កម្ពុជាម៉ាឡេស៊ីចុះអនុស្សរណៈស្តីកិច្ចសហការទទួលនិងបញ្ជូនពលករ
ភ្នំពេញ៖ នៅព្រឹកថ្ងៃទី២៧ ខែមីនា ឆ្នាំ២០២៣ នេះ បន្ទាប់ពីជំនួបពិភាក្សាទ្វេភាគីរួចហើយនោះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងឯកឧត្តម ដាតុ ស៊េរី អាន់វ៉ា ប៊ីន អ៊ីប្រាហ៊ីម នាយករដ្ឋមន្ត្រី នៃប្រទេសម៉ាឡេស៊ី បានអញ្ជើញធ្វើជាសហធិបតី ចុះហត្ថលេខាលើឯកសារចំនួន០២ និងបានអញ្ជើញធ្វើសន្និសីទសារព័ត៌មានរួមគ្នាបង្ហាញអំពីលទ្ធផលជំនួបទ្វេភាគី។
សម្ដេចតេជោ ហ៊ុន សែន បានបញ្ជាក់អំពីលទ្ធផល នៃជំនួនរវាងអ្នកដឹកនាំនៃប្រទេសទាំងពីរថា «ថ្នាក់ដឹកនាំទាំងពីរបានប្ដេជ្ញាលើកកម្ពស់ថែមទៀត នូវកិច្ចសហប្រតិបត្តិការគ្រប់វិស័យរួមទាំង ពាណិជ្ជកម្ម វិនិយោគ អប់រំ ទេសចរណ៍ ថាមពល ការតភ្ជាប់និងទំនាក់ទំនងរវាងប្រជាជន និងប្រជាជន »។
សម្តេចក៏បានបញ្ជាក់ថា «យើងបានលើកទឹកចិត្តឲ្យភាគីទាំងពីរ បន្តការទស្សនកិច្ចជាន់ខ្ពស់ឲ្យកាន់តែញឹកញាប់ និងគ្រប់កម្រិតដើម្បីពង្រឹងមិត្តភាពឲ្យកាន់តែជិតស្និទ្ធបង្កើនទំនុកចិត្តឲ្យកាន់តែខ្ពស់ និងពង្រីកវិសាលភាព នៃសហប្រតិបត្តិការទ្វេភាគីឱ្យកាន់តែទូលំទូលាយថែមទៀត» ។
សម្តេចក៏បានបញ្ជាក់ថា «យើងទាំងពីរក៏បានឯកភាពពង្រឹងយន្តការកិច្ចសហប្រតិបត្តិការទ្វេភាគីដែលមានស្រាប់ ជាពិសេសគណៈកម្មការចម្រុះកម្ពុជាម៉ាឡេស៊ី »។ ចំពោះវិស័យពាណិជ្ជកម្ម និងវិនិយោគទ្វេភាគី សម្ដេចតេជោ ហ៊ុន សែន បានថ្លែងថា «យើងរីករាយដែលពាណិជ្ជកម្មទ្វេភាគីសម្រេចបាន ៦២០លានដុល្លារអាមេរិកក្នុងឆ្នាំ២០២២ កើនឡើង២៤ភាគរយធៀបនឹងឆ្នាំ២០២១ ដែលសម្រេចបានជាង៥០០លានដុល្លារ។ ខ្ញុំបានស្នើឲ្យបង្កើនទិញទំនិញបំពេញតម្រូវការឲ្យគ្នាទៅវិញទៅមក ខ្ញុំបានលើកទឹកចិត្តឲ្យវិនិយោគិន និងក្រុមហ៊ុនម៉ាឡេស៊ីមកធ្វើធុរកិច្ច និងវិនិយោគឲ្យបានកាន់តែច្រើន »។
ចំពោះវិស័យទេសចរណ៍វិញ សម្ដេចបានលើកឡើងថា «ខ្ញុំបានស្នើឲ្យមានកិច្ចសហការស្នើឲ្យម៉ាឡេស៊ីគាំទ្រដល់កម្ពុជាក្នុងការអភិវឌ្ឍការងារទេសចរណ៍មូស្លីម តាមរយៈការបណ្ដុះបណ្ដាល បច្ចេកទេស »។
ចំពោះវិស័យកសិកម្មភាគីទាំងពីរបានឯកភាពឲ្យមានអនុស្សរណៈ នៃការយោគយល់ កិច្ចសហប្រតិបត្តិការអភិវឌ្ឍន៍ ។ សម្តេចតេជោក៏បានស្នើឲ្យបង្កើនការទិញអង្ករ និងកសិផលពីកម្ពុជា តាមរយៈការបង្កើតក្រុមហ៊ុនប្រមូលទិញ និងកែច្នៃនៅកម្ពុជាសម្រាប់លក់នៅលើទីផ្សារកម្ពុជា និងនាំចេញទៅកាន់ម៉ាឡេស៊ី និងទីផ្សារផ្សេងៗទៀតតាមផ្លូវដឹកជញ្ជូនពីក្រុងព្រះសីហនុទៅ»។
