ប្រជាពលរដ្ឋអាមេរិក៥០ម៉ឺននាក់ស្លាប់ដោយសារកូវិត១៩ច្រើនជាងអ្នកស្លាប់ក្នុងសង្គ្រាម
03-April-2024 / ព័ត៌មានអន្តរជាតិ
អាមេរិក៖គិតត្រឹមថ្ងៃចន្ទទី ២២កុម្ភៈ ចំនួនអ្នកស្លាប់ដោយកូវីដ១៩ នៅសហរដ្ឋអាមេរិក គឺបានឡើងដល់ចំនួនកន្លះលាននាក់ហើយ។តួលេខនេះ គឺមានចំនួនលើសទាហានអាមេរិក ដែលស្លាប់ក្នុងជំនាន់សង្គ្រាមលោក ទាំង២លើក និងសង្គ្រាមនៅវៀតណាម បូកបញ្ចូលគ្នាទៅទៀត។ លោកប្រធានាធិបតីអាមេរិក ចូ បៃដិននៅថ្ងៃទី២២កុម្ភៈ បានរៀបចំពិធីរំលឹកវិញ្ញាណក្ខន្ធ ដល់អ្នកស្លាប់ទាំងអស់ ហើយបានប្រកាសសន្យាថា រដ្ឋាភិបាលលោក នឹងប្រឹងឲ្យអស់ពីសមត្ថភាព ក្នុងការប្រយុទ្ធប្រឆាំងនឹងកូវីដ១៩ ដើម្បីការពារសុខភាពប្រជាពលរដ្ឋអាមេរិក។
លោកប្រធានាធិបតី ចូ បៃដិនបានថ្លែងសារទៅកាន់ប្រជាជាតិអាមេរិក ចូលរួមរំលែកទុក្ខដល់គ្រួសារអ្នកស្លាប់ ព្រមទាំង អំពាវនាវឲ្យប្រជាជនអាមេរិកឈប់បែកបាក់គ្នា ហើយងាកមករួមគ្នា តស៊ូ ប្រយុទ្ធនឹងកូវីដ១៩ ដ៏កាចសាហាវនេះ។ ថ្ងៃនេះយើងសូមរំលឹកវិញ្ញាណក្ខន្ធ ដ៏សោកសង្រេងបំផុតមួយ ជូនចំពោះអ្នកស្លាប់ចំនួន ៥០០០៧១នាក់ ដោយសារតែជំងឺកូវីដ១៩។ ត្រឹមតែមួយឆ្នាំសោះ កូវីដ១៩ បានផ្តាច់ជីវិតប្រជាជនអាមេរិក មានចំនួនច្រើនលើស ចំនួនទាហានអាេមរិក ដែលស្លាប់ ក្នុងជំនាន់សង្គ្រាមលោកលើកទ១ លើកទី២ និងសង្គ្រាមនៅ វៀតណាម បូកបញ្ចូលគ្នាទៅទៀត។ លោកបន្តថា៖ ក្នុងនាមជាប្រទេសជាតិមួយ យើងមិនអាចទទួលយក នូវជោគវាសនាដ៏អាក្រក់នេះបានទេ។ យើងត្រូវតែប្រឹងប្រែង ប្រយុទ្ធប្រឆាំងនឹងជំងឺឆ្លងរាលដាលនេះ មិនត្រូវបណ្តោយខ្លួនឲ្យទន់ខ្សោយ ដោយសារតែក្តីទុក្ខសោកនេះទេ។
បន្ទាប់ពីថ្លែងសន្ទរកថាចប់ លោកចូ បៃដិន រួមទាំងលោកស្រីអនុប្រធានាធិបតី កាម៉ាឡា ហារីស បានឈរស្មឹងស្មាតមួយនាទី បន្ទាប់មកទៀត សម្លេងជួងនៃវិហារកាតេដ្រាល់ ក្រុងវ៉ាស៊ីនតោន បានបន្លឺឡើងចំនួន៥០០ដង ដើម្បីឧទ្ទិសវិញ្ញាណក្ខន្ធ ដល់អ្នកស្លាប់។ នៅតាមអាគាររដ្ឋ និងទីតាំងទាហានអាេមរិក