ប្រធានរដ្ឋសភាថៃប្រកាសយកថ្ងៃទី១៣កក្កដាសម្រាប់ការប្រជុំសភាបោះឆ្នោតតែងតាំងនាយករដ្ឋមន្ត្រី
21-September-2026 / ព័ត៌មានអន្តរជាតិ
ប្រទេសថៃ ៖ ប្រធានសភាថ្មីរបស់ថៃ លោក Wan Muhamad Noor Matha បានកំណត់ យកថ្ងៃទី១៣ ខែកក្កដា ជាកាលបរិច្ឆេទ សម្រាប់ការបោះឆ្នោតជ្រើសរើស នាយករដ្ឋមន្ត្រីទី ៣០ របស់ប្រទេសថៃ ។សារព័ត៌មានថៃ The Nation ចេញផ្សាយនៅថ្ងៃទី៥ ខែកក្កដា ឆ្នាំ២០២៣ បានឱ្យដឹងថា ទោះជាយ៉ាងណាក៏ដោយ លោក Wan Muhamad Noor Matha បាននិយាយថា លោកមិនអាចប្រាប់ថាតើចំនួនសន្លឹកឆ្នោតនឹងត្រូវទាមទារប៉ុន្មានជុំនោះទេ ប្រសិនបើមេដឹកនាំគណបក្ស Move Forward និងបេក្ខជននាយករដ្ឋមន្ត្រីលោក Pita Limjaroenratបរាជ័យក្នុងការឈ្នះ៣៧៦សំឡេងដែលត្រូវការនៅក្នុងការប៉ុនប៉ងលើកដំបូង។
លោក Wan Noor ដែលត្រូវបានជ្រើសរើសជាប្រធាន សភាកាលពីថ្ងៃអង្គារ បានប្រាប់អ្នកសារព័ត៌មាន ថា លោកបានរាយការណ៍ទៅការិយាល័យកាលពីថ្ងៃពុធ ដើម្បីពិភាក្សាជាមួយអគ្គលេខាធិការសភាតំណាងរាស្ត្រលោក Pornpit Phetcharoen អំពីតួនាទីរបស់លោកជាប្រធានសភា និងការរៀបចំសម្រាប់កិច្ចប្រជុំសភាបន្ទាប់។លោក Wan Noor បាននិយាយថា លោករំពឹងថានឹងមានព្រះរាជក្រឹត្យផ្លូវការ ក្នុងការតែងតាំងលោកជាប្រធានសភា និងជាប្រធានសភាតំណាងរាស្ត្រ នៅថ្ងៃបន្ទាប់ ឬពីរថ្ងៃទៀត។លោកថា នៅថ្ងៃទី១២ ខែកក្កដា លោកនឹងកោះប្រជុំសភា ដើម្បីឲ្យសមាជិកសភាជជែកដេញដោល និងបោះឆ្នោតថា តើសភាគួរប្រជុំពីរ ឬបីដងក្នុងមួយសប្ដាហ៍។
សូមបញ្ជាក់ថាសារព័ត៌មានរបស់ថៃ Bangkok Post បានចេញផ្សាយ កាលពីល្ងាច ថ្ងៃអង្គារ ទី៤ ខែកក្កដា បានឲ្យដឹងថា មុនប៉ុនា្មនថ្ងៃនៃការបោះឆ្នោតបង្កើតរដ្ឋាភិបាលថ្មីនេះមេដឹកនាំគណបក្សភឿថៃ លោកបណ្ឌិត ឈុលណាន ស្រ៊ីកែវ (Cholnan Srikaew) កាលពីថ្ងៃអង្គារ បានចេញសេចក្ដីថ្លែងការណ៍រួមរបស់គណបក្សភឿថៃ និង គណបក្សឆ្ពោះទៅមុខ ដោយគាំទ្រដល់វិសោធនកម្មច្បាប់លើកលែងទោស សម្រាប់ជនទាំងឡាយណា ត្រូវបានផ្ដន្ទាទោស ព្រោះត្រឹមតែការសម្ដែងមតិយោបល់របស់ពួកគេ ពាក់ព័ន្ធនឹងរឿងនយោបាយ។ គណបក្សធំៗទាំង២នេះ ក៏នឹងធ្វើវិសោធនកម្មច្បាប់ជាច្រើនបន្ដទៀត មានដូចជា កំណែទម្រង់កម្លាំងប្រដាប់អាវុធ និង សន្ដិសុខជាតិ។ ប៉ុន្ដែការសម្រេចចិត្តបែបនេះ នឹងមិនពាក់ព័ន្ធជាមួយសម្ពន្ធភាពគណបក្សចម្រុះ ចំនួន៦ផ្សេងទៀតនោះដែរ។
