មេធនាគារនិងថៅកែស្រូវអង្ករកំពុងរក់វិធីដោះស្រាយរឿងថ្លៃស្រូវអង្ករពេលប្រមូលផលបាន!
16-September-2024 / សេដ្ឋកិច្ច
ភ្នំពេញ៖ធនាគារអភិវឌ្ឍន៍ជនបទ និង សហព័ន្ធស្រូវអង្ករកម្ពុជា កំពុងរកវិធីដោះស្រាយបញ្ហាតម្លៃស្រូវអង្ករកម្ពុជានៅរដូវប្រមូលផលឆ្នាំនេះ ។
មានបញ្ហាធំៗចំនួន៤ ចំនុច ដែលត្រូវលើកយកមកពិភាក្សារួមគ្នានាពេលនេះរួមមាន ផលលើវិស័យស្រូវអង្ករកម្ពុជា នៅពេលមានកិច្ចព្រមព្រៀងពាណិជ្ជកម្មសេរីកម្ពុជា-ចិន។ បញ្ហាទីផ្សារស្រូវ និង ការប្រមូលទិញស្រូវនាពេលបច្ចុប្បន្ន និង អនាគត។ ការផ្គត់ផ្គង់ភ្លើងដល់រោងម៉ាស៊ីនកិនស្រូវ និង ផលនៃគម្រោងវិនិយោគ ឃ្លាំង និង ឡត៍សម្ងួតរបស់ចិនផងដែរ។
លោក កៅ ថាច អគ្គនាយកនៃធនាគារអភិវឌ្ឍន៍ជនបទបានឲ្យដឹងថា ភាគីទាំងពីរបានគិតគូអំពីផលដែលទទួលបានសម្រាប់កិច្ចព្រមព្រៀងពាណិជ្ជកម្មសេរីរវាងកម្ពុជា ចិន និងកម្ពុជា កូរ៉េ នាពេលខាងមុខដែលពាក់ព័ន្ធនឹងវិស័យស្រូវអង្ករនេះតែម្តង។អ្វីដែលជាបញ្ហាចោទនាពេលនេះគឺគុណភាពស្រូវដែលកសិករផលិតបានមានកម្រិតទាបជាងមុនពោលគឺគ្រាប់អង្ករដើមដែលផលិតបានមានបរិមាណទទួលបានតិចជាងមុននៅតំបន់មួយចំនួន និងមួយទៀតសម្រាប់អង្ករក្រអូបដែលកសិករផលិតបានដែរនោះ នៅតំបន់ខ្លះក៏បានប្រែក្លាយទៅជាអង្ករផ្សេងទៅវិញ ដោយសារតែបញ្ហាពូជដែលត្រូវដោះស្រាយបន្ទាន់ បើមិនដូច្នោះទេ នៅពេលអនាគតពិតណាស់តម្លៃស្រូវកម្ពុជានឹងបន្តធ្លាក់ចុះទៀតនៅក្នុងទីផ្សារ។
ឯ ឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជាក៏បានឲ្យដឹង ថា ការជជែករកដំណោះស្រាយនេះ គឺចង់ឲ្យអង្ករកម្ពុជាល្បីល្បាញឡើងវិញ ខណៈនៅឆ្នាំនេះអង្កររបស់កម្ពុជាបាត់បង់ម្ចាស់ជ័យលាភីលេខ១ ខណៈសំពៀតតម្លៃទីផ្សារពិភពលោកក៏កំពុងប្រកួតប្រជែងខ្លាំង។ប្រធានសហព័ន្ធស្រូវអង្ករកម្ពុជាលោក ឧកញ៉ា សុង សារ៉ន កាលពីថ្ងៃទី ២៨ វិច្ឆិកានេះ បានលើកឡើងនៅក្នុងហ្វេសប៊ុកផ្លូវការរបស់លោកថា លោក «សោកស្តាយ» ដល់កសិករ ដោយសារតែស្រូវធ្លាក់ថ្លៃនៅឆ្នាំនេះ។
លោកសសេរនេះថា «ខ្ញុំមានការសោកស្តាយដល់កសិករ និង រោងម៉ាស៊ីនកិនស្រូវ ដោយសារតម្លៃស្រូវផ្ការរំដួលមានភាពធ្លាក់ថ្លៃជាងឆ្នាំមុន ព្រោះតម្លៃអង្ករលើទីផ្សារអន្តរជាតិមានការប្រែប្រួលចុះតម្លៃខ្លាំងក្នុងរយៈពេលជាងមួយខែនេះ ធ្វើឲ្យប្រទេសនាំចូលមួយចំនួនពន្យារពេលទិញអង្ករ ដែលជះឥទ្ធិពលអវិជ្ជមានដល់ស្ថានភាពស្រូវប្រភេទផ្ការំដួល» ។
