ប្រធានាធិបតីចិន ៖ ចិនបន្តនាំចូលអង្ករពីកម្ពុជាឲ្យច្រើនជាងមុន និងទិញចេក ស្វាយ ផ្លែមៀន ពីកម្ពុជា
ភ្នំពេញ៖ លោក ស៊ី ជីនពីង ប្រធានាធិបតី នៃប្រទេសចិន បានសន្យាជាមួយសម្តេចតេជោ ហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជាក្នុងនួបតាមរយៈទូរស័ព្ទ នៅរសៀលថ្ងៃទី ១៨ ខែមីនាឆ្នាំ ២០២២ ថា ចិននឹងបន្តនាំចូលអង្ករពីកម្ពុជាឲ្យច្រើនជាងមុន ទិញចេក ស្វាយ ផ្លែមៀន ពីកម្ពុជា ដើម្បីកាត់បន្ថយភាពក្រីក្រនៅកម្ពុជា។
ក្រៅពីរឿងខាងលើនេះលោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រីបានឲ្យកាសែតដឹងថា នៅក្នុងជំនួបនេះ ថ្នាក់ដឹកនាំទាំងពីរបានពិភាក្សាទៅលើចំនុចជាច្រើន កម្រិតទ្វេភាគី កម្រិតតំបន់ និងមានការផ្លាស់ប្ដូរមតិជុំវិញបញ្ហាតំបន់ និងពិភពលោក។ ជារួមថ្នាក់ដឹកនាំទាំងពីរបានលើកឡើងអំពីទំនាក់ទំនងទ្វេភាគី ការពង្រឹងពង្រីកទំនាក់ទំនងទ្វេភាគី ។ ករណីយ៍នេះបើតាមការចុះផ្សាយរបស់កាសែតចិន CHINA DAILY លោក ស៊ី ជីនពីង បានចាត់ទុកជំហរកម្ពុជាដែលបានបោះឆ្នោតគាំទ្រអធិបតេយ្យភាព និងបូរណភាពទឹកដីអ៊ុយក្រែន និងទាមទារឲ្យរុស្ស៊ីដកកងទ័ពចេញពីអ៊ុយក្រែន ជាការសម្រេចចិត្តដោយឈរលើជំហរឯករាជ្យ និងថា វាជាសិទ្ធិផ្ដាច់មុខរបស់កម្ពុជាក្នុងការសម្រេចចិត្តបែបនេះ។
សម្រាប់កម្ពុជា ក្រៅពីសម្រេចចិត្តបោះឆ្នោតគាំទ្រអធិបតេយ្យ និងបូរណភាពទឹកដីរបស់អ៊ុយក្រែន ហើយទាមទារឲ្យរុស្ស៊ីដកកងទ័ពចេញពីអ៊ុយក្រែនជាបន្ទាន់ និងដោយគ្មានលក្ខខណ្ឌ ប្រទេសកម្ពុជា ក៏បានចូលរួមជា Co-Sponsor គឺជាប្រទេសចូលរួមផ្តួចផ្តើម ឬយល់ព្រមឲ្យគេកត់ត្រាថា ជាប្រទេសចូលរួមផ្តួចផ្តើមសេចក្តីព្រាងនៃសេចក្តីសម្រេចចិត្តរបស់អង្គការសហប្រជាជាតិតែម្តង។ទោះជាយ៉ាងណាសម្រាប់មតិមហាជនពិសេសអ្នកដែលបានរៀននៅរុស្ស៊ីបានសម្តែងមតិកាន់ជើងការឈ្លានពានរបស់ប្រទេសរុស្ស៊ីលើប្រទេសអ៊ុយក្រែន!។
