កាន់មេក្រូក្នុងពិធីសម្ពោធផ្លូវជាតិលេខ៧ជំនួយចិនតេជោសែនវ៉ៃបកបីចំណុច!
21-September-2026 / ផ្សេងៗ
ភ្នំពេញ ៖ ក្នុងពេលដែលប្រកាសថាមិនជេរតាមការស្នើសុំសម្តេចតេជោ ហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជា ហៅលោកសុខ សុគន្ធ (ជេមសុខ) ជា ជនតិរច្ឆាន ដែលភ្លេចកំណើតខ្លួនឯងជាខ្មែរ។ ក្រៅពីនេះ សម្តេចតេជោ ហ៊ុន សែនបង្ហើបឌឺរឿងទៅប្រជុំនៅអាមេរិកក្នុងនាមប្រធានអស៊ានថាមូលហេតុសម្តេច មិនទម្លាយលិខិតអញ្ជើញរបស់ប្រធានាធិបតីអាមេរិកព្រោះចាំមើលប្រតិកម្មរបស់អ្នកវិភាគធុនឡប់ៗ។
លោកប្រធានាធិបតីអាមេរិក លោក ចូ បៃដិន កាលពីថ្ងៃទី១៤ ខែមករា ឆ្នាំ២០២២ បានផ្ញើលិខិតមួយច្បាប់មកសម្តេចនាយករដ្ឋមន្ត្រី ហ៊ុន សែន លើកឡើងអំពីការទន្ទឹងរង់ចាំស្វាគមន៍លោក ហ៊ុន សែន ទៅចូលរួមកិច្ចប្រជុំពិសេសអាស៊ាន-អាមេរិក នៅរដ្ឋធានីវ៉ាស៊ីនតោន សហរដ្ឋអាមេរិក។ លិខិតប្រធានាធិបតីអាមេរិកបញ្ជាក់ថា រដ្ឋបាលរបស់លោក ទន្ទឹងរង់ចាំធ្វើការជាមួយកម្ពុជា ក្នុងនាមជាប្រធានអាស៊ាន សម្រាប់ឆ្នាំ២០២២។ ក៏ប៉ុន្តែលិខិតនេះ ទើបតែត្រូវបានបញ្ចេញដល់ដៃប្រព័ន្ធផ្សព្វផ្សាយក្នុងស្រុកកាលពីថ្ងៃអាទិត្យ ទី៦កុម្ភៈ។
ទាក់ទងរឿងលោកសុខសុគន្ធហៅជេមសុខដូរឥរិយាក្នុងវោហាសព្ទ័នយោបាយពីសសើមករិះគន់សម្តេចតេជោមានប្រសាសន៍នៅក្នុងពិធីសម្ពោធកំណាត់ផ្លូវជាតិលេខ៧ នៅក្នុងខេត្តក្រចេះនាព្រឹកថ្ងៃទី៧ ខែកុម្ភៈ ឆ្នាំ២០២២ ថា៖ សូមផ្តាំទៅប្អូន ជេម សុខ ផង ..ប្អូន ជេម សុខ អើយ ប្អូនឯងនិយាយ វ៉់យសំឡេង សំឡេងនៅបងណេះ ,ប្អូននិយាយក្នុងគោលដៅអោយបង ជេរប្អូនឯង ដើម្បីប្អូនឯងអូសទាញពួកប្រឆាំង ប៉ុន្តែបងមិនជេរប្អូនឯងទេ តែប្អូនឯងនិយាយខុសហើយ។
