សន្និបាតគណបក្សប្រជាជនដាក់ចេញយុទ្ធសាស្ត្របង្ក្រាបដើម្បីអភិវឌ្ឈន៍
26-February-2023 / ផ្សេងៗ
ភ្នំពេញ៖ មហាសន្និបាតបក្សប្រជាជនកម្ពុជា បានដាក់ចេញនូវគោលដៅជាយុទ្ធសាស្ត្រចំនួន៥ និងបណ្តាគោលនយោបាយធំៗជាអាទិភាពសម្រាប់រយៈពេលប្រាំឆ្នាំបន្តទៀត ដោយផ្អែកលើបំណងប្រាថ្នារបស់ប្រជាជន ព្រមទាំងសភាពការណ៍ជាក់ស្តែងនៅក្នុងប្រទេស និងនៅក្រៅប្រទេស ដើម្បីសម្រេចបានសមិទ្ធផលធំៗលើគ្រប់វិស័យជាបន្តទៀត និងឈានទៅសម្រេចចក្ខុវិស័យកម្ពុជាឆ្នាំ២០៣០ ជាប្រទេសមានចំណូលមធ្យមកម្រិតខ្ពស់។ នេះបេយោងតាមសេចក្តីសម្រេចលទ្ធផល នៃមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា នាល្ងាចថ្ងៃទី២៩ ខែមករា ឆ្នាំ២០២៣។
ក្នុងសេចក្តីសម្រេច បានបញ្ជក់ថា គោលដៅជាយុទ្ធសាស្ត្រទាំង៥ រួមមាន ទី១. ការពារសន្តិភាព ការពារឯករាជ្យ អធិបតេយ្យ បូរណភាពទឹកដី និងការពាររាល់សមិទ្ធផល សង្គមជាតិឱ្យបានគង់វង្សស្ថិតស្ថេរ។ ទី២. កសាងព្រះរាជាណាចក្រកម្ពុជា រដ្ឋប្រជាធិបតេយ្យសេរីពហុបក្សដ៏ជឿនលឿន និងរឹងមាំ ដែលផ្អែកលើច្បាប់ មានសេដ្ឋកិច្ចរីកចម្រើនប្រកបដោយចីរភាព និងសមធម៌ ប្រជាជនមានជីវភាពសម្បូរ សប្បាយ បានរស់នៅយ៉ាងសុខដុមរមនាប្រកបដោយកិត្តិយស សេចក្ដីថ្លៃថ្នូរ និងមានការគោរពសិទ្ធិមនុស្ស។
ទី៣. កសាងប្រព័ន្ធគាំពារសង្គមប្រកបដោយបរិយាបន្ន ប្រសិទ្ធភាព និងចីរភាពហិរញ្ញវត្ថុ ដែលធានាការផ្ដល់ការគាំពារដល់ប្រជាជន ក្នុងការឆ្លើយតបចំពោះហានិភ័យសេដ្ឋកិច្ច ហានិភ័យសុខភាពសាធារណៈ និងភាពងាយរងគ្រោះផ្សេងៗ ដែលកើតឡើងពីការប្រែប្រួលលក្ខខណ្ឌនៃការងារ និងការរស់នៅ។ ទី៤. ជំរុញការអនុវត្ត “កម្ពុជាគ្មានមីនត្រឹមឆ្នាំ ២០២៥ និងកាត់បន្ថយគ្រាប់មិនទាន់ផ្ទុះឱ្យបានជាអតិបរមា”។ ទី៥. បន្តអនុវត្តនយោបាយការបរទេសឯករាជ្យដោយផ្អែកលើច្បាប់ កសាងមិត្តភាព និងកិច្ចសហប្រតិបត្តិការល្អប្រសើររវាងព្រះរាជាណាចក្រកម្ពុជាជាមួយប្រទេសទាំងអស់នៅលើសកលលោក និងអង្គការអន្តរជាតិនានា ហើយចូលរួមយ៉ាងសកម្មចំពោះបុព្វហេតុសន្តិភាព ស្ថិរភាព សន្តិសុខ និងវិបុលភាពក្នុងតំបន់ និងពិភពលោក។