ពាក់ព័ន្ធទៅនឹងវិស័យអប់រំ សម្ដេចតេជោ ហ៊ុន សែន ក៏បានមានប្រសាសន៍ថា «ខ្ញុំអរគុណម៉ាឡេស៊ីដែលបានឯកភាពលើការបណ្តុះបណ្តាល និងចែករំលែកបទពិសោធថែមទៀត តាមរយៈកិច្ចសហប្រតិបត្តិការបច្ចេកទេស»។ សម្តេចតេជោបានថ្លែងថា «ខ្ញុំក៏បានស្នើឲ្យបន្តអនុវត្តយន្តការដែលមានស្រាប់ដើម្បីលើកកម្ពស់ការការពារសិទ្ធិពលករកម្ពុជាដែលធ្វើការនៅប្រទេសម៉ាឡេស៊ី »។
ក្នុងវិស័យថាមពល សម្តេចតេជោ ហ៊ុន សែន បានស្នើឲ្យនាយករដ្ឋមន្ត្រីម៉ាឡេស៊ីគាំទ្រចំពោះការស្ថាបនាខ្សែកាបអគ្គិសនីក្រោមបាតសមុទ្រដែលត្រូវឆ្លងកាត់ដែនសមុទ្រប្រទេសម៉ាឡេស៊ីសម្រាប់គម្រោងពាណិជ្ជកម្មថាមពលបៃតងរវាងកម្ពុជា និងសិង្ហបុរី នេះជាកិច្ចសហប្របត្តិការមួយល្អផងដែររបស់យើង »។ពាក់ព័ន្ធទៅនឹងវិស័យវិទ្យាសាស្ត្រ បច្ចេកវិទ្យា និងនវានុវត្តន៍ កម្ពុជាបានលើកទឹកចិត្តឲ្យតំបន់អាស៊ីចូលរួមអភិវឌ្ឍឧស្សាហកម្ម ផលិតកម្មកែច្នៃ ឧស្សាហកម្មហាឡាល់ និងឧស្សាហកម្មផ្នែកចំណេះដឹង និងបច្ចេកវិទ្យា។
វិស័យការពារជាតិ និងសន្តិសុខភាគីទាំងពីរបានឯកភាពគ្នាពង្រឹងកិច្ចសហប្រតិបត្តិការរវាងស្ថាប័នពាក់ព័ន្ធការផ្លាស់ប្តូរគណៈប្រតិភូជំនាញ ដើម្បីដកពិសោធន៍ការងារប្រឆាំងនឹងការរត់ពន្ធ និងជួញដូរមនុស្ស និងការងារសម្អាតប្រាក់ និងពិចារណាឲ្យមានអនុស្សរណៈ នៃការយោគយល់គ្នារវាងអគ្គស្នងការនគរបាលជាតិកម្ពុជា និងនគរបាល ម៉ាឡេស៊ី ស្ដីពីកិច្ចសហប្រតិបត្តិការប្រយុទ្ធប្រឆាំងឧក្រិដ្ឋកម្មឆ្លងដែន ។
ថ្នាក់ដឹកនាំទាំងពីរក៏បានឯកភាពគ្នាទៅលើការជំរុញកិច្ចសហប្រតិបត្តិការទៅលើវិស័យព័ត៌មាន និងគមនាគមន៍សេដ្ឋកិច្ចឌីជីថល និងសន្តិសុខ តាមប្រព័ន្ធអ៊ីនធឺណិតថែមទៀត ។ថ្នាក់ដឹកនាំក៏បានពិភាក្សាទៅលើបញ្ហាតំបន់ និងអន្តរជាតិដែលជាបញ្ហាកង្វល់រួម គឺជាបញ្ហាមីយ៉ាន់ម៉ា បញ្ហារ៉ូហ៊ីងយ៉ា និងបញ្ហាសមុទ្រចិនខាងត្បូង បញ្ហាឧបទ្វីបកូរ៉េ បញ្ហាទាក់ទងទៅនឹងសង្គ្រាមរុស្ស៊ី និងអ៊ុយក្រែនផងដែរ ។ ថ្នាក់ដឹកនាំទាំងពីរបានបង្ហាញសុទិដ្ឋិនិយមថាប្រទេសទាំងពីរនឹងរួមគ្នាដោះស្រាយបញ្ហាប្រឈមរួម ទាំងតំបន់ និងពិភពលោក ដើម្បីពង្រឹង នូវសាមគ្គីភាព .។
សូមបញ្ជាក់ថាឯកសារចំនួន០២ ដែលនាយករដ្ឋមន្ត្រី នៃប្រទេសទាំងពីរធ្វើជាសហធិបតីក្នុងការចុះហត្ថលេខានោះរួមមាន៖១- អនុសារណៈនៃការយោគយល់គ្នារវាងរដ្ឋាភិបាលនៃប្រទេសម៉ាឡេស៊ី និងរាជរដ្ឋាភិបាលនៃព្រះរាជាណាចក្រកម្ពុជាស្ដីពីការជ្រើសរើស ការប្រើប្រាស់ និងការធ្វើមាតុភូមិនិវត្តន៍របស់ពលករ។២-អនុសារណៈនៃការយោគយល់គ្នារវាងរដ្ឋាភិបាលនៃប្រទេសម៉ាឡេស៊ី និងរាជរដ្ឋាភិបាលនៃព្រះរាជាណាចក្រកម្ពុជាស្ដីពីការជ្រើសរើស ការប្រើប្រាស់ និងការធ្វើមាតុភូមិនិវត្តន៍របស់ពលករធ្វើការងារផ្ទះ។
