អាល្លឺម៉ងមានមហិច្ឆតាចង់ពង្រឹងពង្រីកកិច្ចសហប្រតិបត្តិការជាមួយកម្ពុជា
21-September-2026 / សេដ្ឋកិច្ច
ភ្នំពេញ៖ លោក ហ្វ្រាំង វ៉ាល់ធ័រ ឆ្តែនម៉ៃយ័រ ( Frank-Walter Steinmeier) ប្រធានាធិបតីនៃសាធារណរដ្ឋសហព័ន្ធអាល្លឺម៉ង់ក្នុងឱកាសជួបពិភាក្សាការងារជាមួយសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា នៅព្រឹកថ្ងៃទី១៥ ខែកុម្ភៈ ឆ្នាំ២០២៣នេះ នៅវិមានសន្តិភាពបានជម្រាបពីមហិច្ឆតារបស់អាល្លឺម៉ង់នៅចំពោះមុខសម្តេចតេជោ ហ៊ុន សែន ដោយមានបំណងពង្រីកពង្រឹងកិច្ចសហប្រតិបត្តិការជាមួយកម្ពុជា។ 
លោកប្រធានាធិបតីអាល្លឺម៉ង់ បានថ្លែងអំណរគុណចំពោះសម្តេចតេជោ ហ៊ុន សែន ចំពោះការទទួលបដិសណ្ឋារកិច្ចយ៉ាងកក់ក្តៅ និងបានឲ្យដឹងថា លោក បានទៅទស្សនាមជ្ឈមណ្ឌលដោះមីនកម្ពុជា ហើយអ្វីដែលបានឃើញ គឺការដោះមីននោះ ជួយដល់ជីវិតប្រជាជន សម្អាតមីន និងជួយឲ្យប្រជាពលរដ្ឋត្រឡប់ទៅរស់នៅ និងការប្រកបមុខរបរលើដី ដើម្បីចិញ្ចឹមជីវិត។ ក្នុងន័យនេះ ការចូលរួមរបស់អាល្លឺម៉ង់លើវិស័យដោះមីន គឺមានអត្ថន័យណាស់ និងត្រឹមត្រូវ ។លោក ក៏បានជម្រាបសម្តេចតេជោ ហ៊ុន សែន ថា លោកបានទៅទស្សនកិច្ចនៅប្រាសាទអង្គរវត្តដែលជាសម្បត្តិវប្បធម៌ដ៏ស្កឹមស្កៃ និងអស្ចារ្យ ហើយកំពុងត្រូវការការថែរក្សា។ លោក ក៏បានសម្តែង នូវការរីករាយពេញចិត្តជាមួយកិច្ចសហប្រតិបត្តិការលើវិស័យវប្បធម៌ ការថែរក្សាប្រាង្គប្រាសាទ រយៈពេល២៥ឆ្នាំកន្លងមក។ លោកបញ្ជាក់ថា កិច្ចសហប្រតិបត្តិការនេះនឹងនៅបន្តទៀត ។
លោកប្រធានាធិបតីក៏បានជម្រាប និងកោតសរសើរសម្ដេចតេជោ ហ៊ុន សែន ថា សម្តេចជាអ្នកដឹកនាំ ដែលបានដឹកនាំប្រទេសពីបាតដៃទទេ កាត់បន្ថយភាពក្រីក្រ ទប់ស្កាត់ទប់ស្កាត់ជំងឺកូវីដ១៩ ការបើកប្រទេស និងសេដ្ឋកិច្ចឡើងវិញ ជាពិសេសការដឹកនាំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធទទួលបានជោគជ័យ បើទោះបីស្ថិតនៅក្នុងស្ថានភាពដែលពិភពលោកនៅប្រឈមជំងឺកូវីដ១៩ និងកម្ពុជាកំពុងតែប្រឈមនឹងការប្រែប្រួល ភូមិសាស្ត្រនយោបាយ តែសម្តេចតេជោនៅតែនាំប្រទេសឆ្ពោះទៅជាប្រទេសនាំមុខមួយនៅក្នុងតំបន់។
សម្ដេចតេជោ ហ៊ុន សែន បានថ្លែងអំណរគុណចំពោះលោកប្រធានាធិបតី សម្រាប់ការវាយតម្លៃល្អដល់កម្ពុជា ហើយក៏បានថ្លែងអំណរគុណដល់លោកប្រធានាធិបតីអាល្លឺម៉ង់ក៏ដូចជាប្រជាជនអាល្លឺម៉ង់ ចំពោះការជួយកម្ពុជាលើវិស័យដោះមីន លើវិស័យវប្បធម៌ និងវិស័យដទៃទៀត។សម្តេចតេជោ ហ៊ុន សែន ក៏បានជម្រាបប្រធានាធិបតីអាល្លឺម៉ង់ អំពីស្ថានភាពមីននៅកម្ពុជាដែលត្រូវដោះឲ្យអស់នៅឆ្នាំ ២០២៥ និងជួយដោះមីននៅប្រទេសមួយចំនួនក្រោមឆ័ត្រអង្គការសហប្រជាជាតិ រួមជាមួយនឹងការជួយបង្ហាត់កងទ័ពអ៊ុយក្រែន លើបញ្ហាដោះមីន ដែលជាការងារមនុស្សធម៌ ក៉ំឲ្យឃាតកកំបាំងមុខនេះបង្កបញ្ហាដល់ជនស្លូតត្រង់ ។
