វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1564 នាក់
ម្សិលមិញ 5020 នាក់
សរុប 14117011 នាក់
ភ្នំពេញៈ លោកឧត្តមសេនីយ៍ឧកញ៉ា ហូ ចំរើន ដែលកំពុងជាប់ឃុំនៅពន្ធនាគារម១ ហៅព្រៃសក្រោមបទគម្រាមជិវិត(បាញ់សេរី) ត្រូវបានព្រះមហាក្សត្រ សម្រេចបញ្ចប់ទាំងមុខតំណែងជាទីប្រឹក្សាផ្ទាល់សម្ដេចតេជោ ហ៊ុន សែន និងថែមទាំងលុបឈ្មោះចេញពីក្របខ័ណ្ឌ នៃកងយោធពលខេមរភូមិន្ទ តែមិនឃើញការលុបគោរម្យងារឧកញ៉ានៅឡើយ។ យោងតាមព្រះរាជក្រឹត្យរបស់ព្រះមហាក្សត្រ ចុះហត្ថលេខាចម្លងដោយលោក
សយ សុខាអគ្គលេខាធការរាជរដ្ឋាភិបាល កាលពីថ្ងៃទី២៣ ខែឧសភា ឆ្នាំ២០១៨ បានឲ្យដឹងថា “មាត្រា១ ៖ បញ្ចប់មុខតំណែងឯកឧត្តម ហូ ចំរើន ពីទីប្រឹក្សាផ្ទាល់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មានឋានៈស្មើរដ្ឋលេខាធិការ” និង “មាត្រា២ ៖ លុបឈ្មោះ ឯកឧត្តម ឧត្តមសេនីយ៍ឯក ហូ ចំរើន អត្តលេខ ០០២៩៥៨ នាយទាហានថ្នាក់ឧត្តមសេនីយ៍ នៃកងយោធពលខេមរភូមិន្ទ ចេញពីក្របខ័ណ្ឌ នៃកងយោធពលខេមរភូមិន្ទ”។
តាមប្រភពព័ត៌មានមួយ បង្ហើបប្រាប់អង្គភាពសារព័ត៌មាន ថា លោកឧកញ៉ា ហូ ចំរើន បច្ចុប្បន្នកំពុងរងការស៊ើបអង្កេតពីសំណាក់អង្គភាពប្រឆាំងអំពើពុករលួយ (ACU) ផងដែរព្រោះទ្រព្យសម្បត្តិដ៏ច្រើនសន្ធឹកសន្ធាប់របស់លោកមិនដឹងបានពីណារកស៊ីអី អាចនឹងត្រូវរឹបអូសជាព្រទ្យសម្បត្តិរដ្ឋ។
ឧត្តមសេនីយ៍ផ្កាយ៣ឧកញ៉ា ហូ ចំរើន ត្រូវព្រះរាជអាជា្ញរងអមសាលាដំបូងរាជធានីភ្នំពេញ លោក សៀង សុខ សម្រេចចោទប្រកាន់ពីបទ គំរាមកំហែងថានឹងសម្លាប់ តាមមាត្រា២៣៣ នៃក្រមព្រហ្មទណ្ឌ កាលពីរសៀលថ្ងៃទី១៧ ខែឧសភា ឆ្នាំ២០១៨ ហើយបញ្ជូនសំណុំរឿងទៅឲ្យចៅក្រមស៊ើបសួរ ដើម្បីបន្តនីតិវិធីតាមច្បាប់។ រហូតមកទល់នឹងល្ងាចថ្ងៃទី១៧ ខែឧសភាដដែល ចៅក្រមស៊ើបសួរ លោក កូយ សៅ បានសម្រេចឃុំខ្លួនបណ្ដោះអាសន្នលើឧកញ៉ា ហូ ចំរើន នៅមណ្ឌលកែប្រែម១ ហៅព្រៃស ដើម្បីធ្វើការស៊ើបអង្កេតបន្ថែម។
ឧកញ៉ាផ្កាយ៣រូបនេះ ត្រូវសមត្ថកិច្ចព្រហ្មទណ្ឌកម្រិតស្រាល នៃក្រសួងមហាផ្ទៃ ធ្វើការឃាត់ខ្លួនកាលពីវេលាម៉ោង៣រសៀល ថ្ងៃទី១៥ ខែឧសភា ឆ្នាំ២០១៨ ពាក់ពន្ធករណីបាញ់បោះគំរាមភរិយា និងឪពុកម្ដាយក្មេក កាលពីពាក់កណ្ដាលខែមេសាកន្លងទៅ។ ការឃាត់ខ្លួនឧកញ៉ាដ៏មានឥទ្ធិពល និងសេដ្ឋកិច្ចរូបនេះ គឺធ្វើឡើងដោយមានបញ្ជាពីព្រះឥន្ទបន្ទាប់ពីមានការិះគន់ថាចាប់លោកឧកញ៉ាហ៊ុនជារឿងបាញ់សេរីម៉េចមិនចាប់លោកហូចំរើនផង?។
លោក ហូ ចំរើន បានបើកការបាញ់បោះគំរាមក្រុមគ្រួសារចំនួនប្រហែល៦-៧គ្រាប់ កាលពីវេលាម៉ោង៣៖៣៥នាទីរសៀល ថ្ងៃសៅរ៍ ៧កើត ខែពិសាខ ឆ្នាំច សំរឹទ្ធិស័ក ពុទ្ធសករាជ២៥៦២ ត្រូវនឹងថ្ងៃទី២១ ខែមេសា ឆ្នាំ២០១៨ នៅចំណុចផ្ទះវីឡាគ្មានលេខ ស្ថិតក្នុងភូមិព្រៃសកើត សង្កាត់ព្រៃស ខណ្ឌដង្កោ រាជធានីភ្នំពេញ។
សមត្ថកិច្ចបញ្ជាក់ថា ជនសង្ស័យបង្កការបាញ់បោះខាងលើ មានឈ្មោះ ហូ ចំរើន ភេទប្រុស អាយុ៣៨ឆ្នាំ បច្ចុប្បន្នស្នាក់នៅទីតាំងកើតហេតុ មុខរបរជាមន្ត្រីយោធា ឋានៈឧត្តមសេនីយ៍ឯក (ផ្កាយ៣)។ ចំណែក ជនរងគ្រោះមានគ្នា៣នាក់ រួមមាន ១-ឈ្មោះ យិន គារ ភេទប្រុស អាយុ៥៦ឆ្នាំ ជាឪពុកក្មេក, ទី២-ឈ្មោះ ផន ទៀង ភេទស្រី អាយុ៥១ឆ្នាំ ម្ដាយក្មេក និងទី៣-ឈ្មោះ គារ សុខគាង ភេទស្រី អាយុ១៩ឆ្នាំ ជាភរិយា។ ជនរងគ្រោះទាំង៣ ស្នាក់នៅទីតាំងកើតហេតុខាងលើដូចគ្នា។តែគ្មានអ្នកណាហ៊ានធើអីហូចំរើនឡើយព្រោះហូចំរើនថាអង្គរក្ស័បាញ់៕