រដ្ឋមន្ត្រីក្រសួងព័ត៌មាន ស្នើពិនិត្យរយៈពេល៣ខែម្តងរកគេហទំព័រ ផ្សព្វផ្សាយព័ត៌មានក្លែងក្លាយក្នុងពេលសមាគមន៍កាសែតស្នើកុំឲ្យមានការគម្រាម
21-September-2026 / ព័ត៌មានជាតិ
ភ្នំពេញ៖ លោក ខៀវ កាញារីទ្ធ រដ្ឋមន្ត្រី ក្រសួងព័ត៌មានក្នុងឱកាសនៃកិច្ចប្រជុំសាមញ្ញប្រចាំសប្តាហ៏ថ្នាក់ដឹកនាំ ក្រសួងព័ត៌មាន ព្រឹកថ្ងៃទី៦ ខែកញ្ញា ឆ្នាំ២០២១ ដែលមានការចូលរួមជុំផ្ទាល់ និងតាមរយៈប្រពន្ធ័ Zoom ជាលក្ខណៈHybrid ផ្តល់អនុសាសន៍ដល់ ក្រុមប្រឆាំងព័ត៌មានក្លែងក្លាយឲ្យ៣ខែម្តងពិនិត្យ តើមានគេហទំព័រប៉ុន្មាន និងឈ្មោះអ្វីខ្លះ? ដែលបាននិយាយ ផ្សព្វផ្សាយព័ត៌មានក្លែងក្លាយអំពីអ្វី និងប៉ុន្មានដង? ។
លោករដ្ឋមន្ត្រី បញ្ជាក់ថា ក្រុមប្រឆាំងព័ត៌មានក្លែងក្លាយ ជាក្រុម ដែលពិនិត្យមើលតែពីដំណឹងដែលបំពុល ព័ត៌មានដែលមិនពិត បំភ្លៃសង្គម គឺ ខុសពី គណ:កម្មការតាមដានវាយតំលៃនិង លើកសរសើរក្រមសីលធម៌ វិជ្ជា ជីវ:សារព័ត៌មាន ។គោលបំណងនៃការបង្កើតគណ:កម្មការនេះឡើងគឺ ដើម្បីជាការលើកនូវតំលៃ សីលធម៌ និងតំលៃតូនាទីសង្គម របស់អ្នកសារព័ត៌មាន ឡើងវិញ ។ គណ:កម្មការ ក៏មិនមែនវាយតំលៃគ្រប់អត្ថបទនោះទេ គឺពិនិត្យនៅពេលមានបញ្ហា ហើយក៏មិនមានសិទ្ធិ ដាក់ទោសកំហុសដល់អ្នកសារព័ត៌មាននោះទេ ។
ដោយឡែកនៅថ្ងៃទី៦កញ្ញានេះដែរសមាគមអ្នកកាសែតកម្ពុជា(CamboJA) បានចេញសេចក្តីថ្លែងការណ៍សម្តែងការសោកស្ដាយយ៉ាងខ្លាំង ដែលមានអ្នកសារព័ត៌មានពីររូប បានរងនូវការបំភិតបំភ័យ ក្នុងពេលពួកគាត់ចុះយកព័ត៌មានពីករណីជម្លោះដីធ្លីព្រលានយន្តហោះអន្តរជាតិថ្មីក្នុងខេត្តកណ្ដាល។ CambodJA ឲ្យដឹងថា កាលពីថ្ងៃទី០៤ ខែកញ្ញា កន្លងទៅនេះ លោក ពក ខឺយ អ្នកហាត់ការនៅសារព័ត៌មានសំឡេងប្រជាធិបតេយ្យ(VOD) បានចុះទៅយកព័ត៌មាននៅកន្លែងមានជម្លោះដីធ្លីក្នុងតំបន់ព្រលានយន្តហោះអន្តរជាតិថ្មី ស្ថិតក្នុងស្រុកកណ្តាលស្ទឹង ខេត្តកណ្តាល ដែលនៅទីនោះ ក្រុមប្រជាពលរដ្ឋបានធ្វើសន្និសីទកាសែត ឆ្លើយតបនឹងលិខិតជូនដំណឹងរបស់រដ្ឋបាលខេត្តកណ្តាលស្តីពីការបិទទ្វារទឹក និងកាយផ្តាច់ផ្លូវទំនប់៥៤ ដែលស្ថិតនៅក្នុងភូមិកំពង់តាឡុង។
