គណៈកម្មការព្រឹទ្ធសភាអាមេរិក អនុម័តច្បាប់ជួយដល់កោះតៃវ៉ាន់តែចិនដីគោកក្តៅ
19-January-2026 / ព័ត៌មានអន្តរជាតិ
អាមេរិកតៃវ៉ាន់៖នៅថ្ងៃទី១៥ ខែកញ្ញាឆ្នាំ២០២២ គណៈកម្មការកិច្ចការបរទេសនៃព្រឹទ្ធសភាអាមេរិកបានអនុម័តច្បាប់ បង្កើនការជួយដល់កោះតៃវ៉ាន់ដើម្បីទប់ទល់នឹងការគំរាមកំហែងពីទីក្រុងប៉េកាំង។
នៅក្នុងការបោះឆ្នោតនៃគណកម្មការកិច្ចការបរទេសនៃព្រឹទ្ធសភាអាមេរិក អនុម័តលើគោលនយោបាយគាំទ្រកោះតៃវ៉ាន់ ឆ្នាំ២០២២ ដោយទទួលបានការគាំទ្រ ១៧/៥សំឡេង។
លោក Bob Menendez និង លោក Lindsey Graham ព្រឹទ្ធសមាជិក ដែលជាអ្នកផ្តួចផ្តើមគំនិត តាក់តែងសំណើច្បាប់នេះ បានទទួលស្គាល់ថា តាមរយៈច្បាប់ថ្មីនេះ គឺគោលនយោបាយរបស់សហរដ្ឋអាមេរិក ក្នុងសំណុំរឿងកោះតៃវ៉ាន់ ត្រូវបានវិវឌ្ឍន៍ប្រែប្រួលខ្លាំង។សំណើច្បាប់ ដែលត្រូវបានគណៈកម្មការកិច្ចការបរទេសនៃព្រឹទ្ធសភា បោះឆ្នោតយល់ព្រមនេះ បានកំណត់ថា សហរដ្ឋអាមេរិកនឹងផ្តល់ជំនួយយោធាដោយផ្ទាល់ ក្នុងតម្លៃទឹកប្រាក់សរុបចំនួន ៤ពាន់លានដុល្លារ សម្រាប់រយៈពេល៤ឆ្នាំទៅមុខ។ គម្រោងច្បាប់នេះ ក៏បានចែងផងដែរ ថាប្រធានាធិបតីអាមេរិក ត្រូវចាត់វិធានការទណ្ឌកម្ម ទៅលើស្ថាប័នហិរញ្ញវត្ថុរបស់ចិន ដើម្បីឆ្លើយតបទៅនឹងសកម្មភាពរករឿង គំរាមសំឡុតរបស់ចិន មកលើកោះតៃវ៉ាន់។ បន្ថែមពីនេះ សំណើច្បាប់ដែលគេដាក់ឈ្មោះហៅថា Taiwan Policy Act of 2022 ក៏បានកំណត់ដែរ សហរដ្ឋអាមេរិកត្រូវទទួលស្គាល់កោះតៃវ៉ាន់ ក្នុងនាមជា “សម្ព័ន្ធមិត្តសំខាន់ ក្រៅក្របខណ្ឌអង្គការអូតង់”។
នៅថ្ងៃព្រហស្បតិ៍ទី១៥កញ្ញា ខុទ្ទការល័យលោកស្រីប្រធានាធិបតីតៃវ៉ាន់ ឆៃ អ៊ីងវេន បានចេញលិខិតមួយ ថ្លែងអំណអរគុណ ចំពោះសហរដ្ឋអាមេរិក ដែលជាថ្មីម្តងទៀត បានបង្ហាញមិត្តភាព និងការគាំទ្រយ៉ាងច្បាស់លាស់ មកលើកោះតៃវ៉ាន់។ទោះជាយ៉ាងណា សំណើរច្បាប់ថ្មីនេះ ត្រូវឆ្លងកាត់នីតិវិធីអនុម័តច្រើនដំណាក់ទៀត ដូចជាត្រូវយកទៅឆ្លងកាត់ ការអនុម័ត