ករណីយ៍បាញ់រំដោះអ្នកទោសយួនពីក្នុងសាលាដំបូងខេត្តស្វាយរៀងចាប់បានមកវិញអស់ហើយ

ស្វាយរៀង ៖ នៅព្រឹកថ្ងៃទី១៨ ខែវិច្ឆិកា ឆ្នាំ២០២៥មានករណីបាញ់រំដោះអ្នកទោសជនជាតិវៀតណាមនៅសាលាដំបូងខេត្តស្វាយរៀង ដោយមានរថយន្តសង្ស័យ១គ្រឿងចាំខាងក្រៅបានមករំដោះជនជាតិវៀតណាម ដែលមានស្លាកលេខ 2CA 0692 ពណ៌ខ្មៅ។សម្រាប់អ្នកទោស បើមើលតាមឯកសណ្ឋានដែលពួកគេស្លៀកគឺ​ពណ៌​ទឹក​ក្រូច ​ឬ​ខ្លឹម​ខ្នុរ គឺជាសម្លៀកបំពាក់សម្រាប់ជនត្រូវចោទ, ជនជាប់ចោទ ឬ ពិរុទ្ធជនមិនទាន់ជាទណ្ឌិតនៅឡើយទេ។បើតាមរូបភាពដែលអគ្គពន្ធនាគារបញ្ចេញផ្សព្វផ្សាយអ្នកទោសវៀតណាមទាំង៦នាក់នោះត្រូវចាប់ខ្លួនកាលពីខែដើមឆ្នាំ២០២៥ភាគច្រើនបទល្មើសគ្រឿងញៀនមានតែម្នាក់បទល្មើសកាន់កាប់អាវុធខុសច្បាប់។ 

សម្រាប់សកម្មភាពវិញបើតាមរូបភាពឃ្លិបវិដេអូគឺមានស្រ្តីវៀតណាមម្នាក់ស្លៀកពាក់ខ្មៅបានឈរស្រេចក្នុងតុលាការចាំហុចកាំភ្លើងខ្លីឲ្យអ្នកទោសម្នាក់ក្នុងចំណោម៦ដែលចុះពីឡានហើយក៏ធ្វើសកម្មភាពបាញ់រំដោះខ្លួន។សំណាងហើយអ្នកទោសមិនបានបាញ់សម្លាប់មនុស្សគ្រាន់តែបាញ់គម្រាមរំដោះខ្លួនដោយមានឡានរង់ចាំខាងក្រៅ។បានសេចក្តីថាផែនការរំដោះនេះត្រូវបានរៀបចំល្អដែរគ្រាន់តែបរាជ័យដោយសារមិនដឹងភូមិសាស្ត្ររត់គេចមិនដឹងបើទោះបីពួកគេបានដោះខោអាវអ្នកទោសទុកចោលក្នុងឡានហើយក៏ដោយ។

​ ករណីរំដោះអ្នកទោសចេញពីតុលាការខេត្តស្វាយរៀង កាលពីព្រឹកថ្ងៃទី១៨ ខែវិច្ឆិកា ឆ្នាំ២០២៥នេះ ត្រូវកម្លាំងនាយកដ្ឋាននគរបាលព្រហ្មទណ្ឌ ដឹកនាំស្រាវជ្រាវចាប់ខ្លួនមកវិញបានទាំងអស់ហើយ ក្នុងនោះមានអ្នកទោស៦នាក់ និងស្ដ្រីអ្នកមករំដោះម្នាក់ សរុបទាំងអស់៧នាក់។យ៉ាងណាសង្ឃឹមថាសមត្តកិច្ចនឹងបកស្រាយពីអង្គហេតុនៃការឃុបឃិតគ្នារំដោះអ្នកទោសជាជនជាតិវៀតណាមនោះជាមិនខាន។