វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5394 នាក់
ម្សិលមិញ 5544 នាក់
សរុប 13946491 នាក់
ប៉ាគីស្ថាន៖ នាយករដ្ឋមន្ត្រីប៉ាគីស្ថាន លោកស្សេបាសស្សារិហ្វ( Shehbaz Sharif )នៅថ្ងៃទី១០ឧសភា បានចេញសារព្រមានថា រដ្ឋាភិបាលរបស់លោកអាចនឹង ឬចាំបាច់ត្រូវប្រើប្រាស់វិធានការក្តៅ ដើម្បីបង្ក្រាបរាល់ការតវ៉ាទាំងឡាយណាដែលមានលក្ខណៈហិង្សានិយមពីសំណាក់អ្នកគាំទ្រអតីតនាយករដ្ឋមន្ត្រីលោកអ៊ីមរ៉ាខាន( Imran Khan )ដែលតុលាការទើបឃាត់ខ្លួនកាលពីពេលថ្មីៗ ដើម្បីស្តារស្ថានការណ៍ក្នុងប្រទេសឱ្យមានស្ថិរភាពឡើងវិញ ។
ករណីអំពើហិង្សាក្នុងប្រទេសប៉ាគីស្ថាននៅរយៈពេលចុងក្រោយនេះ បានបណ្ដាលឱ្យមនុស្សយ៉ាងហោចណាស់ចំនួន៥នាក់ស្លាប់ និងបង្កឱ្យមានអស្ថិរភាពនយោបាយនៅក្នុងប្រទេសដែលមានពលរដ្ឋសរុបជាង ២២០លាននាក់ ខណៈប្រទេសនេះ កំពុងតែប្រឈមនឹងវិបត្តិសេដ្ឋកិច្ចយ៉ាងធ្ងន់ធ្ងររួចជាស្រេចទៅហើយ។
អាជ្ញាធរបានឃាត់ខ្លួន លោក Imran Khan ជាអតីតមេដឹកនាំដ៏មានប្រជាប្រិយរបស់ប្រទេសប៉ាគីស្ថានៅថ្ងៃទី១០ឧសភា ដោយចោទប្រកាន់ពីបទក្លែងបន្លំកម្មសិទ្ធិដីធ្លី រហូតបណ្តាលឱ្យពលរដ្ឋប៉ាគីស្ថាន និងជាអ្នកស្មោះស្ម័គ្រនឹងលោកខាន់ ជាច្រើនពាន់នាក់នាំគ្នាចេញតវ៉ា និងចូលដណ្ដើមកាន់កាប់ទីតាំងអគារកងទ័ពយោធាជាច្រើនកន្លែង រួមទាំងចូលរួមបំផ្លិចបំផ្លាញទ្រព្យសម្បត្តិក្នុងគេហដ្ឋានរបស់ឧត្តមសេនីយ៍យោធាកំពូលមួយរូបក្នុងទីក្រុង Lahore ។ កងទ័ពត្រូវបានដាក់ពង្រាយដើម្បីជួយបង្ក្រាបភាពវឹកវរនៃបាតុកម្ម ដែលផ្ទុះឡើងក្រោយការចាប់ខ្លួនលោក ខាន់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី១១ ខែឧសភា ឆ្នាំ២០២៣។
គិតមកទល់ពេលនេះ ថ្នាក់ដឹកនាំយ៉ាងហោច៣រូបហើយ នៃគណបក្សរបស់លោក ខាន់ ត្រូវបានអាជ្ញាធរប៉ាគីស្ថានចាប់ខ្លួន។ លោក សា ម៉ាមូដ គូរេសស៉ី (Shah Mahmood Qureshi) ដែលជាអតីតរដ្ឋមន្ត្រីការបរទេសរបស់លោក ខាន់ និងជាអនុប្រធានគណបក្ស PTI ត្រូវបានចាប់ខ្លួនកាលពីព្រលឹមថ្ងៃព្រហស្បតិ៍នេះ។ ចំណែកថ្នាក់ដឹកនាំជាន់ខ្ពស់បក្ស PTI ២នាក់ទៀត គឺលោក អាសាដ អ៊ូម៉ា (Asad Umra) និងលោក ហ្វាវ៉ាដ ចាវឌ្រី (Fawad Chaudhry) ត្រូវបានចាប់ខ្លួនកាលពីថ្ងៃពុធ ដោយលោក ចាវឌ្រី ត្រូវគេចាប់នៅក្រៅតុលាការកំពូល ប៉ុន្មាននាទីក្រោយលោកនិយាយជាមួយក្រុមអ្នកកាសែត។ គណបក្ស PTI បានដេញដោលប្រឆាំងការចាប់ខ្លួនលោក ខាន់ នៅឯតុលាការកំពូល។