នៅក្នុងព្រឹទ្ធិសភា និងសភាតំណាង មុននឹងត្រូវបានលោកប្រធានាធិបតី ចូ បៃដិន ចុះហត្ថលេខាប្រកាសឲ្យអនុវត្ត។ កាលពីថ្ងៃពុធ លោកស្រី Karine Jean-Pierre អ្នកនាំពាក្យសេតវិមានអាមេរិក បានឆ្លើយប្រាប់អ្នកកាសែតថា សម្រាប់ពេលនេះ រដ្ឋាភិបាលកំពុងទាក់ទងជាប្រចាំជាមួយសភាខុនហ្ក្រេ ទាក់ទិននឹងខ្លឹមសារ ក៏ដូចជាការអនុម័តច្បាប់ថ្មីនេះ។ លោកស្រីអះអាងថា រដ្ឋាភិបាលអាមេរិក នឹងបន្តពង្រីកទំនាក់ទំនងជាមួយតៃវ៉ាន់ តាមរយៈជំនួយគាំទ្រផ្នែកការទូត សេដ្ឋកិច្ច និងកងទ័ពផងដែរ។
ប៉ុន្តែការអនុម័តទទួលរងការប្រឆាំងពីរដ្ឋាភិបាលរបស់ប្រធានាធិបតីបៃឌិន ដោយព្រមានពីវិធានការទប់ទល់ពីចិន។ ក្រសួងការបរទេសចិននៅថ្ងៃ១៥ខែកញ្ញាដែរ បានដាក់ «កំណត់ទូតមួយ» ផ្ញើទៅកាន់សហរដ្ឋអាមេរិកបន្ទាប់ពីគណៈកម្មការព្រឹទ្ធសភាអាមេរិក បានអនុម័តច្បាប់ដែលនឹងជួយពង្រឹងការគាំទ្រផ្នែកយោធារបស់សហរដ្ឋអាមេរិកសម្រាប់កោះតៃវ៉ាន់។សារព័ត៌មាន Reuters នៅថ្ងៃព្រហស្បតិ៍ទី១៥ ខែកញ្ញា ឆ្នាំ២០២២ បានផ្សាយថា ក្នុងសន្និសីទសារព័ត៌មានប្រចាំថ្ងៃ អ្នកនាំពាក្យក្រសួងការបរទេសចិន លោក Mao Ning បានគូសបញ្ជាក់ថា«ប្រសិនបើច្បាប់ថ្មីនេះនៅតែដំណើរការទៅមុខវានឹងជះផលប៉ះពាល់ដល់ទំនាក់ទំនងរវាងសហរដ្ឋអាមេរិកនឹងប្រទេសចិន»។ប្រធានាធិបតីរុស្ស៊ីលោកពូទីន បានបង្ហាញពីការគាំទ្រដល់រដ្ឋាភិបាលទីក្រុងប៉េកាំងជុំវិញបញ្ហាកោះតៃវ៉ាន់ ហើយបានថ្កោលទោសយ៉ាងខ្លាំងដល់តំណាងរាស្ត្រអាមេរិក ដែលបានបំពេញទស្សនកិច្ចកោះតៃវ៉ាន់ជាបន្តបន្ទាប់។
សូមរំលឹកថា គិតចាប់ពីឆ្នាំ១៩៧៩មក សហរដ្ឋអាមេរិក បានប្រកាសគាំទ្រជាផ្លូវការ ប្រទេសចិនតែមួយ តែទន្ទឹមគ្នានេះ អាមេរិកបានរក្សាជំហរ អនុញ្ញាតឲ្យតៃវ៉ាន់ មានលទ្ធភាពការពារខ្លួន តាមរយៈការលក់គ្រឿងសព្វាវុធទៅឲ្យកោះតៃវ៉ាន់។ ការប្រែប្រួលគោលនយោបាយ ឈានទៅផ្តល់ជាជំនួយយោធាដោយផ្ទាល់ទៅឲ្យតៃវ៉ាន់ អាចនឹងត្រូវចិនចាត់ទុកថា ជាការដើរហួសគំនូសក្រហមដែលខ្លួនបានកំណត់។
