អ្នកភូមិព្រះដាក់ស្ងៀមសិនស្តាប់មេស៊ីសងរឿងរើចេញពីដី
11-March-2026 / ព័ត៌មានជាតិ
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាព្រឹកនៅទី០៦ ខែតុលា ឆ្នាំ២០២២ បានសំណូមពរឱ្យ ប្រជាពលរដ្ឋនៅឃុំព្រះដាក់ ស្រុកបន្ទាយស្រី ខេត្តសៀមរាប រក្សាភាពស្ងប់ស្ងាត់ សិនរាជរដ្ឋាភិបាល នឹងគិតគូរឱ្យបានម៉ត់ចត់បំផុត។ថ្លែងក្នុងពិធីបើកសន្និសីទ «ចក្ខុវិស័យប្រទេសកម្ពុជាឆ្នាំ២០២២» ពិភាក្សាពីការស្តារកម្ពុជាក្រោយវិបត្តិជំងឺកូវីដ១៩ នា សម្តេចតេជោ បានលើកឡើងថា «យើងមិនទាន់មានការប៉ះពាល់ណាមួយទៅលើប្រជាជននៅឃុំព្រះដាក់នោះទេ យើងគ្រាន់តែបានគិតគូអំពីហេដ្ឋារចនាសម្ព័ន្ធរបស់អង្គរ ដែលមុននេះមានបារាយខាងកើត ដែលអាចមានទឹករហូតដល់៣០លានម៉ែត្រគីប»។
សម្តេចទទួលស្គាល់ថា ឃុំព្រះដាក់ត្រូវបានកសាងឡើងប្រមាណ៣០០-៤០០ឆ្នាំមុនមកហើយ ហើយឃុំនេះស្ថិតនៅជាឃុំមួយដែលទាក់ទងទៅនឹងផ្នែករដ្ឋបាលដែនដីរបស់យើងទៀតផងដោយសម្តេចបានបញ្ជាក់បន្ថែមថា «សូមស្ងប់ស្ងាត់ យើងនឹងគិតគូរឱ្យម៉ត់ចត់ ខ្ញុំនឹងបញ្ជូន ឯកឧត្តម ឧបនាយករដ្ឋមន្ត្រី ជា សុផារ៉ា និងលោកជំទាវ ភឿង សកុណា ទៅជួបជាមួយបងប្អូននៅថ្ងៃស្អែក និងមានការជួបជុំដើម្បីពន្យល់»។
សម្តេចតេជោ ហ៊ុន សែន បានបង្ហើបថា រាជរដ្ឋាភិបាលកំពុងសិក្សាអំពីលទ្ធភាពដាក់ទឹកទៅក្នុងបារាយដើម្បីទ្រទ្រង់អង្គរ។ សម្តេចបញ្ជាក់ថា យើងមិនដាក់ទឹកដល់៣០លានម៉ែត្រគូប ដើម្បីទាញប្រជាជនចេញនោះទេ។ សម្រាប់ដីនៅរុនតាឯក វិញនៅសល់ប្រមាណ២០០ឡូតិ៍ សម្តេចបានបញ្ជាឱ្យចាប់ផ្តើមរៀបចំដីនៅតំបន់ពាក់ស្នែង។ សម្តេចក៏បានបញ្ជាឱ្យរៀបចំវត្តនៅតំបន់នេះផងដែរ។សម្តេចបានចាត់ទុកថា ករណីនៅឃុំព្រះដាក់ជារឿងទទួលព័ត៌មានមិនច្បាស់ ធ្វើឱ្យមានការយល់ច្រឡំ ដែលរាជរដ្ឋាភិបាល មិនមានការបណ្តេញនោះទេ។
សូមបញ្ជាក់ថាមានប្រជាពលរដ្ឋប្រមាណ ៣ ០០០នាក់ នៅឃុំព្រះដាក់ ស្រុកបន្ទាយស្រី ខេត្តសៀមរាប បានប្រមូលផ្តុំតវ៉ានៅមុខសាលាឃុំកាលពីថ្ងៃពុធទី៥តុលា ក្រោយពួកគាត់បានទទួលព័ត៌មានថា អាជ្ញាធរជាតិអប្សរា ឱ្យពួកគាត់ចាកចេញពីលំនៅឋានទៅនៅទីតាំងថ្មីក្នុងតំបន់រុនតាឯក។លោក ជា វីរៈ ជាប្រជាពលរដ្ឋរស់នៅភូមិថ្នល់ទទឹង ឃុំព្រះដាក់ ប្រាប់លកាសែតថា ពលរដ្ឋនៅឃុំព្រះដាក់ បានប្រមូលផ្តុំតវ៉ានៅមុខសាលាឃុំទាមទារសុំមិនចាកចេញពីលំនៅឋាន ឬដោះដូរទៅកន្លែងថ្មី។ លោកបន្តថា ថ្មីៗនេះ អាជ្ញាធរជាតិអប្សរា បានមកសម្របសម្រួលឱ្យប្រជាពលរដ្ឋនៅភូមិមួយចំនួន ក្នុងឃុំនេះឱ្យដោះដូរទៅនៅទីតាំងថ្មីក្នុងតំបន់រុនតាឯក ក្រោមហេតុផលថា តំបន់ដែលពលរដ្ឋកំពុងរស់នៅបច្ចុប្បន្ន ជាតំបន់រមណីយដ្ឋានអង្គរ។
លោក ជា វីរៈ បន្ថែមថា៖ «យើងមិនព្រមចាកចេញ ដោយសារយើងរស់នៅកន្លែងភូមិចាស់នេះយូរឆ្នាំហើយ ហើយយើងមិនចង់ចាកចេញដោយបារម្ភពីផលប៉ះពាល់សេដ្ឋកិច្ចគ្រួសារ។ យើងទៅនៅកន្លែងថ្មីថា តើមុខរបរយើង យើងត្រូវធ្វើអី រកស៊ីអី។ យើងនៅភូមិចាស់នេះយើងអត់ការងារធ្វើ តែយើងមានស្រែចម្ការធ្វើ។ អីចឹងហើយយើងសុំរស់នៅភូមិចាស់ យើងមិនព្រមរុះរើផ្ទះទៅកន្លែងថ្មី»។សម្រាប់កាដោះដូប្រជាពលរដ្ឋនិយាយថា ការដោះដូរទៅកន្លែងថ្មីនៅតំបន់រុនតាឯកនោះ គឺអាជ្ញាធរផ្តល់ដីឡូតិ៍ត្រឹមតែ២០ម៉ែត្រគុណ៣០ម៉ែត្រប៉ុណ្ណោះ ទោះដីអ្នកភូមិមានទំហំប៉ុណ្ណាក៏ដោយ។ លោកថា គ្រួសារលោកមានដីលំនៅឋានទំហំ៣០ម៉ែត្រគុណ២០០ម៉ែត្រ និងដីស្រែទំហំ ៥ហិកតា សម្រាប់បង្កបង្កើនផលចិញ្ចឹមគ្រួសារជារៀងរាល់ឆ្នាំ។ពលរដ្ឋរូបនេះ បន្តថា ការដែលអាជ្ញាធរឱ្យគាត់ដោះដូរ ដោយផ្តល់ដីឡូតិ៍មកវិញត្រឹមតែ២០ម៉ែត្រគុណ៣០ម៉ែត្រនៅតំបន់រុនតាឯកនោះ គឺលោកមិនអាចទទួលយកបានឡើយ។
