សេនានុពន្ធ័យោធាអាមេរិកជួបមេទព័ខ្មែរចិនរសើបរឿងអនុរដ្ឋមន្ត្រីការបរទេសអាមេរិកលើករឿងផែរាម!
21-September-2026 / ផ្សេងៗ
ភ្នំពេញ៖ ថ្ងៃទី៤មិថុនា២០២១នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានទទួលជួបលោកវរសេនីយ៍ឯក ម៉ាកូស ហ្វេរ៉ារ៉ា នាយការិយាល័យអនុព័ន្ធយោធាសហរដ្ឋអាមរិកប្រចាំកម្ពុជា ដែលត្រូវចប់អាណត្តិ ។ ចំណែកលោកវរសេនីយ៍ត្រី អារីស រីប៊ូជីអូ នាយការិយាល័យអនុព័ន្ធយោធាសហរដ្ឋអាមេរិកថ្មីក៏បានចូលជួបសម្ដែងការគួរសម និងបង្ហាញមុខនាឱកាសនោះផងដែរ។
លោកវរសេនីយ៍ឯក ម៉ាកូស ហ្វេរ៉ារ៉ា បានលើកឡើងនូវចំណុចសំខាន់ពីរក្នុងរយៈពេលដែលលោកបំពេញការងារនៅកម្ពុជា ក្នុងនោះគឺ ការឆ្លងរាតត្បាតនៃជំងឺកូវីដ-១៩ និងទី២ ទំនាក់ទំនងរវាងកងទ័ពប្រទេសទាំងពីរ(កម្ពុជា-អាមេរិក)។ លោកនាយសេនានុព័ន្ធយោធាសហរដ្ឋអាមេរិកបានគូសបញ្ជាក់ថា ចាប់តាំងពីលោកបានមកបំពេញការងារដំបូងនៅកម្ពុជាក្នុងឆ្នាំ២០១៧ បរិយាកាសមិត្តភាពរវាងកម្ពុជា និងសហរដ្ឋអាមេរិកមានភាពស្និទ្ធស្នាល ប៉ុន្តែកាលពីសប្តាហ៍មុនរូបលោកបានទៅមូលដ្ឋានសមុទ្ររាម ហើយបានឃើញសារព័ត៌មានចុះផ្សាយនៅទំព័រមុខថា កងទ័ពសហរដ្ឋអាមេរិកបានចុះទៅត្រួតពិនិត្យនៅសមុទ្ររាម ដែលធ្វើឱ្យលោកមានអារម្មណ៍ថាទំនាក់ទំនងកម្ពុជា-អាមេរិក ហាក់ដូចជាមានការប្រែប្រួល។ ប៉ុន្តែលោកវរសេនីយ៍ឯក បានមានសង្ឃឹមថាទៅថ្ងៃខាងមុខទំនាក់ទំនងរវាកងទ័ពប្រទេសទាំងពីរ នឹងអាចត្រឡប់មកល្អដូចពីពេលមុនវិញ តាមរយៈការបន្តគោរពគ្នាទៅវិញទៅមក ការបន្តអនុវត្តអនុសាសន៍សម្ដេចតេជោ ហ៊ុន សែន នាយករដ្ឋមន្ត្រីកម្ពុជា នៅក្នុងការកសាងទំនុកចិត្តគ្នា។
ជាការឆ្លើយតប នាយឧត្តមសេនីយ៍ វង្ស ពិសេន បានគូសបញ្ជាក់ពីទំនាក់ទំនងការទូតរវាងកម្ពុជា និងសហរដ្ឋអាមេរិក ដែលមានជាមួយគ្នារយៈពេល ៧១ឆ្នាំមកហើយ ដែលទំនាក់ទំនងនេះមានភាពល្អប្រសើររហូតមក។ ចំពោះកិច្ចសហប្រតិបត្តិការរបស់កងទ័ពសហរដ្ឋអាមេរិកនៅក្នុងការជួយឧបត្ថម្ភគាំទ្រដល់កងយោធពលខេមរភូមិន្ទដែលត្រូវទៅបំពេញបេសកកម្មនៅក្នុងក្របខ័ណ្ឌអង្គការសហប្រជាជាតិ រួមទាំងការជួយហ្វឹកហ្វឺនផ្នែកដោះមីន គ្រាប់មិនទាន់ផ្ទុះ សន្តិសុខលំហរសមុទ្រ ហើយថ្មីៗនេះការជួយឧបត្ថម្ភថវិកាដើម្បីប្រយុទ្ធប្រឆាំងជំងឺកូវីដ-១៩ ផងដែរ។
