បោះឆ្នោតមូលដ្ឋានគណបក្សកាន់អំណាចម៉ាឡេស៊ីបន្តឈ្នះឆ្នោតនៅតាមរដ្ឋចំនួន ៣ឯក្រុមប្រឆាំងក៏គ្រាន់បើ ដែរ
21-September-2026 / ព័ត៌មានអន្តរជាតិ
ម៉ាឡេស៊ី៖ ក្រុមគណបក្សកាន់អំណាចនៅប្រទេសម៉ាឡេស៊ីរបស់លោកអានវ៉ាអ៊ីប្រាហ៊ីម រក្សាបាននូវសម្លេងគាំទ្រនៅតាមរដ្ឋចំនួន ៣ អំឡុងការបោះឆ្នោតតាមតំបន់ បើទោះបីជាលទ្ធផលផ្លូវការនៃសន្ទុះប្រជាប្រិយភាពរបស់ក្រុមបក្សប្រឆាំង បានក្លាយឧបសគ្គសម្រាប់នាយករដ្ឋមន្ត្រីអាន់វ៉ាអ៊ីប្រាហ៊ីមក៏ដោយ (Anwar Ibrahim) ។
គួរបញ្ជាក់ថា ព្រឹត្តិការណ៍បោះឆ្នោតតាមតំបន់នៃប្រទេសម៉ាឡេស៊ី បានធ្វើឡើងនៅតាមរដ្ឋចំនួន ៦ រួមមាន រដ្ឋសេឡាហ្គ័រ (Selangor), ប៉េណាង (Penang), ណេជើរិ សេមប៊ីឡាន (Negeri Sembilan), កេឡាន់តាន់ (Kelantan), តេរ៉េងហ្គានូ (Terengganu) និងរដ្ឋកេដា (Kedah) ដោយនឹងមិនប៉ះពាល់ដល់សម្លេងភាគច្រើន (២ ភាគ ៣) របស់លោកអាន់វ៉ា នៅក្នុងសភាម៉ាឡេស៊ីនោះទេ គ្រាន់តែគេមើលឃើញថា នេះគឺជាការបោះឆ្នោតប្រជាមតិទៅលើរដ្ឋាភិបាលចម្រុះរយៈពេល ៩ ខែរបស់លោកតែប៉ុណ្ណោះ ។
យោងតាមទិន្នន័យពីគណៈកម្មាធិការរៀបចំការបោះឆ្នោត បានបង្ហាញថា គណបក្សចម្រុះជាតិសាសន៍របស់លោកអាន់វ៉ា បានឈ្នះឆ្នោតសាជាថ្មីនៅក្នុងព្រឹត្តិការណ៍បោះឆ្នោតកាលពីថ្ងៃសៅរ៍ នៅក្នុងរដ្ឋសំខាន់ៗចំនួន ៣ ដែលធ្លាប់បានឈ្នះកន្លងមក រួមបញ្ចូលទាំងរដ្ឋសេឡាហ្គ័រ ជារដ្ឋដែលមានជាងគេបំផុតនៅក្នុងប្រទេសម៉ាឡេស៊ី ស្ថិតនៅព័ទ្ធជុំវិញរដ្ឋធានីកូឡាឡាំពួ ។ដោយឡែក សម្ព័ន្ធគណបក្សប្រឆាំង ប៉េរីកាតាំងណាសិនណាល់ (Perikatan Nasional) ដឹកនាំដោយអតីតនាយករដ្ឋមន្ត្រីមូយីដឌីន យ៉ាស៊ីន (Muhyiddin Yassin) និងគាំទ្រដោយគណបក្សឥស្លាមអភិរក្សនិយម ក៏ទទួលបានការគាំទ្ររហូតអាចដណ្តើមកាន់កាប់រដ្ឋចំនួន ៣ ឱ្យមកស្ថិតនៅក្រោមការគ្រប់គ្រងរបស់ខ្លួនផងដែរ ស្របពេលគណបក្សប្រឆាំងមានទំនាក់ទំនងស្អិតល្មួតភាគច្រើនជាមួយជនជាតិភាគតិចម៉ាឡេ-មូស្ល៊ីម ។តាមប្រធានគណៈកម្មាធិការរៀបចំការបោះឆ្នោត លោក Abdul Ghani Saleh បានឲ្យដឹងថា អ្នកបោះឆ្នោតជាង ៩.៧លាននាក់ទៅបោះឆ្នោតនៅថ្ងៃទី ១២ខែសីហា ដើម្បីជ្រើសរើសអ្នកតំណាងរបស់ខ្លួន ចំនួន ២៤៥រូបមកពីរដ្ឋចំនួន៦។