សម្តេចលើកឡើងថា, ឧទាហរណ៍ថាមានសង្គ្រាម សុខចិត្តកាន់អាវុធមកវ៉ៃខ្មែរ ប្អូន! បងប្រាប់ទៅប្អូន , ប្អូនអន់ជាងតិរច្ឆាន ..តិរច្ឆាន គង់ស្គាល់សំបុករបស់វា ប៉ុន្តែប្អូនបែរជា បើទោះបានចូលសញ្ជាតិបរទេស ល្អមិនគួរប្រើភាសាហ្នឹង , បើទោះប្អូនមិននិយាយ ក៏គ្មាននរណាគេថាប្អូន គរដែរ ។ប៉ុន្តែបងឃើញប្អូនតាំងពីកាត់ពោះវៀនមកនេះ ជំងឺប្អូនក៏វាមិនបានអាយុប៉ុន្មានដែរ ហើយប្អូនថា គង់តែងាប់ដដែល ហើយថារងចាំបងទៅអាមេរិក ហៅទៅធាក់២-៣ជើង បងមិនធាក់ប្អូនឯងទេ ! ។
បងគ្រាន់តែប្រាប់ប្អូនឯងថា, ប្អូននិយាយខុសហើយ ធ្វើការប្រមាថជាតិសាសន៍ឯង ក្នុងពេលប្អូន ចូលសញ្ជាតិបរទេសក៏ដោយ ក៏ប៉ុន្តែប្អូនមិនគួរប្រមាថខ្មែរ ដល់កម្រិតហ្នឹងទេ ! យ៉ាងមេច ! ប្អូនចង់ធ្វើយ៉ាងម៉េចអោយបងជេរប្អូនឯង ដើម្បីប្អូនឯងជាច្រកចូលមួយ នៃពួកប្រឆាំង , ប្អូនឯងចង់អោយបងបង្ហោះ បងមិនបង្ហោះទេ តែបងគ្រាន់តែដាស់តឿននូវអ្វី ដែលជាសំឡេងប្អូនឯង ហើយប្អូនឯងកុំចូលទៅ ដេលីតចូលក្នុងហ្នឹង បងត្រង់ស្វ៊ៀចេញទៅកន្លែងផ្សេងអស់ហើយ គ្រាន់តែផ្តាំទៅប្អូនឯងប៉ុណ្ណឹង ។
សម្តេចមានប្រសាសន៍ប្រាប់ថា, ឃើញខ្មែរយើងប្រតិកម្ម ជេម សុខ ទាំងក្នុងនិងក្រៅប្រទេស ។ប៉ុន្តែ ជេម សុខ នេះ ! គោលដៅគាត់និយាយចឹង ដើម្បីអោយខ្ញុំហ្នឹងជេរគាត់ ហើយនិយាយគ្នាតាមទូរស័ព្ទផង និយាយគ្នាតាមសំឡេង ចេះឡើងផង ថាកុំធ្វើចឹងអី កុំជេរធ្វើអី , គឺចង់បានច្រកចូល ពួកប្រឆាំង ។
សម្រាប់រឿងភូមាវិញសម្ដេចតេជោបានលើកឡើងថា សម្ដេចពុំទទួលបានផលប្រយោជន៍អ្វីក្រៅពីចង់ជួយប្រជាជនមីយ៉ានម៉ាឱ្យចេញផុតពីសង្គ្រាមនោះទេ។
សម្ដេចថា អ្នកកំពុងជេរសម្ដេច និងប្រសិតពិសេសអង្គការសហប្រជាជាតិអំពីមីយ៉ាន់ម៉ាគឺកំពុងតែរុញប្រទេសមីយ៉ាន់ម៉ាឱ្យធ្លាក់ចូលសង្គ្រាមបន្តទៀត។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា មានប្រសាសន៍ថាបញ្ហាមីយ៉ាន់ម៉ាមានទាំងអ្នកគាំទ្រ និងអ្នកប្រឆាំងនឹងសម្ដេចក្នុងការស្វែងរកដំណោះស្រាយ។ សម្ដេចបន្ថែមថា បញ្ហាប្រទេសមីយ៉ាន់ម៉ាបើមិនអាចដោះស្រាយក្នុងឆ្នាំនេះ អាចបន្តទៅឆ្នាំក្រោយ ហើយវាមិនមែនជាបញ្ហាដែលសម្ដេចត្រូវឈឺក្បាលនោះទេ។
ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុនសែន មានប្រសាសន៍ថា៖ «ខ្ញុំរកសន្ដិភាព និងការពារសន្ដិភាពសម្រាប់ប្រទេសខ្ញុំវាគ្រប់គ្រាន់ វាពិបាកណាស់ទៅហើយ។ បើអ្នកចង់វ៉ៃគ្នា សូមអញ្ជើញអ្នកវ៉ៃចុះ។ វិធីសាស្ត្ររបស់ខ្ញុំគឺពន្លត់ភ្លងសង្គ្រាមសិន បានអាចដំណើរការប្រជាធិបតេយ្យស្អីៗវាទៅតាមក្រោយ» ហើយ ការទាល់ចោលនូវរដ្ឋាភិបាលយោធាមីយ៉ាន់ម៉ាមិនមែនជាដំណោះស្រាយសម្រាប់ប្រទេសនេះទេ។សម្ដេចតេជោថា បញ្ហាមីយ៉ាន់ម៉ាត្រូវការដំណោះស្រាយរយៈពេលវែង មិនអាចដោះស្រាយតែមួយថ្ងៃដែលសម្ដេចទៅអាចរកដំណោះស្រាយបាននោះទេ ព្រោះប្រទេសមីយ៉ាន់ម៉ាមានយោធាគ្រប់គ្រងអស់ជាង៧០ឆ្នាំទៅហើយនោះ.។
កំណាត់ផ្លូវជាតិលេខ៧ ពីចំណុចរង្វង់មូលខ្លាស្ទុះ ក្រុងក្រចេះ ទៅភូមិរមាត ឃុំអូរគ្រៀង ស្រុកសំបូរ ខេត្តក្រចេះ ប្រវែងប្រមាណ ៩៣.៥៦គីឡូម៉ែត្រ ដែលសាងសង់ក្រោមជំនួយឥតសំណងរបស់រដ្ឋាភិបាលចិន ក្នុងទឹកប្រាក់ប្រមាណជាង ៣៣លានដុល្លារអាមេរិក។លោកទេសរដ្ឋមន្ត្រី ស៊ុន ចាន់ថុល បានឱ្យដឹងថា កំណាត់ផ្លូវជាតិលេខ៧នេះត្រូវបានសាងសង់លើកកម្រិតគុណភាពឡើងវិញ ដោយក្រាលបេតុងកៅស៊ូ(AC) មានទទឹងតួផ្លូវប្រវែង ១១ម៉ែត្រ ចែកជា ២គន្លង សម្រាប់រថយន្តចរាចរណ៍ ដោយគន្លងនីមួយៗមានទទឹង ៣.៥ម៉ែត្រ និងផ្លូវសម្រាប់ទោចក្រយានយន្ត មាន ២គន្លង គន្លងនីមួយៗមានទទឹង ១.៥០ម៉ែត្រ និងចិញ្ចើមដីក្រហមសងខាងមានទទឹង ០.៥០ម៉ែត្រ។
កំណាត់ផ្លូវជាតិលេខ៧ គឺជាខ្សែផ្លូវដ៏មានសក្ដានុពលមួយ តភ្ជាប់ពីរាជធានីភ្នំពេញ ឆ្លងកាត់ខេត្តសំខាន់ៗ ដូចជា៖ ខេត្តកំពង់ចាម ត្បូងឃ្មុំ ក្រចេះ ស្ទឹងត្រែង និងឆ្ពោះទៅតំបន់ប៉ូលសេដ្ឋកិច្ចទី៤ របស់កម្ពុជា ស្ថិតនៅភូមិភាគឦសាននៃប្រទេស ដែលបម្រើឱ្យចរាចរណ៍សម្រាប់សកម្មភាពផ្លាស់ប្តូរសេដ្ឋកិច្ច ពាណិជ្ជកម្ម និងទេសចរណ៍នៅក្នុងប្រទេស។
