លោកពូទីនថាការទណ្ឌកម្មលោកខាងលិចដូចធ្វើសង្គ្រាមជាមួយរុស្ស៊ី!
22-January-2026 / ព័ត៌មានអន្តរជាតិ
ប្រទេសរុស្ស៊ី៖លោកប្រធានាធិបតីរុស្ស៊ីវ្លាឌីមៀពូទីន(VladimirPutin)និយាយថាការដាក់ទណ្ឌកម្មប្រឆាំងនឹងរុស្ស៊ីប្រៀបដូចជាការប្រកាសសង្គ្រាមពីលោកខាងលិចនិងព្រមានប្រទេសនានាកុំឲ្យអនុវត្តតំបន់គ្មានការហោះហើរនៅអ៊ុយក្រែនឲ្យសើ!។
ប្រធានាធិបតីរុស្ស៊ីលោកពូទីនបាននិយាយក្នុងអំឡុងសន្និសីទវីដេអូជាមួយបុគ្គលិកក្រុមហ៊ុនអាកាសចរណ៍Aeroflotថា”ប្រទេសណាដែលដាក់តំបន់ហាមហោះហើរលើអ៊ុយក្រែននឹងត្រូវបានចាត់ទុកថាចូលរួមក្នុងជម្លោះប្រដាប់អាវុធ”។លោកPutinបាននិយាយថា”ការដាក់ទណ្ឌកម្មដែលកំពុងត្រូវបានអនុវត្តគឺដូចជាការប្រកាសសង្គ្រាម ។ប៉ុន្តែសូមអរគុណព្រះជាម្ចាស់អ្វីៗមិនទាន់មាននៅឡើយទេ”។
លោកប្រធានាធិបតីពូទីននិយាយថា ការបញ្ជូនកងទ័ពទៅកាន់អ៊ុយក្រែនគឺជាការសម្រេចចិត្តដ៏លំបាកមួយ។ប៉ុន្តែនៅតែការពារការឈ្លានពានថា៖ ទីក្រុងម៉ូស្គូត្រូវតែធ្វើសកម្មភាពដើម្បីការពារសហគមន៍និយាយភាសារុស្ស៊ីនៅភាគខាងកើតអ៊ុយក្រែន និងផលប្រយោជន៍របស់ខ្លួន។លោកបានច្រានចោលលទ្ធភាពនៃការប្រកាសច្បាប់អាជ្ញាសឹកដោយនិយាយថាវានឹងត្រូវបានអនុវត្តតែនៅពេលដែលមាន “សកម្មភាពឈ្លានពានពីបរទេស” ។
ចៅហ្វាយវិមានក្រឹមឡាំងបាននិយាយថា «អ្វីៗនៅតែដំណើរការទៅតាមផែនការ» នៅអ៊ុយក្រែនហើយកងទ័ពរុស្ស៊ីនឹងសម្រេចគោលដៅនៃប្រតិបត្តិការយោធាពិសេសនោះគឺ«ការរំសាយសព្វាវុធនិងផ្ដាច់ហ្វាស៊ីសនិយមរបស់អ៊ុយក្រែន ព្រមទាំងការធានាអព្យាក្រឹតភាពនៃប្រទេសនេះ”។”មេដឹកនាំអ៊ុយក្រែនបច្ចុប្បន្នត្រូវយល់ថា ប្រសិនបើពួកគេបន្តធ្វើសកម្មភាពដូចបច្ចុប្បន្នពួកគេប្រថុយនឹងការបាត់បង់ឋានៈជារដ្ឋឯករាជ្យរបស់អ៊ុយក្រែន។ប្រសិនបើរឿងនោះកើតឡើងពួកគេអាចបន្ទោសខ្លួនឯងតែប៉ុណ្ណោះ”។
លោកPutin បានបន្ថែម។បណ្តាប្រទេសរបស់សហរដ្ឋអាមេរិក និងសហភាពអឺរ៉ុប (EU) ក៏ដូចជាចក្រភពអង់គ្លេស កាណាដា ជប៉ុន និងប្រទេសមួយចំនួនទៀត បានដាក់ទណ្ឌកម្មជាបន្តបន្ទាប់ប្រឆាំងនឹងប្រទេសរុស្ស៊ី ដូចជាការដកធនាគាររុស្ស៊ីមួយចំនួនចេញពីប្រព័ន្ធហិរញ្ញវត្ថុសកលSWIFTការបង្កកទ្រព្យសម្បត្តិនៅសហរដ្ឋអាមេរិក របស់ប្រធានាធិបតីរុស្ស៊ីនិងហាមយន្តហោះរបស់រុស្ស៊ីចូលដែនអាកាសរបស់គេ។ទណ្ឌកម្មបានធ្វើឱ្យរុស្ស៊ីប្រឈមនឹងវិបត្តិហិរញ្ញវត្ថុ ខណៈតម្លៃប្រាក់រូប្លិបានធ្លាក់ចុះដល់កម្រិតទាបបំផុតធៀបនឹងប្រាក់ដុល្លារ។