តាម សមាគមកាសែត លោក ពក ខឺយ ត្រូវបានកម្លាំងសន្តិសុខ ដែលយាមការពារនៅតំបន់ ដែលប្រជាពលរដ្ឋធ្វើសន្និសីទកាសែត ឯកសណ្ឋានស៊ីវិល ប្រដាប់ដោយវិទ្យុទាក់ទង ជិះម៉ូតូដេញតាមពីក្រោយ ពេលដែលលោកធ្វើបទសម្ភាសជាមួយអ្នកតវ៉ា ហើយត្រលប់មកការិយាល័យព័ត៌មានវិញ។ ទីបំផុត អ្នកកាសែតហាត់ការរូបនេះ មិនត្រូវបានឃាត់ខ្លួនអ្វីឡើយ ខណៈដែលអ្នកគ្រប់គ្រងទូរទស្សន៍អនឡាញម្នាក់ទៀត ត្រូវបានគេប្រាប់ដំណឹងនៃការរារាំងជាមុន ជាហេតុធ្វើឲ្យលោកបារម្ភ និងមិនបានទៅយកព័ត៌មានកន្លែងនោះឡើយ។
លោក ណុប វី មាននាយកប្រតិបត្តិ CambodJA បានថ្លែងថា ការរារាំង ការគំរាមកំហែងតាមរយៈរូបភាពផ្សេងៗមកលើអ្នកសារព័ត៌មាន ធ្វើឲ្យប៉ះពាល់យ៉ាងធ្ងន់ធ្ងរមកលើសេរីភាពរបស់អ្នកសារព័ត៌មាន ស្ថានភាពសេរីភាពបញ្ចេញមតិនៅក្នុងប្រទេសកម្ពុជា និងប៉ះពាល់ធ្ងន់ធ្ងរទៅដល់សិទ្ធិទទួលបានព័ត៌មានរបស់អ្នកសារព័ត៌មាន និងរបស់ប្រជាពលរដ្ឋទូទៅ។អាជ្ញធរខេត្តកណ្តាលមិនទាន់មានប្រតិកម្មតបត ដូចដែលអ្នកកាសែតទាំងពីបានលើកឡើងតាមរយៈ CamboJA នៅឡើយ។
បើគិតចាប់តាំងពីខែមករា ដល់ដើមខែកញ្ញា ឆ្នាំ ២០២១នេះ CamboJA ឲ្យដឹងថាមានករណីបៀតបៀនមកលើអ្នកសារព័ត៌មានចំនួន៣៨ករណី ដែលកើតមានលើអ្នកសារព័ត៌មានចំនួន៥៦នាក់ (ក្នុងនោះមានស្ត្រីចំនួន៤នាក់) ដែលភាគច្រើនជាករណីចាប់ឃុំខ្លួន និងការប្រើអំពើហិង្សា។
សមាគម CambodJA ស្នើសុំឲ្យមន្ត្រីថ្នាក់លើនៃក្រសួងជំនាញរបស់សមត្ថកិច្ច រួមមានក្រសួងមហាផ្ទៃជាដើម ណែនាំទៅដល់មន្ត្រីនៅតាមមូលដ្ឋានរបស់ខ្លួន ដើម្បីឲ្យពួកគាត់បានយល់ដឹងអំពីតួនាទីភារកិច្ចរបស់អ្នកសារព័ត៌មាន គោលការណ៍សិទ្ធិ និងសេរីភាពរបស់អ្នកសារព័ត៌មាន ព្រមទាំងទទូចឲ្យសមត្ថកិច្ចក្រសួងមហាផ្ទៃស្រាវជ្រាវរកសមត្ថកិច្ច ដែលបានរារាំង និងបង្ករូបភាពគំរាមកំហែង បំភិតបំភ័យអ្នកសារព័ត៌មាន យកមកអប់រំណែនាំឲ្យពួកគេឈប់ប្រពឹត្តសកម្មភាពខុសច្បាប់ទាំងអស់នោះទៀត៕