ជាមួយគ្នានេះ មហាសន្និបាតក៏បានផ្តោតសារៈសំខាន់ជាយុទ្ធសាស្ត្រ ចំពោះការបន្តកសាងពង្រឹងគណបក្សឱ្យកាន់តែរឹងមាំ និងស្អាតស្អំលើគ្រប់ផ្នែក ដើម្បីបង្កើនការផ្សារភ្ជាប់រវាងគណបក្សជាមួយប្រជាជន និងលើកកម្ពស់សមត្ថភាពដឹកនាំរបស់គណបក្សឱ្យឆ្លើយតបទៅនឹងសំណូមពរនៃភារកិច្ចដែលមានកាន់តែច្រើនឡើង និងកាន់តែលំបាកស្មុគស្មាញឡើង។ ជាពិសេសជាងនេះទៀតគឺ ការពង្រឹងគណបក្សថ្នាក់ក្រុង ស្រុក ខណ្ឌ និងថ្នាក់មូលដ្ឋានឃុំ សង្កាត់ ដែលមានតួនាទីគន្លឹះក្នុងការធានាជោគជ័យក្នុងការអនុវត្តកម្មវិធីនយោបាយរបស់គណបក្ស។សន្និបាតគណបក្សប្រជាជនកម្ពុជា ក៏បានលើកឡើងពីភាព ចាំបាច់ត្រូវកម្ចាត់នយោបាយ និងសកម្មភាពជ្រុលនិយមគ្រប់រូបភាព ឱ្យអស់ពីសង្គមកម្ពុជា មិនទុកឱ្យនិន្នាការនេះបង្កការបែកបាក់ជាតិឡើយ។ នេះបេីយោងតាមសេចក្តីសម្រេច លទ្ធផល នៃមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា នាល្ងាចថ្ងៃទី២៩ ខែមករា ឆ្នាំ ២០២៣។
គបក្សប្រជាជនកម្ពុជាក៏បានបញ្ជាក់ដែរថា មហាសន្និបាតបញ្ជាក់ច្បាស់អំពីការប្តេជ្ញាចិត្តរបស់គណបក្សក្នុងការថែរក្សាសន្តិភាព ស្ថិរភាពនយោបាយ និងសន្តិសុខ ឱ្យបានរឹងមាំនៅគ្រប់កាលៈទេសៈ លើកកម្ពស់ការគោរព និងអនុវត្តច្បាប់ដ៏ម៉ឹងម៉ាត់ ហើយប្រឆាំងដាច់ខាតរាល់សកម្មភាពប្រទូសរ៉ាយដែលធ្វើឱ្យប៉ះពាល់ដល់សន្តិភាព ប្រជាធិបតេយ្យ នីតិរដ្ឋ និងការអភិវឌ្ឍនៅកម្ពុជា។ ក្នុងស្មារតីនេះ បក្សប្រជាជន បានប្តេជ្ញាចាំបាច់ត្រូវកម្ចាត់នយោបាយ និងសកម្មភាពជ្រុលនិយមគ្រប់រូបភាព ឱ្យអស់ពីសង្គមកម្ពុជា មិនទុកឱ្យនិន្នាការនេះបង្កការបែកបាក់ជាតិឡើយ ដើម្បីពង្រឹងសាមគ្គីភាព ឯកភាពជាតិ និងធានាបរិយាកាសរស់នៅដ៏សុខសាន្តជូនប្រជាជន។ ក្រៅពីនេះបន្តលើកកម្ពស់ការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាពឱ្យកាន់តែបានល្អប្រសើរតាមទិសដៅដែលរាជរដ្ឋាភិបាលបានដាក់ចេញ។