គឺត្រូវបង្ហូតទង់ជាតិតែពាក់កណ្តាល រយៈពេល៥ថ្ងៃ។លោកប្រធានាធិបតីចូ បៃដិន បានទទួលថ្មបាក់ ពីរដ្ឋបាលលោក ដូណាស់ ត្រាំ ដែលបានដឹកនាំប្រទេស៤ឆ្នាំ ធ្វើឲ្យសហរដ្ឋអាមេរិកពុះចែកគ្នាជា២។ ហើយមួយឆ្នាំចុងក្រោយជាមួយនឹងវិបត្តិកូវីដ១៩ គឺវាបានបង្ហាញឲ្យឃើញនូវ ភាពកម្សោយ និងអសមត្ថភាព របស់រដ្ឋបាលលោកដូណាល់ ត្រាំ ក្នុងការដឹកនាំដែលព្រងើយកន្តើយ មិនខ្វល់ពីបញ្ហាកូវីដ១៩ទេ ដោយមិនព្រមចាត់វិធានការរួម ជាលក្ខណៈជាតិ បណ្តោយអោយរដ្ឋនីមួយៗ ចាត់ចែងតែរៀងៗខ្លួន គ្មានការសហការគ្នា។
លោកចូ បៃដិន បានមានប្រសាសន៍ថា៖ ទាំងអស់គ្នា ត្រូវតែចូលរួមប្រយុទ្ធប្រឆាំងនឹង នយោបាយដែលប្រើប្រាស់ព័ត៌មានប្រឌិតក្លែងក្លាយ ភូតកុហក ព្រោះដំណឹងបោកប្រាស់ទាំងអស់នេះហើយ ដែលធ្វើឲ្យប្រជាជនអាមេរិក បែកបាក់គ្នា សមាជិកគ្រួសារឈ្លោះប្រកែកគ្នា សហគមបែងចែកគ្នាជាដើម។ បញ្ហានេះ បានបណ្តាលឲ្យជីវិតមនុស្សស្លាប់ច្រើនពេកហើយ។ ដូច្នេះទាំងអស់គ្នាត្រូវតែប្រយុទ្ធ គឺរួមសាមគ្គីគ្នាប្រយុទ្ធ។
វ៉ាក់សាំង គឺជាក្តីសង្ឃឹមតែមួយគត់ ដើម្បីឲ្យអ្វីៗអាចត្រលប់មករកភាពប្រក្រតីបាន នៅសហរដ្ឋអាមេរិក។ គិតមកត្រឹមពេលនេះ គេបានចាក់វ៉ាក់សាំងប្រឆាំងកូវីដ១៩ ទៅឲ្យមនុស្សប្រមាណ៤៤លាន១សែននាក់ហើយ នៅសហរដ្ឋអាមេរិក។ ហើយក្នុងចំណោមនេះ គឺមាន១៩លាន៤សែននាក់ បានទទួលការចាក់គ្រប់ទាំង២ដូសហើយ។ល្បឿននៃការចាក់វ៉ាក់សាំងនេះ គឺអាចចាត់ទុកបានថាជាល្បឿនលឿន បើប្រៀបធៀបទៅប្រទេសផ្សេងទៀត ដោយសារតែវ៉ាក់សាំង ទាំង២មុខគឺសុទ្ធតែ ជាវ៉ាក់សាំងផលិតដោយមន្ទីរពិសោធន៍អាមេរិក គឺ Pfizer និង Moderna។ បច្ចុប្បន្ននេះ គេអាចចាក់វ៉ាក់សាំងចំនួន១លាន៧សែនដូស ក្នុងមួយថ្ងៃ ជាមធ្យមនៅសហរដ្ឋអាមេរិក។
លោកប្រធានធិបតី ចូ បៃដិន បានអះអាងថា ពីនេះទៅចុងឆ្នាំ២០២១ អ្វីៗនឹងអាចវិលត្រលប់មករកភាពប្រក្រតីវិញបានហើយ។ លោកសង្ឃឹមថា វ៉ាក់សាំងទាំង៦០០លានដូស សម្រាប់ចាក់ជូនប្រជាជនអាមេរិក នឹងអាចផលិតបាន ប្រគល់មកគ្រប់នៅរវាងចុងខែកក្កដា។
