វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4939 នាក់
ម្សិលមិញ 5304 នាក់
សរុប 14144465 នាក់
ប្រទេសតួគី៖កងទ័ពអាកាសតួកគីបានបើកការវាយប្រហារតាមអាកាសប្រឆាំងនឹងមូលដ្ឋានឃឺដនៅទូទាំងភាគខាងជើងប្រទេសស៊ីរីនិងអ៊ីរ៉ាក់ ដែលខ្លួននិយាយថាកំពុងបម្រើ “ភេរវករ” ។”យើងបានចាប់ផ្តើមប្រតិបត្តិការ Claw-Sword” រដ្ឋមន្ត្រីការពារជាតិតួកគីលោកហ៊ូលូស៊ីអាកា( Hulusi Akar )បានប្រកាសនៅថ្ងៃនេះនៅឯមូលដ្ឋានទ័ពអាកាសក្នុងទីក្រុងអ៊ីស្តង់ប៊ុលមុនពេលយន្តហោះចម្បាំងចេញដំណើរទៅវាយប្រហារគោលដៅនៅភាគខាងជើងប្រទេសស៊ីរីនិងអ៊ីរ៉ាក់។
ក្រសួងការពារជាតិតួកគីបាននិយាយថាការវាយប្រហារបានផ្តោតទៅលើមូលដ្ឋាននៃគណបក្សពលករឃឺដ(PKK)និងអង្គភាពការពារប្រជាជនឃឺដ(YPG)ដែលទីក្រុងអង់ការ៉ាចាត់ទុកជាការពង្រីកបន្ថែមនៃចលនាPKK ។សេចក្តីថ្លែងការណ៍បានបញ្ជាក់ថា៖”ក្រោមសិទ្ធិរបស់យើងក្នុងការការពារខ្លួនដោយផ្អែកលើមាត្រា៥១នៃធម្មនុញ្ញអង្គការសហប្រជាជាតិ ប្រតិបត្តិការ Claw-Sword ត្រូវបានអនុវត្តនៅក្នុងតំបន់ភាគខាងជើងនៃប្រទេសស៊ីរីនិងអ៊ីរ៉ាក់ ដែលត្រូវបានប្រើប្រាស់ជាមូលដ្ឋានសម្រាប់ការវាយប្រហារភេរវករក្នុងគោលបំណងទៅកាន់ប្រទេសតួកគី”។
យុទ្ធនាការផ្លូវអាកាសកើតឡើង១សប្តាហ៍បន្ទាប់ពីការវាយប្រហារដោយគ្រាប់បែកនៅកណ្តាលទីក្រុងអ៊ីស្តង់ប៊ុលកាលពីថ្ងៃទី១៣ខែវិច្ឆិកាបានបណ្តាលឱ្យមនុស្ស៦នាក់ស្លាប់និង៨១នាក់រងរបួស។ រដ្ឋមន្ត្រីក្រសួងមហាផ្ទៃលោក Suleyman Soylu បាននិយាយនៅក្នុងការអត្ថាធិប្បាយតាមទូរទស្សន៍ថា “យើងសូមបដិសេដ និងមិនទទួលយកសាររំលែកទុក្ខរបស់ស្ថានទូតអាមេរិកនោះទេ” ។ មន្ត្រីតួកគីបាននិយាយផងដែរថា ទីក្រុងអង់ការ៉ាកំពុងធ្វើការជាមួយប្រទេសមួយចំនួនប្រឆាំងនឹងអំពើភេរវកម្ម រួមទាំងការបំផ្ទុះគ្រាប់បែកនៅទីក្រុងអ៊ីស្តង់ប៊ុលកាលពីថ្ងៃអាទិត្យផងដែរ ហើយបានស្ដីបន្ទោសអំពើដ៏ឃោរឃៅនេះ ទៅលើក្រុមសកម្មប្រយុទ្ធឃឺដ ដោយសារតែក្រុមនេះបានធ្វើប្រតិបត្តិការជាច្រើននៅភាគខាងជើងប្រទេសស៊ីរី ។
