វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 662 នាក់
ម្សិលមិញ 4140 នាក់
សរុប 14163052 នាក់
កណ្តាល៖ ក្រុមការងារនៃគណៈកម្មាធិការសិទ្ធិមនុស្សកម្ពុជា (គ. ស.ម.ក.) បានចុះពិនិត្យស្ថានភាពសិទ្ធិមនុស្សនៅពន្ធនាគារ ខេត្តកណ្ដាល នៅថ្ងៃទី២៤ ខែមីនា ឆ្នាំ២០២៣។ ក្នុងបេសកកម្មនេះ ក្រុមការងារនៃគណៈកម្មាធិការសិទ្ធិមនុស្សកម្ពុជា បានចូលជួប លោក ខៀវ សំផន ដើម្បីដឹងពីស្ថានភាពរបស់គាត់ ដែលកំពុងរស់នៅក្នុងពន្ធនាគារ។អ្នកដែលនៅមើលថែទាំ លោក ខៀវ សំផន បានអះអាងថា ជារៀងរាល់ថ្ងៃលោកខៀវសំផនពិសារបាយបានច្រើន ហើយគាត់អាចរុញរទេះដើរបានធម្មតាដោយខ្លួនគាត់តិចៗ។
ក្រុមការងារគណៈកម្មាធិការសិទ្ធិមនុស្សកម្ពុជាដឹកនាំដោយ លោក ជូ ហេង សមាជិក និងជាអគ្គនាយករង តំណាង លោកស្រី ឆាំ ម៉ារី សមាជិក គ.ស.ម.ក. និងជាអគ្គនាយិកានៃអគ្គនាយកដ្ឋានស៊ើបអង្កេត និងអប់រំសិទ្ធិមនុស្សបានចុះពិនិត្យស្ថានភាពសិទ្ធិមនុស្សនៅពន្ធនាគារខេត្តកណ្ដាល តាមការចាត់តាំងរបស់ លោក កែវ រ៉េមី រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានគណៈកម្មាធិការសិទ្ធិមនុស្សកម្ពុជា ដោយ ។
សម្រាប់គណៈកម្មាធិការសិទ្ធិមនុស្សកម្ពុជាការចុះពិនិត្យស្ថានភាពសិទ្ធិមនុស្សតាមពន្ធនាគារនៅទូទាំងប្រទេសកម្ពុជា គឺជាបេសកកម្មសំខាន់មួយក្នុងចំណោមបេសកកម្មដ៏ទៃទៀតរបស់គណៈកម្មាធិការសិទ្ធិមនុស្សកម្ពុជា ក្នុងការការពារ និងលើកកម្ពស់សិទ្ធិមនុស្ស។ក្នុងឱកាសនោះដែរ ក្រុមការងារ គ.ស.ម.ក. ក៏បាននាំយកឱសថចំនួន ៨មុខ ដែលផ្តល់ដោយ លោករដ្ឋមន្ត្រីប្រតិភូអមនាយករដ្ឋមន្ត្រី និងជាប្រធាន គ.ស.ម.ក. សម្រាប់ប្រើប្រាស់ក្នុងពន្ធនាគារផងដែរ។
សូមបញ្ជាក់ថាលោក ខៀវ សំផន អាយុ ៩១ ឆ្នាំ អតីតប្រមុខរដ្ឋនៃរបបកម្ពុជាប្រជាធិបតេយ្យដែលត្រូវបានតុលាការនៃអង្គជំនំវិញ្ញាសមញ្ញានៃតុលាការកាត់ទោសកាលពីខែកញ្ញាឲ្យជាប់គុក១ជីវីតបន្តពីការជាប់គុក១៥ឆ្នាំរួចមកហើយនៅសាលក្តីខ្មែរក្រហម។ឡូវតុលាការខ្មែរក្រហមបានបិទបញ្ចប់ហើយ ទីតាំងសាលាក្តីខ្មែរក្រហមដែលត្រូវបានប្រើប្រាស់សម្រាប់ការងារកាត់ក្តីអតីតមេដឹកនាំខ្មែរក្រហមក្នុងរយៈពេលប្រមាណ ១៦ ឆ្នាំមកហើយនោះ ត្រូវបានផ្ទេរមកនៅក្រោមការគ្រប់គ្រងរបស់បញ្ជាការដ្ឋានកងទ័ពជើងគោកវិញ។
ពិធីផ្ទេរ-ទទួលទីតាំងអតីតសាលាក្តីខ្មែរក្រហម ដែលស្ថិតនៅតាមបណ្តោយផ្លូវជាតិលេខ ៤ ក្នុងសង្កាត់ចោមចៅ ខណ្ឌពោធិ៍សែនជ័យ ត្រូវបានធ្វើឡើង កាលពីថ្ងៃពុធ ទី ២៨ ខែធ្នូ ឆ្នាំ ២០២២ ក្រោមអធិបតីភាពរបស់លោក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ។លោក ហ៊ុន ម៉ាណែត បានថ្លែងក្នុងពិធីនោះថា ការផ្ទេរ-ទទួលអគារគឺជាសក្ខីភាពនៃការបិទបញ្ចប់ទាំងស្រុងនៃដំណើរការរបស់សាលាក្តីខ្មែរក្រហម ដោយប្រែក្លាយពីទីកន្លែងផ្តល់យុត្តិធម៌ទៅជាទីកន្លែងសម្រាប់បន្តការងារការពារជាតិវិញ បន្ទាប់ពីរាជរដ្ឋាភិបាលបានប្រគល់មួយផ្នែកនៃទីតាំងយោធានេះសម្រាប់បម្រើឱ្យដំណើរការកាត់ក្តីខ្មែរក្រហម ចាប់តាំងពីឆ្នាំ ២០០៦ មក។