លោក ភីថា លីមចារឿនរ៉ាត ប្រធានគណបក្សឆ្ពោះទៅមុខ និង លោកវេជ្ជបណ្ឌិត ឈុលណាន ស្រ៊ីកែវ ប្រធានគណបក្សភឿថៃ កាលពីយប់ ថ្ងៃចន្ទ បានសម្រេចចិត្តរួមគ្នា ក្រោយការប្រកាស អំពីកិច្ចព្រមព្រៀងរបស់គណបក្សទាំង២ ដើម្បីតែងតាំងលោក វ៉ាន់ មូហាម៉ាត់ ណ័រ (Wan Muhamad Noor Matha) ប្រធានគណបក្សប្រាឆាឆាត (Prachachart) ជាបេក្ខជន សម្រាប់ឈរឈ្មោះកាន់កាប់តំណែងប្រធានសភា។ នៅទីបំផុត មេដឹកនាំគណបក្សប្រាឆាឆាត បានក្លាយជាប្រធានសភាថ្មីរបស់ប្រទេសថៃ កាលពីថ្ងៃអង្គារ។នៅក្នុងសេចក្ដីថ្លែងការណ៍ដដែលនោះដែរ គណបក្សភឿថៃ និង គណបក្សឆ្ពោះទៅមុខ បានសម្រេច ថា គណបក្សទាំង២នេះ នឹងធ្វើសេចក្តីស្នើច្បាប់ លើកលែងទោស ដល់ជនទាំងឡាយណា ត្រូវបានចោទប្រកាន់ ហើយបានកាត់ទោសឲ្យជាប់គុក ពាក់ព័ន្ធនឹងការបញ្ចេញមតិនយោបាយរបស់ពួកគេ។
គណបក្សភឿថៃ និង គណបក្សឆ្ពោះទៅមុខ ក៏នឹងធ្វើវិសោធនកម្មច្បាប់ ពាក់ព័ន្ធនឹងកំណែទម្រង់កម្លាំងប្រដាប់អាវុធ និងសន្តិសុខជាតិ រួមទាំង ច្បាប់អាជ្ញាសឹក និង ប្រតិបត្តិការសម្រាប់បញ្ជាការដ្ឋានសន្តិសុខផ្ទៃក្នុង ផងដែរ។យោងតាមសារព័ត៌មានថៃ បាងកក ប៉ុស្តិ៍ ចេញផ្សាយនៅថ្ងៃទី៥ ខែកក្កដា ឆ្នាំ២០២៣ បានឱ្យដឹងថា គណៈកម្មាធិការជាតិប្រឆាំង អំពើពុករលួយ (NACC)ថៃ នៅថ្ងៃពុធបានចេញផ្សាយ ទ្រព្យសម្បត្តិ និងបំណុល ដែលបានប្រកាស របស់សមាជិកសភាចំនួន ៤០រូប ដែលអាណត្តិ របស់ពួកគេបានបញ្ចប់ នៅថ្ងៃទី ២០ ខែមីនា ។ សមាជិកសភាទាំងនោះ រាប់បញ្ចូលទាំងលោក Pita ដែលសេចក្តីប្រកាស របស់លោកក៏បានលើកឡើង អំពីការកាន់កាប់ភាគហ៊ុនដ៏ចម្រូងចម្រាស របស់នៅក្នុងប្រព័ន្ធផ្សព្វផ្សាយ iTV Plc ផងដែរ ។