ទីក្រុងអង់ការ៉ាបានចោទប្រកាន់ PKK ថាបានបង្កការបំផ្ទុះគ្រាប់បែកដ៏សាហាវបំផុតក្នុងរយៈពេល៥ឆ្នាំចុងក្រោយនេះនៅក្នុងប្រទេសក៏ដូចជារំលឹកឡើងវិញនូវការចងចាំដ៏ជូរចត់នៃរលកនៃការទម្លាក់គ្រាប់បែកនៅទូទាំងប្រទេសតួកគីក្នុងឆ្នាំ ២០១៥-២០១៧ ដែលភាគច្រើនដោយកងកម្លាំងមនុស្សឃឺដ និងយុទ្ធជននៃក្រុមអ៊ីស្លាមប្រកាសខ្លួនឯងក្រុមបះបោររដ្ឋ (IS) ។PKK ដែលបានធ្វើការវាយប្រហារយ៉ាងសាហាវនៅក្នុងប្រទេសតួកគីក្នុងរយៈពេលជាច្រើនទសវត្សរ៍ហើយត្រូវបានចុះក្នុងបញ្ជីជាភេរវករដោយក្រុងអង់ការ៉ានិងសម្ព័ន្ធមិត្តលោកខាងលិចរបស់ខ្លួនបដិសេធការជាប់ពាក់ជជាមួយ។ក្រុមYPG ដែលជាកងជីវពលជនជាតិឃឺដនៅភាគខាងជើងប្រទេសស៊ីរី និងជាសម្ព័ន្ធមិត្តរបស់សហរដ្ឋអាមេរិកក្នុងការប្រយុទ្ធប្រឆាំងនឹងក្រុម IS ក៏បានបដិសេធការចោទប្រកាន់របស់តួកគីផងដែរ។
មិនទាន់មានក្រុមណាមួយចេញមុខអះអាងទទួលខុសត្រូវចំពោះការបំផ្ទុះគ្រាប់បែកនៅអ៊ីស្តង់ប៊ុលនៅឡើយទេ។តែយោធាតួកគីបានសម្រេចចិត្តបើកយុទ្ធនាការផ្លូវអាកាសបន្ទាប់ពីប៉ូលិសតួកគីបានចាប់ខ្លួនAlhamAlbashirដែលត្រូវបានគេកំណត់ថាជាជនសង្ស័យសំខាន់ក្នុងការបំផ្ទុះគ្រាប់បែកនៅជាយក្រុងអ៊ីស្តង់ប៊ុល។ Albashir គឺជាស្ត្រីជនជាតិស៊ីរីដែលគេជឿថាមានទំនាក់ទំនងជាមួយកងជីវពលឃឺដ ។ក្រុមឃ្លាំមើលសិទ្ធិមនុស្សស៊ីរី ដែលមានមូលដ្ឋាននៅអង់គ្លេស បាននិយាយថា យន្តហោះចម្បាំងតួកគី ក្នុងប្រតិបត្តិការថ្ងៃនេះ បានធ្វើការវាយប្រហារតាមអាកាសជាង ២០លើក ទៅលើគោលដៅជាច្រើននៅក្នុងខេត្តភាគខាងជើង Raqqa, Aleppo និង Hassakeh ប្រទេសស៊ីរី។
ការវាយប្រហារនេះបានសម្លាប់សមាជិកយ៉ាងហោចណាស់៦នាក់នៃកងកម្លាំងប្រជាធិបតេយ្យស៊ីរី (SDF) ដែលដឹកនាំដោយឃឺដនិងទាហានរដ្ឋាភិបាលស៊ីរី៦នាក់។ទន្ទឹមនឹងនោះ PKK បានអះអាងថាការវាយឆ្មក់ទម្លាក់គ្រាប់បែករបស់កងទ័ពអាកាសតួកគី