អាជ្ញាធរជាតិអប្សរាមិនហាមឃាត់ ការជួសជុលលំនៅដ្ឋាន ឬសំណង់ស្រាលៗរបស់ពលរដ្ឋដែលរស់នៅតំបន់អង្គរយូរឆ្នាំអប្សារាទេ !
16-April-2026 / ទេសចរណ៏និងវប្បធម៌
សៀមរាប៖ ប្រជាពលរដ្ឋដែលរស់នៅក្នុងតំបន់អង្គរជាយូរលង់ណាស់មកហើយ អាជ្ញាធរជាតិអប្សរាមិនបានហាមឃាត់ការជួសជុលផ្ទះសម្បែង បន្ទប់ទឹក ចង្ក្រានបាយ ឬរោងចិញ្ចឹមសត្វរបស់ពួកគាត់ឡើយ តែនៅពេលត្រូវការសាងសង់ ឬជួសជួលលំនៅស្ថានរបស់ខ្លួន ពួកគាត់ត្រូវតែដាក់ពាក្យស្នើសុំមកអាជ្ញាធរជាតិអប្សរា តាមរយៈអាជ្ញាធរភូមិ ឃុំដែលនៅជិតបំផុត។ ចំពោះសំណង់ដែលបានសាងសង់រួចដោយគ្មានច្បាប់អនុញ្ញាត ត្រូវរុះរើចេញវិញ?។
តាមសេចក្តីសម្រេចលេខ៧០សសរ ស្តីពីការកំណត់បទដ្ឋាននៃការប្រើប្រាស់ដីធ្លីនៅតំបន់១ និងតំបន់២ ក្នុងតំបន់រមណីយដ្ឋានសៀមរាប-អង្គរ បានកំណត់ថា ប្រជាពលរដ្ឋដែលមានលំនៅឋាន និងរស់នៅយូរលង់ណាស់មកហើយ អាចបន្តរស់នៅតទៅទៀតដោយមិនតម្រូវឱ្យចាកចេញពីភូមិដ្ឋានឡើយ។ អ្នកភូមិទាំងនោះអាចរុះរើ ជួសជុលផ្ទះចាស់ ទ្រុឌទ្រោម ដើម្បីសាងសង់ផ្ទះថ្មី ជំនួសផ្ទះចាស់បាន ដោយមានការអនុញ្ញាតពីអាជ្ញាធរអប្សរា ក៏ប៉ុន្តែរាល់ការសាងសង់ផ្ទះថ្មី ត្រូវហាមឃាត់ជាដាច់ខាត។
លោក ឡូយ អ៊ាត អាយុ៦២ឆ្នាំ រស់នៅភូមិនគរក្រៅ សង្កាត់គោកចក ក្រុងសៀមរាប បានឱ្យដឹងថា លោករស់នៅក្នុងមូលដ្ឋាននេះជាច្រើនឆ្នាំមកហើយ ពោលគឺនៅមុនឆ្នាំ១៩៩៣ ដោយទទួលបានកេរមរតកជាដីធ្លីទាំងនេះពីដូនតាមក។លោកបន្តថា ដើមឡើយលំនៅឋានរបស់លោក មានសភាពចាស់ទ្រុឌទ្រោមយ៉ាងខ្លាំង តែលោកមិនហានដាក់ពាក្យស្នើសុំជួសជុលឡើយ ព្រោះយល់ថាអាជ្ញាធរជាតិអប្សរាមិនអនុញ្ញាត។ តែក្រោយមកលោកក៏ទទួលបានព័ត៌មានតាមការផ្សព្វផ្សាយពីក្រុមការងារសហគមន៍ថា ប្រជាពលរដ្ឋដែលរស់នៅយូរលង់ណាស់មកហើយ អាចស្នើសុំជួសជួលផ្ទះចាស់ទ្រុឌទ្រោមបាន ទើបលោកសម្រេចចិត្តដាក់ពាក្យស្នើសុំជាបន្តបន្ទាប់រហូតអាចជួសជុលលំនៅឋានរបស់លោកបានល្អប្រសើដូចសព្វថ្ងៃ។
ដូចគ្នាដែរលោកស្រី ឈិន បូលីន អាយុ៧១ឆ្នាំ រស់នៅភូមិគោកតាចាន់ សង្កាត់គោកចក បានរៀបរាប់ថា លោកស្រីបានរស់នៅក្នុងតំបន់រមណីយដ្ឋានអង្គរជាយូរឆ្នាំណាស់មកហើយ។ ចំណែកការសុំច្បាប់សាងសង់ ឬជួសជុលផ្ទះមានភាពងាយស្រួល មិនមានភាពស្មុគស្មាញអ្វីឡើយ ដោយធ្វើឡើងតាមរយៈភូមិ ឃុំ និងបន្តទៅអាជ្ញាធរជាតិអប្សរាប៉ុណ្ណោះ និងមានក្រុមការងារសហគមន៍នៃអាជ្ញាធរជាតិអប្សរាចុះមកពិនិត្យទៅតាមអ្វីដែលបានស្នើសុំ។
