វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 310 នាក់
ម្សិលមិញ 3717 នាក់
សរុប 14148643 នាក់
ថៃឡង់ដ៍៖ នាយករដ្ឋមន្ត្រីថៃ លោក ប្រាយុទ្ធ ចាន់អូចា បានប្រកាសចូលនិវត្តន៍ពីជីវិតនយោបាយ ក្រោយទទួលរងបរាជ័យនៅក្នុងការបោះឆ្នោតយ៉ាងគួរឱ្យអាម៉ាស់កាលពីខែឧសភាកន្លងទៅ ដោយនឹងត្រូវបិទបញ្ចប់អំណាចរយៈពេល ៩ឆ្នាំ របស់លោក ។“ចាប់ពីពេលនេះទៅ ខ្ញុំសូមចាកចេញពីនយោបាយ ដោយសុំលាលែងចេញពីតួនាទីនៅក្នុងបក្ស” នេះជាសេចក្តីថ្លែងការណ៍របស់លោកប្រាយុទ្ធចាន់អូចា បង្ហោះផ្សាយនៅថ្ងៃអង្គារទី ១១កក្កដា ក្នុងទំព័រហ្វេសប៊ុកផ្លូវការរបស់បក្ស ដោយជំរុញឱ្យសមាជិកបក្សទាំងអស់ការពារស្ថាប័នប្រទេស គឺជាតិ សាសនា ព្រះមហាក្សត្រ។
ប្រកាសរបស់នាយករដ្ឋមន្ត្រីថៃរូបនេះ ត្រូវគេមើលឃើញថាក្រោយពីគណបក្សរួបរួមជាតិថៃរបស់លោក (United Thai Nation) ដណ្តើមបានអាសនៈក្នុងសភាត្រឹមតែ ៣៦អាសនៈ ក្នុងចំណោមអាសនៈសរុបទាំង ៥០០កៅអី។លទ្ធផលនេះក៏បានបង្ហាញអំពីការមិនពេញចិត្តរបស់ពលរដ្ឋថៃភាគច្រើនទៅលើរដ្ឋាភិបាលរបបសឹករបស់លោកដែលបានឡើងមកកាន់អំណាចដោយសារតែការធើ្វរដ្ឋប្រហារយោធាកាលពីឆ្នាំ ២០១៤ ។ ទោះជាយ៉ាងណា លោកប្រាយុទ្ធបានបញ្ជាក់នៅថ្ងៃអង្គារទី១១កក្កដានេះថា លោកនឹងបន្តធើ្វជានាយករដ្ឋមន្ត្រីចាំផ្ទះរហូតដល់រដ្ឋាភិបាលថ្មីត្រូវបានគេបង្កើតឡើង នៅក្រោយការបោះឆ្នោតសភានិតិកាលថ្មីជាលើកដំបូង ដែលនឹងត្រូវធើ្វឡើងថ្ងៃព្រសហ្បតិ៍ទី១៣ក្កដាសប្តាហ៍នេះ ដើម្បីជ្រើសរើសមេដឹកនាំ ខណៈលទ្ធិផលជាក់ស្តែងបានទៅលើឥស្សរជនណាមួយនោះ ហាក់នៅមិនទាន់មានភាពច្បាស់លាស់នៅឡើយ ។
ប៉ុន្តែអ្វីដែលគួឲ្យចាប់អារម្មណ៍គឺមុនមួយថ្ងៃនៃការបោះឆ្នោតជ្រើសនាយករដ្ឋមន្ត្រីគណៈកម្មាធិការរៀបចំការបោះឆ្នោតថៃបានប្រកាស ថា ខ្លួនបានសន្និដ្ឋានថាមានភស្តុតាងបញ្ជាក់ថា បេក្ខជននាយករដ្ឋមន្ត្រី គឺប្រធានបក្សកាវក្លៃ(MFP)លោកភិតា លីមចារឺនរ៉ាត បានរំលោភច្បាប់បោះឆ្នោតនិងបញ្ជូនករណីនេះអោយតុលាការធម្មនុញ្ញសំរេច។លោក អ៊ិធិភុន ប៊ូនប្រាកង ប្រធានគណកម្មការជាតិរៀបចំការបោះឆ្នោតថៃ បានអះអាងប្រាប់អ្នកយកព័ត៌មានបារាំង AFP នៅព្រឹកមិញនេះ ថាគណកម្មការលោក មានហេតុផលគ្រប់គ្រាន់ ដើម្បីរុញសំណុំរឿងនេះ ជូនទៅតុលាការធម្មនុញ្ញថៃ ជាអ្នកសម្រេច។ ដូច្នេះអំណេះតទៅ គឺអ្វីៗស្ថិតក្នុងដៃរបស់តុលាការធម្មនុញ្ញថៃ ក្នុងការសម្រេចចាត់ទុក ឬមិនចាត់ទុកជាមោឃៈ នូវបេក្ខភាពរបស់លោក ភិថា លីមចារើនរ៉ាត់។
ជាទ្រឹស្តី តុលាការធម្មនុញមិនអាចរារាំងមិនអោយសភាបោះឆ្នោតអនុម័តលោកជានាយករដ្ឋមន្ត្រីបន្ទាប់នៅថ្ងៃព្រហស្បតិ៍នេះបានទេ ដោយសារតែមុខតំណែងនេះមិនតំរូវអោយទាល់តែសមាជិកសភាទើបអាចកាន់កាប់បាន។តែបើសិនជាតុលាការរកឃើញកំហុសលោកភិតានឹងត្រូវហាមធ្វើនយោបាយ ពិន័យប្រាក់និងអាចជាប់គុក ហើយតំណែងនាយករដ្ឋមន្ត្រីនឹងបាត់បង់ជាស្វ័យប្រវត្តិ ទោះជាលោកត្រូវសភានិងព្រឹទ្ធសភាគាំទ្រអោយលោកដឹកនាំរដ្ឋាភិបាលនៅស្អែកនេះហើយក្តី។
គណបក្សMFPបានដណ្តើមបានសម្លេងឆ្នោតគាំទ្រពីប្រជាជនច្រើនជាងគេក្នុងការបោះឆ្នោតកាលពីខែឧសភា ដោយទទួលបាន១៥១អាសនៈសភានៅក្នុងសភាដែលមាន៥០០អាសនៈ។MFPបានរួមជាមួយគណបក្សធំលំដាប់ទីពីរ គឺបក្សភឿថៃដើម្បីបង្កើ់តក្រុមចំរុះប្រាំបីគណបក្សមួយជាមួយនឹងសម្លេង៣១២ មានន័យថាក្រុមចំរុះនេះត្រូវការសម្លេងគាំទ្រ៦៤ទៀតដើម្បីអោយលោកភិតាក្លាយជានាយករដ្ឋមន្ត្រីបាន។
ដោយសារMFPមានគោលនយោបាយកែទំរង់និយម ប្រឆាំងការអភិរក្សជាពិសេសសន្យាកែប្រែច្បាប់ប្រឆាំងការប្រមាថព្រះមហាក្សត្រនោះ ការទទួលបានការគាំទ្រពីព្រឹទ្ធសភាដែលជ្រើសឡើងដោយយោធាទំនងជាពិបាក។សូមបញ្ជាក់ថា ករណីប្រឆាំងលោកភិតា ទាក់ទងនឹងការកាន់កាប់ភាគហ៊ុនក្នុងក្រុមហ៊ុនផ្សព្វផ្សាយiTVដែល ច្បាប់បោះឆ្នោតហាមមិនអោយអ្នកឈរឈ្មោះអោយគេបោះឆ្នោតជាសមាជិកសភាមានភាគហ៊ុនក្នុងអង្គការផ្សព្វផ្សាយ។ករណីដែលគណៈកម្មាធិការរៀបចំការបោះឆ្នោតបញ្ជូនទៅកាន់តុលាការវាហួសពីការរំលោភច្បាប់បោះឆ្នោតនិងចោទប្រកាន់លោកថាឈរឈ្មោះបោះឆ្នោតក្នុងពេលដឹងថាវាខុសច្បាប់ ជាបទល្មើ់សព្រហ្មទណ្ឌដែលអាចជាប់គុកបីឆ្នាំ ពិន័យប្រាក់៦០.០០០បាត និងគណបក្សបក្សប្រឈមការពិន័យ១០០.០០០បាត។