សម្តេច ក៏បានសម្ដែងការពេញចិត្តចំពោះការជួយរបស់សហព័ន្ធអាល្លឺម៉ង់ក្នុងរយៈពេល២៥ឆ្នាំកន្លងមក។ សម្ដេចបានសម្តែងនូវការរីករាយ និងជំរុញកិច្ចសហប្រតិបត្តិការលើវិស័យប្រែប្រួលអាកាសធាតុ ថាមពល ជាពិសេសលើវិស័យវិនិយោគ និងពាណិជ្ជកម្មរវាងប្រទេសទាំងពីរ។ដោយឡែកសម្រាប់ក្រុមធុរកិច្ចជនអាល្លឺម៉ង ដែលបានអមដំណើរលោកប្រធានាធិបតីបំពេញទស្សនកិច្ចនៅព្រះរាជាណាចក្រកម្ពុជាបានបង្ហាញ ពីការចាប់អារម្មណ៍ការវិនិយោគនៅកម្ពុជា ដោយចាប់អារម្មណ៍វិនិយោគលើរោងចក្រផលិតរថយន្ត គ្រឿងចក្រ សម្ភារសំណង់ ប្រព័ន្ធប្រព្រឹត្តិកម្មទឹកកខ្វក់ បច្ចេកវិទ្យា និងថាមពលកកើតឡើងវិញ ។ ប្រតិភូធុរកិច្ចអាល្លឺម៉ង់ ក៏បានសម្តែងនូវការពេញចិត្តចំពោះបរិយាកាសវិនិយោគនៅកម្ពុជា ដែលជាបរិយាកាសបើកចំហ និងអនុគ្រោះជាទីបំផុត ។
សម្តេចតេជោ ហ៊ុន សែន ក៏បានថ្លែងអំណរគុណជូនចំពោះក្រុមធុរកិច្ចអាល្លឺម៉ង់ចំពោះចំណាប់អារម្មណ៍ក្នុងការវិនិយោគនៅកម្ពុជា។ សម្តេចក៏បានជម្រាបដល់ប្រតិភូធុរកិច្ចអាល្លឺម៉ង់ថា កម្ពុជាអនុញ្ញាតឲ្យជនបរទេសធ្វើជាម្ចាស់ក្រុមហ៊ុន ១០០ភាគរយ ដោយមិនចាំបាច់មានអ្នកសញ្ជាតិខ្មែរជាម្ចាស់ភាគហ៊ុនឡើយ ហើយកម្ពុជាក៏អនុញ្ញាតឲ្យប្រើរូបិយវត្ថុបរទេសផងដែរសម្រាប់ការបើកប្រាក់ខែ សម្រាប់ការទូទាត់ផ្សេងៗ ដោយមិនឲ្យអ្នកវិនិយោគនៅកម្ពុជាបាត់បង់ប្រយោជន៍តាមរយៈការប្តូរប្រាក់នោះទេ។
សម្តេចបន្តថា កម្ពុជាសព្វថ្ងៃនេះ មានការលូតលាស់ខ្លាំងណាស់លើវិស័យសំណង់ ។ សម្តេចក៏បានស្នើឲ្យវិនិយោគិនរបស់អាល្លឺម៉ង់ពិចារណាលើរូបមន្តបូកមួយ ក្នុងករណីដែលអ្នកវិនិយោគអាល្លឺម៉ង់ដាក់ទុននៅប្រទេសណាមួយហើយ គួរពិចារណាដាក់ទុនវិនិយោគនៅកម្ពុជាផងដែរ ។សម្តេចតេជោ បានជម្រាបជូនប្រតិភូអំពីបទពិសោធន៍កន្លងមកដែលមានក្រុមហ៊ុនមួយនៅប្រទេសថៃ ដាក់ទុននៅប្រទេសថៃផង ដាក់នៅក្នុងប្រទេសកម្ពុជាផង នៅពេលដែលប្រទេសថៃធ្លាក់ចូលទៅនឹងវិបត្តិកូវីដ១៩ ជួបវិបត្តិទឹកជំនន់ ប៉ុន្តែក្រុមហ៊ុនបានបង្វែរផលិតកម្មនៅក្នុងប្រទេសកម្ពុជាវិញ ដើម្បីផលិតឲ្យទាន់ការបញ្ជាទិញ។សម្ដេចតេជោ ហ៊ុន សែន ក៏បានស្វាគមន៍រាល់អ្នកវិនិយោគទាំងឡាយរបស់អាល្លឺម៉ង់មកកាន់កម្ពុជា ។
