កម្ពុជាទទួលបានការសាទរក្នុងតួនាទីជាសហស្ថាបនិកនៃការធ្វើសេចក្តីសម្រេចថ្កោលទោសរុស្ស៊ីដែលកាត់យកដីអ៊ុយក្រែន
នីវយ៉ក៖លទ្ធផលនៃការបោះឆ្នោតនៅសន្និបាតអង្គការសហប្រជាជាតិ នាថ្ងៃពុធទី១២តុលា បង្ហាញថា កម្ពុជាស្ថិតក្នុងចំណោម១៤៣ប្រទេស បានសម្រេចចិត្តបោះឆ្នោតប្រឆាំងរុស្ស៊ី បករណីយ៍រុស្ស៊ីធ្វើប្រជាមតិយកតំបន់៤របស់អ៊ុយក្រែនមកកាន់កាប់ជាកម្មសិទ្ធិ។មហាសន្និបាតអង្គការសហប្រជាជាតិបានអនុម័តដំណោះស្រាយមួយ ថ្កោលទោសការបញ្ចូលខុសច្បាប់របស់រុស្ស៊ី ទៅលើតំបន់ចំនួន ៤ គឺតំបន់ Luhansk Donetsk Kherson និងZaporizhzhiaនៃភាគខាងកើតអ៊ុយក្រែន ដោយមានប្រទេសចំនួន ១៤៣ បានបោះឆ្នោតគាំទ្រ ប៉ុន្តែប្រទេសចំនួន ៥ ដូចជា រុស្ស៊ី វេណេស៊ុយអេឡា កូរ៉េខាងជើង បេឡារុស និងស៊ីរី បានបោះឆ្នោតប្រឆាំងនឹងដំណោះស្រាយនេះ ខណៈប្រទេស ៣៥ ទៀតរួមទាំងចិន និងឥណ្ឌាគឺបោះឆ្នោតអនុប្បវាទ ។
ការសម្រេចចិត្តធ្វើជាសហស្ថាបនិករបស់កម្ពុជាពេលនេះ ត្រូវបានសហគមន៍អន្តរជាតិសម្តែងការសាទរ ដ្បិតកម្ពុជាមានតួនាទីជាប្រធានអាស៊ាននៅឆ្នាំនេះផង។ លោក Patrick Murphy ឯកអគ្គរដ្ឋទូតអាមេរិកប្រចាំកម្ពុជាបានសសេរលើបណ្តាញសង្គមធ្វីតទ័រ នៅព្រឹកថ្ងៃព្រហស្បតិ៍ ទី១៣តុលា បានចាត់ទុកការសម្រេចចិត្តរបស់កម្ពុជា ថាបានបង្ហាញពីគោលការណ៍ភាពជាអ្នកដឹកនាំរបស់កម្ពុជាក្នុងនាមជាប្រធានអាស៊ាន។ ភ្ជាប់ជាមួយគ្នានេះ តំណាងទូតអង់គ្លេសប្រចាំកម្ពុជា ក៏គាំទ្រការសម្រេចចិត្តរបស់កម្ពុជាដែរ។ ឯកអគ្គរាជទូតអង់គ្លេស លោក Dominic William បញ្ជាក់ពីការអរគុណប្រមុខរដ្ឋាភិបាលកម្ពុជា លោក ហ៊ុន សែន និងប្រមុខការទូត លោក ប្រាក់ សុខុន ដែលធ្វើជាសហស្ថាបនិកគាំទ្រដំណោះស្រាយដ៏មានសារៈសំខាន់នៅមហាសន្និបាតអង្គការសហប្រជាជាតិ ដើម្បីថ្កោលទោសរុស្ស៊ីជាថ្មី។
ជំហររបស់កម្ពុជាពេលនេះ ក៏ត្រូវបានសម្តេចនាយករដ្ឋមន្ត្រី ហ៊ុន សែន អះអាងរួចជាស្រេចទៅហើយ ថាកម្ពុជានឹងយកគោលការណ៍ច្បាប់ជាមូលដ្ឋាន។ កាលពីថ្ងៃអង្គារ ទី១១តុលា សម្តេច ហ៊ុន សែន លើកឡើងថា ការណ៍ដែលប្រទេសមួយ ទៅយកទឹកដីប្រទេសមួយទៀត ជារឿងមិនត្រឹមត្រូវ ដោយលោកបានប្រដូចស្ថានការណ៍អ៊ុយក្រែននឹងកម្ពុជា ថាបើប្រទេសជិតខាង ធ្វើចឹងដាក់យើង តើយើងខឹងឬទេ?។
ជាការកត់សម្គាល់ នេះជាលើកទី២ហើយ ដែលកម្ពុជាធ្វើជាសហស្ថាបនិកនៃការផ្ចុងផ្តើមការថ្កោលទោសរុស្ស៊ីម្តងទៀត ខណៈដែលលើកទី១នោះបានធ្វើឡើងកាលពីថ្ងៃទី២មីនា ដែលកម្ពុជាបានស្ម័គ្រចិត្តចូលរួមផ្តួចផ្តើមសេចក្តីសម្រេចចិត្តរបស់អង្គការសហប្រជាជាតិ ក្នុងការគាំទ្រអធិបតេយ្យភាព និងបូរណភាពទឹកដីអ៊ុយក្រែន ហើយទាមទារឲ្យរុស្ស៊ីដកកងទ័ពចេញពីអ៊ុយក្រែនជាបន្ទាន់។