ចាប់តាំងពីឡើងកាន់អំណាចមក លោកអានវ៉ា បានផ្តោតលើកំណែទម្រង់សេដ្ឋកិច្ច និងស្ថាប័ន រួមទាំងកាត់បន្ថយឧបត្ថម្ភធនសម្រាប់អ្នកមាន បន្ធូរបន្ថយច្បាប់ចុះបញ្ជីសម្រាប់ក្រុមហ៊ុន និងលុបចោលច្បាប់កាត់ទោសប្រហារជីវិតជាដើម ។ទោះជាបែបណាក្តី ក្រុមអ្នករិះគន់បានលើកឡើងចំពោះការព្រួយបារម្ភអំពីវិធានការបង្កើនការត្រួតពិនិត្យរបស់រដ្ឋាភិបាលជុំវិញមាតិការនៅលើប្រព័ន្ធអ៊ីនធឺណិត និងសកម្មភាពប្រឆាំងសហគមន៍អ្នកស្រលាញ់ភេទដូចគ្នា (LGBTQ+) នៅក្នុងប្រទេសម៉ាឡេស៊ី ។ ក្នុងនោះដែរ លោកអាន់វ៉ា ធ្លាប់បានលើកឡើងផងដែរថា រដ្ឋាភិបាលរបស់លោកនឹងមិនទទួលស្គាល់សិទ្ធិរបស់ក្រុមអ្នកស្រលាញ់ភេទដូចគ្នានោះឡើយ ។
សូមបញ្ជាក់ថាការបោះឆ្នោតតាមរដ្ឋនេះជាទូទៅ មិនប៉ះពាល់ដល់រដ្ឋាភិបាលសហព័ន្ធនោះទេ ប៉ុន្តែវាត្រូវបានគេចាត់ទុកថា ជាសូចនាករដ៏សំខាន់សម្រាប់វាស់ស្ទង់ការគាំទ្រ ឬមិនគាំទ្រលើរដ្ឋាភិបាលរួបរួម របស់លោក អាន់វ៉ា ដែលត្រូវបានបង្កើតឡើង បន្ទាប់ពីការបោះឆ្នោតសកលដ៏មានភាពបែកបាក់កាលពីខែវិច្ឆិកាឆ្នាំមុន។គណបក្ស Pakatan Harapan (PH) ដែលមានជាតិសាសន៍ភាគតិចចម្រុះ របស់លោកអា់វ៉ា( Anwar) បានឈ្នះអាសនៈច្រើនជាងគេក្នុងការបោះឆ្នោតកាលពីខែវិច្ឆិកា ប៉ុន្តែបានបរាជ័យក្នុងការទទួលបានសំឡេងភាគច្រើន បន្ទាប់ពីជនជាតិម៉ាឡេជាច្រើនបានបោះការគាំទ្រ គណបក្យ Perikatan National (PN) ដែលដឹកនាំដោយអតីតនាយករដ្ឋមន្ត្រីមូយីឌីនយ៉ាស៊ីន( Muhyiddin Yassin) ។
លោក Ahmad Fawzi Abdul Hamid សាស្ត្រាចារ្យផ្នែកវិទ្យាសាស្ត្រនយោបាយនៅសាកលវិទ្យាល័យវិទ្យាសាស្ត្រម៉ាឡេស៊ីបាននិយាយថា «ការបោះឆ្នោតថ្នាក់រដ្ឋនេះ គឺជាការសាកល្បងលើកដំបូង លើប្រជាប្រិយភាពរបស់សម្ព័ន្ធនៅទូទាំងប្រទេស ឬស្ទើរតែពាក់កណ្តាលនៃប្រទេសម៉ាឡេស៊ី។ វានឹងសាកល្បងថាតើប្រជាជន ជាពិសេសអ្នកគាំទ្រគណបក្ស PH និងគណបក្ស BN ដែលបានចាត់ទុកគ្នាទៅវិញទៅមកជាគូប្រជែង ស្វាគមន៍កិច្ចសហការនេះឬអត់»។
កាលពីបោះឆ្នោតសភារបស់ម៉ាឡេស៊ី កាលពីថ្ងៃទី១៩ ខែវិច្ឆិកាកន្លងទៅ បានបញ្ចប់ទៅដោយគ្មានគណបក្សណាមួយ ទទួលបានសំឡេងភាគច្រើននៃអាសនៈចំនួន ២២២នៅក្នុងរដ្ឋសភានោះទេ។ ដើម្បីដោះស្រាយវិបត្តិជាប់គាំងនយោបាយនេះ ព្រះមហាក្សត្រម៉ាឡេស៊ីបានចេញព្រះរាជបញ្ជាឱ្យ គណបក្ស PH របស់លោក អាន់វ៉ា ចងសម្ព័ន្ធភាពជាមួយគណបក្ស Barisan Nasional ដែលជាគូរប្រជែងដ៏ខ្លាំងរបស់ខ្លួន បង្កើតរដ្ឋាភិបាលចម្រុះដែលដឹកនាំដោយ លោក អាន់វ៉ា អ៊ីប្រាហ៊ីម៕