ឧកញ៉ាបានស្នើសុំឲ្យសមាជិករោងម៉ាស៊ីនកិនស្រូវបន្តទិញស្រូវ ហើយស្នើសុំឲ្យធនាគារអភិវឌ្ឍន៍ជនបទ និង ធនាគារពាណិជ្ជធ្វើការទម្លាក់ថវិកាឲ្យរោងម៉ាស៊ីនកិនស្រូវ និង សហគមន៍កសិកម្មដើម្បីទិញស្រូវស្តុកទុក ។លោកឧកញ៉ា សុង សារ៉ន បានបញ្ជាក់យ៉ាងដូច្នេះថា «យើងត្រូវការថវិកាយ៉ាងតិច ២០០ លានដុល្លារក្នុងមួយឆ្នាំដើម្បីប្រមូលទិញស្រូវពីបងប្អូនពូមីងកសិករ »។
ប៉ុន្តែ លោក កៅ ថាច អគ្គនាយកនៃធនាគារអភិវឌ្ឍន៍ជនបទ បានអះអាងថា ប្រាក់ដែលធនាគារអភិវឌ្ឍន៍ជនបទទទួលបានពីរដ្ឋាភិបាលទាំងប៉ុន្មាន សម្រាប់ផ្តល់ជាកម្ចីនៅក្នុងវិស័យស្រូវអង្ករគឺពេលនេះបានបញ្ចេញស្ទើតែអស់ហើយប្រមាណ ៩៥ភាគរយ នៃទឹកប្រាក់សរុប ៥០លានដុល្លារ។លោកកៅថាច់សង្ឃឹមថា នៅក្នុងកិច្ចព្រមព្រៀងពាណិជ្ជកម្មសេរីជាមួយចិនននឹងមានការចរចារទៅលើប្រព័ន្ធកូតាបន្ថែមទៀតក្រៅពីរបាំងពន្ធគយ។
របាយការណ៍ក្រសួងកសិកម្ម ក្នុងរយៈពេល ៩ខែ នៅឆ្នាំ២០១៩នេះ កម្ពុជាបាននាំចេញអង្ករប្រមាណ ៤០ម៉ឺនតោន កើនឡើងប្រមាណតែជាង ២ភាគរយ បើធៀបនឹងរយៈពេលដូចគ្នាកាលពីឆ្នាំមុន។ ក្នុងនោះ ប្រទេសចិនឈរក្នុងលំដាប់កំពូលតារាងក្នុងបរិមាណនាំចេញ ១៦ម៉ឺនតោន ខណៈអឺរ៉ុប មានជាង ១៣,៦ ម៉ឺនតោន ស្មើ និង ប្រទេសអាស៊ាន មានប្រមាណ ៥,៣ ម៉ឺនតោន។
សូមបញ្ជាក់ថា រាជរដ្ឋាភិបាលថៃ នាពេលថ្មីៗនេះ បានសម្រេចដាក់ចេញនូវកញ្ចប់ថវិកាប្រមាណ៧០ ពាន់លានបាត ឬស្មើនឹងប្រមាណជាង ២.៣០០ លានដុល្លារអាមេរិក ដើម្បីសង្គ្រោះថ្លៃស្រូវ ខណៈដែលការច្រូតកាត់ប្រចាំឆ្នាំ ត្រូវបានគេមើលឃើញថា នឹងមានជន់ជោរទីផ្សារនៅក្នុងខែនេះ។ នេះបើតាមការចុះផ្សាយដោយសាព័ត៌មានបាងកកប៉ុស្ដិ៍នៅថ្ងៃនេះ។
លោក វិឆ័យ ភោជណាគីត អគ្គនាយកនៃអគ្គនាយកដ្ឋានពាណិជ្ជកម្មផ្ទៃក្នុង បានឲ្យដឹងថា កិច្ចប្រជុំចុងក្រោយនៃអនុគណៈកម្មាធិការ គោលនយោបាយ និងការគ្រប់គ្រង ស្រូវអង្ករជាតិ ដែលដឹកនាំដោយរដ្ឋមន្ត្រីក្រសួងពាណិជ្ជកម្មថៃ គឺលោក ជូរិន ឡាក់សាណា វិស្សុត បានអនុម័តលើគម្រោងទ្រទ្រង់ថ្លៃស្រូវនេះ ក្នុងទំហំទឹកប្រាក់សរុប ៧០ ពាន់លានបាត ឬស្មើនឹងប្រមាណ ជាង ២.៣០០ លានដុល្លារអាមេរិក។កម្មវិធីគម្រោងកម្ចីនេះ នឹងត្រូវចូលជាធរមានភ្លាមៗ ខណៈដែលគណៈកម្មាធិការគោលនយោបាយស្រូវអង្ករជាតិ ដែលដឹកនាំដោយលោកនាយករដ្ឋមន្ត្រីថៃ បានអនុម័តជាគោលការណ៍រួចហើយ៕
