កាសែតថារដ្ឋាភិបាលចាស់ថៃនិងអ្នកថ្មីមិនឃើញមានគោលនយោបាយបណ្តេញពលករបរទេសចេញពីថៃ
15-March-2026 / សេដ្ឋកិច្ច
ប្រទេសថៃ៖ សារព័ត៌មានរបស់ថៃ Bangkok Post បានចេញផ្សាយ កាលពីថ្ងៃអង្គារ ទី៦ ខែមិថុនាបានផ្សាយ ថា ការបោះឆ្នោតសកលរបស់ប្រទេសថៃ កាលពីថ្ងៃទី ១៤ ខែឧសភា ឆ្នាំ២០២៣ ទើបនឹងកន្លងផុតទៅថ្មីៗនេះ មិនមានគណបក្សនយោបាយណាមួយ បើកយុទ្ធនាការ ប្រកាសអំពីគោលនយោបាយរបស់ពួកគេ ធ្វើមាតុភូមិនិវត្តន៍ដល់ពលករចំណាកស្រុកបរទេស ចេញពីប្រទេសថៃ នោះឡើយ។ ជាការពិតណាស់ សេដ្ឋកិច្ចរបស់ប្រទេសថៃ ទើបនឹងងើបឡើងវិញ ហើយនៅតែបន្តប្រឈមមុខនឹងកង្វះខាតកម្លាំងពលកម្ម នៅក្នុងវិស័យជាច្រើន មានដូចជា វិស័យទេសចរណ៍ និង សំណង់…ជាដើម។
រដ្ឋាភិបាលបន្ទាប់ នឹងចាត់វិធានការជាច្រើន ដើម្បីធានាឲ្យបានយ៉ាងរលូន សម្រាប់ការធ្វើចំណាកស្រុក ដោយស្របច្បាប់ និង សិទ្ធិការងារជាមូលដ្ឋាន ដោយធ្វើការងារជាមួយនឹងរដ្ឋាភិបាល នៃប្រទេសជិតខាង សម្រាប់ពលករណាម្នាក់ ចង់មកកាន់ប្រទេសថៃ។ ក្រុមជួយពលករខ្មែរ ឡាវ និង មីយ៉ាន់ម៉ា ឬ ភូមា នៅក្នុងប្រទេសថៃ បានទទួលស្គាល់ ថា ពួកគេមានការព្រួយបារម្ភ អំពីស្ថានភាពរបស់ពលករ ខណៈមានការលេចឮនូវពាក្យចចាមអារ៉ាម ថា ពួកគេនឹងមិនអាចធ្វើការងារ នៅក្នុងប្រទេសថៃ បានបន្ដទៀត។
លោក រី ឆាយ (Ry Chay) អនុប្រធានទី១ នៃសមាគមសប្បុរសធម៌កម្ពុជា បានបញ្ជាក់ ថា មានជនជាតិថៃមួយក្រុមតូច កំពុងតែផ្សព្វផ្សាយព័ត៌មានក្លែងក្លាយ ថា ពលករ មកពីប្រទេសជិតខាង រួមមាន ខ្មែរ ភូមា និង ឡាវ ត្រូវតែវិលឡប់ទៅប្រទេសកំណើតរបស់ពួកគេវិញ ដោយសារពលករទាំងនោះលែងចង់ នៅក្នុងប្រទេសថៃ។ ពួកគេបានបំភ្លៃព័ត៌មានផ្លូវការ ជុំវិញការនិយាយ ថា អាជ្ញាធរថៃ នឹងមិនត្រូវការពលករចំណាកស្រុកខ្មែរ និងឡាវ បន្ដទៀត នោះឡើយ ហើយបានផ្សព្វផ្សាយពាសពេញប្រទេសថែមទៀតផង»។
សូមបញ្ជាក់ថា ការចុះផ្សាយរបស់កាសែតបាងកកប៉ុស្តិ៍របស់ថៃនេះ គឺបន្ទាប់ពីសម្តេចនាយករដ្ឋមន្ត្រី ហ៊ុន សែន កាលពីថ្ងៃទី០៣មិថុនា ក្នុងពិធីជួបសំណេះសំណាលជាមួយកម្មករ លោកបានប្រតិកម្មទៅលើគោលនយោបាយរបស់ប្រធានគណបក្សឈ្នះឆ្នោតនៅប្រទេសថៃ ដែលចង់បណ្ដេញពលករខ្មែរ និងពលករឡាវចេញពីប្រទេសថៃ។ សម្តេច ហ៊ុន សែន បានផ្តាំទៅអ្នកនយោបាយទាំងនោះសូមមើលឲ្យឆ្ងាយពីប្រទេសថៃ ព្រោះការបណ្តេញពលករបរទេសចេញ នឹងប៉ះពាល់ដល់ច្រវាក់ផលិតកម្មរបស់ថៃខ្លួនឯងទៅវិញទេ។សម្តេច ហ៊ុន សែន ថា នយោបាយនេះប្រហែលជាមិនទទួលបានការគាំទ្រពីប្រទេសជិតខាង ដូចជា ប្រទេសឡាវ មីយ៉ាន់ម៉ា ក៏ដូចជាកម្ពុជា។ អ្នកនយោបាយថៃគួរតែប្រុងប្រយ័ត្នចំពោះការដាក់ចេញ និងអនុវត្តនយោបាយរបស់ខ្លួននេះ។ សម្តេច ហ៊ុន សែន បានបញ្ជាទៅកាន់ក្រសួងការងារ និងបណ្ដុះបណ្ដាលវិជ្ជាជីវៈ ក្រសួងស្ថាប័ន និងភាគីពាក់ព័ន្ធដទៃទៀត ត្រូវបង្កើនការយកចិត្តទុកដាក់ និងដោះស្រាយបញ្ហាប្រឈមនានារបស់ពលករខ្មែរនៅប្រទេសថៃផងដែរ។បច្ចុប្បន្នពលករកម្ពុជាដែលកំពុងបម្រើការងារនៅប្រទេសថៃមានប្រមាណ ១.២លាននាក់ ក្នុងចំណោមពលករនៅក្រៅប្រទេសផ្សេង ១.៣លាននាក់៕
