០% នៃចំនួនGDP។ 
ថ្លែងក្នុងសន្និសីទសារពត៍មាន នៅប្រទេសជប៉ុននាថ្ងៃទី៣០ ខែឧសភា ឆ្នាំ២០១៩ សម្ដេចតេជោ ហ៊ុន សែន មានប្រសាសន៍ថា “ខ្ញុំបានលឺគេនិយាយរឿងនេះយ៉ាងច្រើនថាកម្ពុជាអាចនឹងទៅធ្លាក់ក្នុងអន្ទាក់បំណុលរបស់ចិន។ និយាយមួយបែប មិនមែនគ្រាន់តែជាបញ្ហាទំនាក់ទំនងរវាង ផ្លូវមួយមួយខ្សែក្រវាត់មួយទេ។ ក៏ប៉ុន្ដែខ្ញុំអាចបញ្ជាក់បានថាមិនដល់កម្រិតនោះទេប្រទេសខ្លះជំពាក់បំណុលគេរហូតទៅដល់២០០% ឬ៣០០% ឬ៥០០%នៃGDPប៉ុន្ដែវាមិនជំពាក់ចិនណាអីចឹងវាមិនមែនជាអន្ទាក់របស់ចិនទេ ប្រទេសខ្លះអត់ជំពាក់ចិនផងប៉ុន្ដែជំពាក់តាំងពេលមុនមក”។
សម្ដេចបន្ដថាកម្ពុជារក្សានូវអធិបតេយ្យភាពរបស់ខ្លួន នៅក្នុងការខ្ចីពីចិន គឺកម្ពុជាខ្ចីទៅតាមគម្រោង ដែលកម្ពុជាត្រូវការ ។ “ខ្ញុំសូមគូសបញ្ជាក់ថា ចិនមិនបានបង្ខំឲ្យយើង ធ្វើនេះ ឬធ្វើនោះទេ ។ ប៉ុន្ដែចិន បានគោរពនូវការសម្រេចចិត្ត របស់យើងការប្រើប្រាស់ឥណទាន ដែលយើងខ្ចីនេះយកទៅធ្វើអ្វី” ។
សម្តេចនាយករដ្ឋមន្ដ្រីកម្ពុជា ថាការខ្ចីប្រាក់ពីចិន មានអត្រាការប្រាក់ទាប និងរយៈពេលវែង ។ កម្ពុជាមានការប្រុងប្រយ័ត្នខ្លាំងបំផុត ទៅលើបញ្ហាការខ្ចីប្រាក់ពីបរទេសដូច្នេះ រហូតមកដល់ពេលនេះកម្ពុជា ទើបតែជំពាក់បំណុលបរទេស២១,៥% ស្មើនឹងអនុបាត៤០% ដែលអនុញ្ញាតឲ្យខ្ចីខណៈកម្ពុជាទើបតែខ្ចីបរទេស ២១,៥% តែប៉ុណ្ណោះ ។
សូមរំលឹកថា ទំហំហិរញ្ញប្បទានសហប្រតិបត្តិការពីរដ្ឋាភិបាលចិនមានចំនួន ៥ ៨០០លានដុល្លារ ដោយក្នុងនោះឥណទានសម្បទានមានសរុបចំនួនប្រមាណ៤ ៤០០លានដុល្លារ និងហិរញ្ញប្បទានក្នុងក្របខណ្ឌនៃ កិច្ចសហ-ប្រតិបត្តិការ សេដ្ឋកិច្ច និងបច្ចេកទេសចំនួនប្រមាណ ១ ៤០០ លានដុល្លារ គិតឆ្នាំ២០១៨ ។
ដោយឡែកថ្លែងក្នុងសន្និសីទអន្តរជាតិលើកទី២៥ ស្តីពី “អនាគតរបស់អាស៊ី” នៅថ្ងៃទី ៣០ ខែឧសភា ឆ្នាំ២០១៩ នាសណ្ឋាគារអ៉ីមភៀ រៀល ប្រទេសជប៉ុន សម្ដេចតេជោ បានថ្លែងថា រាជរដ្ឋាភិបាលតែងតែប្រកាន់ខ្ចាប់នូវ គោលនយោបាយ សកលភាវូបនីយកម្ម គោលនយោបាយបើកចំហ និងស្វាគមន៍ វិនិយោគទាំងអស់ដែលមានចំណាប់អារម្មណ៍ ក្នុងការវិនិយោគ ឬបង្កើតធុរកិច្ចនៅកម្ពុជា។