ភាពតានតឹងនៅតែបន្តស្ថិតក្នុងកម្រិតខ្ពស់ក្នុងប្រទេសប៉ាគីស្ថាន ដោយកងកម្លាំងទាហាននិងប៉ូលិស ត្រូវបានដាក់ពង្រាយនៅតាមដងផ្លូវនៃទីក្រុងធំៗ នាថ្ងៃព្រហស្បតិ៍នេះ។ សេវាអ៉ីនធើណេតលើឧបករណ៍ចល័តនៅតែត្រូវបានផ្អាក ហើយសាលានិងក្រុមហ៊ុនត្រូវបានបិទទ្វារនៅក្នុងខេត្តចំនួន២ នៃខេត្តទាំង៤របស់ប៉ាគីស្ថាន។ ការតវ៉ាបានបន្តនៅទូទាំងប្រទេសប៉ាគីស្ថាននៅថ្ងៃនេះ ជុំវិញការចាប់ខ្លួនអតីតនាយករដ្ឋមន្ត្រី លោក អ៊ីមរ៉ាន់ ខាន់ (Imran Khan) ដោយការតវ៉ាបានបណ្តាល ឱ្យមានមនុស្សស្លាប់យ៉ាងតិច ៨នាក់ និងជាង ១០០ នាក់ផ្សេងទៀតរងរបួស, នេះបើយោងតាមសារព័ត៌មាន ក្នុងស្រុករាយការណ៍ ។
ខណៈប៉ូលិសបានចាប់ខ្លួនបាតុករជាង១,៦៥០នាក់ នៅខេត្តពុនចាប់ (Punjab) ដែលជាទឹកដីកំណើតរបស់លោក ខាន់។
យោងតាមសារព័ត៌មាន The Indian Express ចេញផ្សាយនៅថ្ងៃទី១១ ខែឧសភា ឆ្នាំ២០២៣ បានឱ្យដឹងថា លោក អ៊ីមរ៉ាន់ ខាន់ ដែលត្រូវបានចាប់ខ្លួន កាលពីរសៀលថ្ងៃអង្គារ ត្រូវបានប្រគល់ទៅការិយាល័យ គណនេយ្យភាពជាតិ (NAB) កាលពីម្សិលមិញ។ លោកនឹងស្ថិតក្នុងការឃុំឃាំងរយៈពេលប្រាំបីថ្ងៃ ក្នុងសំណុំរឿងពុករលួយ អាល់ហ្គាឌៀ ត្រាស់ ( Al-Qadir Trust)។នាយករដ្ឋមន្ត្រីប៉ាគីស្ថាន លោក សេបាស ហ្សារីស (Shehbaz) Sharif កាលពីថ្ងៃពុធនៅក្នុងសុន្ទរកថា ដំបូងរបស់លោកបន្ទាប់ពីការចាប់ខ្លួន អតីតនាយករដ្ឋមន្ត្រី អ៊ីមរ៉ាន់ ខាន់ បានអះអាងថា “ភស្តុតាងទាំងអស់” ប្រឆាំងនឹងប្រធាន PTI មានវត្តមាននៅក្នុងករណី អាល់ហ្គាឌៀ ត្រាស់ ។ លោកបានមានប្រសាសន៍ថា ការិយាល័យគណនេយ្យភាពជាតិ (NAB) កំពុងធ្វើការស៊ើបអង្កេតលើមូលដ្ឋាន នៃភស្តុតាង ។ លើសពីនេះទៀត លោកបានចោទសួរពីរបៀប ដែលខុទ្ទកាល័យគណបក្ស PTI ត្រូវបានរក្សាទុក “ទាំងស្រុងនៅក្នុងភាពងងឹត” អំពីបញ្ហានេះ៕