ក្រសួងវប្បធម៍និងឧបនាយករដ្ឋមន្ត្រីហ៊ុនម៉ានីប្រតិកម្មរឿងមិនរៀបចំសង្ក្រានទូរទស្សន៍ហង្សមាសសុំទោស
16-April-2026 / ទេសចរណ៏និងវប្បធម៌
ភ្នំពេញ៖ ក្រសួងវប្បធម៌ និងវិចិត្រសិល្បៈ បានប្រតិកម្មនឹងទូរទស្សន៍ហង្សមាស ដែលផ្សាយថាកម្ពុជាមិនហ៊ានប្រើពាក្យសង្ក្រានដោយបានចាត់ទុកថាជាការផ្សព្វផ្សាយព័ត៌មានមិនពិត និងបង្កផលប៉ះពាល់ធ្ងន់ធ្ងរដល់តថភាពពិត និងវប្បធម៌ប្រពៃណីជាតិ។តាមសេចក្តីបរកាសពត៍មានក្រសួងវប្បធម៌ បានអះអាងថា «សង្ក្រាន្ត» ជាពាក្យសំស្ក្រឹត មានប្រភពមកពីឥណ្ឌា និងមានន័យថា រង្វិលជុំនៃពេលវេលាពេញមួយឆ្នាំ ហើយពាក្យសង្ក្រាន្ត មាននៅសិលាចារឹកនានា តាមប្រាសាទនៅតំបន់អង្គរ។
យ៉ាងណាក្តីពិធីសង្ក្រាន្តនេះ បានក្លាយជាប្រពៃណីទំនៀមទម្លាប់ ដែលបានប្រារព្ធរៀបចំដោយប្រទេសមួយចំនួនដូចជា កម្ពុជា ឡាវ ថៃ ភូមា ជាដើម។ ការចុះបញ្ជីជាបេតិកភណ្ឌអរូបីរបស់ប្រទេសមួយ នឹងមិនប៉ះពាល់ដល់ការចុះបញ្ជី នឹងការប្រារព្ធរបស់បណ្តាប្រទេសផ្សេងទៀតទៅតាមប្រពៃណីទំនៀមទម្លាប់រៀងៗនោះឡើយ។
ចំពោះការអត្ថាធិប្បាយរបស់ទូរទស្សន៍ហង្សមាសនេះបង្កផលប៉ះពាល់ធ្ងន់ធ្ងរដល់តម្លៃពិតនៃវប្បធម៌ និងប្រពៃណីទំនៀមទម្លាប់ ដ៏ផូរផង់របស់ជាតិ ជាពិសេស បានបង្កឱ្យមានការយល់ច្រឡំពីសាធារណជនទូទៅ ព្រមទាំងភាពរសើប និងភាពជ្រួលច្របល់ក្នុងសង្គម។ ក្រសួងវប្បធម៌ និងវិចិត្រសិល្បៈ ស្នើឱ្យចាត់វិធានការបន្ទាន់ លុបព័ត៌មានមិនពិតនេះ ទប់ស្កាត់ចែកចាយបន្ត និងត្រូវសុំទោសជាសាធារណៈឱ្យបានឆាប់រហ័សបំផុត។
ក្រសួងវប្បធម៌ និងវិចិត្រសិល្បៈ បានបញ្ជាក់ថា ក្រុមអ្នកនាំពាក្យរបស់ក្រសួងវប្បធម៌ និងវិចិត្រសិល្បៈ តែមួយគត់ដែលអាចជូនជាព័ត៌មានជាផ្លូវការតំណាងឱ្យក្រសួង។ រីឯការពិគ្រោះយោបល់ ឬសាកសួរព័ត៌មានពីបុគ្គល ផ្សេងនឹងមិនតំណាងឱ្យមតិយោបល់របស់ក្រសួងវប្បធម៌ និងវិចិត្រសិល្បៈនោះទេ។
ដោយឡែកលោក ហ៊ុន ម៉ានីឧបនាយករដ្មមន្ត្រីវិញ នៅល្ងាចថ្ងៃទី២៥ ខែមីនា នេះ បានសម្ដែងការភ្ញាក់ផ្អើល និងហួសចិត្តតាមបណ្ដាញសង្គមហ្វេសប៊ុក បន្ទាប់ពីលោក មាស រិទ្ធី ពិធីករព័ត៌មានដ៏ល្បី បានស្រង់សម្ដីរបស់ឯកឧត្ដម ទៅផ្សាយដែលផ្ទុយពីការពិតទាំងស្រុង ជុំវិញការរៀបចំព្រឹត្តិការណ៍អង្គរសង្ក្រាន្តក្នុងឆ្នាំ២០២៤នេះផងដែរ។លោក ហ៊ុន ម៉ានីដែលជាប្រធានសហពន្ធ័យុវជនកម្ពុជាដែលជាអ្នករៀបចំកម្មវិធីសង្ក្រាននៅខេត្តសៀមរាបនាពេលកន្លងមក បានសរសេរដូច្នេះថា «ខ្ញុំមានការភ្ញាក់ផ្អើលចំពោះអ្វីដែល បងប្រុស មាស រិទ្ធី បានស្រង់ហើយផ្សព្វផ្សាយថា ខ្ញុំបានប្រើពាក្យថា “ខ្ជិល” ក្នុងការឆ្លើយតបទៅនឹងសំណួរ ដែលសួរមកខ្ញុំ ថាតើរៀបចំអង្គរសង្ក្រាន្តទេឆ្នាំនេះ»។