សម្ដេចបន្តថា “ក្នុងឆ្នាំ២០១៨ ការវិយោគផ្ទាល់ពីបរទេស ចូលមកកម្ពុជា មានការកើនឡើង១០ភាគរយ ធៀបនឹងឆ្នាំមុន គឺមានទំហំជាង ៣,០ប៊ីលានដុល្លារអាមេរិក ដែល ត្រូវបានបង្ហូរទៅក្នុងវិស័យហិរញ្ញវត្ថុ ទូរគមនាគមន៍ អចលនទ្រព្យ និងទំនិញ កម្មន្តសាលមិនមែនវាយនភ័ណ្ឌ”។
សម្ដេចនាយករដ្ឋមន្ត្រី ក៏បានចាត់ទុកការវិនិយោគ ផ្ទាល់ពីរបរទេស ជាកត្តាគន្លឹះមួយជួយដល់ការអភិវឌ្ឍសេដ្ឋកិច្ចជាតិ និងការសម្រេច គោលដៅអភិវឌ្ឍន៍ របស់កម្ពុជាផងដែរ ។
សម្តេចតេជោ ហ៊ុន សែន បានកត់សម្គាល់ថា ប្រធានបទនៃវេទិកាសម្រាប់ឆ្នាំនេះ «ការស្វែងរកសណ្ឋាប់ធ្នាប់ពិភពលោកថ្មី៖ ការជម្នះលើភាពវឹកវរ» ដែលមានសារៈសំខាន់ និងសមស្របបំផុត នៅក្នុងបរិការណ៍បច្ចុប្បន្ន និងសម្រាប់អនាគតតំបន់យើង ដែលកំពុងជួបប្រទះ នឹងបញ្ហាប្រឈមស្មុគស្មាញ និង និន្នាការវិវត្តន៍ទៅមុខមិនប្រាកដប្រជា ដោយសារការគំរាមផ្សេងៗ និង ភាពរង្គោះរង្គើរនៃសណ្ហាប់ធ្នាប់ និងនិម្មាបនកម្មពិភពលោកបច្ចុប្បន្ន។
សម្តេចតេជោបានផ្តល់ជាអនុសាសន៍ ថា «ក្នុងន័យនេះ, ថ្នាក់ដឹកនាំតំបន់យើង គប្បីគិតគូរ និងមានជំហររួមគ្នា ចំពោះដំណោះស្រាយលើបញ្ហាប្រឈមធំៗ ដែលកំពុងគំរាមពិភពលោក និងតំបន់អាស៊ីយើង ក្នុងកាលៈទេសៈបច្ចុប្បន្នពិសេស ចរន្តគាំពារនិយម, សង្គ្រាមពាណិជ្ជកម្មរវាងមហាអំណាចធំៗ និង វិបត្តិភូមិសាស្ត្រនយោបាយ»។
សម្តេចតេជោ ហ៊ុន សែន បានសន្និដ្ឋានថា សម្រាប់រយៈពេលវែងទៅមុខ, សកលលោកក៏ត្រូវបន្តប្រឈមនឹងបញ្ហាប្រែប្រួលរចនាសម្ព័ន្ធធំៗផ្សេងទៀតជាច្រើន រួមមានជាអាទិ៍៖ បញ្ហាប្រជាសាស្ត្រនៃមនុស្សចាស់ និង មនុស្សក្មេង, បញ្ហាហេដ្ឋារចនាសម្ព័ន្ធតភ្ជាប់, សន្តិសុខថាមពល, បញ្ហាទឹក និងបរិស្ថាន, ព្រមទាំងការរីកចម្រើន នៃបច្ចេកវិទ្យា, ដែលទាមទារឱ្យយើងទាំងអស់គ្នាពួតដៃគ្នា បង្កើនកិច្ចសហប្រតិបត្តិការកាន់តែជិតស្និទ្ធ ដើម្បីស្វែងរកដំណោះស្រាយសមស្របផងដែរ។