សេចក្តីសម្រេចដែលចងក្រងឡើងដោយសហភាពអឺរ៉ុប មានចែងពីការថ្កោលទោសលើការកាត់យកដោយខុសច្បាប់ ទឹកដី តំបន់ចំនួន៤របស់អ៊ុយក្រែន ក្រោមលេស បោះឆ្នោតប្រជាមតិរបស់រុស្ស៊ី។ សេចក្តីសម្រេចខាងលើបានចាត់ទុកសកម្មភាពកាត់យកទឹកដីអ៊ុយក្រែន ពីសំណាក់រុស្ស៊ី ថា ជាការផ្ទុយនឹងច្បាប់អន្តរជាតិ។ ដូច្នេះ គ្មានអ្នកណាម្នាក់ ត្រូវទទួលស្គាល់ ទឹកដីទាំង៤ របស់អ៊ុយក្រែនដែលរុស្ស៊ីទើបកាត់យកថ្មីៗនេះ ថា ជាទឹកដីរបស់រុស្ស៊ីនោះទេ។ ការអំពាវនាវឲ្យរុស្ស៊ីដកទ័ព ធ្លាប់មាននៅក្នុងសេចក្តីសម្រេចលើកទី ១ដែលមហាសន្និបាតអង្គការសហប្រជាជាតិ បានបោះឆ្នោត អនុម័តកាលពីថ្ងៃទី ២មីនា ពោលគឺនៅប៉ុន្មានថ្ងៃក្រោយរុស្ស៊ី បើកធ្វើសង្គ្រាមអ៊ុយក្រែន។
គួរបញ្ជាក់ថា សេចក្តីសម្រេចលើកទី៤របស់មហាសន្និបាតអង្គការសហប្រជាជាតិ ទាក់ទងនឹងសង្គ្រាមរុស្ស៊ីឈ្លានពានអ៊ុយក្រែននៅឆ្នាំ ២០១៤ មហាសន្និបាតអង្គការសហប្រជាជាតិក៏បាន ចេញសេចក្តីសម្រេចថ្កោលទោសការកាត់យកទឹកដីគ្រីមេរបស់អ៊ុយក្រែនពីសំណាក់រុស្ស៊ីផងដែរតែគ្មានបានការ។ យ៉ាងណាក៏ដោយ សេចក្តីសម្រេចរបស់មហាសន្និបាត អង្គការសហប្រជាជាតិ ជាសារបញ្ជាក់ថា មានប្រទេសច្រើន នៅក្នុងពិភពលោកដែលមិនយល់ស្របឲ្យរុស្ស៊ី កាត់លេបយកទឹកដីអ៊ុយក្រែន។ សម្រាប់ក្រុមប្រទេសលោកខាងលិច និងអ៊ុយក្រែន គោលដៅសំខាន់របស់ពួកគេ គឺចង់ឲ្យរុស្ស៊ី រឹតតែឯកោ គ្មានអ្នកណារាប់រក នៅក្នុងឆាកអន្តរជាតិ។
អ៊ុយក្រែនផ្ទាល់បានបើកយុទ្ធនាការការទូតសម្បើមណាស់ ជាពិសេស នៅទឹកដីអាហ្វ្រិក ដើម្បីបញ្ចុះបញ្ចូល បណ្តាប្រទេសដែលធ្លាប់បោះឆ្នោតអនុប្បវាទ និងប្រទេសដែលមិនចូលរួមបោះឆ្នោត នៅក្នុងសេចក្តីសម្រេចមុនៗ ឲ្យទៅបោះឆ្នោត គាំទ្រសេចក្តីសម្រេចថ្កោលទោស ការកាត់យកទឹកដីអ៊ុយក្រែនពីសំណាក់រុស្ស៊ីលើកនេះ។ អ៊ុយក្រែន ត្រូវតែខំប្រឹងប្រែងស្វែងរកសំឡេងគាំទ្រ ព្រោះថា ការបោះឆ្នោត របស់មហាសន្និបាត កន្លងមក ទាក់ទងនឹងវិបត្តិអ៊ុយក្រែន បង្ហាញថា សំឡេងគាំទ្រសេចក្តីសម្រេចបានធ្លាក់ថយចុះបន្តិចម្តងៗ ចំនួន ពី១៤១ មកនៅ៩៣។ អ្នកទទួលខុសត្រូវអឺរ៉ុបម្នាក់ព្យាករថា សំឡេងគាំទ្រសេចក្តីសម្រេច របស់មហាសន្និបាតនឹងមានក្នុងចន្លោះ ១០០ និង១៤០។ អ្នកជំនាញខ្លះទៀត វាយតម្លៃថា ហេតុការណ៍បាញ់មីស៊ីលរបស់រុស្ស៊ី សំដៅ ទីក្រុងហេដ្ឋារចនាសម្ព័ន្ធដែលសម្លាប់ប្រជាជនស៊ីវិលអ៊ុយក្រែន កាលពីថ្ងៃចន្ទ ដែលសូម្បី អគ្គលេខាធិការអង្គការសហប្រជាជាតិក៏ចេញមុខថ្កោលទោស នឹងអាចចាត់ទុកជាឧក្រិដ្ឋកម្មសង្គ្រាមដែលធ្វើឲ្យមានប្រទេសច្រើន លែងឈរនៅខាងរុស្ស៊ី ដែលកាន់តែសាហាវ ឃោឃៅនៅក្នុងសង្គ្រាមឈ្លានពានអ៊ុយក្រែន។