មេដឹកនាំគណបក្ស Move Forward បានប្រកាសថា លោកនៅលីវ ហើយមានទ្រព្យសម្បត្តិ ៨៥ លានបាត រួមទាំងសាច់ប្រាក់ ១,៨ លានបាត, ប្រាក់បញ្ញើ ២៨៦.០៤៥.៧០បាត ក្នុងគណនីធនាគារចំនួន២៧, ប្រាក់កម្ចី ១៥ លានបាត នៅប្អូនប្រុសរបស់លោក, ដី ១៤រ៉ៃ នៅស្រុក Pran Buri ខេត្ត Prachuap Khiri Khan មានតម្លៃ ១៨ លាន, ខុនដូដែលមានតម្លៃ ១៥ លានបាត នៅក្នុងស្រុក Wattana និង ១៩ លានបាតនៅក្នុងទ្រព្យសម្បត្តិ ដែលទាក់ទងនឹងការធានារ៉ាប់រង និងសិទ្ធិពាក់ព័ន្ធ ។លោក Pita ក៏បានប្រកាសពីគ្រឿងតុបតែងលម្អ និងឧបករណ៍មានតម្លៃ ១២លានបាតផ្សេងទៀត រួមមាន ទូរសព្ទដៃ ៣គ្រឿង តម្លៃ ១៦៦.៧០០បាត, ឡាន van តម្លៃ ២,៣លានបាត, អាវចំនួន ២៨ មានតម្លៃ ១៨៨.០០០បាត, អាវ ១៦ មានតម្លៃ ១,២លានបាត, ខ្សែក ៧៦ខ្សែ មានតម្លៃ ២២៨.០០០បាត, ស្បែកជើង ២១គូ មានតម្លៃ ១៥ ម៉ឺនបាត, នាឡិកា ១០ គ្រឿង មានតម្លៃ ៥,៧១ លានបាត និងបន្តោងយ័នបដិមាចំនួន ៨ គ្រឿងមានតម្លៃ ២ លានបាត.។
Pita Limjaroenrat បេក្ខជនាយករដ្ឋមន្ត្រីថៃកើតនៅថ្ងៃទី៥ខែកញ្ញា ឆ្នាំ១៩៨០ជាកូនប្រុសច្បងរបស់Pongsak Limjaroenrat អតីតទីប្រឹក្សារដ្ឋមន្ត្រីក្រសួងកសិកម្មនិងសហករណ៍នៃប្រទេសថៃ ដែលក្រោយមកបានបង្កើតក្រុមហ៊ុនAgrifoodដែលជាក្រុមហ៊ុនពាណិជ្ជកម្មប្រេង។ Pitaក៏ជាចៅប្រុសរបស់លោក Padung Limjaroenrat អតីតលេខាធិការក្រសួងមហាផ្ទៃនិងជាទីប្រឹក្សាជិតស្និទ្ធរបស់អតីតនាយករដ្ឋមន្ត្រីThaksinShinawatra។លោកបានទៅសិក្សានៅបរទេសនៅប្រទេសនូវែលសេឡង់បន្ទាប់មកបានត្រឡប់មកប្រទេសថៃវិញដើម្បីសិក្សាថ្នាក់បរិញ្ញាបត្រផ្នែកហិរញ្ញវត្ថុនៅមហាវិទ្យាល័យពាណិជ្ជកម្មនិងគណនេយ្យនៅសាកលវិទ្យាល័យ Thammasat ។
ក្នុងឆ្នាំ២០០២លោកបានបញ្ចប់ការសិក្សាដោយកិត្តិយស និងទទួលបានអាហារូបករណ៍ពីសាកលវិទ្យាល័យTexas នៅ Austin សហរដ្ឋអាមេរិក។ក្រោយមកលោកបានក្លាយជានិស្សិតថៃដំបូងគេដែលទទួលបានអាហារូបករណ៍ពីសាកលវិទ្យាល័យ Harvard។ Pita បានទទួលសញ្ញាប័ត្រអនុបណ្ឌិតផ្នែកគោលនយោបាយសាធារណៈពីសាលា John F. Kennedy នៃសាកលវិទ្យាល័យ Harvard និងថ្នាក់អនុបណ្ឌិតផ្នែករដ្ឋបាលធុរកិច្ចពី Sloan School of Massachusetts Institute of Technology (MIT)នៅសហរដ្ឋអាមេរិក។