ក្រៅពីនោះ នាយឧត្តមសេនីយ៍ ក៏បានលើកឡើងពីកិច្ចសហការល្អរវាងកងទ័ពប្រទេសទាំងពីរកន្លងមក នៅក្នុងការស្វែងរកអដ្ឋិធាតុទាហានអាមេរិកដែលបានបាត់ខ្លួននៅកម្ពុជា ក៏ដូចជាកិច្ចសហប្រតិបត្តិការប្រឆាំងអំពើភេរវកម្ម ការងារមនុស្សធម៌ ការស្រាវជ្រាវវិទ្យាសាស្ត្រយោធា និងលំហាត់ឆ្មាំអង្គរជាដើម។ ទាំងអស់នេះ មានជំនឿយ៉ាងមុតមាំថា ទៅថ្ងៃខាងមុខទំនាក់ទំនងរវាងកងទ័ពប្រទេសទាំងពីរ (កម្ពុជា-អាមេរិក) នៅតែបន្តសហប្រតិបត្តិការល្អជាមួយគ្នា។
ទាក់ទងរឿងឥទ្ធិពលចិនអាមេរិកនៅកម្ពុជាដែរកាលពីថ្ងៃទី៣មិថុនាមន្ត្រីការបរទេសចិនបានចេញមុខការពារខ្លួនចំពោះការចោទប្រកាន់របស់សហរដ្ឋអាមេរិក អំពីទំនាក់ទំនងយោធាជាមួយកម្ពុជា ពិសេសលើការព្រួយបារម្ភចំពោះវត្តមានកងទ័ពចិននៅក្នុងប្រទេសអាស៊ីអាគ្នេយ៍មួយនេះ។
ទីភ្នាក់ងារសារព័ត៌មានAPបានឲ្យដឹងថា៖អ្នកនាំពាក្យក្រសួងការបរទេសចិន លោក Wang Wenbin បាននិយាយថា ប្រទេសចិន និងកម្ពុជារីករាយនឹងមិត្តភាពប្រពៃណី និងជាដៃគូយុទ្ធសាស្ត្រ និងកិច្ចសហប្រតិបត្តិការគ្រប់ជ្រុងជ្រោយ។ការចេញមុខអះអាងជាថ្មីរបស់ភាគីចិនបែបនេះ គឺបន្ទាប់ពីមានការលើកឡើង របស់អនុរដ្ឋមន្ត្រីការបរទេសអាមេរិក លោកស្រី Wendy Sherman នៅចំពោះមុខ លោកនាយករដ្ឋមន្ត្រី ហ៊ុន សែន កាលពីថ្ងៃអង្គារ អំពីការសាងសង់មូដ្ឋានយោធាចិននៅសមុទ្ររាម ខេត្តព្រះសីហនុ។
មន្ត្រីការទូតជាន់ខ្ពស់អាមេរិករូបនេះ សំដែងជាកង្វល់ថា សកម្មភាពយោធារបស់ចិន នៅមូលដ្ឋានកងទ័ពជើងទឹករាម ធ្វើឲ្យប៉ះពាល់ដល់អធិបតេយ្យភាពកម្ពុជា គំរាមកំហែងសន្តិសុខតំបន់ និងប៉ះពាល់ជាអវិជ្ជមានដល់ទំនាក់ទំនងរវាងកម្ពុជា និងសហរដ្ឋអាមេរិក។ លោកស្រី ថែមទាំងជំរុញមេដឹកនាំកម្ពុជាឲ្យរក្សាគោលនយោបាយការបរទេសប្រកបដោយតុល្យភាព និងឯករាជ្យ។ឆ្លើយតបនឹងការលើកឡើងម្តងហើយម្តងទៀតពីបញ្ហាមូលដ្ឋានកងទ័ពចិននៅកម្ពុជានេះ ប្រមុខការពារជាតិកម្ពុជា លោក ទៀ បាញ់ នៅថ្ងៃទី៣ មិថុនា ក៏បានអះអាងថា កម្ពុជានឹងអនុញ្ញាតឲ្យអនុព័ន្ធយោធាអាមេរិកចុះពិនិត្យទីតាំងកំពង់ផែរាមដោយផ្ទាល់ ដើម្បីជំរៈមន្ទិលសង្ស័យពីវត្តមានមូលដ្ឋានកងទ័ពចិន៕