មហាសន្និបាតក៏បានសម្ដែងការគោរព និងដឹងគុណដ៏ជ្រាលជ្រៅបំផុតចំពោះជនរួមជាតិនៅគ្រប់ទិសទីទាំងនៅក្នុងប្រទេស ទាំងនៅក្រៅប្រទេស ដែលបានផ្ដល់យុត្តិធម៌ ការគាំទ្រ និងការជឿជាក់លើការដឹកនាំ របស់គណបក្សប្រជាជនកម្ពុជារយៈពេល ៤៤ឆ្នាំ កន្លងទៅនេះ ដែលធ្វើឱ្យគណបក្សមានលទ្ធភាពបំពេញភារកិច្ច បម្រើជាតិមាតុភូមិប្រកបដោយជោគជ័យ។ បក្សប្រជាជនកម្ពុជាក៏ថ្លែងអំណរគុណយ៉ាងស្មោះស្ម័គ្រចំពោះបណ្តាប្រទេសជាមិត្ត សហគមន៍អន្តរជាតិ និងដៃគូអភិវឌ្ឍន៍នានា ដែលបាននិងកំពុងផ្ដល់ការឧបត្ថម្ភគាំទ្រដ៏ថ្លៃថ្លាដល់បុព្វហេតុដ៏យុត្តិធម៌របស់ប្រជាជនកម្ពុជា។
សូមបញ្ជាក់ថាមហាសន្និបាតវិសាមញ្ញតំណាងទូទាំងប្រទេសរយៈពេល២ថ្ងៃ របស់គណបក្សប្រជាជនកម្ពុជា បានចាប់ផ្តើមនៅព្រឹកថ្ងៃទី២៨ ខែមករា ឆ្នាំ២០២៣ នៅវិមាន៧មករា រាជធានីភ្នំពេញ ក្រោមអធិបតីភាព សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងសម្តេចពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា។ មហាសន្និបាតមានការចូលរួមពីសមាជិកអចិន្ត្រៃយ៍ សមាជិកគណៈកម្មាធិការកណ្តាល ប្រធានគណបក្សទូទាំងប្រទេស។ជាលទ្ធផលបង្ហាញថា៖មហាសន្និបាត បានប្រព្រឹត្តទៅស្របតាមលក្ខន្តិកៈ និងបទបញ្ជាផ្ទៃក្នុងរបស់គណបក្សក្នុង ស្មារតីសាមគ្គីភាព ឯកភាពខ្ពស់ និងចេញសេចក្តីសម្រេចចិត្ត ដូចតទៅ ចំនួន ១១ ចំណុច ៖
១- មហាសន្និបាតបានដំណើរការតាមរបៀបវារៈ និងបានសម្រេចលទ្ធផលដូចខាងក្រោម ៖ក- ពិភាក្សា និងអនុម័ត “របាយការណ៍ ស្តីពីលទ្ធផលនៃការអនុវត្តកម្មវិធីនយោបាយរបស់គណបក្ស ពីឆ្នាំ ២០១៨ ដល់ឆ្នាំ ២០២២ និងទិសដៅ ភារកិច្ច ឆ្នាំ ២០២៣-ខ- ពិភាក្សា និងអនុម័ត “កម្មវិធីនយោបាយរបស់ គណបក្សប្រជាជនកម្ពុជា សម្រាប់ការកសាង និង ការពារមាតុភូមិ ឆ្នាំ ២០២៣-២០២៨
គ- វាយតម្លៃអំពីការអនុវត្តភារកិច្ចឆ្ពោះទៅកាន់ការបោះឆ្នោតជ្រើសតាំងតំណាងរាស្ត្រនីតិកាលទី ៧ឃ- គាំទ្រពេញទំហឹង សម្តេចអគ្គមហាសេនាបតីតេជោ ហ៊ុន សែន ជាបេក្ខភាពនាយករដ្ឋមន្ត្រីសម្រាប់នីតិ កាលទី៧ នៃរដ្ឋសភា និងគាំទ្រ ឯកឧត្តម ហ៊ុន ម៉ាណែត ជាបេក្ខភាពនាយករដ្ឋមន្ត្រីសម្រាប់ពេលអនាគត។
