គណបក្សនយោបាយលោកប្រធានាធិបតីម៉ាក្រុងបរាជ័យក្នុងការបោះឆ្នោតសភា
27-March-2024 / ព័ត៌មានអន្តរជាតិ
ការបោះឆ្នោតសភាបារាំង ជុំទី២ បានបិទបញ្ចប់ទៅកាលពីថ្ងៃអាទិត្យ ទី១៩មិថុនា ជាមួយនឹងកម្រិតអ្នកមិនទៅបោះឆ្នោតខ្ពស់បំផុតមិនធ្លាប់មាន ប្រមាណជា៥៤%។ តាមការប៉ាន់ស្មាន របស់វិទ្យាស្ថានស្ថិតិ ដោយផ្អែកលើលទ្ធផលបោះឆ្នោតបឋម កាលពីថ្ងៃអាទិត្យទី១៩មិថុនា សម្ព័ន្ធគណបក្ស Ensemble របស់លោកអេម៉ានុយអែល ម៉ាក្រុង បានបាត់បង់សំឡេងអស់ ៦៣ កៅអី បើប្រៀបទៅនឹងអាណត្តិមុនហើយ គ្មានសំឡេងភាគច្រើនដាច់ខាតនៅក្នុងសភា (២៨៩អាសនៈ) សម្រាប់ដឹកនាំរដ្ឋាភិបាលតែម្នាក់ឯងទៀត។ បើតាមលទ្ធផល ផ្លូវការ Ensemble ! សម្ព័ន្ធគណបក្សរបស់លោកប្រធានាធិបតី បានទទួលអាសនៈត្រឹមតែ ២៤៥ ប៉ុណ្ណោះ។
ដោយឡែក សម្ព័ន្ធគណបក្សឆ្វេងនិយម ហៅកាត់ថា NUPES ដឹកនាំដោយលោក Jean Luc Mélanchon អាចនឹងឈ្នះអាសនៈសភា ខ្ទង់១៥០អាសនៈ ក្លាយជាបក្សប្រឆាំងធំបំផុត ក្នុងសភាអាណត្តិថ្មី។ រីឯបក្សស្តាំនិយមជ្រុល RN ដឹកនាំដោយលោកស្រី Marine Le Pen ដែលក្នុងអាណត្តិមុន មានត្រឹមតែ៨អាសនៈ លើកនេះបានឈានក្លាយជាបក្សប្រឆាំងធំទី២ ជាមួយនឹងអាសនៈសរុបដល់ជាង៨០។
នេះគឺជាបរាជ័យ យ៉ាងជូរចត់ របស់លោកម៉ាក្រុង ដែលទើបតែជាប់ឆ្នោតជាប្រធានាធិបតីអាណត្តិទី២ តែបែជាគ្មានសំឡេងភាគច្រើននៅក្នុងសភា។ ក្នុងនោះ មានសមាជិករដ្ឋាភិបាលរបស់លោកស្រី អេលីហ្សាប៊ែត ប៊ន ចំនួន៣នាក់ ដែលមិនបានជាប់ឆ្នោតចូលសភា ហើយនឹងត្រូវតែចាកចេញពីរដ្ឋាភិបាល។
គ្មានសំឡេងភាគច្រើនដាច់ខាតក្នុងសភា នឹងធ្វើឲ្យមានការលំបាកខ្លាំង ដល់រដ្ឋាភិបាល និងការដឹកនាំរបស់លោកម៉ាក្រុងសម្រាប់ផែនការធ្វើកំណែទម្រង់នានា ដែលលោកបានសន្យា ។ក្រុមសម្ព័ន្ធគណបក្សរបស់លោកម៉ាក្រុង ប្រាកដជាគ្មានជម្រើសអ្វីក្រៅពីចរចា ធ្វើសម្បទាន ដើម្បីរកបានសំឡេងឆ្នោតពី ខាងសមាជិកសភាបក្សស្តាំនិយម Les Républicains ដែលអាចមានអាសនៈ ប្រមាណជាខ្ទង់៦០អាសនៈ។ តែយ៉ាងណា បក្សលោកម៉ាក្រុងអាចប្រឈមគ្រោះថ្នាក់ណាស់ ប្រសិនបើបក្ស Les Républicains មិនស្របគ្នាទាំងស្រុង ធ្វើឲ្យមិនគ្រប់សំឡេងភាគច្រើន២៨៩ ដើម្បីអាចបោះឆ្នោតអនុម័តច្បាប់មួយបាន។
នេះមិនមែនជាលើកទីមួយទេ ដែលគណបក្សកាន់អំណាចបារាំង គ្មានសំឡេងភាគច្រើនក្នុងសភា ប៉ុន្តែជាមួយនឹងការស្ទុះឡើងខ្លាំងនៃសំឡេងបក្សឆ្វេងនិងស្តាំជ្រុលនិយម នៅក្នុងសភា លោកស្រីនាយករដ្ឋមន្ត្រីបារាំង អេលីហ្សាប៊ែត ប៊ន បានទទួលស្គាល់ នៅល្ងាចថ្ងៃទី ១៩មិថុនា ២០២២ ម្សិលមិញថា លទ្ធផលឆ្នោតលើកនេះ បានបង្កបង្កើតឱ្យមានស្ថានភាពប្លែកមិនធ្លាប់មានសម្រាប់ប្រវត្តិសាស្ត្របារាំង និងបានប្រកាសត្រៀមបង្កើតរដ្ឋាភិបាលចម្រុះជាមួយគណបក្សផ្សេង។
លោកស្រី អេលីហ្សាប៊ែត ប៊ន ៖ « យប់នេះ បារាំងមានស្ថានភាពនយោបាយខុសប្រក្រតី ! ក្រោមរបបសាធារណរដ្ឋទី៥បារាំង សភាជាតិ មិនដែលមានសមាសភាគដូច្នេះសោះពីមុនមក។ ស្ថានភាពបែបនេះ ជាតំណាងហានិភ័យដែលប្រទេស ត្រូវប្រឈមដោះស្រាយ ទាំងក្នុងថ្នាក់ជាតិ និងនៅលើឆាកអន្តរជាតិ។ ប៉ុន្តែយើងត្រូវតែគោរពលទ្ធផលនៃការបោះឆ្នោត និងបត់បែនតាម។ ក្នុងនាមជាកម្លាំងនយោបាយស្នូលរបស់សភាជាតិថ្មី យើងត្រូវមានទំនួលខុសត្រូវពិសេស ៖ ចាប់ពីថ្ងៃស្អែកទៅ យើងនឹងផ្តើមធ្វើការ ដើម្បីឈានទៅបង្កើតរដ្ឋាភិបាលសកម្ម។ យើងគ្មានជម្រើសអ្វីផ្សេង ក្រៅពីប្រមូលផ្តុំគ្នាដើម្បីធានាស្ថិរភាពជាតិ និងដឹកនាំធ្វើកំណែទម្រង់
