លោកភីតាបរាជ័យក្នុងការបោះឆ្នោតធ្វើនាយករដ្ឋមន្ត្រីជុំទី១នាយករដ្ឋមន្ត្រីកម្ពុជាសាទរ
10-April-2024 / ព័ត៌មានអន្តរជាតិ
ប្រទេសថៃ៖សម័យប្រជុំដ៏ពិសេស នៃសភាទាំង២អង្គរបស់ថៃ បានចាប់ផ្តើមនៅម៉ោង ៩ និង៣០នាទី ព្រឹកថ្ងៃព្រហស្បតិ៍ទី១៣កក្កដាដើម្បីបោះឆ្នោតសម្រេច លើបក្ខជននាយករដ្ឋមន្ត្រីថៃទី៣០ដែលមានតែម្នាក់ គឺលោក ភិថា លីមចារើនរ៉ាត់ ប្រធានគណបក្សកាវក្លៃក្នុងពេលដែល ប្រព័ន្ធការពារសន្តិសុខ ត្រូវបានដាក់ហ៊ុំព័ទ្ធយ៉ាងតឹងតែងបំផុតខាងក្រៅ ។
សមាជិកសភាទាំង២អង្គ មានសរុប៧៥០នាក់ តែកាលពីថ្ងៃពុធម្សិលមិញ មានសមាជិកព្រឹទ្ធសភាម្នាក់ បានលាឈប់ពីមុខតំណែង។ ដូច្នេះ នៅសល់តែ ៧៤៩នាក់ទេ។ មានន័យថា លោក ភិថា លីម ចារើនរ៉ាត់ ត្រូវការសំឡេងគាំទ្រ ចំនួន ៣៧៥សំឡេង ដើម្បីអាចក្លាយជានាយករដ្ឋមន្ត្រី ដោយយោងតាមមាត្រា ១៧២នៃរដ្ឋធម្មនុញ្ញថៃ។ មុននឹងចូលក្នុងសភា លោកភិថា បានប្រាប់អ្នកកាសែតថា លោកមានទំនុកចិត្ត នៅក្នុងការទទួលបាននូវលទ្ធភាព ឈានទៅធ្វើការ ដឹកនាំប្រទេស ដោយប្រើប្រាស់សមត្ថភាពទាំងអស់របស់លោក ដើម្បីឆ្លើយតបទៅនឹងសេចក្តីសង្ឃឹមរបស់ប្រជាពលរដ្ឋថៃ ក៏ដូចជាឆ្លើយតបចំពោះការគាំទ្ររបស់ពួកគេ។
នៅក្នុងអង្គសភាមុននឹងបើកការបោះឆ្នោត លោកភិថា លីមចារើនរ៉ាត់ បានថ្លែងថាលោកចង់នាំប្រទេសថៃដើរឆ្ពោះលើមាគ៌ាលិទ្ធិប្រជាធិបតេយ្យ និងការរីកចម្រើន ដោយអនុឡោមទៅតាមលទ្ធផលសន្លឹកឆ្នោត ដែលប្រជាជនថៃបានសម្តែងមតិកាលពីខែឧសភា។ការបោះឆ្នោតបានចាប់ផ្តើម នៅវេលាម៉ោង ប្រមាណជា៤រសៀល បន្ទាប់ពីលោកភិថា បេក្ខជននាយករដ្ឋមន្ត្រី ប្រធានបក្សធំៗ ព្រមទាំងលោកប្រធានសភា បានថ្លែងសុន្ទរកថាចប់សព្វគ្រប់។សមាជិកសភាម្នាក់ៗ ដែលបានឮឈ្មោះ ត្រូវប្រកាសសំឡេងតាមមីក្រូហ្វូនតែម្តង ថា គាំទ្រ មិនគាំទ្រ ឬមួយក៏អនុវប្បវាទ ពោលគឺមិនបញ្ចេញមតិ។
សូមរំលឹកថា លោកភិថា លីមចារើនរ៉ាត់ ប្រធានបក្សកាវក្លៃ បានបង្កើតសម្ព័ន្ធគណបក្សដើម្បីរៀបចំធ្វើរដ្ឋាភិបាលចម្រុះ ជាមួយគណបក្សផ្សេងៗទៀត ក្នុងនោះមានបក្សភឿថៃ ដែលធ្លាប់ជាបក្សដ៏ធំមួយនៅថៃ។ សម្ព័ន្ធគណបក្សចម្រុះដឹកនាំដោយលោកភិថានេះ មានចំនួនអាសនៈសរុបក្នុងសភាជាតិ ៣១២អាសនៈ ក្នុងចំណោម៥០០។ ដើម្បីអាចក្លាយជានាយករដ្ឋមន្ត្រីបាន គឺលោកភិថា ត្រូវការសំឡេងឆ្នោតគាំទ្រពីព្រឹទ្ធសភា ចំនួន៦៣ទៀត ដើម្បីបានគ្រប់ ៣៧៥។គិតត្រឹមម៉ោង៦ល្ងាច ម៉ោងនៅបាងកក គឺការបោះឆ្នោតបានចប់ហើយ លទ្ធផលបឋមបានបង្ហាញថា លោកភិថា លីមចារើនរ៉ាត់ បានទទួលសំឡេងឆ្នោតគាំទ្រ ចំនួន ៣២៤សំឡេង ក្នុងនោះ មាន៣១១មកពីសភាជាតិ ឬសភាជាន់ទាប និង១៣សំឡេង មកពីព្រឹទ្ធសភា។ ចំណែកសំឡេងឆ្នោតមិនគាំទ្រវិញ គឺមាន ១៨២សំឡេង ៣៤មកពីព្រឹទ្ធសភា ១៤៨មកពីសភា។ ដោយឡែក សំឡេងឆ្នោតអនុប្បវាទ មានច្រើនខ្លាំងណាស់ គឺ១៩៩សំឡេង ដែលក្នុងនោះ ១៥៩មកពីព្រឹទ្ធសភា ៤០សំឡេងមកពីសភា។
