វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 7772 នាក់
ម្សិលមិញ 8227 នាក់
សរុប 14134653 នាក់
ភ្នំពេញ៖ រដ្ឋាភិបាលអ៊ុយក្រែន បានសម្រេចបញ្ជូនមន្ត្រីជំនាញសកម្មភាពមីនរបស់ខ្លួន មកធ្វើទស្សនកិច្ចសិក្សា និងហ្វឹកហ្វឺនពីជំនាញបោសសំអាតគ្រាប់មីនពីកម្ពុជា។ សេចក្តីប្រកាសព័ត៌មាន របស់មជ្ឈមណ្ឌលសកម្មភាពកម្ចាត់មីនកម្ពុជា (CMAC) ចេញនៅថ្ងៃទី១៣ ខែមករា ឆ្នាំ២០២៣បានឲ្យដឹងថា៖ការសិក្សា និងហ្វឹកហ្វឺនជំនាញបោសសម្អាតមីន និងយុទ្ធភណ្ឌមិនទាន់ផ្ទុះរបស់មន្ត្រីអ៊ុយក្រែននេះ គាំទ្រដោយរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន (JICA)។
សកម្មភាពមីនមនុស្សធម៌លើវិស័យដោះមីននេះ កើតចេញពីការប្តេជ្ញាចិត្តរួមគ្នារវាងប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន និងនាយករដ្ឋមន្ត្រីជប៉ុន លោក Kishida Fumio ក្នុងជំនួបទ្វេភាគី ក្នុងកំឡុងកិច្ចប្រជុំកំពូលអាស៊ាន ឆ្នាំ២០២២ ដែលកម្ពុជាធ្វើជាម្ចាស់ផ្ទះ។សេចក្តីប្រកាសព័ត៌មានរបស់ CMAC បានបញ្ជាក់ថា ផលប៉ះពាល់នៃគ្រាប់មីន និងយុទ្ធភណ្ឌមិនទាន់ផ្ទុះ លើទឹកដីអ៊ុយក្រែន ដែលបណ្តាលឱ្យមានជនស៊ីវិលស្លាប់បាត់បង់ជីវិត និងកំពុងក្លាយជាឧបសគ្គសម្រាប់ប្រជាជនអ៊ុយក្រែន ហើយកិច្ចខិតខំប្រឹងប្រែងបោសសម្អាតទាមទារ ឱ្យមានការតស៊ូ និងការអត់ធ្មត់ ដោយត្រូវការពេលវេលាយូរ ដើម្បីសុវត្ថិភាព និងស្តារជីវភាពឡើងវិញរបស់ប្រជាពលរដ្ឋអ៊ុយក្រែន។
ប្រទេសកម្ពុជា ឆ្លងកាត់សង្គ្រាមជាច្រើនទស្សវត្សរ៍ ដែលបានបន្សល់ទុកនូវគ្រាប់មីន និងយុទ្ធភណ្ឌមិនទាន់ផ្ទុះ រាប់លានគ្រាប់រាយប៉ាយនៅទូទាំងប្រទេស។ ដោយសារតែបទពិសោធន៍ និងការឈឺចាប់នៃផលប៉ះពាល់ដោយសារសង្គ្រាម ដែលបន្សល់ទុកនូវគ្រាប់មីន និងយុទ្ធភណ្ឌមិនទាន់ផ្ទុះរាប់លានគ្រាប់នេះហើយ ទើបរាជរដ្ឋាភិបាលកម្ពុជា ចាត់ទុកកិច្ចសហប្រតិបត្តិការ លើវិស័យសកម្មភាពមីន ជាសកម្មភាពមនុស្សធម៌ មានសារៈសំខាន់សម្រាប់ជួយដល់ប្រទេស និងប្រជាជនអ៊ុយក្រែន ដែលកំពុងរងគ្រោះដោយសារសង្គ្រាម ដូចកម្ពុជាកាលពីជាង ៣០ឆ្នាំមុនដែរ។
សូមជម្រាបថា មន្ត្រីជំនាញសកម្មភាពមីនរបស់អ៊ុយក្រែនចំនួនប្រមាណ ១៥រូប នឹងត្រូវចាប់ផ្តើមហ្វឹកហ្វឺនជំនាញដោះមីន រយៈពេលពេញមួយសប្តាហ៍ នៅពាក់កណ្តាលខែមករា ឆ្នាំ២០២៣ នៅវិទ្យាស្ថានបច្ចេកទេសសកម្មភាពកម្ចាត់មីនរបស់ CMAC ក្នុងខេត្តកំពង់ឆ្នាំង និងធ្វើទស្សនកិច្ច តាមការដ្ឋានដោះមីន នៅខេត្តបាត់ដំបង និងសៀមរាបជាដើម។សម្រាប់ការហ្វឹកហ្វឺនជំនាញដោះមីន ដល់សិក្ខាកាមអន្តរជាតិនេះ មិនមែនជាលើកទី១ សម្រាប់មន្ត្រីអ៊ុយក្រែនទេ កន្លងមកដោយមានការគាំទ្រដោយរដ្ឋាភិបាល និងប្រជាជនជប៉ុន អង្គភាព CMAC ធ្លាប់បានហ្វឹកហ្វឺនការដោះមីន ដល់ប្រទេសជាច្រើនដូចជា កូឡុំប៊ី, អ៉ីរ៉ាក់, អង់ហ្គោឡា និងឡាវជាដើម។
សូមបញ្ជាក់ថាកាលពីដើមខែធ្នូឆ្នាំ២០២២លោក ហេង រតនា ប្រតិភូរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) បានបញ្ជាក់ប្រាប់កាសែតថា ខាង CMAC កំពុងតែសម្របសម្រួលវគ្គហ្វឹកហ្វឺនពេលខាងមុខនេះ ដោយមានការសហការជាមួយប្រទេសជប៉ុន និងអ៊ុយក្រែន។ បើតាមលោក ហេង រតនា វគ្គហ្វឹកហ្វឺននៅខែមករាខាងមុខ គឺខាង CMAC នឹងផ្តោតសំខាន់ទៅលើការប្រើប្រាស់ឧបករណ៍ស្វែងរកមីន ដល់មន្ត្រីអ៊ុយក្រែនទាំង១៥រូប។ចំពោះការណ៍ដែលកម្ពុជានឹងបញ្ជូលអ្នកជំនាញដោះមីនដល់មន្ត្រីអ៊ុយក្រែន នៅប្រទេសប៉ូឡូញ នៅខែមេសាវិញ លោក ហេង រតនា បញ្ជាក់ថា CMAC នឹងបញ្ជូនមន្ត្រីជំនាញរបស់ខ្លួន ពី៥ទៅ៦នាក់ប៉ុណ្ណោះ ដើម្បីផ្តល់វគ្គហ្វឹកហ្វឺនប្រើប្រាស់ឧបករណ៍រាវរកមីន ដល់អ្នកដោះមីនអ៊ុយក្រែនបន្ថែមទៀត។
អគ្គនាយកមជ្ឈមណ្ឌលសកម្មភាពកំចាត់មីនកម្ពុជា បានអះអាងជាថ្មីថា ការផ្តល់វគ្គហ្វឹកហ្វឺននេះ គឺជាការផ្តល់បែបមនុស្សធម៌ មិនមែនជាការណ៍ដែលកម្ពុជាបញ្ជូនមន្ត្រីរបស់ខ្លួនទៅជួយច្បាំងអ៊ុយក្រែនឡើយ។ បើតាមលោក ហេង រតនា មន្ត្រីCMAC ជាមន្ត្រីស៊ីវិល មិនមែនជាកងកម្លាំងប្រដាប់អាវុធ ហើយបេសកកម្មរបស់CMACពេលនេះ ធ្វើឡើងក្នុងគោលការណ៍មនុស្សធម៌ ដើម្បីដោះមីនឲ្យអ៊ុយក្រែន។