កម្ពុជានិងប្រទេសអាស៊ាន៥ទៀតបោះឆ្នោតអនុប្បវាទរឿងដេញរុស្ស៊ីចេញពីស្ថាបន័សិទ្ធមនុស្សអសប
កម្ពុជាជាប្រទេសមួយក្នុងចំណោមប្រទេសផ្សេងទៀតបានបោះឆ្នោតអនុប្បវាទលើវត្តមានរុស្ស៊ីនៅក្រុមប្រឹក្សាសន្តិសុខអង្គការសហប្រជាជាតិ ខណៈមហាសន្និបាតនៃអង្គការកំពូលមួយនេះសម្រេចព្យួរកៅអីរដ្ឋសហព័ន្ធរុស្ស៊ីនេះ ដោយសំឡេងគាំទ្រ ២ភាគ៣ នៃប្រទេសសរុបចំនួន១៩៣ប្រទេសដែលជាសមាជិករបស់អង្គការសហប្រជាជាតិ កាលពីថ្ងៃទី៧ ខែមេសា។
ជាលទ្ធផលនៃការបោះឆ្នោតព្យួរអាសនៈក្នុងសម័យប្រជុំនោះបានបង្ហាញថា ៩៣ប្រទេសបោះឆ្នោតគាំទ្រ ២៤ប្រទេសបោះឆ្នោតប្រឆាំង និង ៥៨ប្រទេសបោះឆ្នោតអនុប្បវាទ ក្នុងនោះ កម្ពុជាត្រូវបានបង្ហាញនៅក្នុងតារាងនៃរដ្ឋជាសមាជិក ដែលបានបោះឆ្នោតអនុប្បវាទ ចំពោះវត្តមានរុស្ស៊ី ក្នុងពេលដែល UN សម្រេចព្យួរកៅអីប្រទេសមហាអំណាចផ្នែកសព្វាវុធនេះ ដោយសារមូលហេតុមានការរំលោភសិទ្ធិមនុស្សធ្ងន់ធ្ងរ។
ការបោះឆ្នោតតាមរយៈរូបមន្តអនុប្បវាទនេះ មិនមែនតែកម្ពុជាមួយទេ នៅក្នុងរដ្ឋជាសមាជិកអាស៊ាន មានប្រទេសចំនួន៦ហើយដែលបានបោះឆ្នោតតាមយន្តការដូចកម្ពុជានេះ ក្នុងពេលដែលប្រទេសវៀតណាម និងឡាវ បោះឆ្នោតប្រឆាំងការព្យួរអាសនៈដោយមហាសន្និបាតនេះ។ មានតែប្រទេស២ទេដែលជាសមាជិកអាស៊ាន គឺប្រទេសហ្វីលីពីន និងប្រទេសមីយ៉ាន់ម៉ា បោះឆ្នោតគាំទ្រឱ្យព្យួរកៅអីរបស់ប្រទេសរុស្ស៊ីនេះ នៅក្រុមប្រឹក្សាសន្តិសុខអង្គការសហប្រជាជាតិ។
កាលពីពេលថ្មីៗនេះសម្តេចនាយករដ្ឋមន្ត្រី ហ៊ុន សែន តែងប្រកាន់គោលជំហរនយោបាយការបរទេស ដោយបោះឆ្នោតប្រឆាំងការឈ្លានពានដោយរុស្ស៊ីទៅលើអ៊ុយក្រែន។ គេនៅមិនទាន់ដឹងថាតើមានមូលហេតុអ្វីដែលកម្ពុជាសម្រេចបោះឆ្នោតអនុប្បវាទនៅក្នុងមហាសន្និបាតអង្គការសហប្រជាជាតិ កាលពីថ្ងៃព្រហស្បតិ៍ម្សិលមិញនោះទេ។
អគ្គរដ្ឋទូតរងរុស្ស៉ីប្រចាំអង្គការសហប្រជាជាតិ (UN) លោក ហ្គេនណាឌី គូសមីន (Gennady Kuzmin) បានហៅចំណាត់ការព្យួរសមាជិកភាព របស់រុស្ស៉ីពីក្រុមប្រឹក្សាសិទ្ធិមនុស្ស ជាទង្វើខុសច្បាប់ និងមានចេតនានយោបាយជំរុញពីក្រោយ ជាមួយការប្រកាសដែរថារុស្ស៉ីសម្រេចចិត្តចាកចេញពី ក្រុមប្រឹក្សាសិទ្ធិមនុស្សតែម្តង។ នេះបើយោងតាមការចុះផ្សាយរបស់ទីភ្នាក់ងារសារព័ត៌មាន Reuters នៅថ្ងៃសុក្រ ទី៨ ខែមេសា ឆ្នាំ២០២២។
មហាសន្និបាតអង្គការសហប្រជាជាតិ កាលពីថ្ងៃព្រហស្បតិ៍សប្ដាហ៍នេះ បានបោះឆ្នោតលើដំណោះស្រាយព្យួរសមាជិកភាពរុស្ស៊ី ដែលផ្ដួចផ្ដើមឡើងដោយ សហរដ្ឋអាមេរិក ។គួរបញ្ជាក់ថា បើតាមទីភ្នាក់ងារសារព័ត៌មាន Reuters, នៅមុនការបោះឆ្នោត រុស្ស៉ីបានព្រមានប្រទេសនានាថា ការបោះឆ្នោតគាំទ្រ ឬអនុបវាទ នឹងត្រូវ បានចាត់ទុក «ជាកាយវិការអមិត្ត» ហើយនឹងនាំមកនូវផលវិបាកសម្រាប់ទំនាក់ទំនងទ្វេរភាគីជាមួយរុស្ស៉ី។ ការបោះឆ្នោតព្យួរសមាជិកភាពរុស្ស៉ី ធ្វើឡើងបន្ទាប់ពីកងទ័ពរុស្ស៉ី ត្រូវបានចោទប្រកាន់ថាបានប្រព្រឹត្តឧក្រិដ្ឋកម្មសង្គ្រាមដោយសម្លាប់រង្គាលជនស៊ីវិលអ៊ុយក្រែនរាប់រយនាក់ ជាពិសេសនៅក្នុង ទីក្រុងប៊ូចា។
កន្លងមក រុស្ស៉ីតែងតែអះអាងខ្លួនកំពុងអនុវត្តប្រតិបត្តិការយោធាពិសេស ដែលមានគោលដៅបំផ្លាញប្រព័ន្ធយោធារបស់អ៊ុយក្រែន និងបដិសេធថាមិនបានវាយប្រហារលើជនស៊ីវិលនោះទេ