តុលាការធម្មនុញ្ញថៃត្រូវបានគេមើលឃើញថា គឺជាស្ថាប័នកំពូលមួយ តែងតែចូលមកលូកដៃសម្រេចវាសនានយោបាយថៃ ជារឿយៗ ឲ្យតែពេលមានបញ្ហាវិបត្តិម្តងៗ។សម្រាប់ការបោះឆ្នោតនៅសភាទាំង២អង្គនៅថ្ងៃទី១៣កក្កដា ក៏គេមិនដឹងថាលោកភិថា លីមចារើនរ៉ាត់ អាចទទួលបានសំឡេងគាំទ្រគ្រប់គ្រាន់ ក្លាយជានាយករដ្ឋមន្ត្រីថ្មី បង្កើតរដ្ឋាភិបាលដែរ។ សម្ព័ន្ធគណបក្សចម្រុះ ដឹកនាំដោយបក្សកាវក្លៃ មានអាសនៈភាគច្រើននៅសភាមែន គឺចំនួន៣១២ ក្នុងចំណោម៥០០អាសនៈ ក៏ប៉ុន្តែ គេត្រូវការឲ្យបានសំឡេងភាគច្រើន ទាំងសភា និងព្រឹទ្ធសភា ដែលមានអាសនៈ២៥០ទៀត។ ពោលគឺ ទាល់តែបានសំឡេងឆ្នោតគាំទ្រសរុប ចំនួន៣៧៦ ទើបអាចក្លាយជានាយករដ្ឋមន្ត្រីបាន។ មានន័យថា លោកភិថា លីមចារើនរ៉ាត់ ត្រូវការសំឡេងគាំទ្របន្ថែមពីខាងសមាជិកព្រឹទ្ធសភា ចំនួនយ៉ាងហោច ៦៤នាក់ទៀត ទើបគ្រប់ ៣៧៦។ ជាចំនួនច្រើនណាស់ ដែលគ្មាននរណាសង្ឃឹមថាអាចបានទេ ព្រោះសមាជិកព្រឹទ្ធសភាភាគច្រើន តែងតាំងដោយក្រុមរាជានិយម ក្រុមកងទ័ព ហើយមានទំនោរអភិរក្សនិយមខ្លាំងណាស់។
សមាជិកព្រឹទ្ធសភាដែលតែងតាំងដោយយោធាជាច្រើននាក់ហើយ បានប្រកាសថា គឺនឹងមិនបោះឆ្នោតឲ្យបេក្ខជនលោកភិថា លីមចារើនរ៉ាត់ ជានាយករដ្ឋមន្ត្រីនោះទេ។ អ្វីដែលធ្វើឲ្យសមាជិកព្រឹទ្ធសភាអភិរក្សនិយមថៃ គេមិនចង់ឲ្យលោកភិថា លីមចារើនរ៉ាត់ ក្លាយជានាយករដ្ឋមន្ត្រី គឺដោយសារតែគោលនយោបាយរបស់គាត់ ដែលគេចាត់ទុកថាវា ចម្រើននិយមជ្រុលហួសហេតុពេក។ ក្នុងកម្មវិធីនយោបាយរបស់បក្សកាវក្លៃ គឺលោកភិថា លីមចារើនរ៉ាត់ បានសន្យាថានឹងធ្វើកំណែទម្រង់រដ្ឋធម្មនុញ្ញថៃបច្ចុប្បន្ន ដែលត្រូវបានតាក់តែងឡើងដោយក្រុមយោធា ដើម្បីក្រុមយោធា។ ចំណុចដ៏សំខាន់មួយទៀត គឺលោកបានសន្យាធ្វើកំណែទម្រង់ ច្បាប់ផ្តន្ទាទោសប្រមាថព្រះចេស្តាព្រះមហាក្សត្រ ដែលជាលោកចាត់ទុកថាជាច្បាប់ធ្ងន់ធ្ងរជ្រុលហួសហេតុ ចាស់គំរិត ហួសសម័យ មិនត្រូវសម័យនិងការរីកចម្រើនៃសង្គមថៃ។
