វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5990 នាក់
ម្សិលមិញ 8227 នាក់
សរុប 14132871 នាក់
ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ នៅរសៀល ថ្ងៃទី១៧ ខែមីនា ឆ្នាំ២០២២នេះបានបន្តអំពាវនាវជាថ្មី ដល់តំណាងភាគីកម្មករនិយោជិត ឱ្យចូលរួមប្រជុំដោះស្រាយ នៅថ្ងៃទី១៨ ខែមីនា ឆ្នាំ២០២២ វេលាម៉ោង ២:៣០រសៀល បន្តទៀត ទាមទារឱ្យតំណាងបុគ្គលិកទាំងនោះ អនុវត្តតាមកិច្ចសន្យារបស់ខ្លួន ដែលស្នើសុំនៅក្រៅឃុំបន្ទាប់ពីតំណាងអតីតបុគ្គលិកណាហ្គាវើលដ៍ នៅតែបន្តអវត្តមានក្នុងការចូលប្រជុំដោះស្រាយវិវាទចំនួន២ថ្ងៃជាប់ៗគ្នា។
សេចក្តីជូនដំណឹងរបស់ ក្រសួងការងារ បានបញ្ជាក់ថា៖ ដើម្បីបន្ត សម្របសម្រួលដោះស្រាយបញ្ចប់វិវាទការងាររួមនៅក្រុមហ៊ុន ណាហ្គាវើលដ៍ ក្រសួងបានអញ្ជើញតំណាងភាគី កម្មករនិយោជិត និងតំណាងភាគីនិយោជក មកបន្តប្រជុំដោះស្រាយវិវាទនៅទីស្តីការក្រសួង នៅរសៀល ថៃ្ងព្រហស្បតិ៍ ទី១៧ ខែមីនា ឆ្នាំ២០២២ វេលាម៉ោង ២:៣០រសៀល។តែ នៅរសៀលថ្ងៃទី១៧ ខែមីនា ឆ្នាំ២០២២ នេះ តំណាងភាគីនិយោជកបានមកចូលរួមប្រជុំតាម ការអញ្ជើញរបស់ក្រសួង ទោះបីជាក្រសួងបានពន្យល់អំពីកិច្ចខិតខំប្រឹងប្រែងរបស់ក្រសួង ក្នុងការសម្របសម្រួលដោះស្រាយវិវាទនេះ ជាពិសេសផ្តល់កិច្ចអន្តរាគមន៍តាមផ្លូវច្បាប់ ដើម្បីឱ្យអតីតបុគ្គលិក ៣នាក់ ផ្សេងទៀតបាននៅក្រៅឃុំជាបណ្ដោះអាសន្នយ៉ាងណាក៏ដោយ។
ក្រសួងការងារ ក៏បានអំពាវនាវដល់តំណាងភាគីកម្មករនិយោជិត មេត្តាចូលរួមប្រជុំដោះស្រាយ នៅថ្ងៃទី១៨ ខែមីនា ឆ្នាំ២០២២ វេលាម៉ោង ២:៣០រសៀល នៅទីស្តីការក្រសួង និងសូមអនុវត្តតាមការសន្យា របស់ខ្លួន ដែលស្នើសុំកិច្ចអន្តរាគមន៍ឱ្យខ្លួនបាននៅក្រៅឃុំជាបណ្ដោះអាសន្ន ដើម្បីធ្វើជាតំណាងអតីតបុគ្គលិក ក្នុងការដោះស្រាយវិវាទការងារជាមួយក្រុមហ៊ុន ដោយមិនគួរលើកហេតុផលផ្សេងៗខុសពីការសន្យា ឬស្មារតី នៃកិច្ចខិតខំប្រឹងប្រែងដោះស្រាយបញ្ចប់វិវាទការងារនេះឡើយ។
កាលពីថ្ងៃទី១៦មិនា លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានថ្លែងឱ្យដឹង ថា៖ កិច្ចប្រជុំសម្របសម្រួលដោះស្រាយវិវាទការងារករណី ក្រុមហ៊ុនណាហ្គាវើលដ៍ លីមីតធីត នឹងធ្វើឡើងនៅទីស្តីការក្រសួងការងារ និងបណ្តុះបណ្តាលវិជ្ជាជីវៈនៅក្នុងគោលបំណងខិតខំសម្របសម្រួលស្វែងរកដំណោះស្រាយបញ្ចប់ករណីវិវាទ និងការតវ៉ារបស់អតីតបុគ្គលិក និងបុគ្គលិកក្រុមហ៊ុនណាហ្កាវើលដ៍។ នេះអ្នកនាំពាក្យក្រសួងការងាររូបនេះ បានគូសបញ្ជាក់បន្ថែមថា៖ ការជំរុញឲ្យមានកិច្ចប្រជុំនេះក៏ស្របទៅតាមស្មារតី និងការសន្យារបស់អតីតបុគ្គលិកក្រុមហ៊ុន ណាហ្កាវើលដ៍ ចំនួន៨នាក់ ដែលបានសន្យាជាមួយក្រសួងថា នឹងធ្វើជាតំណាងរបស់អតីតបុគ្គលិក និងបុគ្គលិកក្រុមហ៊ុនណាហ្កាវើលដ៍ សំដៅដោះស្រាយបញ្ចប់វិវាទការងារ និងការតវ៉ានេះស្របតាមនីតិវិធីច្បាប់ ជាពិសេសអំពីការទូទាត់សំណងបញ្ចប់កិច្ចសន្យាការងាររួម។
ពាក់ព័ន្ធការអញ្ជើញកោះប្រជុំរបស់ក្រសួងការងារ កាលពីថ្ងៃម្សិលមិញ កញ្ញា ឈឹម ស៊ីថរ បានប្រាប់កាសែតថា ថ្នាក់ដឹកនាំសហជីពនិងក្រុមប្រតិភូចរចាមិនអាចចូលរួមបានឡើយ ដោយសារតែសមាជិកសហជីពរបស់ខ្លួន៣នាក់ទៀត មិនទាន់ត្រូវបានដោះលែង។«អីចឹងទៅ ការដែលឱ្យពួកយើងចូលតុចរចា ខណៈដែលក្រុមការងារយើង៣នាក់ទៀត កំពុងជាប់ពន្ធនាគារ គឺជាអ្វីដែលពួកយើង មិនអាចបន្ទន់ឥរិយាបថលើសហ្នឹងទៀតបានទេ គឺដាច់ខាតត្រូវតែដោះលែងពួកគាត់សិន ទើបពួកយើងអាចចូលទៅក្នុងតុចរចាហ្នឹងបាន។
បើមិនអីចឹងទេ គឺយើងត្រូវ[ស្ថិត]ទៅក្នុងស្ថានភាពមួយដែល វាអត់មានតុល្យភាពនៅក្នុងការចរចាទេ។ ខ្ញុំចង់រំលឹកថា បើទោះពីពួកខ្ញុំនៅខាងក្រៅ[ឃុំ]មែន ប៉ុន្តែបទចោទប្រកាន់នៅមិនទាន់ត្រូវបានទម្លាក់ចោលទេ ហើយពួកយើងសុខចិត្តបង្ហាញឆន្ទៈក្នុងការបញ្ចប់បញ្ហា ចង់រកដំណោះស្រាយ ចូលតុចរចាហ្នឹង ទាំងដែលនៅជាប់បទចោទប្រកាន់នៅតាមខ្លួននៅឡើយ»។
សូមបញ្ជាក់ថាកាលពីយប់ថ្ងៃទី១៤ ខែមីនា ឆ្នាំ២០២២ តុលាការបានសម្រេចដោះលែងថ្នាក់ដឹកនាំសហជីពណាហ្គាវើលដ៍ចំនួន ៨នាក់ឱ្យនៅក្រៅឃុំជាបណ្ដោះអាសន្ន។ដោយឡែក សមាជិកសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនណាហ្គាវើលដ៍ ៣នាក់ទៀតដែលកំពុងជាប់ឃុំឃាំងនៅពន្ធនាគាររាជធានីភ្នំពេញឬប៉េហ្ស៊ី(PJ) ដែលមិនទាន់ដោះលែង ត្រូវបានតុលាការចោទពីបទរារាំងវិធានការសុខាភិបាលពាក់ព័ន្ធការការពារជំងឺកូវីដ-១៩។
បើតាមសេចក្តីថ្លែងការណ៍របស់រាជរដ្ឋាភិបាលនៅថ្ងៃទី១៥ ខែមីនា បានឱ្យដឹងថា កូដករដែលកំពុងជាប់ឃុំ ៣នាក់ទៀត ក្រសួងការងារក៏បានរៀបចំសំណើដាក់ទៅកាន់ក្រសួងយុត្តិធម៌ និងក្រសួងសុខាភិបាលដើម្បីពិនិត្យ និងរកអន្តរាគមន៍ដោះលែងតាមផ្លូវច្បាប់ដែរតែមិនទាន់ឃើញដោះលែង។
គួរជម្រាបថាអតីតបុគ្គលិកចំនួន៨រូបដែលត្រូវបានតុលាការអនុញ្ញាតឱ្យនៅក្រៅឃុំជាបណ្តោះអាសន្ន ដោយក្នុងនោះរួមមាន៖ ទី១៖ ឈ្មោះ ឈឹម ស៉ីថរ, ទី២៖ ឈ្មោះ រី សុវណ្ណឌី, ទី៣៖ ឈ្មោះ ស៊ុន ស្រីពេជ្រ, ទី៤៖ ឈ្មោះ ហៃ សុភាព, ទី៥៖ ឈ្មោះ ឃ្លាំង សុបិន្ដ, ទី៦៖ ឈ្មោះ ទូច សិរីមាស, ទី៧៖ ឈ្មោះ សុខ ណារិទ្ធ និងទី៨៖ ឈ្មោះ ឈឹម សុខន។