ឆមាសទី១ ឆ្នាំ២០២៥នេះកម្ពុជា មាន អតិផរណាក្នុងអត្រា ៣,៥% អត្រាប្រាក់រៀលប្រែប្រួលដកសូន្យ៣ភាគរយ

ភ្នំពេញ៖ អតិផរណារួមជាមធ្យមរបស់កម្ពុជា ក្នុងឆមាសទី១ ឆ្នាំ២០២៥នេះ មានអត្រាកំណើន ៣,៥% បន្ទាប់ពីបានហក់ឡើងក្នុងកម្រិតខ្ពស់ដល់ ៦% នៅក្នុងខែមករា ប៉ុន្តែបានថយចុះជាបន្តបន្ទាប់មកវិញដល់ ១,៦% នាខែមិថុនា .។ របាយការណ៍របស់ធនាគារជាតិនៃកម្ពុជាបានឲ្យដឹងថា នៅក្នុងឆមាសទី ១ឆ្នាំនេះ អតិផរណារួមមានកម្រិតជាមធ្យម ៣,៥% ដែលខ្ពស់ជាងឆមាសទី១ គ្រាដូចគ្នាកាលពីឆ្នាំមុន ដែលមានកម្រិតដ៏ទាប ០,៤% ដោយសារការកើនឡើងថ្លៃក្រុមម្ហូបអាហារ ៤,៨% និងការកើនឡើងអតិផរណាស្នូល មានកម្រិត ២,៩%។ 

ទោះជាយ៉ាងណា ថ្លៃក្រុមទំនិញ និងសេវាពាក់ព័ន្ធនឹងប្រេងឥន្ធនៈបន្តថយចុះ -២,២% ធៀបនឹង -១,១% នាឆមាសទី១ឆ្នាំ២០២៤ ដែលជាចម្បងបណ្តាលមកពីការធ្លាក់ថ្លៃសាំង។ករណីយ៍នេះធនាគារជាតិនៃកម្ពុជា បានពន្យល់ថា បណ្តាលមកពីកំណើនថ្លៃក្រុមម្ហូបអាហារមានកម្រិតខ្ពស់នាខែមករា ៧,៨% ដោយសារមូលដ្ឋាន គណនាទាប និងការកើនឡើងតម្រូវការខ្ពស់ក្នុង អំឡុងពេលចូលឆ្នាំប្រពៃណីចិន។ ទោះយ៉ាងណា ការកើនឡើងសន្សឹមៗនៃកម្រិតថ្លៃនាគ្រាដូចគ្នាឆ្នាំមុន បានធ្វើឱ្យកំណើនថ្លៃក្រុមម្ហូបអាហារ ថយចុះជាបន្តបន្ទាប់មក ២,៥% នាខែមិថុនា ឆ្នាំ២០២៥។ធនាគារជាតិនៃកម្ពុជា បានបញ្ជាក់ថា ក្នុងឆមាសទី១ឆ្នាំនេះ ថ្លៃបន្លែ កើន ៨,២% ផ្លែឈើ ៧% ត្រីស្រស់ ៤,៧% សាច់ជ្រូក ៣,៦% និងសាច់គោស្រស់ ៣,៩%។