លោកភិថា លីមចារើនរ៉ាត់ពេលបោះឆ្នោត បានសន្យាលុបចោលកាតព្វកិច្ចយោធា បើកចំហវិស័យមួយចំនួន ដើម្បីទទួលយកការវិនិយោគចូលរួមពីឯកជន និងបានសន្យាទទួលស្គាល់ជាផ្លូវការនូវសិទ្ធិរៀនអាពាហ៍ពិពាហ៍ របស់អ្នកស្រលាញ់ភេទដូចគ្នា។ គោលនយោបាយសេរី និងចម្រើននិយមទាំងអស់នេះ គឺវាប្រឆាំងនឹងការយល់ឃើញ របស់ក្រុមអ្នកមានអំណាចចាស់វស្សានៅថៃ ដូចជាក្រុមយោធាអភិរក្សនិយម និងក្រុមរាជានិយមថៃ ដែលអះអាងថាខ្លួនគឺជាអ្នកការពារតម្លៃសង្គមតាមបែបប្រពៃណីពីបុរមបុរាណ។លោកភិថា លីមចារើនរ៉ាត់ បានថ្លែងសារថា ការបោះឆ្នោតតែងតាំងរដ្ឋាភិបាលថ្មី ដោយសភាទាំង២អង្គ នៅថ្ងៃស្អែកនេះ គឺមិនមែនជារឿងបោះឆ្នោតដើម្បីតែងតាំងរូបលោក ឬដើម្បីបក្សកាវក្លៃរបស់លោកនោះទេ។ តែវាជាការបោះឆ្នោត ដែលសមាជិកសភានិងព្រឹទ្ធសភា អាចឈានទៅបើកទំព័រថ្មី បើកផ្លូវនាំប្រទេសថៃឲ្យត្រលប់ទៅកាន់មាគ៌ាប្រជាធិបតេយ្យធម្មតាដូចគេឯងឡើងវិញ និងជាការបោះឆ្នោត ដោយគោរពឆន្ទៈរបស់ប្រជាពលរដ្ឋថៃ ដែលបានសម្តែងមតិតាមរយៈសន្លឹកឆ្នោតកាលពីចុងខែឧសភា។
បើលោកភិថា លីមចារើនរ៉ាត់ អាចមិនបានសំឡេងឆ្នោតគ្រប់ទាំង៣៧៦ទេ នៅថ្ងៃព្រហស្បតិ៍ទី១៣កក្កដាទេ សភាទាំង២អង្គ អាចប្រជុំគ្នា ម្តងហើយម្តងទៀត ដោយគ្មានចំនួនកំណត់ទេ ដើម្បីធ្វើយ៉ាងណា បោះឆ្នោតឲ្យចេញជាលទ្ធផលស្ថាពរតែងតាំងនាយករដ្ឋមន្ត្រីថ្មី។បើនៅតែមិនមានលទ្ធផល យូរថ្ងៃទៅមុខ អ្នកវិភាគខ្លះបានលើកឡើងថា គឺអាចមានការចរចាគ្នា ដើម្បីផ្លាស់ប្តូរបេក្ខជននាយករដ្ឋមន្ត្រី ព្រោះថាគេមិនអាចដាក់ បេក្ខជនលោក ភិថា លីមចារើនរ៉ាត់ រហូតនោះទេ ដោយដឹងថាបោះមិនចេញដដែលជាដដែល។ គណបក្សភឿថៃ ដែលស្ថិតនៅក្នុងគម្រោងរដ្ឋាភិបាលចម្រុះដែរនោះ អាចនឹងស្នើបេក្ខភាព លោកស្រី ភែថងថាន ស៊ីណាវ៉ាត្រ កូនស្រីលោកថាក់ស៊ីន ដែលតាមទំនោរគឺក្រុមអភិរក្សនិយមថៃមិនប្រឆាំងខ្លាំងពេក ដូចលោកភិថា លីមចារើនរ៉ាត់។ព្រោះថាប្រសិនបើវិបត្តិបយោបាយនេះរ៉ាំរៃយូរខែមានបាតុកម្មថែមទៀត ធ្វើឲ្យប្រទេសជាប់គាំង។ អ្នកវិភាគនយោបាយថៃខ្លះនិយាយថា គលោកប្រាយុទ្ធ ចាន់អូចា ដែលបានប្រកាសលាចាកពីជីវិតនយោបាយ មែន តែមិនប្រាកដថា គាត់នឹងមិនវិលត្រលប់មកវិញ ជាមួយកងទ័ពថៃនោះទេព្រោះគាត់នៅជាំនាយករដ្ឋមន្ត្រីចាំផ្ទះនៅឡើយ។