លោក នង សុវណ្ណារិទ្ធ អនុប្រធានលេខាធិការដ្ឋានសហគមន៍បានឱ្យដឹងថា ប្រជាពលរដ្ឋដែលរស់នៅក្នុងតំបន់អង្គរជាយូរលង់ណាស់មកហើយ អាជ្ញាធរជាតិអប្សរាមិនបានហាមឃាត់ការជួសជុលផ្ទះសម្បែង បន្ទប់ទឹក ចង្ក្រានបាយ ឬរោងចិញ្ចឹមសត្វរបស់ពួកគាត់ឡើយ តែនៅពេលត្រូវការសាងសង់ ឬជួសជួលលំនៅស្ថានរបស់ខ្លួន ពួកគាត់ត្រូវតែដាក់ពាក្យស្នើសុំមកអាជ្ញាធរជាតិអប្សរា តាមរយៈអាជ្ញាធរភូមិ ឃុំដែលនៅជិតបំផុត។លោកបន្តថា រាល់ការដាក់ពាក្យស្នើសុំរបស់ប្រជាពលរដ្ឋមិនតម្រូវឱ្យបង់ប្រាក់ឡើយ តែពួកគាត់ត្រូវភ្ជាប់មកជាមួយនូវអត្តសញ្ញាណប័ណ្ណ សៀវភៅគ្រួសារ សៀវភៅស្នាក់នៅ លិខិតបញ្ជាក់កម្មសិទ្ធិដីធ្លីដែលមានការបញ្ជាក់ពីអាជ្ញាធរក្នុងតំបន់។
យោងខ្លឹមសារសំខាន់ៗនៃបទបញ្ជាលេខ០២ ប.ប ស្តីពីការទប់ស្កាត់ និងលុបបំបាត់អំពើអនាធិបតេយ្យនៅតំបន់រមណីយដ្ឋានអង្គរ ខេត្តសៀមរាប បានកំណត់ថា អាជ្ញាធរជាតិអប្សរាជាស្ថាប័នផ្តាច់មុខក្នុងការចេញលិខិតអនុញ្ញាតសាងសង់សម្រាប់ការស្ថាបនាទាំងឡាយក្នុងរង្វង់តំបន់រមណីយដ្ឋានអង្គរ។ សំណង់ដែលបានសាងសង់រួចដោយគ្មានច្បាប់អនុញ្ញាត ត្រូវរុះរើចេញវិញ។តែអាជ្ញាធរជាតិអប្សរាត្រូវសហការជាមួយអាជ្ញាធរដែនដី និងសមត្ថកិច្ចពាក់ព័ន្ធ ដើម្បីចាត់ការអនុវត្តជាបន្ទាន់បំផុតនូវការចុះស្រង់ស្ថិតិឈ្មោះជនល្មើស និងទីតាំងនីយមួយៗឱ្យបានច្បាស់លាស់ រួចកសាងសំណុំរឿងបញ្ជូនទៅតុលាការដើម្បីកាត់ទោសតាមច្បាប់ជាធរមាន និងត្រូវទប់ស្កាត់មិនឱ្យមានអំពើអនាធិបតេយ្យ កើតឡើងជាថ្មីនៅតំបន់ទាំងពីរនេះតទៅទៀតឡើយ។ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានចេញសេចក្តីសម្រេចតែងតាំងសមាសភាពក្រុមការងារតម្រង់ទិស ដើម្បីដោះស្រាយបញ្ហាសំណង់ និងដីធ្លីក្នុងតំបន់រមណីយដ្ធានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា។
សមាសភាពក្រុមការងារតម្រង់ទិសនេះ មានចំនួន១៣រូប ដឹកនាំដោយលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់ ជាប្រធាន និងលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ព្រមទាំងលោក ទៀ សីហា អភិបាលខេត្តសៀមរាប ជាអនុប្រធាន និងលោក ស៊ុ ម៉ាប់ រដ្ឋលេខាធិការ ក្រសួងវប្បធម៌ និងវិចិត្រសិល្បៈ ជាអនុប្រធានអចិន្ត្រៃយ៍ ហើយក្រៅពីនោះជាសមាជិក។ ការចេញសេចក្តីសម្រេចបង្កើតក្រុមការងារនេះគឺបន្ទាប់ពីមានផ្ទុះរឿងមិនសប្បាយចិត្តរវាងអាជ្ញាធរអប្សារាជាមួយអាជ្ញាធរដែនដីរឿងរុះរើផ្ទះសម្បែងប្រជាពលរដ្ឋដោយអាជ្ញាធរអប្សារាមិនមានការសហការជាមួយអាជ្ញាធរដែនដី។