សម្រាប់កិច្ចកិច្ចព្រមព្រៀងពាណិជ្ជកម្មសេរីទ្វេរភាគីរវាងកម្ពុជា-ចិនដែល ចូលជាធរមាន ហើយនោះលោកប្រធានាធិបតី ស៊ី ជីនពីង បានមានប្រសាសន៍ថា ចិននឹងបន្តនាំចូល នូវអង្ករឲ្យកាន់តែច្រើនជាងមុន នាំចូលផលិតផលកសិកម្មមួយចំនួនទៀត ដូចជា ចេក ស្វាយ និងផ្លែមៀន ដើម្បីចូលរួមចំណែកកាត់បន្ថយភាពក្រីក្រនៅក្នុងប្រទេសកម្ពុជា។
ចិននឹងគាំទ្រដល់គម្រោងទាំងឡាយ ជាពិសេសការពង្រឹងរចនាសម្ព័ន្ធ នៅប្រទេសកម្ពុជា។ នៅក្នុងការពិភាក្សានេះដែរលោក ប្រធានាធិបតីចិនបាន ប្រកាសផ្ដល់វ៉ាក់សាំងចំនួន ៥លានដូស ជូនប្រទេសកម្ពុជា ដែលនឹងដឹកមកដល់នៅចុងខែមីនានេះតែម្ដង ។ បន្ថែមលើនេះ លោក ស៊ី ជីនពីង បានប្រកាសថា នឹងធ្វើការរួមគ្នាជាមួយនឹងប្រទេសកម្ពុជាក្នុងការរៀបចំរោងចក្រផលិតវ៉ាក់សាំងនៅប្រទេសកម្ពុជានាពេលខាងមុខ។ លោកស៊ី បានមានប្រសាសន៍បន្តថា នឹងបន្តជំរុញជើងហោះហើររវាងប្រទេសទាំងពីរ និងគម្រោងផ្សេងៗទៀត ជាពិសេសការកសាងផ្លូវ កសាងសាលារៀន ជាដើម។
លោកប្រធានាធិបតីចិន ប្រកាសគាំទ្រប្រទេសកម្ពុជាដែលធ្វើជាប្រធានអាស៊ានឆ្នាំ២០២២។លោកប្រធានាធិបតីចិន ក៏បានកោតសរសើរចំពោះការធ្វើទស្សនកិច្ចរបស់សម្ដេចតេជោ ហ៊ុន សែន ទៅកាន់ប្រទេសមីយ៉ាន់ម៉ា ដោយបានចាត់ទុកថាគឺ ជាទស្សនកិច្ចដែលមានសារៈសំខាន់ក្នុងការគាំទ្រការចូលរួមចំណែកដោះស្រាយនៅក្នុងប្រទេសមីយ៉ាន់ម៉ាដែលជាមធ្យោបាយមួយ ក្នុងការចូលរួមដោះស្រាយតាមផ្លូវអាស៊ាន។
សម្ដេចតេជោ ហ៊ុន សែន ក៏បានអញ្ជើញប្រធានាធិបតីចិនមកបំពេញទស្សនកិច្ចនៅក្នុងប្រទេសកម្ពុជា ក្នុងពេលវេលាសមស្រប ដោយលោកប្រធានាធិបតីចិនក៏បានទទួលយក នូវការអញ្ជើញនេះ។ លោក ស៊ី ជីនពីង ក៏បានអញ្ជើញសម្ដេចតេជោ ហ៊ុន សែន ធ្វើដំណើរទស្សនកិច្ចទៅកាន់ប្រទេសចិនផងដែរនាពេលខាងមុខ។សម្ដេចតេជោ ហ៊ុន សែន ក៏បានថ្លែងអំណរគុណដល់ភាគីចិនចំពោះការគាំទ្រកម្ពុជាធ្វើជាប្រធានអាស៊ាន និងការផ្ដល់ជំនួយដល់ប្រទេសកម្ពុជា ជាពិសេសវ៉ាក់សាំងកូវីដ១៩ ដែលកម្ពុជាកំពុងតែត្រូវការ៕
.jpg&h=97&w=146)
.jpg&h=97&w=146)