មិនបណ្តាលឱ្យមាននរណាម្នាក់រងរបួសដល់កងកម្លាំងនេះទេ។រដ្ឋាភិបាលស៊ីរីនិងអ៊ីរ៉ាក់ មិនបានធ្វើអត្ថាធិប្បាយលើព័ត៌មាននេះទេ។ថ្មីៗនេះ យោធាតួកគីក៏បានវាយប្រហារជាប្រចាំលើមូលដ្ឋាន PKK នៅអ៊ីរ៉ាក់ដែរ។ ចាប់តាំងពីខែមេសាមក ពួកគេបាននិងកំពុងធ្វើប្រតិបត្តិការ Claw-Lock នៅភាគខាងជើងប្រទេសអ៊ីរ៉ាក់ ដើម្បីតាមប្រមាញ់ក្រុមអ្នកប្រយុទ្ធ PKK ដែលទីក្រុង អង់ការ៉ាចាត់ទុកថាជាភេរវករ។
កន្លងមកលោកប្រធានាធិបតីតួកគី Recep Tayyip Erdogan តែងតែចោទប្រកាន់ទីក្រុងវ៉ាស៊ីនតោន ពីការផ្គត់ផ្គង់អាវុធដល់សកម្មប្រយុទ្ធឃឺដ នៅភាគខាងជើងប្រទេសស៊ីរី ដែលទីក្រុងអង់ការ៉ាចាត់ទុកថាជា “ពួកភេរវករ” ។ទោះបីយ៉ាងណាប្រធានាធិបតីអាមេរិក លោក ចូ បៃដិន និងសមភាគីតួកគី លោក រ៉េជីប អ៊ែរដូហ្កាន កាលពីថ្ងៃអង្គារ (១៥ វិច្ឆិកា) បានពិភាក្សាអំពីការបំផ្ទុះគ្រាប់បែកដ៏សាហាវនៅទីក្រុងអ៊ីស្តង់ប៊ុល និងការខិតខំប្រឹងប្រែងអន្តរជាតិក្នុងការនាំចេញគ្រាប់ធញ្ញជាតិអ៊ុយក្រែន។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃអង្គារ ទី១៥ ខែវិច្ឆិកា ឆ្នាំ២០២២។
មេដឹកនាំទាំងពីរបានពិភាក្សាគ្នានៅក្រៅកិច្ចប្រជុំកំពូល G20 នៅកោះបាលី ប្រទេសឥណ្ឌូនេស៊ី ដោយនិយាយអំពីបញ្ហាមួយចំនួនដែលជាចំណុចស្នូលនៃទំនាក់ទំនងជិតស្និទ្ធ ប៉ុន្តែជាញឹកញាប់តែងតែមានភាពរកាំរកូសរវាងប្រទេសទាំងពីរ។សេតវិមានបាននិយាយនៅក្នុងសេចក្តីថ្លែងការណ៍មួយថា លោក បៃដិន បានសម្តែង «ការរំលែកទុក្ខយ៉ាងជ្រាលជ្រៅ» ចំពោះសោកនាដកម្មស្លាប់មនុស្ស ០៦នាក់នៅក្នុងការវាយប្រហារ ដោយគ្រាប់បែកនៅលើផ្លូវដ៏មមាញឹកក្នុងទីក្រុងអ៊ីស្តង់ប៊ុល កាលពីថ្ងៃអាទិត្យដោយសង្កត់ធ្ងន់ថា សហរដ្ឋអាមេរិកឈរនៅខាងសម្ព័ន្ធមិត្តណាតូរបស់ខ្លូនជានិច្ច។ក្នុងជំនួបនេះ មេដឹកនាំទាំងពីរក៏បានពិភាក្សាគ្នាលើ កិច្ចព្រមព្រៀងអន្តរជាតិដើម្បីដឹកជញ្ជូនការនាំចេញគ្រាប់ធញ្ញជាតិអ៊ុយក្រែន ឆ្លងកាត់សមុទ្រខ្មៅទៅកាន់ទីផ្សារពិភពលោកផងដែរ៕ប្រភព ៖ Arab Newនិង AFP