កាលពីព្រឹកថ្ងៃទី២៥ ខែមីនា លោក មាស រិទ្ធី ពិធីករព័ត៌មានដ៏ល្បីបានធ្វើអត្ថាធិប្បាយថា ឆ្នាំថ្មីនេះ កម្ពុជាមិនរៀបចំព្រឹត្តិការណ៍អង្គរសង្ក្រាន្តនោះទេ។ ដោយលោក មាស រិទ្ធី អះអាងថា លោកបានសួរមកកាន់ឯកឧត្ដម ហ៊ុន ម៉ានី ថាហេតុអ្វីមិនធ្វើអង្គរសង្ក្រាន្ត ហើយឯកឧត្ដម ហ៊ុន ម៉ានី ឆ្លើយតបថាមូលហេតុដែលកម្ពុជាមិនប្រារព្ធពិធីអង្គរសង្ក្រាន្តព្រោះតែខ្ជិលធ្វើ…។តាមសំណេរ លោក ហ៊ុន ម៉ានី បានអះអាងថា បន្ទាប់ពីស្ដាប់កិច្ចអត្ថាធិប្បាយរបស់លោក មាស រិទ្ធី ឯកឧត្ដម មានការហួសលើពីរចំណុច។ ពីរចំណុចនោះគឺ ឯកឧត្ដម បានសរសេរដូច្នេះថា ទី១ លោក គិតថាដោយសារការរាប់អានគ្នា ហើយការដែលលោក មាស រិទ្ធី សួរឯកឧត្ដមប្រហែលជាការសួរនាំធម្មតាមិនមែនជាកិច្ចសម្ភាស ដើម្បីយកចម្លើយទៅផ្សព្វផ្សាយជាសាធារណៈនោះទេ។ ហេតុនេះហើយបានជាលោកឆ្លើយតបទៅលោក មាស រិទ្ធី ថា ឱ្យរាជធានីខេត្តគេរៀបចំ។ ចំណែកការហួសចិត្តទី២ គឺលោកមិននឹកស្មានថាពាក្យ ឱ្យរាជធានីខេត្តគេរៀបចំ ដែលឯកឧត្ដម បានឆ្លើយ បែជាលោក មាស រិទ្ធី យកទៅអត្ថាធិប្បាយថា ខ្ជិលរៀបចំ វិញនោះទេ?!។
ទាក់ទងបញ្ហានេះ លោក ហ៊ុន ម៉ានី បានចោទជាសំណួរត្រឡប់វិញថា «តើបង មាស រិទ្ធី មានបំណងយ៉ាងណាសម្រាប់ខ្ញុំ តើគាត់មិនបានឮចម្លើយរបស់ខ្ញុំពេលយប់នោះ ឬចង់មានចេតនាប្រើពាក្យបែបនេះក្នុងបំណងទាញចំណាប់អារម្មណ៍ពីមហាជន»។សម្រាប់លោក ហ៊ុន ម៉ានី នេះក៏ជាមេរៀនសម្រាប់ឯកឧត្ដមទៅថ្ងៃក្រោយដែរ។ លោកអះអាងថា មិនគួរដោយសារការរាប់អាន បែទៅជាការបង្កើតបញ្ហាមួយដូច្នេះទេ។ ដូច្នេះហើយ លោកប្រហែលត្រូវគិតគូរច្បាស់លាស់ជាមុន សម្រាប់មនុស្សដែលហៅថារាប់អានគ្នា។លោក ហ៊ុន ម៉ានី បានគូសបញ្ជាក់ថា ឯកឧត្ដមជាមនុស្សម្នាក់ក្នុងចំណោមមនុស្សមួយចំនួនតូច ដែលបានដឹកនាំរៀបចំតាំងពីមិនមានការស្គាល់ “អង្គរសង្ក្រាន្ត” រហូតដល់មានការស្គាល់ព្រឹត្តិការណ៍អង្គរសង្ក្រាន្ត។ លោក ហ៊ុន ម៉ានី ថាបើក្រុមការងារខ្ជិលរៀបចំអង្គរសង្ក្រាន្តពិតមែននោះ ប្រហែលជាព្រឹត្តិការណ៍អង្គរសង្ក្រាន្តមិនអាចបានរៀបចំខួប១០ឆ្នាំនៅនោះទេ។
សម្រាប់ករណីយ៍ខាងលើនេះលោកមាសរិទ្ធីក្នុងនាមក្រុមហ៊ុនហង្សមាសបានសសេរតាមហ្វេប៊ុកថា៖ខ្ញុំបាទ មាស រិទ្ធី អ្នកអត្ថាធិប្បាយព័ត៌ មានហង្សមាស សុំអភ័យទោសរដ្ឋមន្ត្រីក្រសួងវប្បធម៌ និវិចិត្រសិល្បះ និងឯកឧត្តមហ៊ុន ម៉ានី រដ្ឋមន្ត្រីក្រសួងមុខងារសាធរណ:.. ចំពោះកំហុសឆ្គងការផ្សាយរឿងសង្ក្រានឆ្នាំថ្មីព្រឹកមិញ... កំហុសនេះកើតចេញពីព័ត៌មានមិនគ្រប់ប្រភពនាំឲ្យថ្លោះធ្លោយ.. តែខុំមិនមានចេតនាអាក្រក់ណាមួយទេ.. នេះជាមេរៀនជីវិតដែលខ្ញុំត្រូវចងចាំ.. តែអ្វីៗទាំងឡាយរឿងនេះខ្ញុំទទួលកំហុស..៕