បារាំង អាឡឺម៉ង់ និងអ៊ីតាលីបានរឹបអូសយកនាវាទំនើបរបស់មហាសេដ្ឋីរុស្ស៊ី។ប្រធានាធិបតីអាមេរិក លោក Joe Bidenបាននិយាយថាប្រទេសនេះក៏នឹងរឹបអូសទូកអាផាតមិនប្រណីតនិងយន្តហោះឯកជនរបស់មហាសេដ្ឋីរុស្ស៊ីផងដែរ។ វិមានក្រឹមឡាំងបានរិះគន់លោកខាងលិចចំពោះអាកប្បកិរិយាដូចជា “ចោរ” ដោយនិយាយថាទណ្ឌកម្មរបស់លោកខាងលិចនឹងមិនផ្លាស់ប្តូរជំហររបស់រុស្ស៊ីចំពោះអ៊ុយក្រែនឡើយ។ប្រទេសមួយចំនួនក៏បានបញ្ចេញសំឡេងប្រឆាំងនឹងទណ្ឌកម្មរបស់លោកខាងលិចប្រឆាំងនឹងរុស្ស៊ីដែរ។ ប្រធានាធិបតីវេណេស៊ុយអេឡា លោក Nicolas Maduro (ដែលរងទណ្ឌកម្មពីអាមេរិកដែរ)បានហៅទណ្ឌកម្មនេះថា”ឆ្កួត” ហើយចាំបាច់ត្រូវបញ្ឈប់។
ម៉ិកស៊ិក និងប្រេស៊ីលក៏បានបដិសេធមិនដាក់ទណ្ឌកម្មសេដ្ឋកិច្ចលើរុស្ស៊ីដែរ។សម្រាប់ប្រធានាធិបតីអ៊ុយក្រែនលោកវ៉ូឡូឌីមហ្សេឡិនស្គី( Volodymyr Zelensky) និងមន្ត្រីអ៊ុយក្រែនមួយចំនួនបាននិយាយថា ការបង្កើតតំបន់គ្មានការហោះហើរគឺជាការទាមទារដ៏សំខាន់មួយដែលពួកគេបានធ្វើចំពោះសម្ព័ន្ធមិត្តលោកខាងលិចរបស់ពួកគេចាប់តាំងពីប្រទេសរុស្ស៊ីបានចាប់ផ្តើមយុទ្ធនាការយោធានៅក្នុងប្រទេស។ អ្នកគាំទ្រគំនិតនេះជឿថាតំបន់គ្មានការហោះហើរនឹងកាត់ផ្តាច់សកម្មភាពផ្លូវអាកាសរបស់រុស្ស៊ី ដោយរារាំងសន្ទុះនៃកងទ័ពរុស្ស៊ីមិនឱ្យឈានទៅមុខក្រុងគៀវ។ទោះជាយ៉ាងណាក៏ដោយ មន្ត្រីរដ្ឋបាលលោក Biden បានបញ្ជាក់យ៉ាងច្បាស់ និងស្របគ្នាថាពួកគេនឹងមិនពិចារណាបង្កើតតំបន់ហាមហោះហើរលើអ៊ុយក្រែនទេ ដោយសារខ្លាចមានផលវិបាកគ្រោះថ្នាក់។
អគ្គលេខាធិការអង្គការណាតូ លោក Jens Stoltenberg ក៏បានយល់ស្របដែរថា ការបង្កើតតំបន់គ្មានការហោះហើរលើអ៊ុយក្រែន «អាចបង្កឲ្យមានសង្គ្រាមពេញផ្ទៃអឺរ៉ុប»។រុស្ស៊ីបានបើកប្រតិបត្តិការយោធាពិសេសនៅអ៊ុយក្រែនចាប់ពីថ្ងៃទី ២៤ កុម្ភៈហើយអរិភាពបានឈានចូលដល់ថ្ងៃទី១០។ កងកម្លាំងរុស្ស៊ីគ្រប់គ្រងទីក្រុងធំ Kherson នៅភាគខាងត្បូងអ៊ុយក្រែនហើយកំពុងឡោមព័ទ្ធ និងបាញ់ផ្លោងទីក្រុងមួយចំនួន រួមទាំងរដ្ឋធានី Kiev និង Kharkov ដែលជាទីក្រុងធំទីពីររបស់ប្រទេសនេះ។
ទីក្រុងម៉ូស្គូទទូចថា ខ្លួនផ្តោតតែលើហេដ្ឋារចនាសម្ព័ន្ធយោធាប៉ុណ្ណោះ។គណៈប្រតិភូរុស្ស៊ីនិងអ៊ុយក្រែន គ្រោងនឹងធ្វើកិច្ចចរចាជុំទី៣ នៅចុងសប្តាហ៍នេះ ដើម្បីស្វែងរកដំណោះស្រាយចំពោះអរិភាព។ រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយនៅមុននេះថា ទីក្រុងម៉ូស្គូបានត្រៀមខ្លួនរួចជាស្រេចក្នុងការចរចា។ ប៉ុន្តែនឹងបន្តយុទ្ធនាការយោធារបស់ខ្លួន នៅពេលដែលកិច្ចចរចាបានធ្វើឡើង ដោយសារតែរុស្ស៊ីមិនអាចអនុញ្ញាតឱ្យ “ហេដ្ឋារចនាសម្ព័ន្ធយោធា” បន្តកើតមានក្នុងប្រទេសអ៊ុយក្រែនដែលជាការគំរាមកំហែងដល់រុស្ស៊ី៕យោងតាមAFP