ជាសរុប យើងឃើញថា ប្រធានគណបក្ស Move Forward គឺលោក ភីតា លីមចារ៉ឺនរ៉ាត(Pita Limjaroenrat) ទទួលបានសំឡេងគាំទ្រមិនគ្រប់គ្រាន់ដើម្បីក្លាយជានាយករដ្ឋមន្ត្រីថ្មីនៃប្រទេសថៃឡើយ។
នេះជាឧបសគ្គ ដែលត្រូវបានគេព្រួយបារម្ភច្រើនថ្ងៃមកហើយ ព្រោះថាក្រុមអ្នកនយោបាយចាស់វស្សាថៃ ដែលមានទំនោរអភិរក្សនិយម រាជានិយម គាំទ្រកងទ័ព គឺមិនពេញចិត្តចំពោះគំនិតនយោបាយសម័យទំនើប បែបចំរើននិយមរបស់លោក ភិថា លីមចារើនរ៉ាត់នេះទេ។
ទាក់ទងនិងការបោះឆ្នោតជ្រើសនាយករដ្ឋមន្ត្រីថៃលើកនេះក្នុងសំណេរលើបណ្ដាញសង្គមតេឡេក្រាមនាយប់ថ្ងៃទី១៣ ខែកក្កដាឆ្នាំ២០២៣សម្ដេចតេជោ ហ៊ុន សែន បានលើកឡើងថា ” ខ្ញុំសូមប្រកាសថ្ងៃនេះថា ការមិនទទួលបានសំឡេងគ្រប់គ្រាន់ដើម្បីធ្វើជានាយករដ្ឋមន្ត្រីថៃរបស់លោក ភីតា (Pita) គឺជាការបរាជ័យដ៏ធំរបស់ក្រុមពួកតិរច្ឆាននៅកម្ពុជា ហើយនេះមិនមែនបង្ហាញថាខ្ញុំជ្រៀតជ្រែកកិច្ចការផ្ទៃក្នុងរបស់ថៃនោះទេ ខ្ញុំគ្រាន់តែចង់បង្ហាញថា ព្រោះកន្លងមកពួកក្បត់ជាតិទាំងនេះ តែងតែរំពឹងទុកថានៅពេលលោក Pita ក្លាយជានាយករដ្ឋមន្ត្រីរបស់ថៃ ពួកគេនឹងប្រើប្រាស់ទឹកដីរបស់ថៃ ដើម្បីធ្វើចលនាប្រឆាំងបះបោរនឹងរាជរដ្ឋាភិបាលកម្ពុជា។ ឥឡូវនេះក្តីរំពឹងរបស់ពួកអាតិរច្ឆានទាំងនោះបានរលាយដូចអំបិលត្រូវទឹកហើយ”។
សម្តេចតេជោ ហ៊ុន សែន បានបញ្ចប់សំណេរដោយសារក្រើនរំលឹកថា”សូមកុំធ្វើនយោបាយផ្អែកលើដង្ហើមអ្នកដទៃ ដែលនេះជាការដាស់តឿន និងជាបំណងល្អរបស់ខ្ញុំសម្រាប់ក្រុមជ្រុលនិយម”។តាមធម្មតា សភាទាំង២អង្គ នឹងបើកសម័យប្រជុំម្តងទៀត ដែលបើតាមកាសែតបើតាម The Nation ការបោះឆ្នោតសភាតជុំទី២សម្រាប់តំណែងនាយករដ្ឋមន្ត្រីទី៣០របស់ថៃ គឺគ្រោងធ្វើបន្តនៅថ្ងៃទី ១៩ ខែកក្កដាខាងមុខនេះ។ការបរាជ័យលើលើកនេះជាសញ្ញាថា ប្រទេសថៃ ក៏កំពុងតែឈានជើងចូលក្នុងវិបត្តិនយោបាយ យូរខែដែរ ព្រោះថាមើលទៅ គឺមិនអាចជ្រើសរើសនាយករដ្ឋមន្ត្រី បង្កើតរដ្ឋាភិបាលថ្មីបានដោយងាយទេ។ លោកភិថា លីមចារើនរ៉ាត់ ត្រូវតែព្យាយាម បញ្ចុញបញ្ចូលសមាជិកសភា និងព្រឹទ្ធសភា យ៉ាងហោច ៥១នាក់ទៀត ដែលបានបោះឆ្នោតអនុវប្បវាទ ឲ្យងាកមកគាំទ្រលោក។
បើនៅតែមិនមានលទ្ធផល យូរថ្ងៃទៅមុខ អ្នកវិភាគខ្លះបានលើកឡើងថា គឺអាចមានការចរចាគ្នា ដើម្បីផ្លាស់ប្តូរបេក្ខជននាយករដ្ឋមន្ត្រី។ គណបក្សភឿថៃ ដែលស្ថិតនៅក្នុងគម្រោងរដ្ឋាភិបាលចម្រុះដែរនោះ អាចនឹងស្នើបេក្ខភាព លោកស្រី ភែថងថាន ស៊ីណាវ៉ាត្រ កូនស្រីលោកថាក់ស៊ីន។ តាមការវិភាគ លោកស្រី ភែថងថាន មានទំនោរទន់ជាងលោកភិថា ជាពិសេសទាក់ទិននឹងការធ្វើកំណែទម្រង់ដ៏រសើបមួយចំនួន ដែលអាចប៉ះពាល់ដល់ស្ថាប័នព្រះមហាក្សត្រ។
