វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 8138 នាក់
ម្សិលមិញ 8227 នាក់
សរុប 14135019 នាក់
ភ្នំពេញ៖ នៅ ក្នុងកិច្ចប្រជុំបន្ទាន់នៅថ្ងៃទី១៤ ខែធ្នូជាមួយសមាគមវារីវប្បករកម្ពុជា ពិភាក្សាអំពីតួនាទីក្នុងការបង្កើនផលិតភាពផលិតកម្ម ឆ្លើយតបតម្រូវការទីផ្សារ កាត់បន្ថយការនាំចូលលោករដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានប្រាប់ឱ្យរដ្ឋបាលជលផល និងសមាគមវារីវប្បករកម្ពុជា ត្រូវសហការគ្នាពង្រឹងការទប់ស្កាត់បទល្មើសនាំចូលផលវារីវប្បកម្ម។
លោករដ្ឋមន្ត្រី វេង សាខុន បានណែនាំដល់រដ្ឋបាលជលផល ត្រូវសហការជាមួយសមាគម ដើម្បីវាយតម្លៃឲ្យបានច្បាស់លាស់អំពីសមត្ថភាពផលិតផ្គត់ផ្គង់ក្នុងស្រុក និងតម្រូវការបន្ថែម ដោយប្រើយន្តការចុះស្រង់ស្ថិតិកសិដ្ឋានចិញ្ចឹម កន្លែងចិញ្ចឹម និងបណ្តុំអាជីវកម្មផ្សេងៗទៀត រួចកំណត់ចេញអំពីបរិមាណផ្គត់ផ្គង់ និងតម្រូវការច្បាស់លាស់មួយ។ ត្រូវពង្រឹង និងពង្រីកបន្ថែមទៀត លើការងារផ្សព្វផ្សាយបច្ចេកទេស បែបបទរដ្ឋបាល និងឯកសារគតិយុត្តដែលមានស្រាប់ដល់សមាជិកសមាគម។
លោករដ្ឋមន្ត្រី ក៏បានប្រាប់រដ្ឋបាលជលផលឲ្យជួយរៀបចំចងក្រងបណ្តុំអាជីវកម្ម ឬបណ្តាញចិញ្ចឹម ដើម្បីងាយស្រួល ក្នុងការគ្រប់គ្រងបរិមាណផលិត និងតម្រូវការ។ ព្រមជាមួយនេះ ត្រូវខិតខំសិក្សាស្រាវជ្រាវបន្ថែមទៀត អំពីបច្ចេកទេសចិញ្ចឹម កែច្នៃ ធ្វើយ៉ាងណាបង្កើនផលិតភាពចិញ្ចឹម ក្នុងផ្ទៃដីស្រះទឹកដដែល ដើម្បីធានាបាននូវសុខុមាភាព វិបុលភាព និងនិរន្តរភាពនៃវិស័យវារីវប្បកម្មកម្ពុជា ក្នុងពេលអនាគតដ៏ខ្លី។
សម្រាប់សមាគមវារីវប្បករកម្ពុជា លោករដ្ឋមន្ត្រី បានណែនាំឱ្យរួមសហការគ្នាក្នុងរង្វង់សមាគម បង្កើនផលិតភាពផលិតកម្មចិញ្ចឹមត្រីគ្រប់ប្រភេទ បង្កង កន្ធាយ និងកង្កែបទាំងបរិមាណ និងគុណភាពឈាន ទៅបង្កើនបរិមាណផ្គត់ផ្គង់ឲ្យទីផ្សារក្នុងស្រុក និងធ្វើការកាត់បន្ថយការនាំចូល។ ជាមួយនេះ ត្រូវរៀបចំបណ្តុំ ឬបណ្តាញអាជីវកម្មចិញ្ចឹមត្រីឲ្យបានទូលំទូលាយ អនុវត្តបច្ចេកទេសឲ្យបានត្រឹមត្រូវ ទាំងកម្មវិធីផលិតកូន កម្មវិធីចិញ្ចឹម និងកម្មវិធីទីផ្សារ។
លោករដ្ឋមន្ត្រី វេង សាខុន បានលើកទឹកចិត្តដល់សមាជិកសមាគមវារីវប្បករទាំងអស់ ឲ្យយកចិត្តទុកដាក់បន្ថែមទៀត លើការអនុវត្តបច្ចេកទេសចិញ្ចឹម និងពង្រីកអាជីវកម្មចិញ្ចឹមដើម្បីច្បាមយក រួចប្រើប្រាស់កាលានុវត្តភាពនៃវិបត្តជំងឺឆ្លងនេះ ឲ្យកាន់តែមានប្រសិទ្ធភាពទាំងផ្នែកសេដ្ឋកិច្ច និងសង្គម៕