ក្រុមហ៊ុនហ៊ួវ៉េនឹងសហកាជាមួយក្រសួងប្រៃណីយ៍ធ្វើឲ្យកម្ពុជាទទួលបាននូវបច្ចេកវិទ្យាចុងក្រោយបំផុត!?
11-February-2026 / សេដ្ឋកិច្ច
ភ្នំពេញ ៖ នៅវិមានសន្តិភាព នាព្រឹកថ្ងៃទី២៤ ខែមីនា ឆ្នាំ២០២២ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាបានទទួលជួបពិភាក្សាការងារ ជាមួយលោក លីន បៃហ្វេង (Lin Baifeng) ប្រធានក្រុមហ៊ុន HUAWEI ប្រចាំតំបន់ប៉ាស៊ីហ្វិក។ 
លោក លីន បៃហ្វេង បាន ថ្លែងអំណរគុណ ចំពោះសម្ដេចតេជោនាយករដ្ឋមន្ត្រី ចំពោះការគាំទ្រក្រុមហ៊ុនរបស់លោករយៈពេលជាង ២៣ឆ្នាំកន្លងមក និងផ្តល់នូវការទុកចិត្តដល់ក្រុមហ៊ុនរបស់លោក និងអនុញ្ញាតឲ្យក្រុមហ៊ុនមួយនេះបានចូលរួមចំណែកក្នុងការអភិវឌ្ឍវិស័យបច្ចេកវិទ្យា ទាំងក្នុងវិស័យសុខាភិបាល ការប្រយុទ្ធប្រឆាំងការរីករាលដាលជំងឺកូវីដ-១៩ និងលើវិស័យដទៃទៀត។
លោក លីន បៃហ្វេងបានគោរពសុំការគាំទ្រពីសម្ដេចតេជោ ចូលរួមចំណែកអភិវឌ្ឍវិស័យព័ត៌មានវិទ្យា តាមរយៈការអភិវឌ្ឍធនធានមនុស្ស នាំមកនូវបច្ចេកវិទ្យាចុងក្រោយបំផុតមកកម្ពុជា និងរៀបចំហេដ្ឋារចនាសម្ព័ន្ធតភ្ជាប់បណ្ដាញព័ត៌មានវិទ្យា និងតភ្ជាប់រវាងប្រជាជន និងប្រជាជន ប្រកបដោយសុវត្ថិភាព និងអធិបតេយ្យភាព។
លោក លីន បៃហ្វេង ក៏បានផ្តល់ជូនសម្ដេចតេជោនូវគ្រឿងបរិក្ខា ដែលមានជាក្តាដែលអាចសរសេរបាន ក្តាដែលអាចតភ្ជាប់ដើម្បីទំនាក់ទំនងតាមប្រព័ន្ធវីដេអូ ចំនួន១០០ និងកុំព្យូទ័រចំនួន ៥០០គ្រឿង សម្រាប់ប្រើប្រាស់តាមតម្រូវការ។
សម្ដេចតេជោ ហ៊ុន សែន បានថ្លែងអំណរគុណ ចំពោះលោក លីន បៃហ្វេង ដែលកន្លងមកបានផ្ដល់ជូនកម្ពុជានូវគ្រឿងបរិក្ខាសម្រាប់ប្រយុទ្ធប្រឆាំងនឹងជំងឺកូវីដ-១៩ និងនៅពេលនេះបានផ្តល់ជូននូវគ្រឿងបរិក្ខាសម្រាប់ការតភ្ជាប់ការប្រជុំតាមប្រព័ន្ធវីដេអូផង និងកុំព្យូទ័រ ផងដេរ។សម្តេចតេជោបានស្វាគមន៍ និងលើកទឹកចិត្តដល់លោក លីន បៃហ្វេង ក្នុងការបន្តធ្វើការជាមួយ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បន្តជួយបណ្ដុះបណ្ដាលធនធានមនុស្ស និងបន្តធ្វើយ៉ាងណាឲ្យកម្ពុជាទទួលបាននូវបច្ចេកវិទ្យាចុងក្រោយបំផុតដែលធានាបាននូវសុវត្ថិភាព និងអធិបតេយ្យភាព ព័ត៌មានផង និងមានការប្រកួតប្រជែងលើពិភពលោកផង។
សូមបញ្ជាក់ដែរថាកាលពីទី២៨ ខែមេសា ឆ្នាំ២០១៩លោក វ៉ុ វ៉ៃតាវ ប្រធានក្រុមហ៊ុន HUAWEI ថេកណូឡូជីប្រចាំតំបន់អាស៊ីអាគ្នេយ៍ក៏បានចូលជួបសម្តែងការគួរសមជាមួយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជានៅទីក្រុងប៉េកាំង ប្រទេសចិន ផងដែរ.។លោកប្រធានក្រុមហ៊ុន HUAWEI ថេកណូឡូជីប្រចាំតំបន់អាស៊ីអាគ្នេយ៍ បានឲ្យដឹងថា កន្លងមកក្រុមហ៊ុន HUAWEI បានបើកការិយាល័យនៅក្នុងប្រទេសកម្ពុជាតាំងពីឆ្នាំ១៩៩៨មកម្ល៉េះ ដែលមកដល់បច្ចុប្បន្នមានរយៈពេល ២០ឆ្នាំហើយ។ លោកប្រធានក្រុមហ៊ុន បានអះអាងដែរថា មកដល់ពេលនេះក្រុមហ៊ុនវិនិយោគដោយជោគជ័យនៅក្នុងប្រទេសកម្ពុជា និងសហការជាមួយក្រសួងប្រៃសណីយ៍ និងទូរគមនាគមន៍កម្ពុជាផងដែរ។
លោក វ៉ុ វ៉ៃតាវ ក៏បានជម្រាបជូនសម្ដេចតេជោកាលនោះថាក្រុមហ៊ុន HUAWEI បានចុះហត្ថលេខាជាមួយបណ្ដាប្រទេសប្រមាណជា៤០ប្រទេសហើយក្នុងការអភិវឌ្ឍន៍បច្ចេកវិទ្យា5G។ លោកប្រធានក្រុមហ៊ុន ក៏បានជម្រាបជូនសម្តេចតេជោថា ប្រទេសកម្ពុជាជាប្រទេសទីមួយហើយនៅក្នុងតំបន់អាស៊ានដែលបានចុះហត្ថលេខាលើកិច្ចព្រមព្រៀងអភិវឌ្ឍទៅលើបច្ចេកវិទ្យាថ្មី5G។លោកបានបញ្ជាក់ថា ក្រុមហ៊ុននឹងសហការជាមួយក្រសួងស្ថាប័នរបស់រាជរដ្ឋាភិបាលកម្ពុជាបន្ថែមទៀតព្រមទាំងបន្តពង្រឹងបន្ថែមជាមួយក្រសួងស្ថាប័ននានាទៅលើវិស័យឌីជីថលនៅកម្ពុចា។
សូមបញ្ជាក់ថារដ្ឋការអាមេរិកជំនានលោកប្រធានាធិបតីដូណាល់ត្រាំបានដាក់ចេញនូវគោលនយោបាយប្រឆាំងក្រុមហ៊ុនហ៊ួវ៉េដោយចាត់ទុកថាក្រុមហ៊ុនហ៊ួវ៉េបំរើកាងារចារកម្មឲ្យរដ្ឋាភិបាលចិន។