ទោះជាំយ៉ាងណាធនាគារជាតិអះអាងថាជាទូទៅប្រសិនបើអត្រាអតិផរណារួមជាមធ្យមស្ថិតក្រោម ៥% សម្រាប់ប្រទេសកម្ពុជា អាចចាត់ទុកថា មានកម្រិតល្អ មិនបង្កផលប៉ះពាល់អ្វីគួរឲ្យកត់សម្គាល់ដល់ជីវភាពរស់នៅរបស់ប្រជាពលរដ្ឋនោះទេ ជាពិសេសប្រជាពលរដ្ឋដែលមានចំណូលទាប និងមធ្យម។សម្រាប់ការវាយតម្លៃនៃក្របខ័ណ្ឌម៉ាក្រូសេដ្ឋកិច្ច ឆ្នាំ២០២៥ បានឲ្យដឹងថា អត្រាអតិផរណាជាមធ្យមប្រចាំឆ្នាំ ត្រូវបានព្យាករថា នឹងស្ថិតក្នុងរង្វង់ ២,៥% ក្នុងឆ្នាំ២០២៥នេះ ដោយសារការរក្សាបាននូវចលនការសេដ្ឋកិច្ចក្នុងស្រុក និងប្រក្រតីភាពនៃស្ថានភាព និងថ្លៃទំនិញអន្តរជាតិ ។ អត្រាអតិផរណារបស់កម្ពុជា ក្នុងឆ្នាំ២០២៥នេះ មានកម្រិតខ្ពស់ជាង ឆ្នាំ២០២៤ ដែលមានកម្រិតអតិផរណាជាមធ្យមក្នុងរង្វង់ ០,៨% ។

សម្រាប់ប្រាក់រៀលវិញ បន្តមានស្ថិរភាពល្អប្រសើរ ព្រមទាំងមាននិន្នាការឡើងថ្លៃគួរឲ្យកត់សម្គាល់ក្នុងឆមាសទី១ ឆ្នាំ២០២៥នេះ ដោយសារកំណើនតម្រូវការប្រាក់រៀល សម្រាប់ប្រើប្រាស់នៅក្នុងវិស័យកសិកម្ម ការទូទាត់អេឡិចត្រូនិក និងការបង់ពន្ធ។ លើសពីនេះ ការប្រែប្រួលរបស់អត្រាប្តូរប្រាក់ទៅតាមកត្តារដូវកាលក៏មានកម្រិតផងដែរ ដែលកត្តានេះបានរួមចំណែកថែមទៀតលើការបង្កើនទំនុកចិត្តលើប្រាក់រៀល។ នេះបើយោងតាមរបាយការណ៍របស់ធនាគារជាតិនៃកម្ពុជា។

ធនាគារជាតិនៃកម្ពុជា បានបញ្ជាក់ថា អត្រាប្តូរប្រាក់នាត្រីមាសទី២ បានប្រែប្រួលត្រឹមតែ -០,៣% ធៀបនឹងត្រីមាសទី១ ឆ្នាំ២០២៥ ដែលជាកម្រិតទាបជាងការប្រែប្រួលមុនវិបត្តិកូវីដ-១៩ (០,៩%)។ ជាមធ្យម អត្រាប្តូរប្រាក់នៅក្នុងឆមាសទី១នេះ មានកម្រិត ៤.០១១រៀល ក្នុងមួយដុល្លារអាមេរិក ដែលប្រាក់រៀលបានឡើងថ្លៃ ១,៦% ធៀបនឹងគ្រាដូចគ្នា ឆ្នាំ២០២៤ (៤.០៧៥រៀល) និងឡើងថ្លៃ ០,៧% ធៀបនឹងគ្រាដូចគ្នាឆ្នាំ២០១៦-២០១៩ (៤.០៣៩រៀល)។

ទោះជាយ៉ាងណា អត្រាប្តូរប្រាក់រៀលផ្លាសប្តូវាក៏ ក៏អាស្រ័យទៅលើកត្តាខាងក្រៅដូចជាលក្ខខណ្ឌទីផ្សារពិភពលោក និងគោលនយោបាយរូបិយវត្ថុរបស់សហរដ្ឋអាមេរិកអាចមានឥទ្ធិពលលើការប្រែប្រួលនាពេលអនាគត។
យោងតាមធនាគារជាតិនៃកម្ពុជា បានឲ្យដឹងថា អត្រាប្តូរប្រាក់ផ្លូវការសម្រាប់ថ្ងៃទី ៧ខែសីហា ឆ្នាំ២០២៥នេះ មានតម្លៃ ៤.០០៦រៀល ក្នុងមួយដុល្លារអាមេរិក៕